আল-জবুর ৩৪
হজরত দাউদর মিজমর, রাজা আবিমালিকর ছামনে যেবলা পাগল বেশ ধরছলা আর তানে খেদাই দিলা, তাইনও গেলাগি, অউ সময়কুর মিজমর।
א আলেফ
1 হর-হামেশা আমি মাবুদর তারিফ করমু,
তান গুনগান হামেশা রইবো মোর মুখো।
ב বেথ
2 আমার জানে বড়াই করে মাবুদরে লইয়া,
দুখি জনে করউক ফুর্তি ইতা হুনিয়া।
ג গিমেল
3 আমার লগে মাবুদর গুনগান করো,
আও হক্কলে একলগে তান নামে তারিফ করি।
ד দালেথ
4 আমি মাবুদরে ডাকিছি, তাইন জুয়াপ দিছইন,
সব ডর-খফ থাকি তাইন আমারে রক্ষা করছইন।
ה হে
5 তান বায় চাও, তুমরা নুরানি অইযিবায়,
তুমরার মুখ শরম পাইতো নায়।
ז জাইন
6 ই কাংগালর ডাক মাবুদে হুনছইন,
সব মছিবত থাকি তাইন বাচাইছইন।
ח হেথ
7 মাবুদর আশিকর চাইরোবায়
হেফাজত করইন তান ফিরিস্তায়,
দিয়া এরার জান বাচায়।
ט টেথ
8 যাচাই করিয়া দেখো মাবুদ কতো মেহেরবান,
বড় কপালি হউ জন যে আশ্রয় লয় ছায়াত তান।
י ইয়োধ
9 ও মাবুদর পাক বন্দা অকল, তানরে ডরাও,
তারার কুনুতার অভাব নাই যারা ডরায়।
כ কাফ
10 বলআলা সিংহর পাল খানির অভাবে উপাস,
মাবুদর আশিক অকলর ভালাইর কুনু অভাব নাই।
ל লামেধ
11 ওরে পুয়া-পুড়িন আও, আমার কথা হুনো,
তুমরারে মাবুদর ডর-খফর কথা হিকাইমু।
מ মেম, נ নুন, ס সামেখ
12 জিন্দেগিত সুখ চায় কুন জনে,
সুদিন দেখার আশা করে কে?
13 তে হে বাদ কথা থাকি জিফরারে
সামলাউক ছল-চতুরি থাকি ঠোটরে,
14 বাদ কাম থাকি ফিরিয়া ভালা কাম করউক,
শান্তির আশিক অইয়া এর খরে খরে রউক।
ע আইন
15 মাবুদর নজর তো পরেজগারর উপরে,
তারার দোয়া হুনার লাগি তান কান খাড়া থাকে।
פ পে
16 বাদ কাম কররার উপর মাবুদর বদ নজর,
দুনিয়া থাকি ফুছিলিবা নাম-নিশানা তারার।
צ সাধে
17 দীনদারে ফরিয়াদ করলে হুনইন মাবুদে,
বালা-মছিবত থাকি রক্ষা করইন তারারে।
ק কোফ
18 মন যারার ভাংগি গেছে মাবুদ রইন তারার লগে লগে,
দিল যারার চুরমার অইছে মাবুদেউ বাচাইন তারারে।
ר রেশ
19 হক পথে যে চলে তার বউত মছিবত,
ইতা থাকি মাবুদেউ তারে করইন হেফাজত।
ש শিন
20 নিরাপদ রাখইন তাইন তার সব আড্ডিরে,
ভাংগা অইতো নায় তো ইতা কুনুটারে।
ת তাউ
21 খারাপ কামর দায় অয় নাফরমানর মরন দশা,
পরেজগাররে ইংসায় যারা, সাজা পাইবো তারা।
22 মাবুদে উদ্ধার করইন তান গুলাম অকলরে,
তান আশ্রয় লয় যারা, সাজা দেইন না ইতা কেউররে॥