1 ꠢꠎꠞꠔ ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠅ ꠛꠘꠤ ꠁꠍꠞꠣꠁꠟ, ꠀꠝꠤ ꠅꠈꠘ ꠎꠦ ꠡꠞꠤꠅꠔ ꠀꠞ ꠢꠥꠇꠥꠝ-ꠀꠢꠇꠣꠝ ꠇꠁꠝꠥ, ꠁꠔꠣ ꠔꠥꠝꠞꠣ ꠈꠤꠀꠟ ꠇꠞꠤ ꠢꠥꠘꠅ। ꠔꠦꠃ ꠔꠥꠝꠞꠣ ꠎꠣꠘꠦ ꠛꠣꠌꠛꠣꠄ ꠀꠞ ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡ ꠖꠣꠘ ꠇꠞꠞꠣ, ꠢꠃ ꠖꠦꠡꠅ ꠉꠤꠀ ꠖꠈꠟ ꠇꠞꠔꠣꠄ ꠙꠣꠞꠛꠣꠄ। 2 ꠀꠝꠤ ꠔꠥꠝꠞꠣꠞꠦ ꠎꠦ ꠢꠥꠇꠥꠝ ꠖꠤꠀꠞ, ꠁ ꠢꠥꠇꠥꠝꠞ ꠟꠉꠦ ꠖꠥꠍꠞꠣ ꠇꠥꠘ꠆ꠔꠣ ꠛꠣꠠꠣꠁꠅ ꠘꠣ ꠛꠣ ꠇꠝꠣꠁꠅ ꠘꠣ। ꠀꠝꠤ ꠎꠦꠟꠣꠈꠣꠘ ꠇꠁꠞꠣꠝ, ꠔꠥꠝꠞꠣ ꠑꠤꠇ ꠅꠟꠣꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠌꠟꠤꠅ।

3 “ꠔꠥꠝꠞꠣ ꠔ ꠘꠤꠎꠞ ꠌꠃꠈꠦ ꠖꠦꠈꠍ, ꠀꠉꠦ ꠝꠣꠛꠥꠖꠦ ꠛꠣꠀꠟ-ꠙꠤꠃꠞꠞ ꠛꠦꠙꠣꠞꠦ ꠇꠤꠔꠣ ꠇꠞꠍꠂꠘ। ꠔꠥꠝꠞꠣꠞ ꠝꠣꠎꠞ ꠎꠔ ꠎꠘꠦ ꠙꠤꠃꠞ ꠄꠟꠣꠇꠣꠞ ꠛꠣꠀꠟ ꠖꠦꠛꠔꠣꠞ ꠙꠥꠎꠣ ꠇꠞꠍꠤꠟ, ꠀꠟ꠆ꠟꠣ ꠝꠣꠛꠥꠖꠦ ꠔꠥꠝꠞꠣꠞ ꠍꠣꠝꠘꠦ ꠁꠔꠣ ꠢꠇ꠆ꠇꠟꠐꠤꠞꠦ ꠛꠤꠘꠣꠡ ꠇꠞꠍꠂꠘ। 4 ꠅꠁꠟꠦ ꠔꠥꠝꠞꠣ ꠎꠦꠞꠣ ꠖꠤꠟꠦ-ꠎꠣꠘꠦ ꠀꠟ꠆ꠟꠣ ꠝꠣꠛꠥꠖꠞ ꠀꠡꠤꠇ ꠀꠍꠟꠣꠄ, ꠔꠥꠝꠞꠣ ꠢꠇꠟꠃ ꠅꠈꠘꠅ ꠎꠤꠘ꠆ꠖꠣ ꠞꠁꠍ।

5 “ꠅꠈꠘ ꠢꠥꠘꠅ, ꠀꠝꠣꠞ ꠝꠣꠛꠥꠖ ꠀꠟ꠆ꠟꠣꠄ ꠀꠝꠣꠞꠦ ꠎꠦꠟꠣꠈꠣꠘ ꠢꠥꠇꠥꠝ-ꠀꠢꠇꠣꠝ ꠖꠤꠍꠟꠣ, ꠀꠝꠤ ꠔꠥꠝꠞꠣꠞꠦ ꠑꠤꠇ ꠅꠃ ꠢꠥꠇꠥꠝ-ꠀꠢꠇꠣꠝ ꠀꠞ ꠘꠤꠅꠝ-ꠇꠣꠘꠥꠘ ꠢꠤꠇꠣꠁꠍꠤ। ꠎꠣꠔꠦ ꠔꠥꠝꠞꠣ ꠅꠈꠘ ꠎꠦ ꠖꠦꠡ ꠖꠈꠟ ꠇꠞꠣꠔ ꠎꠣꠁꠞꠣꠄ, ꠢꠃ ꠖꠦꠡꠅ ꠁꠔꠣ ꠇꠣꠝꠅ ꠟꠣꠉꠣꠅ। 6 ꠄꠞꠟꠣꠉꠤ ꠔꠥꠝꠞꠣ ꠈꠥꠛ ꠢꠥꠡꠤꠀꠞ ꠅꠁꠀ ꠁꠔꠣ ꠝꠣꠘꠤꠅ, ꠀꠞ ꠇꠣꠝꠅ ꠟꠣꠉꠣꠁꠅ। ꠔꠦꠃ ꠛꠣꠖ-ꠛꠣꠇꠤ ꠔꠣꠝꠣꠝ ꠎꠣꠔꠤꠞ ꠉꠦꠍꠦꠃ ꠁꠔꠣ ꠔꠥꠝꠞꠣꠞ ꠀꠈꠟ-ꠛꠥꠖ꠆ꠖꠤ ꠢꠤꠡꠣꠛꠦ ꠎꠣꠁꠞ ꠅꠁꠛ। ꠅꠃ ꠢꠥꠇꠥꠝ-ꠀꠢꠇꠣꠝꠞ ꠇꠕꠣ ꠢꠥꠘꠟꠦ ꠔꠣꠞꠣ ꠇꠁꠛꠣ, ꠢꠣꠍꠣꠃ ꠄꠞꠣ ꠈꠥꠛ ꠛꠠ ꠎꠣꠔꠤ ꠀꠞ ꠀꠈꠟ-ꠛꠥꠖ꠆ꠖꠤ ꠀꠟꠣ ꠎꠣꠔꠤ। 7 ꠀꠞ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠎꠦꠟꠣ ꠀꠝꠞꠣꠞ ꠟꠉꠦ ꠟꠉꠦ ꠞꠂꠘ, ꠔꠣꠘꠞꠦ ꠒꠣꠇꠤꠟꠦ ꠎꠦꠟꠣ ꠗꠣꠞꠅ ꠙꠣꠁ, ꠅꠃ ꠖꠥꠘꠤꠀꠞ ꠛꠥꠇꠥꠔ ꠖꠥꠍꠞꠣ ꠇꠥꠘꠥ ꠛꠠ ꠎꠣꠔꠤ ꠀꠍꠂꠘ ꠘꠤ, ꠎꠦꠔꠣꠞ ꠖꠦꠛꠔꠣ ꠅꠟꠣ ꠟꠉꠦ ꠟꠉꠦ ꠞꠂꠘ? 8 ꠛꠣ ꠀꠝꠤ ꠅꠈꠘ ꠎꠦ ꠡꠞꠤꠅꠔꠞ ꠇꠕꠣ ꠇꠁꠞꠣꠝ, ꠁꠔꠣ ꠖꠥꠍꠞꠣ ꠇꠥꠘꠥ ꠛꠠ ꠎꠣꠔꠤꠞ ꠀꠍꠦ ꠘꠤ? ꠁꠟꠣ ꠘꠤꠅꠝ-ꠇꠣꠘꠥꠘ ꠀꠞ ꠘꠤꠈꠥꠔ ꠢꠥꠇꠥꠝ-ꠀꠢꠇꠣꠝ ꠔꠣꠞꠣꠞ ꠀꠍꠦ ꠘꠤ?

9 “ꠅꠁꠟꠦ ꠔꠥꠝꠞꠣ ꠎꠔꠖꠤꠘ ꠛꠣꠌꠤꠀ ꠞꠁꠛꠣꠄ, ꠅꠔꠖꠤꠘ ꠘꠤꠎꠞ ꠛꠦꠙꠣꠞꠦ ꠈꠥꠛ ꠢꠥꠡꠤꠀꠞ ꠞꠁꠅ, ꠘꠤꠎꠞ ꠖꠤꠟꠞꠦ ꠡꠣꠛꠗꠣꠘꠦ ꠞꠣꠈꠤꠅ, ꠀꠞꠘꠣꠄ ꠘꠤꠎꠞ ꠌꠈꠥꠞ ꠖꠦꠈꠣ ꠊꠐꠘꠣ ꠅꠇꠟ ꠚꠣꠃꠞꠤꠟꠤꠛꠣꠄ, ꠁꠔꠣ ꠔꠥꠝꠞꠣꠞ ꠖꠤꠟ ꠕꠣꠇꠤ ꠈꠥꠀꠁꠟꠤꠛꠣꠄ। ꠀꠞ ꠅꠃ ꠢꠥꠇꠥꠝ-ꠀꠢꠇꠣꠝ ꠔꠥꠝꠞꠣꠞ ꠙꠥꠀ-ꠙꠥꠠꠤꠘꠞꠦ ꠢꠤꠇꠣꠅ, ꠔꠣꠞꠣꠅ ꠅꠟꠣ ꠔꠣꠞꠣꠞ ꠀꠅꠟꠣꠖꠞꠦ ꠢꠤꠇꠣꠁꠛꠣ। 10 ꠀꠞ ꠔꠥꠝꠞꠣ ꠢꠃ ꠖꠤꠘꠞ ꠊꠐꠘꠣ ꠝꠘꠅ ꠇꠞꠅ, ꠎꠦ ꠖꠤꠘ ꠔꠥꠝꠞꠣ ꠔꠥꠞ ꠙꠣꠠꠅ ꠀꠙꠘ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠀꠎꠤꠞ ꠅꠁꠍꠟꠣꠄ। ꠎꠦꠛꠟꠣ ꠔꠣꠁꠘ ꠀꠝꠣꠞꠦ ꠇꠁꠍꠟꠣ, ꠀꠝꠣꠞ ꠇꠣꠟꠣꠝ ꠢꠥꠘꠣꠞ ꠟꠣꠉꠤ ꠔꠥꠝꠤ ꠢꠇ꠆ꠇꠟ ꠝꠣꠘꠡꠞꠦ ꠖꠟꠣ ꠇꠞꠤꠀ ꠀꠝꠣꠞ ꠍꠣꠝꠘꠦ ꠀꠘꠅ, ꠔꠦꠃ ꠔꠣꠞꠣ ꠢꠤꠇꠛꠣ, ꠁ ꠎꠉꠔꠅ ꠔꠣꠞꠣ ꠎꠔꠖꠤꠘ ꠎꠤꠘ꠆ꠖꠣ ꠞꠁꠛꠣ, ꠅꠔꠖꠤꠘ ꠀꠝꠣꠞꠦ ꠒꠞꠣꠁꠀ ꠞꠁꠔꠣ, ꠀꠞ ꠔꠣꠞꠣꠞ ꠢꠥꠞꠥꠔ꠆ꠔꠣꠁꠘꠞꠦꠅ ꠅꠟꠣ ꠌꠟꠣꠞ ꠔꠣꠟꠤꠝ ꠖꠤꠔꠣ। 11 ꠅꠃ ꠡꠝꠄ ꠔꠥꠝꠞꠣ ꠇꠣꠘ꠆ꠖꠣꠔ ꠉꠤꠀ ꠅꠃ ꠙꠣꠠꠞ ꠟꠣꠝꠣꠔ ꠃꠛꠣꠁꠍꠟꠣꠄ, ꠃꠛꠣꠁꠀ ꠖꠦꠈꠟꠣꠄ, ꠀꠡ꠆ꠔꠣ ꠙꠣꠠꠅ ꠖꠣꠃ ꠖꠣꠃ ꠇꠞꠤ ꠘꠥꠞꠞ ꠀꠉꠥꠁꠘ ꠎꠟꠦꠞ, ꠀꠉꠥꠁꠘꠦ ꠉꠤꠀ ꠀꠍꠝꠣꠘ ꠍꠁꠟꠤꠍꠦ, ꠀꠞ ꠉꠁꠘ ꠊꠘ ꠝꠦꠊꠞ ꠇꠣꠟꠘꠤꠄ ꠀꠘ꠆ꠖꠣꠁꠞ ꠀꠍꠤꠟ। 12 ꠢꠃ ꠘꠥꠞꠞ ꠀꠉꠥꠘꠤꠞ ꠜꠤꠔꠞꠦ ꠕꠣꠇꠤ, ꠝꠣꠛꠥꠖꠦ ꠔꠥꠝꠞꠣꠞꠦ ꠔꠣꠘ ꠇꠣꠟꠣꠝ ꠢꠥꠘꠣꠁꠟꠣ। ꠔꠥꠝꠞꠣ ꠔꠣꠘ ꠝꠥꠈꠞ ꠀꠅꠀꠎ ꠢꠥꠘꠟꠣꠄ, ꠅꠁꠟꠦ ꠔꠣꠘ ꠇꠥꠘꠥ ꠍꠥꠞꠔ-ꠀꠇꠣꠞ ꠖꠦꠈꠣꠁꠍꠂꠘ ꠘꠣ, ꠈꠣꠟꠤ ꠔꠣꠘ ꠉꠟꠣꠞ ꠀꠅꠀꠎ ꠢꠥꠘꠍ। 13 ꠔꠣꠁꠘ ꠘꠤꠎꠦ ꠔꠥꠝꠞꠣꠞꠦ ꠔꠣꠘ ꠟꠉꠦ ꠝꠤꠟꠘꠞ ꠃꠍꠤꠟ꠆ꠟꠣꠞ ꠀꠟ꠆ꠟꠣꠁ ꠅꠀꠖꠣ-ꠌꠥꠇ꠆ꠔꠤꠞ ꠈꠣꠍ ꠖꠡꠐꠣ ꠢꠥꠇꠥꠝ-ꠀꠢꠇꠣꠝ ꠖꠤꠟꠣ, ꠀꠞ ꠇꠁꠟꠣ ꠅꠉꠥꠁꠘ ꠝꠣꠘꠤꠀ ꠌꠟꠣꠞ ꠟꠣꠉꠤ। ꠔꠣꠘ ꠇꠥꠖꠞꠔꠤ ꠀꠔꠦ ꠖꠥꠁ ꠐꠥꠇꠞꠣ ꠙꠣꠔ꠆ꠔꠞꠞ ꠃꠙꠞꠦ ꠁꠔꠣ ꠟꠦꠈꠤꠀꠅ ꠖꠤꠟꠣ। 14 ꠢꠃ ꠡꠝꠄ ꠝꠣꠛꠥꠖꠦ ꠀꠝꠣꠞꠦ ꠢꠥꠇꠥꠝ ꠖꠤꠟꠣ, ꠀꠝꠤ ꠔꠥꠝꠞꠣꠞꠦ ꠔꠣꠘ ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠢꠤꠇꠣꠁꠔꠣꠝ, ꠎꠣꠔꠦ ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠔꠥꠝꠞꠣ ꠎꠦ ꠖꠦꠡ ꠖꠈꠟꠅ ꠎꠣꠁꠞꠣꠄ, ꠢꠘꠅ ꠉꠤꠀ ꠢꠣꠞꠟꠦ ꠅꠔꠣ ꠝꠣꠘꠤꠀ ꠌꠟꠅ।

15 “ꠝꠣꠛꠥꠖꠦ ꠎꠦꠛꠟꠣ ꠘꠥꠞꠞ ꠀꠉꠥꠘꠤꠞ ꠝꠣꠎ ꠕꠣꠇꠤ ꠔꠥꠞ ꠙꠣꠠꠅ ꠔꠥꠝꠞꠣꠞ ꠟꠉꠦ ꠛꠣꠔꠌꠤꠔ ꠇꠞꠍꠟꠣ, ꠢꠃ ꠖꠤꠘ ꠔ ꠔꠥꠝꠞꠣ ꠔꠣꠘ ꠇꠥꠘꠥ ꠍꠥꠞꠔ-ꠀꠇꠣꠞ ꠖꠦꠈꠍ ꠘꠣ। ꠄꠞꠟꠣꠉꠤ ꠔꠥꠝꠞꠣ ꠘꠤꠎꠞ ꠛꠦꠙꠣꠞꠦ ꠈꠥꠛ ꠢꠥꠡꠤꠀꠞ ꠞꠁꠅ 16 ꠎꠣꠔꠦ ꠇꠥꠘꠥ ꠝꠥꠞ꠆ꠔꠤ ꠘꠣ ꠛꠣꠘꠣꠅ, ꠛꠦ-ꠙꠕꠤ ꠛꠘꠤꠀ ꠙꠥꠎꠣ ꠇꠞꠣꠞ ꠈꠤꠀꠟꠦ ꠇꠥꠘꠥ ꠛꠦꠐꠣ ꠛꠣ ꠛꠦꠐꠤꠞ ꠍꠥꠞꠔꠦ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ। 17 ꠝꠣꠐꠤꠞ ꠃꠙꠞꠦ ꠌꠟꠞꠣ ꠇꠥꠘꠥ ꠎꠤꠛ-ꠎꠣꠘꠥꠀꠞꠞ ꠍꠥꠞꠔꠦ, ꠀꠍꠝꠣꠘꠅ ꠃꠠꠞꠣ ꠇꠥꠘꠥ ꠙꠣꠈꠤꠞ ꠍꠥꠞꠔꠦ, 18 ꠛꠥꠇ ꠍꠦꠌꠠꠣꠁꠀ ꠌꠟꠞꠣ ꠇꠥꠘꠥ ꠎꠣꠘꠖꠣꠞꠞ ꠍꠥꠞꠔꠦ, ꠛꠣ ꠙꠣꠘꠤꠔ ꠞꠅꠞꠣ ꠇꠥꠘꠥ ꠎꠣꠘꠖꠣꠞꠞ ꠍꠥꠞꠔꠦ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ। 19 ꠀꠍꠝꠣꠘꠦꠖꠤ ꠌꠣꠁꠀ ꠢꠣꠞꠤ ꠌꠣꠘ꠆ꠖ, ꠡꠥꠞꠥꠎ, ꠔꠦꠞꠣ ꠅꠇꠟ ꠖꠦꠈꠤꠀ ꠅꠃ ꠘꠣꠝꠞ ꠖꠦꠛ-ꠖꠦꠛꠤ ꠛꠣ ꠚꠤꠞꠤꠡ꠆ꠔꠣꠞ ꠙꠥꠎꠣ ꠇꠞꠤꠅ ꠘꠣ, ꠄꠞꠣꠞ ꠈꠦꠎꠝꠔꠅ ꠟꠣꠉꠤꠅ ꠘꠣ। ꠁꠔꠣꠞꠦ ꠔ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠀꠍꠝꠣꠘꠞ ꠔꠟꠞ ꠢꠇꠟ ꠎꠣꠔꠤꠞ ꠟꠣꠉꠤ ꠖꠣꠘ ꠇꠞꠍꠂꠘ। 20 ꠝꠘꠅ ꠞꠣꠈꠤꠅ, ꠝꠣꠛꠥꠖꠦ ꠔꠥꠝꠞꠣꠞꠦ ꠙꠍꠘ꠆ꠖ ꠇꠞꠍꠂꠘ ꠟꠥꠀ ꠉꠟꠣꠘꠤꠞ ꠉꠞꠝ ꠀꠉꠥꠘꠤꠞ ꠉꠣꠔꠅ ꠕꠣꠇꠤ, ꠔꠣꠁꠘ ꠝꠤꠡꠞ ꠖꠦꠡ ꠕꠣꠇꠤ ꠔꠥꠝꠞꠣꠞꠦ ꠛꠣꠞ ꠇꠞꠤ ꠀꠘꠍꠂꠘ, ꠎꠣꠔꠦ ꠔꠥꠝꠞꠣ ꠔꠣꠘ ꠀꠙꠘ ꠙ꠆ꠞꠎꠣ ꠅꠅ, ꠀꠞ ꠅꠈꠘ ꠔ ꠢꠣꠍꠣꠃ ꠔꠣꠘ ꠙ꠆ꠞꠎꠣ ꠅꠁꠍ।

21 “ꠅ ꠛꠘꠤ ꠁꠍꠞꠣꠁꠟ, ꠔꠥꠝꠞꠣꠞ ꠇꠣꠞꠘꠦ ꠝꠣꠛꠥꠖꠦ ꠀꠝꠣꠞ ꠃꠙꠞꠦꠅ ꠉꠥꠍꠣ ꠇꠞꠍꠂꠘ। ꠔꠣꠁꠘ ꠇꠍꠝ ꠈꠣꠁꠀ ꠇꠁꠍꠂꠘ, ꠀꠝꠣꠞꠦ ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠎꠣꠁꠔꠦ ꠖꠤꠔꠣ ꠘꠣꠄ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠞꠣ, ꠅꠃ ꠀꠞꠣꠝꠞ ꠖꠦꠡꠅ ꠀꠝꠣꠞ ꠎꠣꠅꠀ ꠘꠤꠡꠦꠗ। 22 ꠀꠝꠣꠞ ꠝꠃꠔ ꠅꠘꠅꠃ ꠅꠁꠛ। ꠎꠞ꠆ꠖꠣꠘ ꠉꠣꠋ ꠙꠣꠞꠘꠤꠞ ꠢꠥꠇꠥꠝ ꠘꠣꠄ। ꠅꠁꠟꠦ ꠔꠥꠝꠞꠣ ꠉꠣꠋ ꠙꠣꠞ ꠅꠁꠀ ꠢꠃ ꠀꠞꠣꠝꠞ ꠖꠦꠡ ꠖꠈꠟ ꠇꠞꠣꠔ ꠎꠣꠁꠞꠣꠄ। 23 ꠔꠦ ꠔꠥꠝꠞꠣ ꠘꠤꠎꠞ ꠛꠦꠙꠣꠞꠦ ꠢꠥꠡꠤꠀꠞ ꠞꠁꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠟꠉꠦ ꠎꠦ ꠅꠀꠖꠣ-ꠌꠥꠇ꠆ꠔꠤ ꠇꠣꠁꠝ ꠇꠞꠍꠂꠘ, ꠁꠔꠣ ꠚꠣꠃꠞꠤꠅ ꠘꠣ। ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠤꠡꠦꠗ ꠅꠝꠣꠁꠘ꠆ꠘ ꠇꠞꠤꠀ ꠇꠥꠘꠥ ꠎꠤꠘꠤꠡꠞ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ। 24 ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔ ꠝꠢꠣ ꠗꠋꠡꠞ ꠀꠉꠥꠘꠤꠞ ꠟꠣꠈꠣꠘ, ꠔꠣꠁꠘ ꠔ ꠟꠣ-ꠡꠞꠤꠇ, ꠇꠥꠘꠥ ꠡꠞꠤꠇ ꠡꠁꠎ꠆ꠎ ꠇꠞꠂꠘ ꠘꠣ, ꠔꠣꠘ ꠘꠤꠎꠞ ꠙꠣꠅꠘꠣ ꠄꠛꠣꠖꠔ ꠌꠣꠁꠘꠃ ꠌꠣꠁꠘ।”

25 ꠢꠎꠞꠔ ꠝꠥꠍꠣꠄ ꠔꠣꠞꠣꠞꠦ ꠄꠅꠈꠣꠘ ꠇꠁꠟꠣ, “ꠢꠃ ꠀꠞꠣꠝꠞ ꠖꠦꠡꠅ ꠉꠤꠀ ꠢꠣꠞꠤ, ꠔꠥꠝꠞꠣ ꠙꠥꠀ-ꠙꠥꠠꠤꠘ, ꠘꠣꠔꠤ-ꠙꠥꠔꠤꠞ ꠎꠘꠝ ꠖꠤꠀ ꠛꠃꠔ ꠖꠤꠘ ꠛꠡꠔ ꠇꠞꠣꠞ ꠛꠣꠖꠦꠅ ꠎꠥꠖꠤ ꠇꠥ-ꠙꠕꠦ ꠎꠣꠅꠉꠤ, ꠀꠞ ꠇꠥꠘꠥ ꠎꠤꠘꠤꠡꠞ ꠍꠥꠞꠔꠦ ꠝꠥꠞ꠆ꠔꠤ ꠛꠣꠘꠣꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦꠔꠣꠞꠦ ꠊꠤꠘ꠆ꠘꠣ ꠇꠞꠂꠘ, ꠔꠥꠝꠞꠣ ꠅꠔꠣ ꠇꠞꠅ, 26 ꠔꠦ ꠀꠝꠤ ꠅꠈꠘ ꠀꠍꠝꠣꠘ-ꠎꠝꠤꠘ ꠡꠣꠇ꠆ꠇꠤ ꠞꠣꠈꠤꠀ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠇꠁꠀꠞ, ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠎꠦ ꠖꠦꠡ ꠖꠈꠟ ꠇꠞꠣꠔ ꠎꠣꠁꠞꠣꠄ, ꠢꠤꠘꠅ ꠈꠥꠛ ꠎꠟꠖꠤ ꠔꠥꠝꠞꠣꠞ ꠘꠣꠝ ꠝꠤꠐꠤꠎꠤꠛ। ꠛꠦꠡꠤ ꠖꠤꠘ ꠐꠤꠇꠔꠣꠄ ꠙꠣꠞꠔꠣꠄ ꠘꠣꠄ, ꠘꠤꠌ꠆ꠌꠤꠔ ꠛꠤꠘꠣꠡ ꠅꠁꠛꠣꠄ। 27 ꠝꠣꠛꠥꠖꠦ ꠔꠥꠝꠞꠣꠞꠦ ꠘꠣꠘꠣꠘ ꠎꠣꠔꠤꠞ ꠝꠣꠎꠦ ꠍꠤꠔ꠆ꠞꠣꠁ ꠖꠤꠛꠣ, ꠔꠣꠁꠘ ꠈꠦꠖꠣꠁ ꠖꠤꠀ ꠎꠦꠈꠣꠘꠅ ꠙꠣꠑꠣꠁꠛꠣ, ꠢꠘꠅ ꠔꠥꠝꠞꠣꠞ ꠈꠥꠛ ꠇꠝ ꠝꠣꠘꠥꠡ ꠎꠤꠘ꠆ꠖꠣ ꠞꠁꠛꠣ। 28 ꠅꠃ ꠢꠣꠟꠔꠦ ꠔꠥꠝꠞꠣ ꠝꠣꠘꠥꠡ-ꠀꠔꠦ ꠛꠣꠘꠣꠁꠟ ꠝꠥꠞ꠆ꠔꠤꠞ ꠙꠥꠎꠣ ꠇꠞꠛꠣꠄ, ꠎꠦꠔꠣꠄ ꠌꠃꠈꠦ ꠖꠦꠈꠦ ꠘꠣ, ꠇꠣꠘꠦ ꠢꠥꠘꠦ ꠘꠣ, ꠈꠣꠁꠔ ꠙꠣꠞꠦ ꠘꠣ, ꠇꠥꠘꠥꠎꠣꠔ ꠊꠦꠞꠣꠘꠅ ꠢꠥꠋꠉꠤꠔ ꠙꠣꠞꠦ ꠘꠣ, ꠟꠣꠇꠠꠤꠞ ꠀꠞ ꠙꠣꠔ꠆ꠔꠞꠞ ꠅꠔꠣ ꠝꠥꠞ꠆ꠔꠤꠞ ꠙꠥꠎꠣ ꠇꠞꠛꠣꠄ। 29 ꠔꠣ-ꠅ ꠢꠘꠅ ꠞꠁꠀ ꠎꠥꠖꠤ ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠔꠣꠟ꠆ꠟꠣꠡ ꠇꠞꠅ, ꠔꠦ ꠔꠣꠁꠘ ꠔꠥꠝꠞꠣꠞꠦ ꠖꠤꠖꠣꠞ ꠖꠤꠛꠣ। ꠇꠕꠣ ꠅꠁꠟ, ꠖꠤꠟꠦ-ꠎꠣꠘꠦ ꠇꠣꠔꠞ ꠅꠁꠀ ꠔꠣꠘꠦ ꠒꠣꠇꠤꠔꠦ ꠅꠁꠛ। 30 ꠢꠦꠡ-ꠝꠦꠡ ꠔꠥꠝꠞꠣ ꠝꠍꠤꠛꠔꠅ ꠙꠠꠤꠀ ꠢꠤꠞꠛꠣꠞ ꠔꠃꠛꠣ ꠇꠞꠤꠀ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝ ꠟꠁꠛꠣꠄ, ꠀꠞ ꠔꠣꠘ ꠈꠥꠡꠤ ꠝꠣꠚꠤꠇ ꠌꠟꠛꠣꠄ। 31 ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠞꠢꠝꠣꠘꠥꠞ ꠞꠢꠤꠝ, ꠔꠣꠁꠘ ꠔꠥꠝꠞꠣꠞꠦ ꠚꠣꠟꠣꠁꠔꠣ ꠘꠣꠄ ꠛꠣ ꠛꠤꠘꠣꠡ ꠇꠞꠔꠣ ꠘꠣꠄ। ꠀꠞ ꠔꠣꠁꠘ ꠇꠍꠝ ꠈꠣꠁꠀ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠟꠉꠦ ꠎꠦ ꠅꠀꠖꠣ-ꠌꠥꠇ꠆ꠔꠤ ꠇꠞꠍꠂꠘ, ꠁꠔꠣꠅ ꠚꠣꠃꠞꠤꠔꠣ ꠘꠣꠄ।”

32 ꠢꠎꠞꠔ ꠝꠥꠍꠣꠄ ꠔꠣꠞꠣꠞꠦ ꠄꠅꠈꠣꠘ ꠇꠁꠞꠣ, “ꠀꠟ꠆ꠟꠣ ꠙꠣꠇꠦ ꠎꠝꠤꠘꠅ ꠝꠣꠘꠥꠡ ꠙꠄꠖꠣ ꠇꠞꠣꠞ ꠛꠣꠖ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ, ꠔꠥꠝꠞꠣꠞ ꠀꠉꠞ ꠢꠇ꠆ꠇꠟ ꠎꠝꠣꠘꠣꠞ ꠁꠔꠤꠢꠣꠡ ꠔꠥꠇꠣꠅ, ꠀꠡ꠆ꠔꠣ ꠀꠍꠝꠣꠘ-ꠎꠝꠤꠘꠞ ꠄꠇ ꠝꠣꠕꠣ ꠕꠣꠇꠤ ꠀꠞꠇ ꠝꠣꠕꠣ ꠔꠥꠇꠣꠁꠀ ꠖꠦꠈꠅ, ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠎꠔ ꠀꠎꠛ ꠊꠐꠘꠣ ꠊꠐꠤꠍꠦ, ꠁꠔꠣ ꠟꠣꠈꠣꠘ ꠖꠥꠍꠞꠣ ꠇꠥꠘꠥ ꠊꠐꠘꠣ ꠊꠐꠍꠦ ꠘꠤ? ꠛꠣ ꠁꠟꠣ ꠇꠥꠘ꠆ꠔꠣ ꠇꠥꠘꠥꠖꠤꠘ ꠢꠥꠘꠣ ꠉꠦꠍꠦ ꠘꠤ? 33 ꠀꠞ ꠘꠥꠞꠞ ꠀꠉꠥꠁꠘ ꠕꠣꠇꠤ ꠀꠟ꠆ꠟꠣ ꠙꠣꠇꠞ ꠛꠥꠟꠤ ꠢꠥꠘꠣꠞ ꠛꠣꠖꠦ, ꠈꠣꠟꠤ ꠔꠥꠝꠞꠣ ꠍꠣꠠꠣ ꠖꠥꠍꠞꠣ ꠇꠥꠘꠥ ꠎꠣꠔꠤ ꠎꠤꠘ꠆ꠖꠣ ꠞꠁꠍꠦ ꠘꠤ? 34 ꠔꠥꠝꠞꠣ ꠔꠣꠟ꠆ꠟꠣꠡ ꠇꠞꠤ ꠖꠦꠈꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠌꠈꠥꠞ ꠍꠣꠝꠘꠦ ꠝꠤꠡꠞ ꠖꠦꠡꠅ ꠔꠥꠝꠞꠣꠞ ꠟꠣꠉꠤ ꠎꠔꠔꠣ ꠇꠞꠍꠂꠘ, ꠀꠡ꠆ꠔꠣ ꠎꠉꠔꠞ ꠇꠥꠘꠥ ꠖꠦꠛ-ꠖꠦꠛꠤꠄ ꠁꠟꠣ ꠇꠞꠔ ꠙꠣꠞꠍꠦ ꠘꠤ? ꠁꠟꠣ ꠙꠞꠤꠇ꠆ꠇꠣ ꠟꠅꠀ, ꠇꠥꠖꠞꠔꠤ ꠘꠤꠡꠣꠘꠣ ꠖꠦꠈꠣꠘꠤ, ꠟꠣꠠꠣꠁ-ꠎꠥꠖ꠆ꠖ ꠇꠞꠣ, ꠝꠎꠛꠥꠔ ꠀꠔꠞ ꠛꠟ ꠖꠦꠈꠣꠘꠤ, ꠛꠠ ꠛꠠ ꠔꠣꠁꠎ꠆ꠎꠥꠛꠤ ꠟꠤꠟꠣ-ꠈꠦꠟꠣ ꠀꠞ ꠒꠞ-ꠈꠚ ꠖꠦꠈꠣꠁꠀ, ꠎꠦꠇꠥꠘꠥ ꠎꠣꠔꠤꠞꠦ ꠅꠁꠘ꠆ꠘ ꠎꠣꠔꠤꠞ ꠜꠤꠔꠞꠦ ꠕꠣꠇꠤ ꠛꠣꠞ ꠇꠞꠤ ꠀꠘꠤꠀ ꠘꠤꠎꠞ ꠙ꠆ꠞꠎꠣ ꠛꠣꠘꠣꠁꠔ ꠙꠣꠞꠍꠦ ꠘꠤ?

35 “ꠔꠦ ꠔꠥꠝꠞꠣ ꠎꠣꠔꠦ ꠙꠥꠞꠣꠙꠥꠞ ꠛꠥꠎꠅ, ꠅꠃ ꠀꠟ꠆ꠟꠣꠃ ꠅꠁꠟꠣ ꠝꠣꠛꠥꠖ, ꠔꠣꠁꠘ ꠍꠣꠠꠣ ꠀꠞ ꠇꠥꠘꠥ ꠝꠣꠛꠥꠖ ꠘꠣꠁ, ꠅꠈꠣꠘ ꠛꠥꠎꠣꠘꠤꠞ ꠟꠣꠉꠤꠃ ꠔꠥꠝꠞꠣꠞꠦ ꠅꠔꠔꠣ ꠖꠦꠈꠣꠘꠤ ꠅꠁꠍꠤꠟ। 36 ꠔꠥꠝꠞꠣꠞꠦ ꠢꠦꠖꠣꠄꠅꠔ ꠇꠞꠣꠞ ꠈꠤꠀꠟꠦ ꠔꠣꠁꠘ ꠛꠦꠢꠦꠡ꠆ꠔꠞ ꠀꠞꠡ ꠕꠣꠇꠤ ꠔꠣꠘ ꠘꠤꠎꠞ ꠛꠥꠟꠤ ꠢꠥꠘꠣꠁꠟꠣ, ꠀꠞ ꠎꠝꠤꠘꠞ ꠃꠙꠞꠦ ꠖꠦꠈꠣꠁꠟꠣ ꠘꠥꠞꠞ ꠀꠉꠥꠘꠤꠞ ꠇꠥꠘ꠆ꠒꠟꠤ। ꠅꠃ ꠀꠉꠥꠘꠤꠞ ꠝꠣꠎ ꠕꠣꠇꠤ ꠛꠣꠞꠅꠁꠟ ꠀꠟ꠆ꠟꠣꠁ ꠛꠥꠟꠤ ꠔꠥꠝꠞꠣ ꠢꠥꠘꠍ। 37 ꠔꠣꠁꠘ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠞꠦ ꠝꠢꠛ꠆ꠛꠔ ꠇꠞꠔꠣ, ꠄꠞꠟꠣꠉꠤ ꠄꠞꠣꠞ ꠝꠃꠔꠞ ꠛꠣꠖꠦ ꠔꠣꠞꠣꠞ ꠀꠅꠟꠣꠖ ꠅꠇꠟꠞꠦꠅ ꠙꠍꠘ꠆ꠖ ꠇꠞꠍꠂꠘ। ꠀꠞ ꠔꠣꠁꠘ ꠡ꠆ꠛꠄꠅꠋ ꠀꠎꠤꠞ ꠅꠁꠀ ꠔꠣꠘ ꠝꠢꠣ ꠇꠥꠖꠞꠔꠤ ꠈꠦꠝꠔꠣ ꠈꠣꠐꠣꠁꠀ ꠔꠥꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠍꠂꠘ। 38 ꠔꠣꠘ ꠈꠤꠀꠟ ꠀꠍꠤꠟ, ꠔꠥꠝꠣꠔꠣꠘ ꠕꠣꠇꠤ ꠛꠠ ꠀꠞ ꠛꠟꠛꠣꠘ ꠎꠣꠔꠤ ꠅꠇꠟꠞꠦ ꠔꠥꠝꠞꠣꠞ ꠍꠣꠝꠘ ꠕꠣꠇꠤ ꠈꠦꠖꠣꠁꠀ ꠢꠣꠞꠤ, ꠔꠣꠞꠣꠞ ꠖꠦꠡꠅ ꠘꠤꠀ ꠢꠃ ꠢꠇꠟ ꠖꠦꠡꠞ ꠝꠣꠟꠤꠇꠣꠘꠣ ꠔꠥꠝꠞꠣꠞꠦ ꠖꠤꠔꠣ। ꠅꠈꠘ ꠖꠦꠈꠞꠣꠄ ꠘꠤ, ꠔꠣꠁꠘ ꠔ ꠁꠔꠣ ꠇꠞꠍꠂꠘ।

39 “ꠔꠦ ꠅꠈꠘꠇꠥꠞ ꠅꠃ ꠔꠣꠟꠤꠝ ꠝꠘꠅ ꠞꠣꠈꠤꠅ, ꠖꠤꠟꠞ ꠝꠣꠎꠦ ꠉꠣꠕꠤꠀ ꠕꠁꠅ, ꠢꠥꠘꠅ, ꠈꠣꠟꠤ ꠅꠃ ꠀꠟ꠆ꠟꠣꠃ ꠃꠙꠞꠦ ꠀꠍꠝꠣꠘ ꠀꠞ ꠔꠟꠦ ꠎꠝꠤꠘꠞ ꠝꠣꠟꠤꠇ, ꠔꠣꠁꠘ ꠍꠣꠠꠣ ꠖꠥꠍꠞꠣ ꠇꠥꠘꠥ ꠝꠣꠛꠥꠖ ꠘꠣꠁ। 40 ꠄꠞꠟꠣꠉꠤ ꠀꠝꠤ ꠅꠈꠘ ꠎꠦ ꠡꠞꠤꠅꠔ ꠀꠞ ꠢꠥꠇꠥꠝ-ꠀꠢꠇꠣꠝ ꠎꠣꠘꠣꠁꠞꠣꠝ, ꠔꠥꠝꠞꠣ ꠁꠔꠣ ꠝꠣꠘꠤꠀ ꠌꠟꠤꠅ, ꠔꠦꠃ ꠔꠥꠝꠞꠣ ꠀꠞ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠞ ꠜꠣꠟꠣꠁ ꠅꠁꠛ। ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠌꠤꠞꠇꠣꠟꠞ ꠟꠣꠉꠤ ꠔꠥꠝꠞꠣꠞꠦ ꠎꠦ ꠖꠦꠡ ꠖꠣꠘ ꠇꠞꠞꠣ, ꠅꠃ ꠖꠦꠡꠅ ꠔꠥꠝꠞꠣꠞ ꠢꠣꠄꠀꠔꠤ ꠟꠣꠝ꠆ꠛꠣ ꠅꠁꠛ।”

41 ꠛꠣꠖꠦ ꠝꠥꠍꠣ ꠘꠛꠤꠄ ꠎꠞ꠆ꠖꠣꠘ ꠉꠣꠋꠉꠞ ꠙꠥꠛ-ꠙꠣꠞꠞ ꠔꠤꠘꠈꠣꠘ ꠐꠣꠃꠘ ꠀꠟꠉꠣꠁꠟꠣ, 42 ꠎꠣꠔꠦ ꠇꠥꠘꠥ ꠈꠥꠘꠤ ꠝꠣꠘꠥꠡ ꠜꠣꠉꠤꠀ ꠉꠤꠀ ꠅꠃ ꠐꠣꠃꠘꠅ ꠎꠣꠘ ꠛꠣꠌꠣꠁꠔ ꠙꠣꠞꠦ। ꠎꠦ ꠝꠣꠘꠡꠦ ꠈꠥꠘ ꠇꠞꠣꠞ ꠇꠥꠘꠥ ꠌꠤꠘ꠆ꠔꠣ ꠛꠣ ꠖꠥꠡꠝꠘꠤ ꠜꠣꠛ ꠀꠍꠤꠟ ꠘꠣ, ꠈꠣꠟꠤ ꠀꠈꠔꠣ ꠅꠘꠤꠌ꠆ꠍꠣꠄ ꠇꠦꠃꠞꠞꠦ ꠝꠣꠞꠤꠟꠣꠄ, ꠢꠦ ꠜꠣꠉꠤꠀ ꠛꠘꠛꠣꠡꠤ ꠛꠘꠤꠀ ꠅꠘꠅ ꠞꠁꠔ ꠙꠣꠞꠛ। 43 ꠔꠤꠘꠅ ꠐꠣꠃꠘ ꠅꠁꠟ, ꠞꠥꠛꠦꠘ ꠈꠣꠘ꠆ꠖꠣꠘꠞ ꠟꠣꠉꠤ ꠝꠞꠥꠜꠥꠝꠤꠞ ꠇꠤꠘꠣꠞꠣꠞ ꠙꠣꠠꠤꠀ ꠕꠟ ꠎꠣꠉꠣꠞ ꠛꠣꠍꠤꠞ ꠘꠣꠝꠞ ꠐꠣꠃꠘ। ꠍꠣꠖꠥ ꠈꠣꠘ꠆ꠖꠣꠘꠞ ꠟꠣꠉꠤ ꠉꠤꠟꠤꠅꠖ ꠄꠟꠣꠇꠣꠞ ꠞꠣꠝꠥꠔ ꠐꠣꠃꠘ। ꠝꠣꠘꠡꠣ ꠈꠣꠘ꠆ꠖꠣꠘꠞ ꠟꠣꠉꠤ ꠛꠣꠡꠘ ꠖꠦꠡꠞ ꠉꠥꠟꠣꠘ ꠐꠣꠃꠘ।

44 ꠝꠥꠍꠣ ꠘꠛꠤꠄ ꠛꠘꠤ ꠁꠍꠞꠣꠁꠟꠞ ꠍꠣꠝꠘꠦ ꠡꠞꠤꠅꠔꠞ ꠅꠃ ꠢꠥꠇꠥꠝ ꠛꠄꠀꠘ ꠇꠞꠟꠣ, 45 ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠅꠁꠀ ꠀꠅꠀꠞ ꠛꠣꠖꠦ, ꠢꠇꠟ ꠢꠥꠡꠤꠀꠞꠤꠞ ꠇꠕꠣ, ꠡꠞꠤꠅꠔꠞ ꠘꠤꠅꠝ-ꠇꠣꠘꠥꠘ ꠀꠞ ꠢꠥꠇꠥꠝ-ꠀꠢꠇꠣꠝ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁꠟꠣ। 46 ꠔꠣꠁꠘ ꠎꠞ꠆ꠖꠣꠘ ꠉꠣꠋꠉꠞ ꠙꠥꠛꠞ ꠙꠣꠞꠅ, ꠢꠤꠡꠛꠘ ꠄꠟꠣꠇꠣꠞ ꠀꠝꠥꠞꠤ ꠎꠣꠔꠤꠞ ꠞꠣꠎꠣ ꠍꠤꠢꠥꠘꠞ ꠖꠦꠡꠞ ꠛꠣꠄꠔ-ꠙꠤꠃꠞꠞ ꠍꠣꠝꠘꠞ ꠔꠟ ꠎꠣꠉꠣꠔ ꠁꠔꠣ ꠇꠁꠟꠣ। ꠝꠤꠡꠞ ꠕꠣꠇꠤ ꠛꠣꠞ ꠅꠁꠀ ꠀꠁꠀ ꠢꠣꠞꠟꠦ ꠝꠥꠍꠣ ꠘꠛꠤꠄ ꠀꠞ ꠛꠘꠤ ꠁꠍꠞꠣꠁꠟꠦ ꠎꠥꠖ꠆ꠖ ꠇꠞꠤ ꠅꠃ ꠛꠣꠖꠡꠣ ꠍꠤꠢꠥꠘꠞꠦ ꠀꠞꠣꠁꠍꠟꠣ। 47 ꠔꠣꠞꠣ ꠛꠣꠖꠡꠣ ꠍꠤꠢꠥꠘꠞ ꠖꠦꠡ ꠀꠞ ꠛꠣꠡꠘꠞ ꠛꠣꠖꠡꠣ ꠃꠎꠞ ꠖꠦꠡ ꠖꠈꠟ ꠇꠞꠍꠟꠣ। ꠀꠝꠥꠞꠤ ꠎꠣꠔꠤꠞ ꠅꠃ ꠖꠥꠁꠅ ꠛꠣꠖꠡꠣꠞ ꠛꠣꠖꠡꠣꠁ ꠀꠍꠤꠟ ꠎꠞ꠆ꠖꠣꠘ ꠉꠣꠋꠉꠞ ꠙꠥꠛꠞ ꠙꠣꠞꠅ। 48 ꠅꠞꠘꠘ ꠈꠣꠟꠞ ꠙꠣꠞꠞ ꠀꠞꠥꠀꠞ ꠐꠣꠃꠘ ꠕꠣꠇꠤ ꠍꠤꠞꠤꠅꠘ ꠙꠣꠠ, ꠝꠣꠘꠤ ꠢꠞ꠆ꠝꠥꠘ ꠙꠣꠠ ꠙꠞ꠆ꠎꠘ꠆ꠔ ꠅꠃ ꠖꠥꠁꠅ ꠞꠣꠎꠣꠞ ꠡꠤꠝꠣꠘꠣ ꠀꠍꠤꠟ। 49 ꠄꠞ ꠜꠤꠔꠞꠦ ꠀꠍꠦ ꠎꠞ꠆ꠖꠣꠘ ꠉꠣꠋꠉꠞ ꠙꠥꠛꠞ ꠙꠣꠞꠞ ꠀꠡ꠆ꠔꠣ ꠄꠟꠣꠇꠣ। ꠁꠇꠐꠣ ꠙꠤꠍꠉꠣ ꠙꠣꠠꠞ ꠐꠤꠟ꠆ꠟꠣꠞ ꠔꠟꠦꠖꠤ ꠀꠞꠣꠛꠣ ꠡꠣꠉꠞꠞ ꠇꠤꠘꠣꠞꠣ ꠙꠞ꠆ꠎꠘ꠆ꠔ ꠉꠦꠍꠦ।