আল-জবুর ২৮
হজরত দাউদর মিজমর।
1 ও মাবুদ আমার আশ্রয় পাহাড়, তুমারে ডাকিয়ার,
আমার লাগি বন্দ করিও না দুইও কান তুমার,
নিরাই রইলে তুমি আমার লাগিয়া,
রসাতলো যাওরার লাখান অইবো মোর দশা।
2 আমি যেবলা তুমার গেছে জুরে জুরে কান্দি,
তুমার খাছ পাক জাগার বায় দুইও আত তুলি,
অউ সময় হুনিও গো দয়াল আমার মিনতি।
3 নাফরমান বদখুরর লগে করি নিও না মোরে টানিয়া,
তারা মুখে মুখে দেখায় ভালা দিলো খারাপি রাখিয়া।
4 তারার কাম মাফিক ফল তারারে দেও,
তারার খারাপ কামর ফল তারারে দেও,
তারার আতর বদ কামর বদলাই তারারে দেও,
তারার পাওনা সঠিক সাজা তারারে দিলাও।
5 মাবুদর কাম-কাজ তারার দিলো জাগা না পায়,
তান আতর কামর বায় তারার কুনু খিয়াল নায়,
এরলাগি মাবুদে ইতারে করিলিবা চুরমার,
বাদে কুনু দিনউ ইতারে গড়িতা নায় আর।
6 হকল তারিফ-গুনগান খালি মাবুদর,
তাইনউ তো হুনছইন মিনতি মোর!
7 মাবুদ আমার বল-শক্তি, জান বাচানির আতিয়ার,
তান উপরে ভরসা করে দিল-জান আমার,
তান সাইয্য পাইয়া হারি খুশিয়ে ভরছে মোর দিল,
আমার গলায় শুকরিয়া জানাই করি তান জিকির।
8 মাবুদউ তো বল-শক্তি তান আপন প্রজার,
তান খেলাফতি পাওয়া জনর জান বাচানির বাংকার।
9 তুমার আপন প্রজারে তুমি বাচাও গো,
তারা তুমার ধন-দৌলত, রহম-বরকত দেও,
তুমি তো তারার রাখাল, চিরকাল বইয়া নেও॥