1 ꠢꠎꠞꠔ ꠝꠥꠍꠣꠄ ꠀꠞꠅ ꠇꠁꠟꠣ, “ꠝꠣꠛꠥꠖꠦ ꠀꠝꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠅꠃꠟꠣ ꠀꠝꠞꠣ ꠙꠤꠍꠣꠁꠀ ꠉꠤꠀ ꠝꠞꠥꠜꠥꠝꠤꠞ ꠝꠣꠎꠦꠖꠤ ꠘꠤꠟ ꠖꠞꠤꠀꠞ ꠝꠥꠈꠣ ꠞꠅꠀꠘꠣ ꠖꠤꠟꠣꠝ। ꠍꠦꠁꠞꠞ ꠙꠣꠠꠤꠀ ꠄꠟꠣꠇꠣ ꠌꠇ꠆ꠇꠞ ꠖꠤꠀ ꠎꠣꠁꠔꠦ ꠀꠝꠞꠣꠞ ꠛꠃꠔ ꠖꠤꠘ ꠉꠦꠟꠉꠤ। 2 ꠛꠣꠖꠦ ꠝꠣꠛꠥꠖꠦ ꠀꠝꠣꠞꠦ ꠇꠁꠟꠣ, 3 ꠔꠥꠝꠞꠣ ꠛꠣꠇ꠆ꠇꠣ ꠖꠤꠘ ꠕꠣꠇꠤ ꠅꠃ ꠙꠣꠠꠤꠀ ꠄꠟꠣꠇꠣꠔ ꠌꠇ꠆ꠇꠞ ꠖꠤꠞꠣꠄ, ꠅꠈꠘ ꠃꠔ꠆ꠔꠞ ꠝꠥꠈꠣ ꠞꠅꠀꠘꠣ ꠖꠦꠅ। 4 ꠄꠞꠛꠣꠖꠦ ꠔꠣꠁꠘ ꠀꠝꠣꠞꠦ ꠇꠁꠟꠣ, ꠀꠝꠤ ꠔꠥꠝꠞꠣꠞꠦ ꠎꠣꠘꠣꠁꠔꠣꠝ ꠔꠥꠝꠞꠣ ꠅꠈꠘ ꠡꠦꠈ ꠁꠡʼꠞ ꠀꠅꠟꠣꠖꠞ ꠖꠈꠟꠦ ꠕꠣꠇꠣ ꠍꠦꠁꠞ ꠖꠦꠡꠞ ꠜꠤꠔꠞꠦꠖꠤ ꠎꠣꠁꠔꠦ ꠅꠁꠛ। ꠉꠦꠟꠦ ꠔꠥꠝꠞꠣꠞꠦ ꠖꠦꠈꠤꠀ ꠔꠣꠞꠣ ꠒꠞꠣꠁꠛꠣ, ꠅꠁꠟꠦ ꠔꠥꠝꠞꠣ ꠈꠥꠛ ꠢꠥꠡꠤꠀꠞ ꠞꠁꠅ, ꠄꠞꠣ ꠔ ꠔꠥꠝꠞꠣꠞ ꠜꠣꠁꠀꠁꠘ। 5 ꠔꠣꠞꠣꠞ ꠟꠉꠦ ꠇꠣꠁꠎ꠆ꠎꠣ-ꠚꠍꠣꠖ ꠇꠞꠤꠅ ꠘꠣ। ꠝꠘꠅ ꠞꠣꠈꠤꠅ, ꠔꠣꠞꠣꠞ ꠖꠦꠡꠞ ꠄꠇ ꠁꠘ꠆ꠌꠤ ꠎꠝꠤꠅ ꠀꠝꠤ ꠔꠥꠝꠞꠣꠞꠦ ꠖꠤꠔꠣꠝ ꠘꠣꠄ। ꠇꠣꠞꠘ ꠀꠡ꠆ꠔꠣ ꠍꠦꠁꠞ ꠙꠣꠠꠞ ꠝꠣꠟꠤꠇꠣꠘꠣ ꠀꠝꠤ ꠡꠦꠈ ꠁꠡʼꠞꠦ ꠖꠤꠟꠣꠁꠍꠤ। 6 ꠔꠣꠞꠣꠞ ꠅꠃ ꠖꠦꠡ ꠙꠣꠞ ꠅꠁꠀ ꠎꠣꠁꠛꠣꠞ ꠇꠣꠟꠅ ꠔꠥꠝꠞꠣꠞ ꠈꠣꠘꠤ-ꠈꠥꠞꠣꠇꠤ ꠟꠣꠉꠟꠦ ꠐꠦꠇꠣꠖꠤ ꠟꠁꠀ ꠈꠣꠁꠛꠣꠄ, ꠅꠃꠟꠣ ꠙꠣꠘꠤꠅ ꠟꠁꠀ ꠈꠣꠁꠛꠣꠄ।

7 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠢꠇꠟ ꠇꠣꠝꠞ ꠝꠣꠎꠦꠃ ꠔꠥꠝꠞꠣꠞꠦ ꠞꠢꠝ-ꠛꠞꠇꠔ ꠖꠤꠍꠂꠘ। ꠅꠃ ꠅꠔ ꠛꠠ ꠝꠞꠥꠜꠥꠝꠤ ꠙꠣꠞꠘꠤꠞ ꠛꠣꠟꠣ ꠔꠣꠁꠘ ꠔꠥꠝꠞꠣꠞꠦ ꠢꠦꠚꠣꠎꠔ ꠇꠞꠍꠂꠘ। ꠅꠃ ꠌꠣꠟ꠆ꠟꠤꠡ ꠛꠍꠞ ꠗꠞꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔꠥꠝꠞꠣꠞ ꠟꠉꠦ ꠟꠉꠦ ꠀꠍꠂꠘ, ꠄꠞꠟꠣꠉꠤ ꠇꠥꠘꠥ ꠟꠣꠈꠣꠘ ꠅꠜꠣꠛ ꠅꠁꠍꠦ ꠘꠣ।

8 “ꠔꠦꠃ ꠀꠝꠞꠣ ꠚꠣꠔꠣꠞꠤ ꠙꠕꠦ ꠀꠐꠤꠟꠣꠝ, ꠀꠐꠤꠀ ꠀꠝꠞꠣꠞ ꠜꠣꠁ ꠍꠦꠁꠞꠞ ꠛꠣꠡꠤꠘ꠆ꠖꠣ ꠁꠡʼꠞ ꠀꠅꠟꠣꠖꠞ ꠖꠦꠡ ꠚꠣꠟꠣꠁꠀ ꠉꠦꠟꠣꠝ। ꠀꠝꠞꠣ ꠀꠞꠣꠛꠣ ꠔꠟꠜꠥꠝꠤꠞ ꠎꠦ ꠞꠣꠡ꠆ꠔꠣ ꠄꠟꠣꠔ ꠀꠞ ꠁꠎꠤꠅꠘ-ꠉꠦꠛꠦꠞ ꠕꠣꠇꠤ ꠛꠣꠞ ꠅꠁꠀ ꠀꠁꠍꠦ, ꠅꠃ ꠙꠕꠦꠖꠤ ꠘꠣ ꠉꠤꠀ ꠝꠥꠀꠛꠞ ꠝꠞꠥꠜꠥꠝꠤꠞ ꠝꠥꠈꠣ ꠀꠐꠣ ꠗꠞꠟꠣꠝ। 9 ꠀꠞ ꠝꠣꠛꠥꠖꠦ ꠀꠝꠣꠞꠦ ꠇꠁꠟꠣ, ꠔꠥꠝꠞꠣ ꠝꠥꠀꠛꠤ ꠅꠇꠟꠞꠦ ꠍꠣꠔꠣꠁꠅ ꠘꠣ, ꠇꠥꠘꠥ ꠎꠥꠖ꠆ꠖꠞ ꠜꠣꠛ-ꠡꠣꠛ ꠖꠦꠈꠣꠁꠅ ꠘꠣ। ꠝꠘꠅ ꠞꠣꠈꠤꠅ, ꠔꠣꠞꠣꠞ ꠖꠦꠡꠞ ꠇꠥꠘꠥ ꠎꠝꠤꠃ ꠀꠝꠤ ꠔꠥꠝꠞꠣꠞꠦ ꠖꠤꠔꠣꠝ ꠘꠣꠄ। ꠔꠣꠞꠣꠞ ꠞꠣꠎꠗꠣꠘꠤ ꠀꠃꠞ ꠐꠣꠃꠘꠞ ꠝꠣꠟꠤꠇꠣꠘꠣ ꠀꠝꠤ ꠟꠥꠔ ꠘꠛꠤꠞ ꠀꠅꠟꠣꠖ ꠝꠥꠀꠛꠤ ꠅꠇꠟꠞꠦ ꠖꠤꠟꠣꠁꠍꠤ।”

10 (ꠀꠉꠦ ꠄꠁꠝꠤ ꠎꠣꠔꠤꠞ ꠝꠣꠘꠥꠡ ꠅꠃ ꠄꠟꠣꠇꠣꠔ ꠞꠁꠔꠣ, ꠁꠔꠣ ꠀꠍꠟꠣ ꠙꠄꠟꠥꠀꠘ ꠎꠣꠔꠤ, ꠔꠣꠞꠣ ꠙꠞꠤꠝꠣꠘꠦ ꠀꠍꠟꠣ ꠛꠃꠔ ꠎꠘ, ꠀꠞ ꠖꠦꠈꠔꠦ ꠀꠘꠣꠇꠤ ꠎꠣꠔꠤꠞ ꠟꠣꠈꠣꠘ ꠃꠌꠣ-ꠝꠥꠐꠣ ꠟꠣꠝ꠆ꠛꠣ। 11 ꠀꠘꠣꠇꠤ ꠅꠇꠟꠞ ꠟꠣꠈꠣꠘ ꠄꠁꠝꠤ ꠅꠇꠟꠞꠦꠅ ꠞꠚꠣꠄꠁ ꠘꠣꠝꠦ ꠒꠣꠇꠣ ꠅꠁꠔ, ꠅꠁꠟꠦ ꠝꠥꠀꠛꠤ ꠅꠇꠟꠦ ꠁꠔꠣꠞꠦ ꠄꠁꠝꠤ ꠇꠁꠀ ꠒꠣꠇꠤꠔꠣ। 12 ꠍꠦꠁꠞ ꠙꠣꠠꠅ ꠢꠥꠞꠤꠅ ꠅꠇꠟꠦ ꠛꠡꠔ ꠇꠞꠔꠣ, ꠛꠣꠖꠦ ꠁꠡʼꠞ ꠀꠅꠟꠣꠖ ꠅꠇꠟꠦ ꠔꠣꠞꠣꠞꠦ ꠈꠦꠖꠣꠁꠀ ꠖꠤꠀ ꠁꠈꠣꠘ ꠖꠈꠟ ꠇꠞꠟꠣ। ꠝꠣꠛꠥꠖꠞ ꠀꠔꠦ ꠛꠘꠤ ꠁꠍꠞꠣꠁꠟꠦ ꠎꠦꠟꠣ ꠇꠦꠘꠣꠘ ꠖꠦꠡꠞ ꠝꠣꠟꠤꠇꠣꠘꠣ ꠙꠣꠁꠀ ꠇꠦꠘꠣꠘꠤ ꠅꠇꠟꠞꠦ ꠈꠦꠖꠣꠁꠛꠣ, ꠑꠤꠇ ꠅꠟꠣ ꠁꠡʼꠞ ꠀꠅꠟꠣꠖ ꠅꠇꠟꠦꠅ ꠇꠞꠍꠟꠣ। ꠔꠣꠞꠣ ꠢꠥꠞꠤꠅ ꠅꠇꠟꠞꠦ ꠛꠤꠘꠣꠡ ꠇꠞꠤꠀ ꠢꠇꠟ ꠎꠝꠤ-ꠝꠣꠐꠤ ꠖꠈꠟ ꠇꠞꠤꠀ ꠘꠤꠎꠦ ꠢꠘꠅ ꠛꠡꠔ ꠇꠞꠟꠣ।)

13 ꠝꠥꠍꠣ ꠘꠛꠤꠄ ꠀꠞꠅ ꠇꠁꠟꠣ, “ꠛꠣꠖꠦ ꠝꠣꠛꠥꠖꠦ ꠢꠥꠇꠥꠝ ꠖꠤꠟꠣ, ꠔꠥꠝꠞꠣ ꠎꠟꠖꠤ ꠇꠞꠤ ꠞꠅꠀꠘꠣ ꠅꠅ, ꠀꠞ ꠎꠦꠞꠦꠖ ꠙꠣꠠꠤꠀ ꠈꠣꠟ ꠙꠣꠞ ꠅꠁꠀ ꠢꠙꠣꠞꠅ ꠎꠣꠅ। ꠔꠦꠃ ꠀꠝꠞꠣ ꠙꠣꠞ ꠅꠁꠟꠣꠝ। 14 ꠀꠞ ꠇꠣꠖꠦꠡ-ꠛꠞꠘꠦꠀ ꠕꠣꠇꠤ ꠛꠣꠞ ꠅꠁꠀ ꠢꠣꠞꠤ ꠎꠦꠞꠦꠖ ꠉꠥꠟ꠆ꠟꠣ ꠙꠣꠞ ꠅꠁꠀ ꠀꠁꠔꠦ ꠀꠝꠞꠣꠞ ꠀꠐꠔꠤꠡ ꠛꠍꠞ ꠟꠣꠉꠍꠤꠟ। ꠄꠞꠝꠣꠎꠦ ꠅꠃꠟꠣ ꠅꠁꠟ, ꠝꠣꠛꠥꠖꠦ ꠀꠉꠦ ꠇꠍꠝ ꠈꠣꠁꠀ ꠎꠦꠟꠣ ꠇꠁꠍꠟꠣ, ꠅꠃꠟꠣ ꠇꠣꠖꠦꠡ-ꠛꠞꠘꠦꠀ ꠕꠣꠇꠤ ꠛꠣꠞꠘꠤꠞ ꠇꠣꠟꠅ ꠀꠝꠞꠣꠞ ꠎꠔ ꠍꠤꠙꠣꠁ ꠀꠍꠟꠣ, ꠄꠞꠣ ꠢꠇꠟꠃ ꠅꠃ ꠀꠐꠔꠤꠡ ꠛꠍꠞꠦ ꠝꠞꠤꠉꠦꠟꠣ। 15 ꠛꠘꠤ ꠁꠍꠞꠣꠁꠟ ꠡꠝꠣꠎ ꠕꠣꠇꠤ ꠔꠣꠞꠣꠞꠦ ꠛꠤꠘꠣꠡ ꠇꠞꠣꠞ ꠀꠉ ꠙꠞ꠆ꠎꠘ꠆ꠔ ꠝꠣꠛꠥꠖ ꠔꠣꠞꠣꠞ ꠛꠤꠙꠇ꠆ꠇꠦ ꠀꠍꠟꠣ।

16 “ꠅꠃ ꠢꠇꠟ ꠍꠤꠙꠣꠁ ꠝꠞꠤꠀ ꠡꠦꠡ ꠅꠁꠀ ꠢꠣꠞꠟꠦ, 17 ꠝꠣꠛꠥꠖꠦ ꠀꠝꠣꠞꠦ ꠇꠁꠟꠣ, 18 ꠀꠁꠎ ꠔꠥꠝꠞꠣ ꠝꠥꠀꠛꠤ ꠅꠇꠟꠞ ꠖꠦꠡꠞ ꠡꠤꠝꠣꠘꠣ ꠙꠣꠞ ꠅꠁꠛꠣꠄ, ꠔꠣꠞꠣꠞ ꠞꠣꠎꠗꠣꠘꠤ ꠀꠃꠞ ꠐꠣꠃꠘꠞ ꠇꠣꠘ꠆ꠖꠣꠛꠣꠄ ꠎꠣꠁꠛꠣꠄ। 19 ꠅꠁꠟꠦ ꠔꠥꠝꠞꠣ ꠎꠦꠛꠟꠣ ꠛꠘꠤ-ꠀꠝ꠆ꠝꠣꠘ ꠖꠦꠡꠞ ꠇꠣꠍꠣꠔ ꠎꠣꠁꠛꠣꠄꠉꠤ, ꠉꠤꠀ ꠔꠣꠞꠣꠞꠦ ꠍꠣꠔꠣꠁꠅ ꠘꠣ, ꠔꠣꠞꠣꠞꠦ ꠎꠥꠖ꠆ꠖꠞ ꠜꠣꠛ-ꠡꠣꠛ ꠖꠦꠈꠣꠁꠅ ꠘꠣ। ꠝꠘꠅ ꠞꠣꠈꠤꠅ, ꠔꠣꠞꠣꠞ ꠖꠦꠡꠞ ꠇꠥꠘꠥ ꠎꠣꠉꠣꠃ ꠀꠝꠤ ꠔꠥꠝꠞꠣꠞꠦ ꠖꠤꠔꠣꠝ ꠘꠣꠄ, ꠁꠈꠣꠘꠞ ꠝꠣꠟꠤꠇꠣꠘꠣ ꠔ ꠀꠝꠤ ꠟꠥꠔ ꠘꠛꠤꠞ ꠀꠅꠟꠣꠖ ꠛꠘꠤ-ꠀꠝ꠆ꠝꠣꠘꠞꠦ ꠖꠤꠟꠣꠁꠍꠤ।”

20 (ꠀꠉꠦ ꠞꠚꠣꠄꠁ ꠅꠇꠟ ꠅꠘꠅ ꠞꠁꠔꠣ, ꠄꠞꠟꠣꠉꠤ ꠁꠈꠣꠘꠞꠦ ꠞꠚꠣꠄꠁ ꠅꠇꠟꠞ ꠖꠦꠡ ꠇꠁꠀ ꠒꠣꠇꠣ ꠅꠁꠔ। ꠀꠞ ꠛꠘꠤ-ꠀꠝ꠆ꠝꠣꠘꠦ ꠁꠔꠣꠞꠦ ꠎꠣꠝ-ꠎꠣꠝꠤꠝꠤ ꠇꠁꠀ ꠒꠣꠇꠤꠔꠣ। 21 ꠞꠚꠣꠄꠁ ꠎꠣꠔꠤ ꠙꠄꠟꠥꠀꠘ ꠀꠍꠟꠣ, ꠖꠦꠈꠔꠦ ꠀꠘꠣꠇꠤ ꠎꠣꠔꠤꠞ ꠟꠣꠈꠣꠘ ꠃꠌꠣ-ꠝꠥꠐꠣ ꠟꠣꠝ꠆ꠛꠣ ꠀꠞ ꠙꠞꠤꠝꠣꠘꠦꠅ ꠛꠃꠔ ꠛꠦꠡꠤ ꠀꠍꠟꠣ। ꠝꠣꠛꠥꠖꠦ ꠛꠘꠤ-ꠀꠝ꠆ꠝꠣꠘ ꠎꠣꠔꠤꠞ ꠀꠔꠅ ꠁꠔꠣꠞꠦ ꠛꠤꠘꠣꠡ ꠇꠞꠣꠁꠟꠣ, ꠛꠘꠤ-ꠀꠝ꠆ꠝꠣꠘꠦ ꠞꠚꠣꠄꠁ ꠎꠣꠔꠤꠞꠦ ꠈꠦꠖꠣꠁ ꠖꠤꠀ ꠅꠃ ꠖꠦꠡ ꠖꠈꠟ ꠇꠞꠟꠣ। 22 ꠝꠣꠛꠥꠖꠦ ꠁꠡʼꠞ ꠀꠅꠟꠣꠖ ꠅꠇꠟꠞꠦꠖꠤ ꠅꠃ ꠄꠇꠁ ꠇꠣꠝ ꠇꠞꠣꠁꠟꠣ, ꠔꠣꠁꠘ ꠄꠞꠣꠞ ꠀꠔꠅ ꠢꠥꠞꠤꠅ ꠎꠣꠔꠤꠞꠦ ꠛꠤꠘꠣꠡ ꠇꠞꠟꠣ। ꠄꠞꠣ ꠢꠥꠞꠤꠅ ꠅꠇꠟꠞꠦ ꠈꠦꠖꠣꠁꠀ ꠖꠤꠀ, ꠔꠣꠞꠣꠞ ꠍꠦꠁꠞ ꠖꠦꠡ ꠖꠈꠟ ꠇꠞꠤꠀ ꠛꠡꠔ ꠇꠞꠞꠣ। 23 ꠄꠞꠝꠣꠎꠦ ꠇꠙ꠆ꠔꠥꠞ ꠖꠤꠙ ꠕꠣꠇꠤ ꠇꠙ꠆ꠔꠥꠞꠤ ꠎꠣꠔꠤꠄ ꠀꠁꠀ ꠅꠛ꠆ꠛꠤ ꠎꠣꠔꠤꠞꠦ ꠛꠤꠘꠣꠡ ꠇꠞꠟꠣ, ꠔꠣꠞꠣꠞ ꠝꠣꠐꠤꠞꠦ ꠖꠈꠟ ꠇꠞꠤꠀ ꠛꠡꠔ ꠇꠞꠟꠣ। ꠅꠃ ꠅꠛ꠆ꠛꠤ ꠅꠇꠟ ꠉꠣꠎꠣ ꠐꠣꠃꠘꠞ ꠗꠣꠞꠅ ꠛꠡꠔ ꠇꠞꠔꠣ, ꠢꠘꠞ ꠢꠇꠟ ꠉꠣꠃ-ꠉꠦꠞꠣꠝꠅ ꠔꠣꠞꠣ ꠞꠁꠔꠣ।)

24 “ꠄꠞꠛꠣꠖꠦ ꠝꠣꠛꠥꠖꠦ ꠇꠁꠍꠟꠣ, ꠅ ꠛꠘꠤ ꠁꠍꠞꠣꠁꠟ, ꠔꠥꠝꠞꠣ ꠛꠣꠞ ꠅꠅ, ꠛꠣꠞ ꠅꠁꠀ ꠅꠞꠘꠘ ꠈꠣꠟꠞ ꠢꠙꠣꠞꠅ ꠎꠣꠅ। ꠢꠥꠘꠅ, ꠀꠝꠥꠞꠤ ꠎꠣꠔꠤꠞ ꠛꠣꠖꠡꠣ ꠍꠤꠢꠥꠘ ꠀꠞ ꠔꠣꠞ ꠢꠤꠡꠛꠘ ꠖꠦꠡꠞꠦ ꠀꠝꠤ ꠔꠥꠝꠞꠣꠞ ꠀꠔꠅ ꠡꠙꠤ ꠖꠤꠍꠤ। ꠁꠈꠣꠘ ꠖꠈꠟ ꠇꠞꠣꠔ ꠉꠤꠀ ꠛꠣꠖꠡꠣꠞꠦ ꠎꠥꠖ꠆ꠖꠞ ꠚꠤꠟꠒꠅ ꠟꠣꠝꠣꠅ, 25 ꠔꠦꠃ ꠖꠦꠈꠛꠣꠄ, ꠀꠝꠤ ꠝꠣꠛꠥꠖꠦ ꠀꠁꠎ ꠕꠣꠇꠤ ꠎꠉꠔꠞ ꠢꠇꠟ ꠎꠣꠔꠤꠞ ꠖꠤꠟꠅ ꠒꠞ ꠢꠣꠞꠣꠁ ꠖꠤꠝꠥ, ꠔꠥꠝꠞꠣꠞ ꠒꠞꠦ ꠔꠣꠞꠣ ꠇꠣꠙꠤꠛꠣ। ꠔꠥꠝꠞꠣꠞ ꠀꠅꠀꠎ ꠢꠥꠘꠟꠦꠃ ꠔꠣꠞꠣꠞ ꠎꠣꠘꠅ ꠗꠠꠚꠠ ꠡꠥꠞꠥ ꠅꠁꠛ।”

26 ꠝꠥꠍꠣ ꠘꠛꠤꠄ ꠛꠘꠤ ꠁꠍꠞꠣꠁꠟꠞꠦ ꠀꠞꠅ ꠇꠁꠟꠣ, “ꠛꠣꠖꠦ ꠀꠝꠤ ꠡꠣꠘ꠆ꠔꠤ-ꠌꠥꠇ꠆ꠔꠤ ꠇꠞꠣꠞ ꠈꠤꠀꠟꠦ ꠈꠣꠖꠤꠝꠥꠔ ꠝꠞꠥꠜꠥꠝꠤ ꠕꠣꠇꠤ ꠢꠤꠡꠛꠘꠞ ꠛꠣꠖꠡꠣ ꠍꠤꠢꠥꠘꠞ ꠉꠦꠍꠦ ꠈꠛꠞꠤꠀ ꠙꠣꠑꠣꠁꠟꠣꠝ, ꠇꠁꠟꠣꠝ, 27 ꠀꠝꠞꠣ ꠀꠙꠘꠣꠞ ꠖꠦꠡꠞ ꠜꠤꠔꠞꠦꠖꠤ ꠙꠣꠞ ꠅꠁꠀ ꠎꠣꠁꠔꠣꠝ ꠌꠣꠁ, ꠅꠘꠥꠝꠔꠤ ꠖꠤꠛꠣ ꠘꠤ? ꠀꠝꠞꠣ ꠀꠔꠣꠞꠦ-ꠚꠣꠔꠣꠞꠦ ꠇꠥꠘꠥꠛꠣꠄ ꠎꠣꠁꠔꠣꠝ ꠘꠣꠄ, ꠈꠣꠟꠤ ꠝꠥꠟ ꠡꠠꠇꠦꠖꠤ ꠀꠐꠤꠀ ꠎꠣꠁꠝꠥ। 28-29 ꠀꠝꠞꠣ ꠘꠉꠖ ꠐꠦꠇꠣꠖꠤ ꠀꠙꠘꠣꠞ ꠉꠦꠍ ꠕꠣꠇꠤ ꠈꠣꠘꠤ-ꠈꠥꠞꠣꠇꠤ ꠛꠣ ꠙꠣꠘꠤꠅ ꠈꠞꠤꠖ ꠇꠞꠤꠀ ꠈꠣꠁꠝꠥ। ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠀꠝꠞꠣꠞꠦ ꠎꠦ ꠖꠦꠡꠈꠣꠘ ꠖꠤꠔꠣ ꠌꠣꠁꠞꠣ, ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠢꠃ ꠖꠦꠡꠅ ꠎꠣꠁꠛꠣꠞ ꠀꠉ ꠙꠞ꠆ꠎꠘ꠆ꠔ, ꠀꠙꠘꠣꠞ ꠖꠦꠡꠞ ꠃꠙꠞꠦꠖꠤ ꠀꠝꠞꠣꠞꠦ ꠀꠐꠤꠀ ꠎꠣꠁꠔꠦ ꠖꠦꠃꠇ꠆ꠇꠣ। ꠍꠦꠁꠞꠞ ꠙꠣꠠꠤꠀ ꠄꠟꠣꠇꠣꠞ ꠛꠣꠡꠤꠘ꠆ꠖꠣ ꠁꠡʼꠞ ꠀꠅꠟꠣꠖ ꠅꠇꠟꠦ, ꠀꠞ ꠀꠃꠞ ꠐꠣꠃꠘꠞ ꠛꠣꠡꠤꠘ꠆ꠖꠣ ꠝꠥꠀꠛꠤ ꠅꠇꠟꠦꠅ ꠀꠝꠞꠣꠞꠦ ꠅꠟꠣ ꠙꠣꠞ ꠅꠁꠔꠦ ꠖꠤꠍꠂꠘ।

30 “ꠅꠁꠟꠦ ꠢꠤꠡꠛꠘꠞ ꠛꠣꠖꠡꠣ ꠍꠤꠢꠥꠘ ꠞꠣꠎꠤ ꠅꠁꠟ ꠘꠣ, ꠀꠝꠞꠣꠞꠦ ꠎꠣꠁꠔꠦ ꠖꠤꠟ ꠘꠣ। ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄꠃ ꠔꠣꠞ ꠖꠤꠟꠞꠦ ꠙꠣꠡꠣꠘ ꠛꠣꠘꠣꠁꠟ꠆ꠟꠣ, ꠔꠣꠞ ꠝꠘꠞ ꠜꠣꠛ ꠟꠥꠀꠞ ꠟꠣꠈꠣꠘ ꠅꠁꠉꠦꠟ, ꠎꠣꠔꠦ ꠔꠥꠝꠞꠣꠞ ꠀꠔꠅ ꠔꠣꠞ ꠛꠤꠘꠣꠡ ꠅꠄ, ꠀꠞ ꠑꠤꠇꠃ ꠅꠟꠣ ꠅꠁꠟ। 31 ꠔꠦꠃ ꠝꠣꠛꠥꠖꠦ ꠀꠝꠣꠞꠦ ꠇꠁꠟꠣ, ꠅ ꠝꠥꠍꠣ, ꠍꠤꠢꠥꠘ ꠀꠞ ꠔꠣꠞ ꠛꠣꠖꠡꠣꠁꠞꠦ ꠀꠝꠤ ꠔꠥꠝꠣꠞ ꠀꠔꠅ ꠡꠙꠤ ꠖꠤꠟꠣꠝ। ꠅꠈꠘ ꠔꠥꠝꠤ ꠢꠘꠅ ꠎꠣꠅ, ꠉꠤꠀ ꠅꠃ ꠖꠦꠡ ꠖꠈꠟꠦ ꠀꠘꠣꠔ ꠟꠣꠉꠅ, ꠀꠞ ꠢꠘꠅ ꠛꠡꠔ ꠇꠞꠅ।

32 “ꠔꠦꠃ ꠁꠀꠢꠣꠎ ꠄꠟꠣꠇꠣꠔ ꠍꠤꠢꠥꠘꠦ ꠔꠣꠞ ꠢꠇꠟ ꠍꠤꠙꠣꠁ ꠖꠟ ꠟꠁꠀ ꠀꠝꠞꠣꠞ ꠟꠉꠦ ꠟꠣꠠꠣꠁ ꠇꠞꠣꠔ ꠀꠁꠟ, 33 ꠅꠃ ꠡꠝꠄ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠞꠦ ꠀꠝꠞꠣꠞ ꠀꠔꠅ ꠚꠣꠟꠣꠁꠟꠣ। ꠀꠝꠞꠣ ꠛꠣꠖꠡꠣꠞꠦ, ꠔꠣꠞ ꠙꠥꠀꠂꠘ꠆ꠔꠞꠦ, ꠔꠣꠞ ꠍꠤꠙꠣꠁ ꠖꠟꠞꠦ ꠘꠤꠙꠣꠔ ꠇꠞꠟꠣꠝ। 34 ꠀꠞ ꠀꠝꠞꠣ ꠔꠣꠞ ꠢꠇꠟ ꠐꠣꠃꠘ, ꠉꠣꠃ-ꠉꠦꠞꠣꠝ ꠢꠇꠟꠔꠣ ꠖꠈꠟ ꠇꠞꠟꠣꠝ, ꠔꠣꠞꠣꠞ ꠢꠇꠟ ꠛꠦꠐꠣꠁꠘ-ꠛꠦꠐꠤꠘ ꠀꠞ ꠢꠥꠞꠥꠔ꠆ꠔꠣꠞꠦ ꠛꠤꠘꠣꠡ ꠇꠞꠟꠣꠝ। ꠄꠇꠎꠘꠅ ꠎꠤꠘ꠆ꠖꠣ ꠞꠁꠍꠦ ꠘꠣ। 35 ꠈꠣꠟꠤ ꠔꠣꠞꠣꠞ ꠙꠡꠥꠞ ꠙꠣꠟ ꠀꠞ ꠉꠘꠤꠝꠔꠞ ꠝꠣꠟ-ꠍꠣꠝꠣꠘꠣ ꠀꠝꠞꠣꠞ ꠟꠣꠉꠤ ꠀꠘꠟꠣꠝ। 36 ꠅꠞꠘꠘ ꠈꠣꠟꠞ ꠡꠤꠝꠣꠘꠣꠞ ꠀꠞꠥꠀꠞ ꠐꠣꠃꠘ, ꠀꠞ ꠅꠃ ꠄꠟꠣꠇꠣꠞ ꠄꠇ ꠉꠣꠃ ꠕꠣꠇꠤ ꠀꠞꠇ ꠉꠣꠃ ꠖꠈꠟ ꠇꠞꠤ ꠇꠞꠤ, ꠉꠤꠟꠤꠅꠖ ꠙꠞ꠆ꠎꠘ꠆ꠔ ꠇꠥꠘꠥ ꠎꠣꠉꠣ ꠀꠝꠞꠣꠞ ꠖꠈꠟꠞ ꠛꠣꠁꠞꠦ ꠞꠁꠟ ꠘꠣ। ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠁꠔꠣ ꠢꠇꠟꠔꠣ ꠀꠝꠞꠣꠞ ꠀꠔꠅ ꠖꠤꠟꠣ। 37 ꠈꠣꠟꠤ ꠛꠘꠤ-ꠀꠝ꠆ꠝꠣꠘ ꠎꠣꠔꠤꠞ ꠖꠦꠡ, ꠎꠣꠛ꠆ꠛꠥꠇ ꠙꠣꠠꠤꠀ ꠈꠣꠟꠞ ꠇꠣꠘ꠆ꠖꠣ-ꠇꠣꠍꠣꠞ ꠢꠇꠟ ꠎꠤꠟꠣ, ꠙꠣꠠꠞ ꠃꠙꠞꠞ ꠉꠣꠃ-ꠉꠦꠞꠣꠝ, ꠀꠞ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦꠔꠣ ꠎꠣꠉꠣ ꠖꠈꠟ ꠇꠞꠔꠦ ꠘꠤꠡꠦꠗ ꠇꠞꠍꠂꠘ, ꠅꠃ ꠎꠣꠉꠣ ꠈꠣꠘꠣꠁꠘ ꠔꠥꠝꠞꠣꠞ ꠖꠈꠟꠞ ꠛꠣꠁꠞꠦ ꠞꠁꠟ।”