Fobitro Tourat Shorif dusra sifara
Hizrot
Forisiti
Ou sifara oilo hizrot sifara, Hozrot Musar (a:) ufre nazil oa Fobitro Tourat Shorifor dui nombor sifara. Alla Pakor ḳas kudroti bole leḳa ou sifarar maze Alla Rabbul Alamine tan foeda ḳora ashraful moḳluḳator (shristir shera zat) gese nizor forisoe zair ḳorsoin. Tan nizor munsha-morzi, tan kial-kushi, kun ḳam ḳorle tain kushi ar kun ḳame tain bezar oin, ar tan bonda oḳolre tain ḳoto maea ḳoroin, naforman oḳolre touba ḳorar ḳoto beshi shuzug dein, ou sifarar maze ita zana zae.
Hozrot Isa al-Mosir zonmor onuman 1400 bosor age ou sifara leḳa oe.
I sifarar maze Allar nobi Hozrot Musar (a:) itihash ase. Tan zonom oilo kila, tain kila huru taki boṛo oila, ḳemne deshantori oila, bia-shadi ḳorla, ar kun halote Alla Mabudor didar-doroshon faila ota zana zae.
Musar (a:) zomanar 400 bosor age, Mishoror bashsha eḳ Feraune Hozrot Iusufre (a:) kub maea ḳorta, Iusufor baba Hozrot Iakubor (a:) bongshodor Boni Israilreo kub maea ḳorta. Mishori oḳole erare Boni Israil na ḳoia, Ibrani ḳoia ḍakita. Ibrani shobdor mani oilo, rifuzi ba boitol. Iusuf (a:) mara zaoar bade, aroḳ Feraun Mishoror bashsha oia Boni Israilor ufre kub zur-zulum ḳoria tarare gulam banailo, oile Allae Hozrot Musare (a:) bezila Boni Israilre azad ḳorar lagi, ar tain tarare Feraunor gulami taki azad ḳorla.
Alla Pake Hozrot Musar (a:) gese Boni Israil zati ar tamam Adom zatir lagi Allai shoriotor siroḳalin doshṭa hukum zanaila. Ou hukum hokkol nobi, rosul, fegambore manchoin. Er kunu rod-bodol nai.
Ou sifarat deḳa zae, Allae Hozrot Musare hukum dila, Allar lagi tain eḳan fobitro gor banaita, ou goror nokshao Allae tanre deḳaila. Ou goror bitre asil fobitro herem shorif, manshe i gorre fobitro milon-tambu ḳoia ḍakita. Ikan oilo hou amolor kaba shorif, asta duniar hoḳol muminor kibla. Oile Boni Israil zati ou shomoe musafiror laḳan zagae zagae gia roita, erlagi ou ebadot ḳanare tarar loge ḳori boia nita. Hozrot Musar (a:) hukum mafik Boni Israile ou gor banaila.
Ermaze ase:
(1) Allae Boni Israilre azad ḳorla 1:1–15:21 aeat
(2) Morubumit Boni Israilor sofor 15:22–18:27 aeat
(3) Mabudor loge tan bondar milonor usilla 19–24 ruku
(4) Allar fobitro gor bananir hukum 25–31 ruku
(5) Allar birudde Boni Israilor naformani 32–34 ruku
(6) Allar fobitro gor banani 35–40 ruku
Allae Boni Israilre azad ḳorla (1:1–15:21)
1
Boni Israilor ufre zulum
1 Allae Hozrot Iakubor noea nam disla Israil, erlagi tan bongshor nam oilo Boni Israil. Iakube tan bibi-baichcha ar foribaror hoḳolre loia Mishor desho gelagi. Ou shomoe tan loge oia zera gela, erar nam oilo, 2 Ruben, Shimion, Lebi, Ehuda, 3 Isaḳor, Shobulon, Bin-Iamin, 4 Dan, Noftali, Sadu ar Ashir. 5 Iakubor bongshor hoḳoltae milia shottoir zon asla. Ar Iusuf ag taki-u Mishoro taḳta. 6 Bade Iusuf, tan baiain, ar hi amolor hoḳol mara gela. 7 Oile tarar bador bongshodor baṛia kub bolala oila. Era sairobae sitria asta Mishor desh borigela.
8 Ermaze Mishoro eḳzon noea bashsha oila, ein Iusufre sinoin na. 9 Ein nizor proza oḳolre ḳoila, “Saia deḳo, Boni Israil oḳol amra taki beshio ar bolalao. 10 Te ao, amra eḳ fondi ḳori, ita zenu ar na baṛoin. Arnae tara baṛia heshe zuddor ḳalo amrar dushmonor loge milia amrar birudde zuddo ḳorbo, bade amrar desh taki zaibogi.”
11 Teu tara shordar lagaila erare maria-doria zur-zulum ḳoria ḳam ḳoranir lagi. Era Feraunor foshol raḳar lagi Pitum ar Ramashesh namor duiṭa ṭauno banaila. 12 Oile erar ufre zoto beshi zur-zulum ḳora oilo, erao oto beshi baṛila ar sitrila. Erlagi Mishori oḳole Boni Israilre kub ḍoraigela. 13 Ḍoraia eraredi aro ḳoṭin ḳam ḳoraila. 14 Maṭi ḳam, iṭor ḳam ar ketor maze ḳosṭor ḳam ḳoraia erar zanre titta banaililo. Ar tara zur-zulum ḳoria nisṭur-pashanor laḳan ḳam ḳoraito.
15 Bade Mishoror bashshae Shifra ar Fua namor duizon Ibrani dai beṭire hukum dila, 16 “Tumra Ibrani beṭintor dai girit gia, itar fuain foeda oile-u marilaio, ḳali fuṛintore zita rakio.” 17 Oile hi dai beṭinte Allare ḍoraita gotike, Mishori bashshar hukum na mania fuaintoreo zita raḳto. 18 Teu bashshae erare nia zikaila, “Ita ḳam ḳene ḳorlae? Fuaintore ḳene zita raḳlae?”
19 Tara zuaf dila, “Ibrani beṭin Mishori beṭintor laḳan nae, tara bout bolala. Dai tarar ḳasat zaibar age-u tarar hurutta foeda oizae.” 20-21 Ou duio beṭie Allare ḍoraita ḳori, Allae rohomot ḳoria tarareo aolad dila. Ar Boni Israilo aro beshi ḳori baṛia kub shoktiman oila. 22 Ita dekia Feraune nizor proza oḳolre hukum dila, “Ibrani oḳolor kunu fuain oile-u tumra Nil nodo falai dio, ḳali fuṛintore zita rakio.”