আল-জবুর ৭
হজরত দাউদর মিজমর। সুর ‘শিগ্গাইয়ন’। বিন-ইয়ামিন খান্দানর সর্দার কুশে তানরে গালি দেওয়ায় মাবুদর দরবারো তান ফরিয়াদ।
1 ওগো আমার মাবুদ এলাহি
তুমার ছায়াত আশ্রয় লইছি,
খরে অইয়া খেদাইরা যারা আমারে,
তারার আত থাকি বাচাও মোরে।
2 নাইলে সিংহর লাখান টুকরা টুকরা করবো মোরে,
ফারিয়া-চিরিয়া মারবো তো বাচানিত কেউ না আইলে।
3 ওগো আমার মাবুদ এলাহি, যুদি করিয়া থাকি কুনু খারাপি,
আমার আতো রয় যুদি কুনু নাফরমানি,
4 মোর বিরুধি নায় তেবুও যুদি খেতি করিয়া থাকি,
—বরং বিনা কারনে যে দুশমন অইছে তারও উপকার করছি—
5 তে দুশমনে আমারে ধরিলাউক খেদাইয়া,
মাটিত ফালাইয়া পাওদি পাড়াইয়া,
ধুলাত মিশাইলাউক আমার কায়া।
(ছেলা)
6 মাবুদ গো, তুমার মহা গুছায় আমার পক্ষে উবাও,
যারা মোরে ইংসায় অতা দুশমনর বিপক্ষে খাড়া অও,
ও আমার আল্লা, তুমার হক বিচার জারি করিলাও।
7 তুমার চাইরো গালাত জমা অউক দুনিয়ার হকল জাতি,
আরশো বইয়া দেখো তারার হকল কু-কির্তি।
8 মাবুদ অতা হকল জাতির বিচারক তো তুমি,
রায় দিও দেখিয়া মোর পরেজগারি আর হক-হালালি।
9 নাফরমানর জুলুম বন্দ করিলাউক্কা,
পরেজগাররে মজবুত বানাও ও হক আল্লা,
দিল-মনর ভিতর তুমি যাচাই করো হকলতা।
10 আল্লা পাক মোর রক্ষাকারি, জান বাচাইন আমার,
তাইনউ বাচানেআলা সরল মনর বন্দার।
11 আল্লা পাকে করইন হক বিচার,
নাফরমানর উপরে গুছা করইন বরাবর,
12 মানষে তৌবা না করিলে তান তলোয়ার ধারাইবা,
তীর-ধনুক লইয়া তাইন ধনুকো তীর লাগাইবা।
13 জানে মারার আতিয়ার তাইন জুইত করছইন,
তান তীর অকলরে তাইন আগুইনদি হাজাইছইন।
14 নাফরমানে বদ কামরে পেটর ভিতরে রাখে,
বদ কামে পেট ভরি গেলে জনম দেয় মিছারে।
15 মাটি খুড়িয়া কুপ খুদে হে গইন করিয়া,
তার বানাইল অউ কুপো নিজে যায় পড়িয়া।
16 তার নাফরমানি তো তার মাথাত ফিরিয়া আয়,
তার জুলুম আইয়া নিজর তালুত পড়ি যায়।
17 মাবুদর হক বিচারর লাগি শুকুর-গুজার করমু তান,
রাব্বুল আলামিনর নামে আমি করমু গুনগান॥