1 Batselole babla laḳṛidi fobitro shahadot shonduk banaila. Iṭa aṛai at lamba, deṛ at fash ar deṛ at usa. 2 Er bare-bitore ḳaṭi shunadi lefila, er sairo kinaro shunar noksha lagaila. 3 Aguindi shuna golaia sairṭa shunar ḳoṛa er sairo kunat lagaila, ogalat duiṭa ar hogalat duiṭa lagaila. 4 Babla laḳṛidi dugu benda banaia shunadi lefila. 5 Shonduk boia neoar lagi i duio benda, shondukor dui galar ḳoṛar bitredi haraila.

6 Bade ḳaṭi shunadi shondukor ekkan ḍaḳna banaila, oḳanor ufre gunar kofora adae ḳorar lagi. I ḍaḳna lambae aṛai at, ar fashe deṛ at. 7 Shuna fiṭaia ḍaḳnar duio galat duiṭa Karubi banaila. 8 Duio Karubi shondukor ḍaḳnar dui kinaro roilo. I duio Karubi ḍaḳnar loge ekḳano ḳori banail oilo, i astaṭa ḳali eḳ siz oilo. 9 Karubi deḳte Duldul guṛar laḳan ḍaḳna ala, er duio ḍaḳna ufredi melia deoae, ou ḍaḳnar sayar tole shondukor ḍaḳna hamaigelo. Iṭa mukamuki uba roilo. Ar tarar souk roilo shondukor ḍaḳnar bae.

10 Batselole bade babla laḳṛidi dui at lamba, eḳ at fash ar deṛ at usa ḳori ekkan ṭebul banaila. 11 Banaia harle ḳaṭi shunadi lefia er sairo kinaro noksha lagaila. 12 Ar er sanir sairo kinaro sair angul usa ḳori eḳ haz dila, hazor maze shunadi noksha lagaila. 13 Ṭebulor sairo kunar fayar ufre shunar sairṭa ḳoṛa lagaila. 14 I sairo ḳoṛain ṭebulor kunar hou usa hazor tole lagani oilo, zate ṭebul boia neoar bala ḳoṛar bitre benda harail zae. 15 Ṭebulre boia neoar lagi babla laḳṛidi dugu benda banaia shunadi lefila. 16 Ṭebulor ufror tal-bashon, Allar name shorbot-fanir sodgar zog ar mog, hoḳolta ḳaṭi shunadi goṛaila.

17 Bade ḳaṭi shunadi ekkan serag dani tiar ḳorla. Serag danir tola ar ufror ḍanḍi kaṭi shuna fiṭaia goṛaila. Er ḍanḍi, fulor laḳan fiala, kuṛi ar fafṛi oḳol serag danir loge ekḳano ḳori banaila. 18 Serag danir ḍanḍir dui galat tinṭa ḳori muṭ soyṭa ḍal deoa oilo. 19 Forteḳ ḍalor maze zoba fulor laḳan tingu ḳori fiala tiar ḳora oilo. Serag danir soyo ḍalo eḳlaḳan ḳam ḳora oilo. 20 Serag danir mul ḍanḍir maze-o zoba fulor laḳan sairṭa fiala deoa oilo. 21 Ou mul ḍanḍi taki bar oilo soyṭa ḍalor maze, foyla duio ḍalor zuṛat egu ḳori kuṛi, dusra duio ḍalor zuṛat arok kuṛi, ar heshor duio ḍalor zuṛat-o kuṛi lagail oilo. 22 Kuṛi ar ḍal hoḳolta serag dani taki bar oilo, hoḳolta milia eḳ siz oilo. Astaṭa-u ḳaṭi shuna fiṭaia banani oilo. 23 Ḳaṭi shunadi shatṭa serag, seragor fita saf ḳorar simṭa, zalail fitar sali toar lagi koygu baṭi banail oilo. 24 Eḳ mon ḳaṭi shunadi i serag dani, ar logor hoḳolta tiar ḳora oilo.

25 Bade babla laḳṛidi sair kuna ala agor-kushboy zalanir ṭebul banail oilo. Eḳ at lamba, eḳ at fash, ar dui at ubi dia i ṭebul banaila. Er sairo kunar sairo hing-o ekḳano ḳori banaila. 26 Sani, sanir sairo kinar ar hing, hoḳolta ḳaṭi shunadi lefia sairo kinaro shunar noksha lagaila. 27 Er dui kinaror nokshar tole dugu ḳori shunar ḳoṛa lagail oilo, zate er bitre benda haraia boia neoa zae. 28 Babla laḳṛidi boia neoar benda banaila, iṭare-o shunadi lefila.

29 Bade kushboy-ala moshla bananir ḳarigoror niome ḳelafoti shomzibar fobitro tel ar kushboy-ala ḳaṭi agor tiar ḳorla.