আল-জবুর ৩২
হজরত দাউদর মাস্কীল-কাওয়ালি।
1 নেক-কপালি কয় তারারে,
মাফ করা অইছে যারার নাফরমানিরে,
মাবুদ মউলায় যেরার গুনারে
আমল-নামার হিসাবো ধরতা নায়রে।
2 হউ জনও নেক-কপালি,
আল্লায় যার গুনারে কাটি দিছইন খাতা থাকি,
যার মাজে নাই কুনু ধুকাবাজি।
3 তৌবা করছলাম না যেবলা আমার গুনার লাগি,
হারা দিন কুকাই কুকাই ক্ষয় অইছিল মোর আড্ডি-গুড্ডি।
4 তুমার আতে জাতিয়া ধরছিল দিন-রাইত আমারে,
কমি গেছিল মোর কায়ার শক্তি চৈত-মাইয়া গরমে।
(ছেলা)
5 আমি যেবলা তৌবা করলাম তুমার দরবারে,
অপরাধ স্বীকার করলাম লুকাইলাম না কুনুতারে,
কইলাম আমি যেবলা স্বীকার করমু অপরাধরে,
লগে লগেউ মাফি দিলায় তুমি আমার সব সাজারে।
(ছেলা)
6 তে মছিবতর কালো পরতেক পরেজগারে
দোয়া করউক তুমারউ দরবারে,
মহা বইন্যা অইলেও পাইতো নায় তো তারারে।
7 মোর লুকানির বাংকার তুমি
বাচাইছো মোরে মছিবত থাকি,
আমি উদ্ধার পাওয়ায় বেরিয়া রাখছো তুমি
মোর চাইরোবায় খুশির কাওয়ালি।
(ছেলা)
8 আমি আল্লায় তালিম দিমু, তুমারে চলার পথ দেখাইমু,
আমি তো চউখদি নজর রাখমু, আখল-বুদ্ধি তুমারে দিমু,
9 গাধা কিবা ঘোড়ার লাখান অবুজ অইও না,
ইতারে সামলাইতে অয় দড়ি-লাগাম দিয়া,
না দিলে মানতো নায় ইতা তুমার কুনু কথা।
10 নাফরমানর লাগি বউত জালা-যন্ত্রনা আছে,
মাবুদর উপরে ভরসা করলে দয়া-মায়ায় বেরিয়া রাখে।
11 মাবুদর নামে আনন্দ-উল্লাস করো সব পরেজগার,
জুর গলায় গাও গজল-গীত নিখুত দিল যার॥