1 Musa nobie eoḳan ḳoila, “Mabude Batselol, Aholiab ar oinno ḳarigor oḳolre aḳol-buddi dan ḳorla, zate tara fobitro ebadot ḳanar hoḳol ḳam-ḳaz ḳorta faroin. Mabude zela hukum ḳorsoin, ou laḳan tara zanu ebadot ḳanar hoḳolta banain ar hazain.”

2 Ou ḳam ḳoranir lagi Musae Batselol ar Aholiabre anaila. Mabude zeta ustad ḳarigor oḳolre aḳol-hekmot disoin, ar i kam ḳorar lagi zerar dilo ḳaish foyda oise, Musae tarare-o anaila. 3 Tara aia fobitro ebadot ḳana bananir lagi, Boni Israilor deoa lillar hoḳol mal-samana Musar ges taki shomzia nila. Manshe kushi oia nizor ichchae forteḳ din biane aro siz oḳol ania ono lilla dita. 4 Ze ustad ḳarigor oḳol ebadot ḳanar ḳamo asla, tara ita dekia, nizor ḳam toia aia Musare ḳoila, 5 “Mabude zeta zeta bananir hukum disoin, ita bananir lagi manshe dorḳar taki aro beshi mal-samana loia aira.”

6 Teu Musar hukume manshe hoḳol Boni Israilre zanai dila, ebadot ḳana bananir lagi, ḳeu zanu ar kunu mal-samana lilla na dein. Ougi manshe lilla deoa bond ḳorla. 7 Ḳaron ebadot ḳanar ḳamor lagi dorḳar taki aro beshi siz zugaṛ oigesil.

8 Bade ḳam ḳorra ustad oḳole fesail sutar dami suti kafoṛ, lilua, baingoni, ar lal sutadi banail dosh ṭukra ḳafoṛ dia Allar goror forda banaila. Ar ustad oḳole er ufre Karubi oḳlor noksha bain ḳorla. 9 Forteḳ ṭukrain eḳ mafor asil, lambae aṭaish at ar fashe sair at. 10 Bade fasḳan fasḳan ḳori ekḳano zuṛa dia boṛo ḳori dukan gilaf banaila. 11 Ar duio gilafor fashor ek kinaro, lilua sutadi hukor fuṛ deoa oilo. 12 Oula foyla gilafor kinaro fonchashgu hukor fuṛ ar dusra gilafor kinaro fonchashgu hukor fuṛ lagail oilo. I duio hukor fuṛ egu aregur ulṭamuka ḳora oilo. 13 Bade shunadi fonchashgu huk banaia hou hukor fuṛor mazedi haraia, boṛo duio gilafre zuṛa deoa oilo. Teu ekkan gor tiar oilo.

14 Allar goror salor lagi sagolor ruma dia gilafor laḳan egaroḳan ṭukra banail oilo. 15 Ita fortek kan eḳoi mafor asil, tish at lamba ar sair at fash. 16 On taki fas ṭukra eḳloge zuṛa dia boṛo ek gilaf banaila. Ar baki soy ṭukra zuṛa dia, aroḳan boṛo gilaf banaila. 17 Foyla boṛo gilafor fashor ek kinaro fonchashgu hukor fuṛ lagaila, ar dusra gilafo-o oula lagaila. 18 Bade fitol dia fonchashgu huk banaia hou hukor fuṛor mazedi haraia, ou boṛo duio gilaf ekḳano zuṛa dila. Teu i duio gilaf milia ekkan sani oilo. 19 Lal rong kora meṛar samṛadi er ufror sani banail oilo, bade fuʼr samṛadi aroḳan sani toiar ḳoria er ufre guri deoa oilo.

20 Bade babla laḳṛidi koyḳan freim banail oilo. 21 Forteḳ freim asil lambae dosh at ar faṛe deṛ at. 22 Forteḳ freimo dugu ḳori faya lagaia goror hoḳol freim eḳlaḳan banaila. 23 Ou goror dokkin galar lagi bishḳan freim zuit ḳorla. 24 I bisho freimor fayar tole sallishgu rufar sungi lagaila. Forteḳ freimor dui fayar tole dugu sungi lagail oilo. 25 Allar goror uttor galar lagia-o bishḳan freim zuit ḳorla. 26 I forteḳ freimor fayar tole sallishgu rufar sungi lagaila. Eḳo freimor tole dugu ḳori sungi lagail oilo. 27 Ar fosim galar lagi, mani kor galar lagi soyḳan freim banaila. 28 Ar ḳoror duio kunat dukan freim lagaila. 29 I duio kunar freimre ḳasar freimor loge tole-ufre zuṛa deoa oilo. Fortek kunar duio freimre daror freimor loge batti maria zuṛa deoa oilo. 30 Teu aṭḳan freim ar shullogu rufar sungi laglo, eḳo freimor tole duiṭa ḳori sungi dila.

31 Bade freimre zuṛa dibar lagi babla laḳṛidi koygu lamba batti banaila. 32 Goror ek galar lagi fasgu batti, arok galar lagi aro fasgu, ar fasgu batti kor gala, mani fosim galar lagi banaila. 33 Freimor mazḳano lagail ou battidi hoḳol freimor eḳ mata taki aroḳ mata aṭḳai dila. 34 Bade i freim ḳanain shunadi lefila. Ar batti laganir lagi shunar ḳoṛa lagaia, battire-o shunadi lefila.

35 Ou ustad ḳarigor oḳole dami suti kafoṛdi ekkan forda banaila. Fordar ufre lilua, baingoni, lal suta dia Karubi oḳlor sobi bain ḳorla. 36 I forda ṭananir lagi babla laḳṛidi sairṭa kuṭi banaila, banaia ou kuṭintore-o shunadi lefila, kuṭintor matat shunar ḳoṛa lagaila. Kuṭir tolor lagi rufar sairṭa sungi banail oilo.

37 Tambur duaror lagi lilua, baingoni, lal suta ar dami suti kafoṛdi noksha ḳori ekkan forda banaila. 38 I fordar lagi fasṭa ḳoṛa ar fasṭa kuṭi banail oilo. Kuṭir mata ar tol shunadi lefa oilo, kuṭir tolor lagi fitolor fasgu sungi banaila.