আল-জবুর ২৬
হজরত দাউদর মিজমর।
1 আমি যেন নির্দুষি মাবুদ, তুমি তা করো গো জাইর,
আমি তো হক পথেউ চলিয়ার,
মাবুদর উপরেউ ভরসা করিয়ার,
বদলাইতাম নায় নিয়ত আমার।
2 মাবুদ গো, আমারে আজমাইয়া দেখো,
আমার দিল পরিক্ষা করিয়া যাচাই করো।
3 তুমার দয়া-মায়া তো আমার চখুর ছামনে,
আমি চলি তুমার দেখাইল হক পথে।
4 মিছা মাতরার আড্ডাত আমি বই না,
বেইমান-মুনাফিকর ধারো কাছে যাই না।
5 খবিছ-নাফরমানর সং থাকি হরিয়া রই,
বজ্জাত অকলর আড্ডাত আমি না বই।
6 খালাছর রায় পাইয়া গো মাবুদ, আত ধইছি আমি,
তুমার ঘর তওয়াফ করিয়া আদায় করি কুরবানি।
7 জুরে জুরে তুমার শুকরিয়া জানাইরাম,
তুমার হক্কল কেরামতির কথা কইরাম।
8 মাবুদ, তুমার বসত ঘর আমি ভালবাসি,
যে জাগাত তুমার গৌরব-মহিমার বসতি।
9 গুনাগারর লগে আমার জান না নিও,
খুনি অকলর লগে আমার মরন না দিও।
10 তারার আতো আছে খালি নাফরমানি,
ডাইন আত ভরা তারার ঘুষর টেকাদি।
11 আমি তো চলি হক-হালাল পথে,
দয়া-মায়া করিয়া খালাছ করো মোরে।
12 হমান জাগাত মজবুত আছে আমার দুইও পাও,
মাবুদর তারিফ করমু আমি মহা মজলিছো॥