Fobitro Injil Shorif 23 nombor sifara
Foyla Hannan
Forisiti
Alla Pakor hukume Hozrot Isa al-Mosir sahabi Hozrot Hannane (ra:) siṭir aḳare ou sohifa leḳsoin. Hozrot Isae dunia taki behesto toshrif neoar onuman 50–60 bosor bade ikan leḳa oise.
Tan leḳa ou sohifar maze, Alla Pakor mayar bonda oḳlor befare boyani ase. Zogotor manshor aolad oḳol zelaḳan tarar ma-bafor laḳan oin, oula Allar mayar bonda oḳol-o tan laḳan oin. Hozrot Isa al-Mosir ufre iman ania zera aḳeri zindegi failise, tarar zindegir maze nanan nomunae Allai gunagun deḳa zae. Tara Allar hukum-ahkam mania sole, ar gunar ḳam taki horia roy. Alla Pakor bae tarar mohobbot ase ar oinnainno imandar oḳolre-o mohobbot ḳore.
Ou sifarar 3 ruku 16 ayato ase, “Al-Mosie amrar lagi tan nizor zan bilai disla, oḳan taki-u amra buzchi, mohobbot ḳare ḳoy. Oḳon amrar bair lagi-o amrar zan bilai deoa zorur.”
Ermaze ase,
(1) Hozrot Isa-u Allar deoa zindegi kalam 1:1-4 ayat
(2) Guna saṛia Allar nure ar mohobbote solo 1:5—2:17
(3) Kane-Dorjal taki shabdan 2:18-27; 4:1-6
(4) Allar nuror aolad bonia nekir ashik o 2:28—3:10
(5) Alla nize-u mohobbot, te mohobbote solo 3:11-24; 4:7-21
(6) Isa-u Allar ḳas mayar zon mania joyi o 5 ruku
1
Hozrot Isa-u Allar deoa zindegi kalam
1 Hoḳol foyla taki-u zein asla, zanre nizor souke deḳsi, zan mukor aoaz amra hunchi, kub kial ḳori azmaia saisi ar nizor ate dora-soa ḳorsi, hou zindegi kalamor boyani leḳram. 2 Ou zindegi to i duniat zair oisla, amrar nizor souke i zindegire deḳsi, dekia hari tan befare shakki diram. Behesti baf Alla Pakor gese zein asla ar amrar maze zair oisla, aḳeri ou zindeganir ḳota-u tumrare zanairam. 3 Ou ze zonre amra deḳsi, zan mukor buli hunchi, tan befare-u tumrare ḳoiram. Zate ota hunar bade amrar loge tumrar-o ḳatir-dusti oy. Amrar ou ḳatir oilogi, gaibi baf Alla Pak ar tan ḳas mayar zon Ibnulla Isa al-Mosir loge. 4 Te amra ita leḳram, zate amra ar tumrar kushi-bashi fura oy.
Guna saṛia Allar nure ar mohobbote solo
5 Amra al-Mosir muk taki ita hunia hari, oḳon tumrare-o zanairam, Alla Pak to nur. Tan maze andarir kunu siṭa-fuṭa-o nai. 6 Ar amra andarir maze solia zudi koi, Alla Pak ar amrar maze ḳatir-dusti ase, te to amra misa matram, shoṭik kam ḳorram na. 7 Oile Alla Pak zela nuror maze boshot ḳoroin, oula amra-o zudi nuror fore soli, te amra eḳe-oinne ḳatir-dusti ase, ar tan ḳas mayar zon Isa Ibnullar fobitro loue amrar tamam guna-ḳosuri fak-saf ḳore. 8 Oḳon amra zudi koi, amra muṭe-u gunagar nae, te amra nize nizore ṭogiar, ete forman oy amrar maze Allai hokikoti nai. 9 Amra zudi zarzir gunar shikarukti dilai, te tan afon hok-halali ar fak-forezgarir gune, loge loge gunar mafi dilain, tamam naformani taki amrare fak-saf ḳorilain. 10 Oḳon amra zudi koi, amra kunu guna ḳorsi na, te amra tanre-u misa matra banailam, ete forman mile, amrar dilor maze tan kalam nai.