আল-জবুর ১৮
এবাদত-বন্দেগি পরিচালকর লাগি: মাবুদর বন্দা হজরত দাউদর মিজমর।
মাবুদে যেবলা বাদশা তালুত আর বাদ-বাকি হকল দুশমনর আত থাকি দাউদরে হেফাজত করলা, অউ সময় দাউদে মাবুদর নামে অউ মিজমর গাইলা।
1 ও মাবুদ, আমার বল-শক্তি, আমি তুমারউ আশিক।
2 আল্লাউ আমার নিরাপদ মিনার, আমার জান বাচানির মালিক,
আমার মাবুদ, আমার পাহাড়, তান ছায়াত আশ্রয় লইছি।
যুদ্ধর ময়দানো তাইনউ আমার ঢাল, জান বাচানির বল-তাক্কত, আমার আশ্রয় মোকাম।
3 গুনগান পাওয়ার লাখ মাবুদর নাম লইমু,
তেউ দুশমনর আত থাকি আমি জানে বাচিমু।
4 মরনর দড়িয়ে পেচাই লিছিল আমারে,
সর্বনাশা ফুতর পানিত ডুবাই লিছিল মোরে,
5 পাতালর দড়ি দিয়া অইছিল মোরে বান্দা,
আমার লাগি অইছিল কয়বরর গাত খুদা।
6 অলাখান বিপদো পড়িয়া মাবুদরে ডাকিলাম,
জুরে জুরে তান সাইয্য আমি মাংগিলাম,
তাইন নিজর আরশ থাকি হুনলা আমার ডাক,
তান দরবারো আজিলো আমার ফরিয়াদ।
7 আস্তা দুনিয়া কাপিয়া থর-থরানি ধরলো,
পাহাড়-টিল্লার ভিত অকল লড়া-চড়া করলো,
গুছার আগুইনে তান ইতায় তো কাপিলো।
8 নাকেদি বার অইলো তান গুছার গরম ধুমা,
মুখ থাকি আইলো তান আগুনির লুক্কা,
আরো তো বার অইয়া আইলো জালাইল আংরা।
9 আছমানরে লামাইয়া তাইন তলে লামিয়া আইলা,
তান কদমর তলে আছিল ঘনো কালা মেঘর চাকা।
10 তাইন কারুবীর উপরে চড়িয়া উড়াল দিলা,
বাতাসর ডাখনাত ভর দিয়া উড়িয়া আইলা।
11 তাইন আন্দাইরর ভিতরে নিজরে আওড় করিল্লা,
ঘনো মেঘর চাকায় তান পবিত্র তাম্বু গুরিল্লা।
12 নুরর জিলকিয়ে তান আন্দাইর মেঘ হরি গেলো,
মেঘর হিল আর জালাইল আংরা জমিনো পড়লো।
13 মাবুদে আছমান থাকি গর্জিয়া উঠিলা,
আল্লাতালায় তান গলার আওয়াজ হুনাইলা।
14 তান ধনুকর তীর মারিয়া দুশমনরে ছিতরাইল্লা,
মেঘর জিলকানিয়ে তারারে বেফানা বানাইলা।
15 তুমার ধমকে আর নাকর শ্বাসে, মাবুদ গো,
দরিয়ার মুরর পানির ফুত অকল দেখা দিলো,
জগতর মুল ভিত অকলও উদলা অইগেলো।
16 উপরে থাকি আত বাড়াইয়া তাইন মোরে ধরলা,
গইন পানি থনে আমারে টানিয়া তুললা।
17 বাচাইলা আমারে তাইন পয়লোয়ান দুশমন থাকি,
বাচাইলা দুশমন-রিপু অকলর কবজা থাকি,
যেতার বল-তাক্কত তো আমার থাকিও বউত বেশি।
18 আমার মছিবতর দিনোও তারা মোরে মারাত আইলা,
অইলে মাবুদ আল্লা তো আমার সহায় অইলা।
19 খুলা ময়দানো তাইন আমারে বার করি আনলা,
আমার উপরে খুশ অওয়ায় আমারে বাচাইলা।
20 মাবুদে দিলা আমার পরেজগারির বদলা,
আমার আতর নেক কামর বখশিশ তাইন দিলা।
21 মাবুদর পথেউ চলছি আমি, করছি না নাফরমানি,
ইলা কাম করছি না যেতায় হরায় আল্লার দিদার থাকি।
22 তান তামাম হক-ফয়ছালা আমার চখুর আয়না,
আমি তো তান হুকুমর কুনু খেলাফ করছি না।
23 তান নজরো আমি নিখুত রইছি হর-হামেশা,
গুনা-নাফরমানি থাকি নিজরে রাখছি হরাইয়া।
24 এরদায় মাবুদে আমার পরেজগারির দিছইন পুরুস্কার,
আমার নেক কাম দেখিয়া তাইন করছইন অউ বিচার।
25 দয়া-মায়া কররারে তুমিও দয়া-মায়া করো,
খাটি বন্দার লগে তুমিও খাটি রও।
26 নির্ভেজালির বায় তুমিও নির্ভেজাল,
আর কমিনরে দেখাও তুমার পেচর ফান্দ।
27 নরম দিলর মানষরে তুমিউ বাচাও,
অইলে বড়াই-গরিমা দেখাওরারে তলেদি লামাও।
28 খালি তুমি আল্লায় ফর করো আমার মুশালরে,
আমার মাবুদে উজিলা করইন আমার আন্দাইররে।
29 তুমারে লগে লইয়া দুশমনর সিপাই দলরে আরাইমু,
আমার মাবুদর লগে উচা দেওয়ালও ফালদি পার অইমু।
30 তাইনউ আল্লা, তান পথ তো নিখুত,
মাবুদর জবান অক্ষয়।
তান গেছে যত জনে আশ্রয় লইন,
তাইনউ তারার জান বাচানির আতিয়ার অইন।
31 খালি আল্লা ছাড়া আর দুছরা কুনু মাবুদ আছে নি?
আমরার আল্লা বাদে দুছরা কুনু আশ্রয় পাহাড় মিলে নি?
32 আল্লায়উ আমার কমরো বল-শক্তি বান্দিয়া দিছইন,
তাইন তো আমার চলার পথ নিখুত করছইন।
33 তাইন আমার পাওরে দিছইন অরিনর লাখান হেকমত,
তাইন আমারে টিকাই রাখইন পাহাড়িয়া কঠিন টিল্লাত।
34 তাইনউ আমার আতরে লাড়াই করার কলা-কৌশল হিকাইন,
এরলাগি আমার আতে পিতলর তীর-ধনুকরেও বেকা করিলায়।
35 তুমি আমারে জান বাচানির আতিয়ার দান করছো,
তুমার ডাইন আতদি আমারে ধরিয়া রাখছো,
তুমার দেওয়া নরম মনে আমি অইছি বড়।
36 তুমি আমার চলার পথরে করছো সুজা,
এরলাগি আমার পাও তো পিছলিছে না।
37 আমার দুশমন দলর খরে দৌড়াইয়া ইতারে ধরছি,
অতার সর্বনাশ না করিয়া আমি ফিরত না আইছি।
38 চুরমার করছি তারারে, উবাইতো আর পারতো নায়,
পিষিছি তারারে আমার পাওর তলায়।
39 যুদ্ধর লাগি তুমিউ আমার কমরো বল-শক্তি বান্দিয়া দিছো,
আমার বিরুধি সিপাইরে আমার পাওত ফালাইছো।
40 তুমি আমার দুশমন দলরে বাগাইছো ছামন থাকি,
আমারে যেতায় ইংসাইন আমি তারার বিনাশ করছি।
41 বাচার লাগি তারা চিল্লাইছিল, বাচানিত কেউ আইছিল না,
মাবুদর গেছে সাইয্য চাইছিল, তাইনও ইতা হুনলা না।
42 আমি ইতারে মারিয়া ধুইল-বালুর লাখান বাতাসো উড়াইলাম,
পথর বাদা-ছাদার লাখান ইতারে হরাইয়া ফালাইলাম।
43 ও মাবুদ, মানষর গন্ডগোল থাকি তুমিউ বাচাইছো আমারে,
আমারে চালকদার বানাইছো হকল জাতির উপরে,
অখন আমার খেজমত করের অচিনা জাতিয়ে।
44 আমার নাম হুনলেউ তারা আইওইন আমার তলে,
ভিন-দেশি অকলে আমার গেছে মিনত-কাজ্জি করে।
45 হউ ভিন-দেশি অকল নিরাশ অইয়া যায়,
তারা বাংকার থাকি বার অইয়া কাপি কাপি আয়।
46 মাবুদ তো জিন্দা! আমার আশ্রয় পাহাড়র তারিফ অউক!
আমারে বাচাওরা আল্লার ইজ্জত-তাজিম বাড়উক!
47 জাতি অকলরে যেইন আমার অধিনে আনইন,
তাইনউ আল্লা, আমার পক্ষ লইয়া তারারে বদলা দেইন।
48 দুশমনর আত থাকি যেইন আমারে বাচাইন,
তুমিউ আল্লা, বিপক্ষ অকলর উপরে তুমিউ আমারে তুলছো,
ইংসা-গন্ডগোল কররার আত থাকি তুমি আমারে বাচাইছো।
49 এরলাগি ও মাবুদ,
হক্কল জাতির গেছে আমি তুমার তারিফ করমু,
হামেশা তুমার পাক নামর গুনগান গাইমু।
50 মাবুদে তান বাদশারে বউত বার মহা জয়ী করছইন,
তান খেলাফতি পাওয়া বাদশা দাউদ আর তান খান্দানরে
হর-হামেশা দয়া-মায়াত রাখছইন॥