1 Ermaze Lebi kandanor eḳzon manshe, tan nizor ḳandanor ek koinare shadi korla. 2 Ou ḳoinar goro eḳ fuar zonom oilo. Fuagu deḳte kub shundor oae, tin mash dori lukai raḳla. 3 Heshe ar lukaita na faria, tain nol-ḳagṛar eḳ ṭukri loila. Ou ṭukrit maṭia tel ar alḳatra lefia ogur bitre huruttare haraia, gangor soror nol bonor maze toia aila. 4 Ar er kita dosha oy deḳar lagi, tar boin duroi ubailo.

5 Tuṛa bade Feraunor fuṛi gango naoat aila. Gangor faro tan bandi oḳol guragurit asil. Tain soror nol-ḳagṛar maze ou ṭukri dekia, tan bandire ḳoila, “Ou ṭukrigu an.” 6 Ṭukrir ḍala kulia deḳla, er bitre eḳ fuae ḳander. Dekia tan maya lagigelo. Tain ḳoila, “Ish, igu to kunu Ibranir fua.”

7 Ou shomoy fuar boin aia Feraunor fuṛire zikailo, “Rani ma, i huruttare dud ḳaoanir lagi kunu Ibrani beṭire faile afnar gese antam ni?” 8 Feraunor fuṛie ḳoila, “Za angi.” Teu fuṛie gia fuar maʼre loia ailo. 9 Feraunor fuṛie tanre ḳoila, “Ogo, ami tumar beton dimune, tumi amar oia ou fuagure bukur dud ḳaoao.” Ou hi beṭie nia huruttare dud ḳaoaia falila. 10 Fuagu kisu boṛo oar bade tain nia Feraunor fuṛir gese dilaila. Feraunor fuṛie enre nizor fua banaia falila. Tain ḳoila, “Ami tare fani taki ṭania tulchi.” Erlagi tar nam raḳla Musa [mani, ṭania tula].

11 Heshe Musa boṛo oigele eḳdin tan nizor zatir baiaintor gese gia deḳla, tara kub ḳoshṭor ḳam ḳorra. Ermaze deḳla, tan nizor Ibrani zatir eḳ beṭare, eḳ Mishorie mair-doir ḳorer. 12 Dekia sairobae saia ar kunu manush na deḳae, tain hou Mishorire kun ḳoria balur tole gaṛilla. 13 Bador dino tain hirbar bare gela. Gia deḳla, duizon Ibranie nize nize maramari korer. Ou tain dushi zonre ḳoila, “Oba, tumar baire ḳene marrae?” 14 He ḳoilo, “Tumare ḳegie amrar hakim banaia bisar ḳorat faṭailo? Ḳail zela hou Mishorire kun ḳorso, oula amare-o kun ḳoriltae sairae ni?” Ou Musae ḍoraigela. Tain buzla ita to zana-zani oigese.

15 Ar Feraune-o ita hunia Musare marilta saila. Ou shomoy Musa Feraunor ges taki bagi gela. Bagia Madian desho boshot ḳorar lagi aila. Aia honor ek kuar ḳasat boila. 16 Madian desho Shuaib namor eḳ imam sab asla. Tan shatzon fuṛin asoin. Ou fuṛinte kuar faro aia, tarar bafor sagol-meṛare fani kaoanir lagi gamla borat lagla. 17 Ou shomoy oinno raḳal oḳole tarare ḳedaia dilailo. Oile Musa ubaia tarare shaijjo ḳorla, ar tarar falre fani kaoaila. 18 Tara tarar bafor daro gia harle tain zikaila, “Tumra aiz oto zoldi kemne ailae?” 19 Tara ḳoila, “Eḳ Mishori beṭae amrare raḳal oḳlor at taki basaisoin. Ein amrar sagol-meṛare fani tulia ḳaoaisoin.” 20 Teu tain zikaila, “I manushgu kuai? Tumra tare toia aillae ḳene? Ere ḍakia ania ḳana ḳaoao.” 21 Erbade Musae ou imamor baṛit roite razi oila. Imam sabe tan fuṛi Sofurare Musar loge shadi dila. 22 Bade Sofurar goro eḳ fua oile Musae ḳoila, “Ami to boitol bonia bidesho roiram.” Erlagi ou fuar nam raḳla Zarsum [mani, boitol].

23 Bout din bade Mishoror bashsha morigela. Boni Israile gulamir lagi kator oia ḳanda-ḳaṭi korlo. Tarar ḳandon Allar gese kobul oigelo. 24 Allae tarar foriad hunla. Tain Ibrahim, Isʼhak ar Iakubor loge tan oadar ḳota iad ḳorla. 25 Ar Boni Israilor bae muk firaila, doyar nozore tarar bae saila.