1 Ou shomoe Galil zilar Raza Herude Isar befare hunla, 2 hunia tan uzir-nazirre ḳoila, “Ein to toubar gusol ḳoraora Ehia. Ein mora taki zinda oia uṭae ou keramoti deḳaira.”

3 Ou Herude tar bai Filifor bou Herudiare hanga ḳorsil. Tair mon zuganir lagi he Ehia nobire zelo bondi ḳoria toisil, 4 ḳaron Ehiae Herudre ḳoita, “Taire hanga ḳora to tumar ṭik oise na.” 5 Erlagi he Ehia nobire marilito sailo, oile manshor ḍore marto farlo na, manshe zanta ein eḳzon nobi.

6 Bade Raza Herudor zonom dinor onusṭano Herudiar fuṛie nasia razare kushi ḳorlo. 7 Erdae razae ḳosom ḳaia ḳoilo, “Ou fuṛie zeta saibo, ota dimu.” 8 Fuṛie tair maʼr loge foramish ḳori ḳoilo, “Toubar gusol ḳoraora Ehiar ḳolla ḳaṭia eḳan talo ḳori, oḳon ania amare deukka.”

9 Ikan hunia razar mon kub bezar oigelo. Oile tar loge boa meman-musafiror samne nize ḳosom ḳorse, erlagi he ou ḳolla ḳaṭibar hukum dilo. 10 Tar zollad faṭaia zelor bitre Ehia nobir ḳolla ḳaṭailo. 11 Bade ou ḳolla eḳ talo ḳori ania ou fuṛire deoa oilo, fuṛie nia tair maʼr gese dilo. 12 Erbade Ehia nobir ummot oḳole tan lash nia dafon ḳorla, ar Hozrot Isar gese gia ou ḳobor zanaila.

13 Ehiar moutor ḳobor hunia Isae eḳan naot uṭia nirai eḳ zagat gelagi. Tain gesoingi hunia, nanan zagar manush hukna bae aṭi aṭi tan ḳore roana oila. 14 Tain nao tone lamar bade manshor biṛ dekia tan bitre doya hamaigelo. Erdae tarar maze zoto bemari asla, tain erare bala ḳorla.

15 Biali bala sahabi oḳol ḳandat aia ḳoila, “Huzur, ikan to kub nirai zaga, ar beilo zargi. Te ota manshore bidae dilaukka, era ḳanda-ḳasar gauainto gia tarar ḳani-kuraki louk.” 16 Isae ḳoila, “Na, tara zaoar dorḳar nai, tumrau erare ḳani deo.” 17 Sahabi oḳole ḳoila, “Amrar gese to ḳali fasḳan ruṭi ar duiṭa biran mas saṛa ar kuntau nai.”

18 Tain ḳoila, “Oḳnain amar gese ano.” 19 Bade tain manshore ḳoila, gashor ufre boizita. Tain hou fasḳan ruṭi ar duiṭa biran mas ato loila, ar asmanedi saia shukria adae ḳorla. Bade ou ruṭi ṭukraia sahabi oḳolor ato dile, era baṭia dilaila. 20 Otadi hoḳol manshe feṭ bori ḳaila. Ḳaia harle baṛti zeta roilo, oḳnain dola ḳorle baro ṭukri borigelo. 21 Onuman fas azar beṭa manshe ou ḳana ḳaila, erar loge beṭin ar huruttaino asla.

22 Ḳanir badeu tan sahabi oḳolre hukum dila, tain zaibar age tara nao-o uṭia aoror hofaro zaitagi. Ḳoia tain onor manshore bidae dilaila. 23 Era gia harle tain dua ḳorar lagi faṛor ufre uṭila. Hainja bad forzonto hono eḳla roila. 24 Ou shomoe sahabi oḳolor nao aoror mazḳano gesegi, ar ufta batashor ḍeue nao kub ilkani dorlo. 25 Fotabala Hozrot Isa aoror fanir uforedi aṭia sahabi oḳolor ḳandat aira. 26 Ou shomoe sahabi oḳole tanre dekia kub ḍoraila, tara but mono ḳoria but, but ḳoia sillaia uṭla.

27 Ou tain ḳoila, “Ḍoraio na, shaosh ḳoro, i to ami.”

28 Teu sahabi Fitore ḳoila, “Huzur, afneu zudi oin, te amare izazot deukka, amio fanir uforedi aṭia afnar gese aitam.” 29 Isae ḳoila, “Ao.” Teu Fitor nao taki lamia fanir ufredi aṭa dorla. 30 Oile batashor zur dekia tain ḍoraigela, ar buṛizira dekia zure zure Isare ḍaḳ dila, “Huzur, huzur, amare basaukka.”

31 Loge loge Isae at baṛaia tanre doria ḳoila, “Ouni tumar iman? Mono shondoe anlae ḳene?” 32 Bade Isa ar Fitor nao-o uṭteu batash tamigelo. 33 Teu naor hoḳole tanre soizda ḳoria ḳoila, “Huzur, asholeu afne Alla Pakor ḳas maear zon, Ibnulla.”

34 Aor faṛi dia tara Gineshorot elaḳat aia nao taki lamla. 35 Lamteu honor manshe tanre dekia sairobae ḳobor faṭaila. Ḳobor faia manshe hoḳol zator bemarire loia tan gese ailo, 36 tara minot ḳori ḳoilo, ou bemari oḳole zanu tan gotror saddoror kunaḳano soita faroin. Ar zoto manshe soila, tara hokkolu bala oigela.