আল-জবুর ৩৩
1 মাবুদর নামে গজল গাও ওরে দীনদার বন্দা,
নিখুত মুমিনর কাম অইলোগি শুকুর-গুজার করা।
2 দুতারার তালে তালে শুকরিয়া জানাও তান,
দশ তারর বীনা বাজাইয়া করো তান গুনগান।
3 মাবুদর নামে নয়া নয়া গীত বড় গলায় গাও,
নিখুত আতে তান নিয়তে বাজনা বাজাও।
4 মাবুদর কালাম তো হক চিরকাল,
তান হকল কাম হামেশা হক-হালাল।
5 পরেজগারি আর হক-ইনছাফ মাবুদে পাইন ভালা,
আস্তা জগত ভরা আছে তান দয়া-মায়া।
6 আছমান তিয়ার অইছে মাবুদর অউ কালামে,
এর মাজর সবতাউ অইছে তান মুখর ফুয়ে।
7 দরিয়ার হকল পানিরে কলসিত রাখইন তাইন,
পাতালর পানিরেও তাইন ভান্ডারো জমাইন।
8 আস্তা দুনিয়ায় মাবুদরে ডরাউক,
দুনিয়ার বাসিন্দা অকল তান ডরে কাপউক,
9 তান কথায় তো হক্কলতার অইছে পয়দা,
তান হুকুমর লগে লগে বওয়াল অইছে হকলতা।
10 জাতি অকলর পরিকল্পনা মাবুদে করইন বেকামা,
বিনাশ করইন তাইন তারার চিন্তা-ভাবনা।
11 মাবুদরউ পরিকল্পনা চিরকাল টিকিয়া থাকে,
তান মনর চিন্তা-ভাবনা যুগ যুগ ধরি বওয়াল থাকে।
12 সুখি হউ জাতি, আল্লা যার আপন মাবুদ,
তাইন যারে পছন্দ করছইন কইয়া আপন দৌলত।
13 আছমান থাকি মাবুদে চাইয়া দেখইন,
হক্কল আদম সন্তানর উপরে তাইন চউখ রাখইন।
14 ই দুনিয়াত যেইন-তাইন বসত করইন,
আরশ থাকি তারার বায় খিয়াল রাখইন,
15 পরতেক জনর দিল তো তাইন গড়িছইন,
যেগিয়ে যেতা করে ইতা বুজিতা পারইন।
16 বড় সিপাই দল থাকলেও রাজার রক্ষা নাই,
মহাশক্তি দিয়াও কুনু বীর যুদ্ধায় পায় না রেহাই,
17 জয়র লাগি ঘোড়ার উপরে ভরসা করা বেকামা,
ঘোড়ার শক্তি যতউ থাকউক বাচাইতো পারে না।
18 মাবুদরে যারা ডরায়, থাকে তান দয়া-মায়ার আশায়,
তাইন খিয়াল রাখইন তারার বায়,
19 মরন থাকি তারার জীবন রক্ষা করইন তাইন,
বড় বড় নিদান কালো তারারে বাচাইন।
20 মাবুদর অপেক্ষাত আছি তো আমরা,
তাইনউ জান বাচানির মালিক, আমরার ভরসা।
21 তানরে লইয়াউ আমরার দিলর ফুর্তি,
তান পাক নামর উপরে ভরসা করি।
22 ওগো মাবুদ, তুমার মায়া-দয়া রউক আমরার উপরে,
আমরার আশা-ভরসা তুমারউ উপরে॥