আল-জবুর ১৭
হজরত দাউদর দোয়া
1 ও মাবুদ, তুমি হক ফরিয়াদ হুনো,
আমার মিনতির বায় খিয়াল করো,
আমার দোয়া কবুল করো গো তুমি,
আমার মুখো নায় কুনু ছল-চতুরি।
2 আমার হক ইনছাফ তুমার আরশ থাকি আউক,
তুমার পবিত্র চউখে হক-হালালির বায় চাউক।
3 তুমি আমার দিলর খবর লইলে,
রাইতর বালাও যাচাই করলে,
হুনারর লাখান তুকাইলেও খাদ পাইতায় নায়,
নিয়ত করছি মুখদি তো গুনার কাম করতাম নায়।
4 মানষে যেলা করে বদ কাম আমি ইলা করি না,
জালিমর পথ হরাইয়া থই তুমার পাক বুলি হুনিয়া।
5 আমার পাওরে শক্ত করছি তুমার পথো রইতো,
লড়ছে না মোর পাও দুখান এক চুল পরিমানও।
6 আল্লা তুমি হুনবায় করিউ তুমারে ডাকিয়ার,
কান পাতিয়া হুনো বন্ধু ফরিয়াদ আমার।
7 কত আচানক দেখি আমি তুমার দয়া-মায়া,
অউ মিনতি করো কবুল ওগো দয়াল আল্লা,
বাচার লাগি তুমার গেছে আশ্রয় লয় যারা,
দুশমন থাকি বাচাও তারে তুমার ডাইন আত দিয়া।
8 চখুর মনি যেলা নিরাপদ অলা রাখো আমারে,
আমারে লুকাও তুমার ডাখনার তলে।
9 মারার লাগি যেগুইন আইয়া বেরিলিছইন মোরে,
অলা জালিম-বজ্জাত থাকি বাচাও আমারে।
10 তারার অসাড় দিলর দুয়ার তালা মারি রাখে,
তারার জবান ভরা খালি বেটাগিরির মাতে।
11 খরে খরে আইয়া তারা বেরিলিছে মোরে,
মাটিত ফালাই মারতো করি কড়া নজর রাখে।
12 শিকারি সিংহয় যেলা খাপ ধরিয়া রয় বনো,
তারা অলা লুকাই বইছে আমার জান নিতো।
13 আও গো মাবুদ, জালিমরে আটকাইয়া মাটিত হুতাইলাও,
তুমার কুদরতি তলোয়ার দিয়া আমারে বাচাও।
14 তুমার আতে বাচাও মাবুদ অতা মানুষ থাকি,
দুনিয়াখুরর কবজা থাকি জান বাচাও তুমি।
তারার মনর আশা খালি অউ জগতর উপরে,
তারার পেট ভরাও তুমার লান্নতি গজবে।
অতা খাইয়া তারার আওলাদে পেট ভরিলাউক,
অতার হুরুতার লাগি বাকি অংশ বেশ করি থইয়া যাউক।
15 অইলে আমি যানু নি-অপরাধি রই তুমার দরবারো,
হজাগ অইয়া স্বাদ মিটাইয়া রইমু তুমার দিদারো॥