Fobitro Injil Shorif 24 nombor sifara
dusra Hannan
Forisiti
Alla Pakor hukume siṭir aḳare ou sohifa leḳsoin, Hozrot Isa al-Mosir sahabi Hozrot Hannan (ra:). Hozrot Isae dunia taki toshrif neoar onuman 50–60 bosor bade ou sohifa leḳa oise. Ikan oilo tan leḳa dusra siṭi. Ita leḳar ḳalo al-Mosir bad-baki hoḳol sahabir mout oigesil, ḳali tain zinda asla, erlagi tan forisoe oigese, ‘hou murobbi’ name.
I sohifar maze Begom Saebani ḳoia zen gese leḳsoin, ein ashole kunu manush nae, hou zomanar eḳ zomat. Begomor aolad bolte, zomator shodoishsho. Ar Begomor boin, leḳokor elaḳar zomat. Tain mumin bai oḳolor gese minoti ḳorra, eḳe-oinne maea-mohobbot ḳorar lagi. Ar bonḍo moulana oḳolor talim taki hushiar oar lagi ḳoira. Itae ḳoita, Hozrot Isa roḳto-mangshor kunu manush nae, tain ḳali ruh, erlagi roḳto-mangshor shorile amra zekunu nafak kam ḳortam fari, itae kunu oshubida nae, ḳali ruh oilo dami. I sohifar 7 aeato ase, “Zetae ḳoin, manush surote Hozrot Isa al-Mosi duniat aisoin na, ila mat zegie mate he oilo hou dukabaz ar Ḳane-Dorjal.”
Ermaze ase,
(1) Salam zanani 1:1–3 aeat
(2) Hoke ar mohobbote solo1:4–11
(3) Bidaei salam 1:12–13
1
Salam zanani
Ami hou murobbie ita leḳram, Allar fosondor hou Begom Saebani ar tan aolad oḳolor gese. Allai hokor ḳatire ami zarare mohobbot ḳori, ḳali ami nae, aro zoto manshe Allai hok zanchoin tara hoḳole zare mohobbot ḳoroin, ou tumrar gese leḳram. Ou hok to oḳon amrar bitre boshot ḳore ar hor-hamesha amrar loge roibo.
Hoḳ ar mohobbotor ḳatire, gaibi baf Alla Pak ar ou bafor ḳas maear zon Ibnulla, einu Isa al-Mosi, erar torof taki rohomot, meherbani ar shanti amrar loge roibo.
Hoke ar mohobbote solo
Gaibi bafe zela hukum disoin, hou hukum mafik afnar ḳoezon fua-fuṛin Allai hokor fote soler dekia ami kub kushi oisi. O maear Saebani, afnar gese amar eḳṭa onurud ase, amra zanu forteḳe eḳe-oinnore mohobbot ḳori. Ar ou ze onurud ami ḳoriar, iṭa to noea kunu hukum nae, borong mulo takiu amra ou hukum faislam. Allar hukum mafik solau oilo mohobbot. Tumra foela taki ze hukumor ḳota hunia airae, olaḳan mohobbotor fote solo.
Duniat oḳon bout laḳan dukabaz baroisoin. Zetae ḳoin, manush surote Hozrot Isa al-Mosi duniat aisoin na, ila mat zera mate era oilo hou dukabaz ar Ḳane-Dorjal. Te tumra hushiar roio, zate tumrar menotor fol na araia shullo-ana furushkar ḳamaitae faro.
Zeta manshe al-Mosir deoa talimor shima faroi zain, tan talimor bitre roin na, tarar dilor bitre Alla nai. Oile ze manush tan talimor ufre tir roe, tar dilor maze gaibi baf ar tan ḳas maear zon Ibnulla, i duiozonu asoin. 10 Kunu ustad tumrar gese aile he zudi ou laḳan talim na dey, te tare salam ḳorio na, ar tumrar baṛit ashroeo dio na. 11 Tare zegie salam ḳorbo, he to ogur bod ḳamor bagi oibo.
Bidaei salam
12 Tumrar gese to amar aro bout ḳota leḳar asil, oile ḳagoz-ḳolome hoḳolta leḳtam sairam na. Borong amar kial oilo, ami nize aia tumrar loge boia samna-samni gof ḳormu, teu hoḳolor bitoror kushi miṭbo.
13 Afnar ze boinre Allae fosond ḳorsoin, tan aolad oḳole afnare salam zanaira. Amin.