Fobitro Injil Shorif 25 nombor sifara
Tisra Hannan
Forisiti
Alla Pakor hukume Hozrot Isa al-Mosir sahabi Hozrot Hannane (ra:) siṭir aḳare ou sohifa leḳsoin. Leḳar ḳalo tan nam na ḳoia ḳali ‘hou murobbi’ koia forisoy disoin. Hozrot Isae dunia taki behesto toshrif neoar onuman 50–60 bosor bade ikan leḳa oise. Ikan oilo tan leḳa tin nombor siṭi, asta Injil Shorifor maze hoḳol taki huru sifara.
I sohifaḳan Gous namor eḳzon mumin bair gese leḳsoin, ou baie kub memandari korta, tain eḳzon fakka imandar asla. Ar Ditrif name ek kobis beṭa asil, he netagiri koria Isayi zomatre doḳol ḳorto saise, leḳoḳe tar birudde hushiari disoin.
Ou sifarar 11 ayato ase, “Ze manshe nek kam ḳore he oilo Allar bonda, ar zegie bod ḳam ḳore, he to Allar doroshon faise na.”
Ermaze ase,
(1) Hozrot Gousre salam ar tarif 1:1-8 ayat
(2) Bonḍo Ditrifor netagiri ar Dimitri bair shunam 1:9-12
(3) Bidayi salam 1:13-15
1
Hozrot Gousre salam ar tarif
1 Allai hokor ḳatire ami zare mohobbot ḳori, amar mayar dust Gousor gese, ami hou murobbie ita leḳram.
2 O mayar dust, ami dua ḳoriar tumar hokkolta zanu shoṭik babe sole, aro saiar tumar dil zela bala tumar shoril-gotor-o zanu ola bala taḳe. 3 Tumar oḳan taki koyzon mumin bai aia ḳoila, Allai hokor befare tumi bule mozbut aso, ikan hunia ami kub kushi oisi. 4 Amar aolad oḳol Allai hokor fote solra hunia kushi lager, ikan taki boṛo ar kunu kushir ḳobor oy ni?
5 O mayar dust, tumar osina hou musafir baiainre zela kezmot ḳorso, ita to ḳaṭi muminor ḳam. 6 Tumar maya-mohobbotor ḳota tara zomator huru-boṛo hoḳlor samne ḳoise. Oḳon Allar kushi mafik tarare sohi-salamote faṭanir bebosta ḳori deo, te aro bala oibo. 7 Tara ḳali al-Mosir tobligo bar oisoin, torikar baira manshor ges taki kunu shaijjo loisoin na. 8 Erlagi ou laḳan manshore shaijjo ḳora zorur, zate hok kamo amra-o shorik taki.
Bonḍo Ditrifor netagiri ar Dimitri bair shunam
9 Ami age zomator gese ekkan siṭi leḳslam, oile ḳobis Ditrife zomator netagiri korto sae, erlagi he amrar ḳota hune na. 10 Oḳon he zeta ḳorer, ami aia hari ita hoḳolre zanaimu. He amrare ingsha ḳoria bout misa bodnam roṭaise. Ḳali ikan nae, mumin kunu baire he maner na, ar oinno zera manto sae, tarare-o bada der, emonki zomat taki bar ḳori der.
11 O mayar dust, tumi bod ḳamor ḳoredi na douṛaia borong nek kam ḳoro. Ze manshe nek kam ḳore he oilo Allar bonda, ar zegie bod ḳam ḳore, he to Allar doroshon faise na. 12 Zano ni, hoḳole-u Dimitri bair shunam gaira, emonki shoyong Allar hoke-o en tarif ḳorra. Amra-o en tarif ḳorram, ar tumi to zano amrar mukor ḳota hasa.
Bidayi salam
13 Baire, tumar gese leḳar boutta asil, oile ḳolome-ḳalie hoḳolta leḳram na. 14 Asha ase, kub zoldi tumar loge deḳa-shakkat oibo, ou shomoy mukamuki hoḳolta gof ḳormu. 15 Tumar dust oḳole-o tumare salam zanaisoin. Amrar hoḳol bondu-bandobre salam zanaio. Assalamu alaikum.