আল-জবুর ২৪
হজরত দাউদর মিজমর।
1 ই জগত আর জগতর হক্কলতাউ মাবুদর,
দুনিয়া আর দুনিয়ার বাসিন্দা অকল তো তান।
2 তাইন দরিয়ার পানির উপরে দুনিয়ার ভিত বওয়াল করলা,
গাং-খালর উপরে ইয়ান খুটি বওয়াইলা।
3 কে গিয়া মাবুদর পাহাড়র উপরে উঠিতো,
তান পাক-পবিত্র মোকামো কুন জন খাড়া রইবো?
4 হউ জনউ তো, যার আত নি-অপরাধি, যার দিল পাক-ছাফ;
হে জগতর মায়া জালো বন্দি নায়,
আর ঠগাঠগির নিয়তে কছম খায় না।
5 হে-উ পাইবো আল্লার তরফ থাকি রহম-বরকত,
তার জান বাচাওরা মালিকর গেছ থাকি বে-কছুর খালাছ পাইবো।
6 এরাউ অইলা তান আশিক বন্দার দল,
তুমার দিদার পাইতো চায়, ও ইয়াকুবর আল্লা।
(ছেলা)
7 ও গেইট অকল, মাথা উচা করো,
উচা অইযাও, ও চিরস্থায়ী দুয়ার অকল,
জালাল-শানর বাদশায় তশরিফ আনিলাউক্কা।
8 অউ জালাল-শানর বাদশা কে?
বলবান আর পয়লোয়ান মাবুদ,
লাড়াই-যুদ্ধত পয়লোয়ান মাবুদ।
9 ও গেইট অকল, মাথা উচা করো,
উচা অও, ও চিরস্থায়ী দুয়ার অকল,
জালাল-শানর বাদশায় তশরিফ আনিলাউক্কা।
10 জালাল-শানর অউ বাদশা কে?
সিপাই দল অকলর কামান্ডার মাবুদ,
তাইনউ জালাল-শানর বাদশা।
(ছেলা)॥