আল-জবুর ২৫
হজরত দাউদর মিজমর।
1 ও মাবুদ, আমার জানরে তুমার দরবারো দিলাইছি সপিয়া,
2 খালি তুমার উপরেউ ভরসা করি, ওগো আমার আল্লা।
শরমিন্দা করিও না মোরে দুশমনর ছামনে,
বাহাদুরি না করউক তারা আমার উপরে।
3 তুমার উপরে করে যারা আশা-ভরসা,
তারার মাজর কুনু জন অইতো নায় তো শরমিন্দা,
শরম পাইবো তারা, খামোখা বেইমানি করে যারা।
4 ও আল্লা, তুমার পথ অকল আমারে চিনাও,
তুমার সঠিক রাস্তা আমারে দেখাও।
5 তুমার হকে আমারে চালাও আর হিকাও,
আমার জান বাচানির মালিক তো তুমিউ,
হর-হামেশা তুমার উপরে আশা রাখি।
6 ওগো মাবুদ, ইয়াদ করো তুমার দয়া-মায়া,
শুরু থাকি তো এবো করাত আছো অতা।
7 আমার জুয়ান কালর গুনা-নাফরমানি না রাখিও মনো,
ও গো মাবুদ, তুমার দয়া-মায়ায় মোরে ইয়াদ করো,
তুমার অটল মেহেরবানির খাতিরে তুমি অলা করো।
8 মাবুদ তো দয়ালু, অতি হক তাইন,
এরলাগি গুনাগাররেও তান পথ চিনাইন।
9 হক পথে চালাইন তাইন নরম দিলর মানষরে,
তান পথ দেখাই দেইন তারা হকলরে।
10 তান ওয়াদা-চুক্তি হুকুম-আহকাম মানিয়া চলে যারা,
তারার লাগি তান পথ অকল হক আর দয়ায় ভরা।
11 বউত বদ কাম নাফরমানি করিলিছি আমি,
তুমার নামর দোহাই গো মাবুদ, দিলাও মোরে মাফি।
12 মাবুদরে হাছাউ ডরাইয়া চলের অলা আদম কে?
কুন পথ বাছিয়া নিতো, মাবুদেউ দেখাইন তারে।
13 সুখ-শান্তি আরামে কাটাইন তারার জিন্দেগানি,
তারার আওলাদেও পাইবা দেশর মিরাসদারি।
14 মাবুদর ডর-খফে যারা জিন্দেগি কাটাইন,
তারারেউ তান দিলর গোপন কথা জানাইন,
তান ওয়াদা-চুক্তির বেয়াপার তারারে হিকাইন।
15 আমার চউখে হর-হামেশা মাবুদর বায় চাই রইছে,
শিকারির জাল থাকি তাইন বাচাইন আমার পাওরে।
16 রহম করো তুমি মোরে, আমার বায়দি চাইয়া,
আমি অইলাম দুখি-কাংগাল, আছি বড় একলা।
17 আমার দিলর দুখ-যন্ত্রনা দিলাও হরাইয়া,
হক্কল বালা-মছিবত থাকি রাখো বাচাইয়া।
18 দেখো মোর দুখ-মছিবত বেহালত দশা,
মাফ করিয়া দিলাও মোর জিন্দেগির গুনা।
19 দেখরায় নি কতো দুশমন লাগছে আমার খরে,
তারা চরম ইংসা-ঘিন্না করের আমারে।
20 ফানা দেও আমারে, বাচাও আমার জান খান,
আশ্রয় লইছি তুমার গেছে, রাখো আমার মান-সম্মান।
21 হক-হালালি সরলতা করউক আমারে রক্ষা,
আমি তো তুমারউ উপরে করছি ভরসা।
22 ও গো আল্লা, খালাছ করো বনি ইছরাইলরে,
তারার হকল মছিবত থাকি বাচাও তারারে॥