আল-জবুর ২৯
হজরত দাউদর মিজমর।
1 ও ফিরিস্তা অকল, জানাও মাবুদর গুনগান,
গৌরব আর বল-শক্তির কথা জানাও তান,
2 মাবুদর নামে তান পাওনা গৌরব জানাও,
পবিত্রতার হাজে হাজিয়া সইজদাত পড়ি যাও।
3 মাবুদর গলার আওয়াজ দরিয়ার উপরে জারি আছে,
বড়াই-শানর আল্লার গর্জন বাজ পড়ার লাখান ডাকে,
আল্লার হুংকার জারি আছে গইন দরিয়ার উপরে।
4 মাবুদর গলার আওয়াজ বউত বলবান,
তান গলার আওয়াজ অতি মহান।
5 মাবুদর গলার সুরে দেবদারু গাছ ভাংগিযায়,
লেবাননর দেবদারু গাছও ভাংগিয়া পড়িযায়।
6 তান সুরে বাছুরর লাখান নাচে লেবানন,
জংলি বয়রার বাইচ্চার লাখান ফালায় সিরিয়ন।
7 তান গলার আওয়াজ হুনিয়া,
আছমান উঠে জিলকাইয়া।
8 মাবুদর গলার সুরে মরুভুমি কাপিয়া উঠে,
কাদেশ দেশর মরুভুমি কাপাইন মাবুদে।
9 এলন গাছও আলিযায় মাবুদর আওয়াজ হুনিয়া,
জংলার পাতা-ছাতা পড়ি যায় ছিড়িয়া,
কাবা ঘরর হকলে কয়, ছুবহানাল্লা!
10 মহা বইন্যার পানি আছিল মাবুদর জিম্মায়,
চিরকালিন বাদশা তাইন, বইছইন আরশ খানায়।
11 বল-শক্তি দেইন মাবুদ তান আপন প্রজারে,
শান্তি দিয়া রহম করইন তারা হকলরে॥