আল-জবুর ৩৬
এবাদত-বন্দেগি পরিচালকর লাগি: মাবুদর বন্দা হজরত দাউদর মিজমর।
1 নাফরমানর খারাপির বেয়াপারে,
মাবুদর কালাম পাইছে আমার দিলে,
তারার চখুত আল্লার ডর-খফ নাইরে।
2 তারা নিজর চউখে দেখে নিজর বাহাদুরি,
নিজরে ঘিন্নায় না অপরাধ কাম করি।
3 ছল-চতুরি খারাপিয়ে ভরা তারার মুখর কথা,
আখল খাটাই চলা, নেক কাম থাকি রয় হরিয়া।
4 বিছনাত হুতিয়া তারা কু-কামর ধান্দা করে,
বদ কাম না ছাড়িয়া মন্দ পথে চলে।
5 ওগো মাবুদ তুমার দয়া-মায়ায় আছমান ছইলাইছে,
তুমার হক-হালালি মেঘর কালনিত লাগি গেছে।
6 পাহাড়-পর্বতর লাখান উচা পরেজগারি তুমার,
গইন দরিয়ার লাখান তুমার হক বিচার,
মাবুদেউ বাচাও তো সব মানুষ আর জানুয়ার।
7 ওগো আল্লা তুমার মায়া-মমতা মহা মুইল্যবান,
আদম জাতিয়ে আশ্রয় পায় তুমার ডাখনার ছায়াত।
8 তুমার ঘরর ধন-ছামানায় তারার পেট ভরি যায়,
তুমার অমৃত পানিয়ে তারার তিরাশ মিটায়।
9 তুমার মাজে আছে জিন্দেগি-পানির ইন্দারা,
তুমার নুরেউ তো দেখি নুর আমরা।
10 তুমারে যারা চিনে তারারে তুমি বিলাই দেও তুমার দয়া-মায়া,
সরল দিলর মানষে পায় তুমার মায়া-মমতা।
11 অহংকারি জনে যানু পাও না বাড়ায় আমার বায়,
নাফরমানর আতে যানু আমারে না খেদায়।
12 দেখরায় নি নাফরমানি যেতায় করছে ইতা তো লেটি গেছে,
উঠিতো পারের না তারা, ফালাই দিছইন ইতারে॥