আল-জবুর ৩৭
হজরত দাউদর মিজমর।
א আলেফ
1 নাফরমানর উন্নতি দেখিয়া মন খারাপ করিও না,
তারার ভালাই দেখিয়া হারি করিও না ইংসা।
2 তারা তো ঘাসর লাখান জলদি হুকাই যিবো,
বন্দর পাতা-ছাতার লাখান ইতার বেহালত অইবো।
ב বেথ
3 মাবুদর উপরে ভরসা করি নেক কাম করো,
হক-হালাল রইয়া হারি বসত করো দেশো।
4 খুশি-বাসি করো তুমি মাবুদরে লইয়া,
তাইনউ তুমার মনর আশা পুরন করিবা।
ג গিমেল
5 তুমার জিন্দেগির হকল ভার মাবুদর আতো ছাড়ো,
তাইনউ চালাইবা হকলতা, নিচ্চিত ভরসা রাখো।
6 তাইন তুমার পরেজগারিরে করবা উজিলা,
তুমার নির্দুষিতা জাইর করবা দুইফরর লাখান চকচকা।
ד দালেথ
7 মাবুদর ছামনে নিরাই রইয়া তান লাগি বার চাইও,
ফন্দিবাজর উন্নতি দেখিয়া বেজার না অইও।
ה হে
8 গুছারে দমন করিয়া থামাও মিজাজ দেখানি,
বেজার অইও না তুমি, খারাপিউ ইতার ফল খালি।
9 মাবুদর ভরসা কররায় দেশর মৌরসি-মালিক বনিবো,
নাফরমান অকলর তো নিচ্চিত সর্বনাশ অইবো।
ו বাউ
10 থুড়া দিন বাদেউ নাফরমান অইবো নিপাত,
তুকাইলেও মিলতো নায় আর তারার জাগাত।
11 নরম দিলর মানষে পাইবা দেশর মালিকানা,
সায়-শান্তিয়ে রইয়া তারা জিন্দেগি কাটাইবা।
ז জাইন
12 নাফরমানে ছল-চতুরি করে পরেজগারর বিপক্ষে,
দুশমনি করিয়া তারা দাত কিড়িমিড়ি করে।
13 তারার হালত দেখিয়া হারি মাবুদে তো আসইন,
নাফরমানর দিন শেষ ইতা তাইন দেখইন।
ח হেথ
14 দুখি-কাংগালরে পাওদি উড়িয়া খুনর খিয়ালে,
নাফরমানে তলোয়ার খুলিয়া তীর-ধনুক হাজাই রাখে।
15 অউ তলোয়ার তারার নিজর কলিজাতউ হামাইবো,
তারার তীর-ধনুকও ভাংগিয়া হারি বেকামা অইবো।
ט টেথ
16 নাফরমানর বেশি ধন-দৌলত থাকিয়া,
পরেজগারর থুড়া ধনউ বউত ভালা।
17 নাফরমানর আত তো যাইবোগি ভাংগিয়া,
পরেজগাররে বাচাইন নিচ্চয় মাবুদে ধরিয়া।
י ইয়োধ
18 মাবুদে দেখইন দীনদারর জিন্দেগির হালত,
চিরকাল জারি রইবো তারার মৌরসি দৌলত।
19 মছিবতর দিনো তারা অইতো নায় শরমিন্দা,
আকাল-নিদানর কালো তারা পেট ভরা খানি পাইবা।
כ কাফ
20 নাম-নিশানা মিটিযিবো যারা নাফরমান,
মাবুদর দুশমন হুকাই যিবো আওরি ফুলর লাখান,
দেখবায় তারার হক্কলতা ফুড়াই যিবো,
ধুমার লাখান ইতা বাতাসো মিশিবো।
ל লামেধ
21 নাফরমানে করজো নিয়া ফিরত না দিলায়,
পরেজগারে দান বিলায় মায়া-মমতায়।
22 মাবুদর রহমতি জন যারা দেশর মালিক অইবো তারা,
তান লান্নতি জনর তো মিটিযিবো নাম-নিশানা।
מ মেম
23 যারার চাল-চলন দেখিয়া মাবুদ অইন খুশি,
তাইনউ মজবুত করইন তারার চলার গতি।
24 স্বয়ং মাবুদে তারার আতো ধরিয়া রাখায়,
উষ্টা খাইলেও তারা পড়িয়া রইতো নায়।
נ নুন
25 আমি আগে জুয়ান আছলাম অখন বুড়া অইছি,
পরেজগাররে ছাড়িয়া যাইতে আমি না দেখছি,
তারার আওলাদরেও কুনুদিন ভিক করাত না পাইছি।
26 দয়া-মায়া করে মানষরে রিন দেয় হামেশা,
তারার আওলাদেও তো রহম-বরকত পাইবা।
ס সামেখ
27 বদ কাম ছাড়ো নেক কাম করো,
তেউ তুমি চিরকাল বসত করবায় অনো।
28 মাবুদে তো ভালা পাইন হক ইনছাফ,
তাইন নিজর আশিকানরে করইন না তো ত্যাগ।
ע আইন
নাফরমানর বিনাশ অইবো চিরকালর লাগি,
তারার বংশ-বুনিয়াদ মিটিযিবো দুনিয়া থাকি।
29 দেশর মালিকানা পাইবা পরেজগারে,
চিরকাল রইবা তারা অউ জাগার মাজে।
פ পে
30 পরেজগারর মুখদি বার অয় গিয়ানর বুলি,
হক বিচারর মাত বার অয় তারার জিফরাদি।
31 আল্লার হুকুম গাথা আছে তারার দিলো,
পিছলিতো নায় তারার পাও মজবুত রইবো।
צ সাধে
32 নাফরমানে উত পাতিয়া রয় পরেজগারর বায়,
এনরে খুনর আশায় হে সুযোগ তুকায়।
33 মাবুদে তানরে ছাড়তা নায় নাফরমানর আতো,
তান সাজা অইতে দিতা নায় আদালতর বিচারো।
ק কোফ
34 মাবুদর লাগি বার চাও, তান দেখাইল পথে চলো,
তাইন তুমরারে করবা বড়, দেশর দখল পাইবায়,
নাফরমান দলর বিনাশ নিজর চউখে দেখবায়।
ר রেশ
35 পাষান নাফরমানরে দেখলাম বউত বড় ইজ্জতি,
তরতাজা গাছর লাখান ডাল-পালা তার চাইরোবায়দি।
36 হিরবার গেলাম আমি তারে আর পাইলাম না,
তুকাইলাম বউত আমি খুজ-খবর মিললো না।
ש শিন
37 নি-অপরাধির বায় চাও দেখো হক মানষর বায়,
টিকিয়া রয় তার আওলাদ সায়-শান্তি যে ভালা পায়।
38 হক্কল খারাপ মানষর অইবো সর্বনাশ
নাফরমানর বংশ-বুনিয়াদ অইবো বিনাশ।
ת তাউ
39 পরেজগারর নাজাত আয় মাবুদর গেছ থাকি,
তারার মছিবতর কালো তাইন রইন বাংকার বনি।
40 মাবুদে সাইয্য করিয়া নিস্তার দেইন তারারে,
তান আশ্রয় লওয়ায় নাফরমানর কবজা থাকি জানে বাচাইন এরারে॥