1 Ami Ehuda to sahabi Iakubor bai ar Hozrot Isa al-Mosir gulam. Amrar gaibi baf Alla Pake zerare mohobbot ḳoroin, zera Allai daot faisoin, ar Isa al-Mosie zerar hefazot ḳoroin, ou sohifaḳan ami erar gese leḳram. 2 Tumrar ufre besh ḳori meherbani, shanti ar mohobbot zari rouk.

3 O mayar dust oḳol, amra hoḳole mili ze nazator bagi oisi, ou nazator befare ami kub kiali oia tumrar gese leḳtam saisi. Ermaze buzlam, aro dorḳar ase imanor lagi laṛair befare lekia tumrare utshaho deoa. Allae tan pak bonda oḳolre siroḳalor lagi ze imani don disoin, ou Isayi imanor fokke dile-zane laṛai kora to zorur. 4 Itar zorur oise, ḳaron zeta manshe be-dini kamor shaza faibar ḳota ag taki-u leḳa asil, tole tole ota manush aia tumrar dolo hamai gese. Amrar Allar rohomotre tarar bod ḳaish miṭanir atiar banaise, ar amrar eḳmatro Malik Isa al-Mosir ulṭa sole.

5 Te ou befar to tumra kub bala ḳori-u zano, ta-o ami kali oḳan mono ḳorai diram, Mishor desh taki Boni Israilre azad ḳoria anar bade, tarar mazor zetae iman anchil na, malike tarare binash ḳorsla. 6 Ar zeta firista oḳole nizor day-dayitto adae na ḳoria, nizor ashon taki hori gesla, Allae tarare siroḳal dori shikoldi bandia goin andair goro raḳsoin Hashoror dinor lagi. 7 Ou laḳan Hozrot Lut nobir zomanar Sadum, Amura ar ḳanda-ḳasar hoḳol ṭaunor manshe otar laḳan zina ḳorsil, ḳali zina nae, tara kub ḳobisi zina ḳorae siroḳal dori duzoḳo zolbo, ita oilo eḳṭa nishana.

8 Erbade-o ou bonḍo ustad oḳol, zetae baze kuab deki deki talim dein, tara ḳobisi kam ḳoroin, kunuzat shashon manoin na, ar batuni shordar oḳlor bodnam gain. 9 Emonki asmanor shordar firista Mikaile zebla Hozrot Musar lash loia Iblisor loge torka-torki korsla, ou shomoy tain Iblis-Shoytanor bodnam gaia dushi shaibosto ḳorar shaosh ḳorla na, borong koila, “Malike zanu tumare bond ḳoroin.” 10 Oile ou bonḍo ustad oḳole zeta buze na otar bodnam gae, ar zongli zanuaror laḳan nizor aḳole nizor shorbonash goṭae. 11 Ita to lannoti! Iguin Baba Adomor lannoti fut Kabilor laḳan bonchoin. Duniabi labor ashae tara hou bonḍo nobi Balamor ḳaishor ato nizore shofi dise. Ar Musa nobir bae bigṛi zaora hou neta Kurahor laḳan tarar binash ase.

12 Te ou lannoti ota aia zebla be-shoromor laḳan tumrar mezbani kae, ou shomoy ita oizain tumrar ḳanir talor moyla. Tara ḳali nizor shartor danda ḳore. Tara oila asmano uṛra huda megor kuṭi, ba bagano duibar mora-hukna fol gas, zegie fol na dorae, zoṛe-foṛe huria tulia falail oise. 13 Ar tara oila tufanor ḳalor doriar ḍeur laḳan, doriar ḍeue zela fenare bashaia tule, tarar bod ḳamor shorom-o ola bashia uṭe. Tara oila sairobae sokkor deora terar laḳan, itar hesh dosha oilo hor-hameshakur lagi zoma raḳa goin andair.

14 Baba Adomor ḳandanor shat nombor zon Hozrot Idrise-o ota manshor befare ḳoia gesoin, “Huno, manshor bisar ḳorar lagi, Malik Moulae tan azar azar fobitro firista loia aira. 15 Zetae be-dini kam ḳorsoin ar tan birudde lannoti mat matisoin, oḳon ou be-din gunagar oḳlor faona hishabe tain itare furafur dushi shaibosto ḳorat aira.” 16 Itae to hamesha-u na-sobri koroin, nizor ḳofalre dushoin ar tarar bod ḳaishor boshe soloin. Tarar hoḳol mato nizor boṛai-beṭagiri deḳain, sharto hasilor lagi manshor bozona ḳoroin.

17 Oile O mayar dust oḳol, ami tumrare ḳoiram, amrar Malik Isa al-Mosir sahabi oḳole age zeta bataisoin, ita mono rakio. 18 Era tumrare ou hushiari dita na ni, “Aḳeri zomanat forezgarre ṭaṭṭa-moshkora ḳorra eḳzat manush aiba, aia tarar be-dini bod ḳaish mafik solba.” 19 Duniabi babor ita manshe ḳali doladoli lagain, tarar bitre Allai Pak Ruhu nai.

20 Ta-o mayar baiain, tumrar ou nikut fak-fobitro imanor ufre bor ḳoria nizore goṛia tulat ro, ar Pak Ruhe kamil oia munazat ḳorat ro. 21 Allar mohobbotor maze nizore bandia raḳo, ar aḳeri zindegi faibar ashae amrar Malik Isa al-Mosir meherbanir lagi bar sao. 22 Tumrar maze zerar imane loṛa-soṛa ḳore, tarare doya ḳoro. 23 Aguin taki tulia ania manshor zan basao. Ar gunar bod ḳaishor zalae zetar zindegi borbad oigese, itar finnor nafak kafoṛ ḳanre-o ginna ḳoro, ar nizore hefazote rakia tarare doya ḳoro.

24 Ar ze Allae tumrare usṭa ḳaoa taki basain, zein nikut halote tumrare kushi-bashie tan shan-tozollir samne azir ḳorta faroin, 25 hou eḳmatro Alla zein amrar zan basain, tan zalal-shan, mohima, kudroti bol-shokti, ar raz-ḳemota amrar Malik Isa al-Mosir usillae zair ouk, hokkol zugor ag taki oḳon forzonto ar zuge zuge hor-hamesha-u ola ouk. Amin.