5
ꠀꠟ꠆ꠟꠣꠞ ꠖꠦꠅꠀ ꠈꠣꠍ ꠖꠡ ꠢꠥꠇꠥꠝ
1 ꠝꠥꠍꠣ ꠘꠛꠤꠄ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠞꠦ ꠖꠟꠣ ꠇꠞꠣꠁꠟꠣ, ꠔꠣꠞꠣꠞꠦ ꠇꠁꠟꠣ, “ꠅ ꠛꠘꠤ ꠁꠍꠞꠣꠁꠟ, ꠀꠝꠤ ꠅꠈꠘ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠀꠞ ꠀꠁꠘ-ꠇꠣꠘꠥꠘ ꠔꠥꠝꠞꠣꠞꠦ ꠎꠣꠘꠣꠁꠝꠥ, ꠁꠔꠣ ꠔꠥꠝꠞꠣ ꠈꠤꠀꠟ ꠇꠞꠤ ꠢꠥꠘꠤꠅ, ꠢꠥꠘꠤꠀ ꠖꠤꠟꠅ ꠉꠣꠕꠤꠀ ꠞꠣꠈꠤꠅ ꠀꠞ ꠀꠝꠟ ꠇꠞꠤꠅ। 2 ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠞ ꠙꠣꠠꠅ ꠀꠝꠞꠣꠞ ꠟꠉꠦ ꠄꠇ ꠅꠀꠖꠣ-ꠌꠥꠇ꠆ꠔꠤ ꠛꠅꠀꠁꠟ ꠇꠞꠍꠂꠘ। 3 ꠅꠃ ꠌꠥꠇ꠆ꠔꠤ ꠔꠣꠁꠘ ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠟꠉꠦ ꠘꠣ ꠇꠞꠤꠀ, ꠀꠝꠞꠣꠞ ꠟꠉꠦ ꠇꠞꠍꠂꠘ, ꠀꠝꠞꠣ ꠎꠔ ꠎꠘ ꠅꠘꠅ ꠎꠤꠘ꠆ꠖꠣ ꠀꠍꠤ, ꠀꠝꠞꠣꠞ ꠟꠉꠦ ꠇꠞꠍꠂꠘ। 4 ꠝꠣꠛꠥꠖꠦ ꠅꠃ ꠙꠣꠠꠞ ꠃꠙꠞꠦ ꠘꠥꠞꠞ ꠀꠉꠥꠘꠤꠞ ꠝꠣꠎ ꠕꠣꠇꠤ ꠔꠥꠝꠞꠣꠞ ꠟꠉꠦ ꠍꠣꠝꠘꠣ-ꠍꠣꠝꠘꠤ ꠛꠣꠔꠌꠤꠔ ꠇꠞꠍꠂꠘ। 5 ꠔꠥꠝꠞꠣ ꠀꠉꠥꠘꠤꠞ ꠒꠞꠦ ꠢꠃ ꠡꠝꠄ ꠙꠣꠠꠞ ꠃꠙꠞꠦ ꠃꠑꠟꠣꠄ ꠘꠣ, ꠄꠞꠟꠣꠉꠤ ꠀꠝꠤ ꠔꠥꠝꠞꠣ ꠀꠞ ꠝꠣꠛꠥꠖꠞ ꠝꠣꠎꠈꠣꠘꠅ ꠃꠛꠣꠁꠀ, ꠔꠣꠘ ꠝꠥꠈꠞ ꠛꠥꠟꠤ ꠔꠥꠝꠞꠣꠞꠦ ꠢꠥꠘꠣꠁꠍꠤ। ꠔꠣꠁꠘ ꠇꠁꠍꠟꠣ,
6 “ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ। ꠝꠤꠡꠞ ꠖꠦꠡꠞ ꠉꠥꠟꠣꠝꠤ ꠕꠣꠇꠤ ꠀꠝꠤꠃ ꠔꠥꠝꠞꠣꠞꠦ ꠈꠣꠟꠣꠍ ꠇꠞꠤ ꠀꠘꠍꠤ।
7 “ꠀꠝꠣꠞ ꠛꠖꠟꠣ ꠔꠥꠝꠞꠣ ꠖꠥꠍꠞꠣ ꠇꠥꠘꠥ ꠖꠦꠛꠔꠣ ꠝꠣꠘꠤꠅ ꠘꠣ।
8 “ꠙꠥꠎꠣ ꠇꠞꠣꠞ ꠈꠤꠀꠟꠦ ꠔꠥꠝꠞꠣ ꠇꠥꠘꠥ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ, ꠀꠍꠝꠣꠘ, ꠎꠝꠤꠘ ꠛꠣ ꠙꠣꠘꠤꠞ ꠔꠟꠦ ꠎꠔꠔꠣ ꠀꠍꠦ, ꠁꠔꠣ ꠇꠥꠘꠥꠔꠣꠞ ꠍꠥꠞꠔꠦ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ। 9 ꠔꠥꠝꠞꠣ ꠁꠔꠣꠞ ꠙꠥꠎꠣ ꠇꠞꠤꠅ ꠘꠣ, ꠁꠔꠣꠞ ꠡꠦꠛꠣ-ꠎꠔꠘ ꠇꠞꠤꠅ ꠘꠣ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ, ꠇꠥꠘꠥ ꠡꠞꠤꠇ ꠡꠁꠎ꠆ꠎ ꠇꠞꠤ ꠘꠣ। ꠀꠝꠣꠞꠦ ꠎꠦꠞꠣ ꠝꠣꠘꠦ ꠘꠣ, ꠀꠝꠤ ꠔꠣꠞꠣꠞ ꠉꠥꠘꠣꠞ ꠡꠣꠎꠣ ꠖꠦꠁ, ꠔꠣꠞꠣꠞ ꠙꠄꠟꠣ ꠍꠤꠠꠤ ꠕꠣꠇꠤ ꠌꠣꠁꠞ ꠍꠤꠠꠤ ꠀꠅꠟꠣꠖ ꠙꠞ꠆ꠎꠘ꠆ꠔ*5:9 ꠝꠥꠟ ꠁꠛ꠆ꠞꠣꠘꠤ: ꠔꠤꠍꠞꠣ ꠍꠤꠠꠤ ꠙꠞ꠆ꠎꠘ꠆ꠔ ꠀꠞ ꠌꠣꠁꠞ ꠘꠝ꠆ꠛꠞ ꠍꠤꠠꠤ ꠙꠞ꠆ꠎꠘ꠆ꠔ ꠡꠣꠎꠣ ꠖꠦꠁ। 10 ꠅꠁꠟꠦ ꠎꠦꠞꠣ ꠀꠝꠣꠞ ꠀꠡꠤꠇ ꠛꠘꠤꠀ ꠀꠝꠣꠞ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠦ, ꠀꠝꠤ ꠔꠣꠞꠣꠞ ꠀꠎꠣꠞ ꠀꠎꠣꠞ ꠅꠀꠞꠤꠡ ꠙꠞ꠆ꠎꠘ꠆ꠔ ꠀꠝꠣꠞ ꠅꠛꠤꠞꠣꠝ ꠝꠣꠄꠀ-ꠝꠢꠛ꠆ꠛꠔ ꠖꠦꠈꠣꠁꠝꠥ।
11 “ꠛꠦꠇꠣꠝꠣ ꠇꠥꠘꠥ ꠇꠣꠞꠘꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝ ꠝꠥꠈꠅ ꠟꠁꠅ ꠘꠣ। ꠇꠦꠃ ꠎꠥꠖꠤ ꠈꠣꠝꠈꠣ ꠝꠣꠛꠥꠖꠞ ꠘꠣꠝ ꠟꠄ, ꠔꠦ ꠇꠥꠘꠥꠝꠘ꠆ꠔꠦꠃ ꠀꠝꠣꠞ ꠡꠣꠎꠣ ꠕꠣꠇꠤ ꠞꠦꠢꠣꠁ ꠙꠣꠁꠔ ꠘꠣꠄ।
12 “ꠀꠞ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ, ꠎꠥꠝ꠆ꠝꠣꠛꠣꠞꠞꠦ ꠙꠛꠤꠔ꠆ꠞ ꠖꠤꠘ ꠝꠣꠘꠤꠅ। 13 ꠢꠣꠙ꠆ꠔꠣꠞ ꠍꠄꠖꠤꠘ ꠔꠥꠝꠞꠣ ꠇꠣꠝ-ꠇꠣꠎ ꠇꠞꠤꠅ, ꠔꠥꠝꠞꠣꠞ ꠖꠞꠇꠣꠞꠤ ꠢꠇꠟ ꠇꠣꠝ ꠡꠣꠞꠤꠅ। 14 ꠅꠁꠟꠦ ꠡꠣꠔ ꠘꠝ꠆ꠛꠞ ꠖꠤꠘ ꠅꠁꠟ ꠎꠥꠝ꠆ꠝꠣꠛꠣꠞ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠎꠤꠞꠣꠁꠛꠣꠞ ꠖꠤꠘ। ꠁ ꠖꠤꠘ ꠔꠥꠝꠞꠣ, ꠔꠥꠝꠞꠣꠞ ꠙꠥꠀ-ꠙꠥꠠꠤꠘ, ꠉꠥꠟꠣꠝ-ꠛꠣꠘ꠆ꠖꠤꠘ, ꠉꠞꠥ-ꠉꠣꠗꠣꠁꠘ, ꠔꠥꠝꠞꠣꠞ ꠉꠣꠃꠔ ꠛꠣ ꠐꠣꠃꠘꠅ ꠞꠅꠞꠣ ꠝꠥꠍꠣꠚꠤꠞ ꠛꠣ ꠜꠤꠘ-ꠖꠦꠡꠤ, ꠇꠦꠃ ꠇꠥꠘꠥꠎꠣꠔꠞ ꠇꠣꠝ-ꠇꠣꠎ ꠇꠞꠤꠅ ꠘꠣ। ꠔꠥꠝꠣꠞ ꠉꠥꠟꠣꠝ-ꠛꠣꠘ꠆ꠖꠤꠄꠅ ꠔꠥꠝꠣꠞ ꠟꠣꠈꠣꠘ ꠎꠤꠞꠣꠁꠛꠣ। 15 ꠝꠘꠅ ꠞꠣꠈꠤꠅ, ꠝꠤꠡꠞ ꠖꠦꠡꠅ ꠕꠣꠇꠔꠦ ꠔꠥꠝꠞꠣꠅ ꠅꠟꠣ ꠉꠥꠟꠣꠝ ꠀꠍꠟꠣꠄ, ꠀꠞ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠘ ꠛꠟꠀꠟꠣ-ꠝꠎꠛꠥꠔ ꠇꠥꠖꠞꠔꠤ ꠀꠔꠖꠤ ꠔꠥꠝꠞꠣꠞꠦ ꠀꠎꠣꠖ ꠇꠞꠤ ꠀꠘꠍꠂꠘ। ꠄꠞꠟꠣꠉꠤ ꠔꠣꠁꠘ ꠢꠥꠇꠥꠝ ꠖꠤꠍꠂꠘ, ꠔꠥꠝꠞꠣ ꠎꠥꠝ꠆ꠝꠣꠛꠣꠞꠞꠦ ꠙꠛꠤꠔ꠆ꠞ ꠖꠤꠘ ꠝꠣꠘꠔꠣꠄ।
16 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠔꠥꠝꠞꠣꠞ ꠝꠣ-ꠛꠣꠚꠞꠦ ꠁꠎ꠆ꠎꠔ ꠇꠞꠤꠅ। ꠔꠦꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦ ꠖꠦꠡ ꠖꠤꠞꠣ, ꠢꠃ ꠖꠦꠡꠅ ꠔꠥꠝꠞꠣꠞ ꠢꠣꠄꠀꠔꠤ ꠛꠣꠠꠤꠛ ꠀꠞ ꠔꠥꠝꠞꠣꠞ ꠜꠣꠟꠣꠁ ꠅꠁꠛ।
17 “ꠈꠥꠘ ꠇꠞꠤꠅ ꠘꠣ।
18 “ꠎꠤꠘꠣ ꠇꠞꠤꠅ ꠘꠣ।
19 “ꠌꠥꠞꠤ ꠇꠞꠤꠅ ꠘꠣ।
20 “ꠇꠦꠃꠞꠞ ꠛꠤꠞꠥꠖ꠆ꠖꠦ ꠝꠤꠍꠣ ꠡꠣꠇ꠆ꠇꠤ ꠖꠤꠅ ꠘꠣ।
21 “ꠙꠞꠞ ꠛꠃꠞ ꠛꠣꠄ ꠟꠣꠟꠌ ꠇꠞꠤꠅ ꠘꠣ। ꠙꠞꠞ ꠊꠞ-ꠛꠣꠠꠤ, ꠎꠝꠤ-ꠝꠤꠞꠣꠡ, ꠉꠥꠟꠣꠝ-ꠛꠣꠘ꠆ꠖꠤ, ꠉꠞꠥ-ꠉꠣꠗꠣ, ꠛꠣ ꠇꠥꠘꠥ ꠎꠤꠘꠤꠡꠞ ꠛꠣꠄ ꠟꠣꠟꠌ ꠇꠞꠤꠅ ꠘꠣ।
22 “ꠝꠘꠅ ꠞꠣꠈꠤꠅ, ꠡ꠆ꠛꠄꠅꠋ ꠝꠣꠛꠥꠖꠦ ꠔꠥꠝꠞꠣꠞꠦ ꠔꠥꠞ ꠙꠣꠠꠞ ꠃꠙꠞꠞ ꠢꠃ ꠘꠥꠞꠞ ꠀꠉꠥꠁꠘ ꠕꠣꠇꠤ, ꠝꠦꠊꠞ ꠇꠣꠟꠘꠤ ꠀꠞ ꠉꠁꠘ ꠀꠘ꠆ꠖꠣꠞꠤꠞ ꠜꠤꠔꠞꠦ ꠕꠣꠇꠤ, ꠈꠥꠛ ꠎꠥꠞꠦ ꠎꠥꠞꠦ ꠅꠃ ꠢꠥꠇꠥꠝ ꠖꠤꠍꠂꠘ। ꠈꠣꠟꠤ ꠅꠃ ꠢꠥꠇꠥꠝ-ꠀꠢꠇꠣꠝ ꠍꠣꠠꠣ ꠔꠥꠝꠞꠣꠞꠦ ꠀꠞ ꠇꠥꠘꠥꠔꠣ ꠇꠁꠍꠂꠘ ꠘꠣ। ꠛꠣꠖꠦ ꠅꠃ ꠇꠣꠟꠣꠝ ꠅꠇꠟꠞꠦ ꠖꠥꠁ ꠐꠥꠇꠞꠣ ꠙꠣꠔ꠆ꠔꠞꠞ ꠃꠙꠞꠦ ꠔꠣꠘ ꠇꠥꠖꠞꠔꠤ ꠀꠔꠦ ꠟꠦꠈꠤꠀ ꠀꠝꠣꠞ ꠀꠔꠅ ꠖꠤꠍꠟꠣ। 23 ꠅꠁꠟꠦ ꠔꠣꠘ ꠘꠥꠞꠞ ꠔꠎꠟ꠆ꠟꠤꠄ ꠎꠦꠛꠟꠣ ꠙꠣꠠ ꠎꠟꠦꠞ, ꠄꠞꠝꠣꠎꠦ ꠔꠥꠝꠞꠣ ꠘꠤꠎꠞ ꠇꠣꠘꠦ ꠢꠥꠘꠟꠣꠄ, ꠢꠃ ꠀꠘ꠆ꠖꠣꠞꠤꠞ ꠜꠤꠔꠞꠦ ꠕꠣꠇꠤ ꠝꠣꠛꠥꠖꠞ ꠉꠟꠣꠞ ꠀꠅꠀꠎ, ꠢꠥꠘꠤꠀ ꠔꠥꠝꠞꠣꠞ ꠢꠇꠟ ꠈꠣꠘ꠆ꠖꠣꠘꠞ ꠀꠝꠤꠞ ꠅꠇꠟ, ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟ ꠀꠝꠣꠞ ꠉꠦꠍꠦ ꠃꠑꠤꠀ ꠀꠁꠟꠣ, 24 ꠀꠁꠀ ꠇꠁꠟꠣ, ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠖꠤꠖꠣꠞ ꠖꠤꠀ ꠔꠣꠘ ꠎꠣꠟꠣꠟ ꠀꠞ ꠝꠢꠤꠝꠣ ꠀꠝꠞꠣꠞꠦ ꠖꠦꠈꠣꠁꠍꠂꠘ, ꠘꠥꠞꠞ ꠀꠉꠥꠁꠘ ꠕꠣꠇꠤ ꠛꠣꠞꠅꠁꠟ ꠔꠣꠘ ꠉꠟꠣꠞ ꠀꠅꠀꠎ ꠀꠝꠞꠣ ꠢꠥꠘꠍꠤ। ꠀꠞ ꠅꠈꠘ ꠀꠝꠞꠣ ꠛꠥꠎꠟꠣꠝ, ꠇꠥꠘꠥ ꠀꠖꠝ ꠎꠣꠔꠦ ꠀꠟ꠆ꠟꠣ ꠙꠣꠇꠞ ꠟꠉꠦ ꠛꠣꠔꠌꠤꠔ ꠇꠞꠣꠞ ꠛꠣꠖꠦꠅ, ꠁ ꠀꠖꠝ ꠛꠣꠌꠤꠀ ꠞꠄ। 25 ꠅꠁꠟꠦ ꠅꠈꠘ ꠇꠦꠘꠦ ꠀꠝꠞꠣ ꠁꠘꠅ ꠝꠞꠔꠣꠝ? ꠇꠥꠖꠞꠔꠤ ꠁ ꠀꠉꠥꠁꠘꠦ ꠔ ꠀꠝꠞꠣꠞꠦ ꠎꠣꠟꠣꠁꠟꠤꠛ, ꠀꠝꠞꠣ ꠎꠥꠖꠤ ꠀꠞꠅ ꠛꠦꠡ ꠇꠞꠤ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠉꠟꠣꠞ ꠀꠅꠀꠎ ꠢꠥꠘꠣꠔ ꠞꠁ, ꠔꠦ ꠔ ꠘꠤꠞ꠆ꠉꠣꠔ ꠝꠞꠘ ꠅꠁꠛ। 26 ꠀꠝꠞꠣꠞ ꠟꠣꠈꠣꠘ ꠁꠟꠣ ꠀꠞ ꠇꠥꠘꠥ ꠀꠖꠝ ꠎꠣꠔ ꠀꠍꠂꠘ ꠘꠤ, ꠎꠦꠞꠣ ꠘꠥꠞꠞ ꠀꠉꠥꠁꠘ ꠕꠣꠇꠤ ꠎꠤꠘ꠆ꠖꠣ ꠀꠟ꠆ꠟꠣ ꠙꠣꠇꠞ ꠉꠟꠣꠞ ꠀꠅꠀꠎ ꠢꠥꠘꠣꠞ ꠛꠣꠖꠦꠅ ꠎꠤꠔꠣ ꠀꠍꠦ? 27 ꠔꠦ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠔꠔꠣ ꠛꠣꠔꠣꠁꠍꠂꠘ, ꠔꠣꠘ ꠇꠣꠘ꠆ꠖꠣꠔ ꠉꠤꠀ ꠀꠙꠘꠦꠃ ꠅꠔꠣ ꠢꠥꠘꠤꠀ ꠀꠁꠃꠇ꠆ꠇꠣ। ꠔꠣꠁꠘ ꠀꠙꠘꠣꠞ ꠉꠦꠍꠦ ꠎꠦꠔꠣ ꠎꠣꠘꠣꠁꠛꠣ, ꠀꠙꠘꠦ ꠀꠁꠀ ꠅꠔꠣ ꠀꠝꠞꠣꠞꠦ ꠢꠥꠘꠣꠁꠛꠣ। ꠔꠦꠃ ꠀꠝꠞꠣ ꠅꠔꠣ ꠀꠝꠟ ꠇꠞꠝꠥ।
28 “ꠀꠞ ꠢꠃ ꠡꠝꠄ ꠔꠥꠝꠞꠣ ꠎꠦꠛꠟꠣ ꠀꠝꠣꠞ ꠟꠉꠦ ꠝꠣꠔꠤꠞꠣꠄ, ꠡ꠆ꠛꠄꠅꠋ ꠝꠣꠛꠥꠖꠦ ꠁꠔꠣ ꠢꠥꠘꠟꠣ, ꠢꠥꠘꠤꠀ ꠀꠝꠣꠞꠦ ꠇꠁꠟꠣ, ꠅꠃ ꠝꠣꠘꠥꠡ ꠅꠇꠟꠞ ꠝꠣꠔ-ꠇꠕꠣ ꠔ ꠀꠝꠤ ꠢꠥꠘꠍꠤ, ꠔꠣꠞꠣ ꠔꠥꠝꠣꠞꠦ ꠎꠦꠔꠣ ꠇꠁꠍꠂꠘ ꠁꠔꠣ ꠢꠇꠟꠔꠣꠃ ꠜꠣꠟꠣ। 29 ꠢꠣꠍꠣꠃ ꠎꠥꠖꠤ ꠔꠣꠞꠣ ꠀꠝꠣꠞꠦ ꠅꠟꠣ ꠒꠞꠣꠁꠘ, ꠢꠣꠝꠦꠡꠣ ꠀꠝꠣꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠌꠟꠣꠞ ꠈꠤꠀꠟꠤ ꠅꠁꠘ, ꠔꠦ ꠔꠣꠞꠣ ꠀꠞ ꠔꠣꠞꠣꠞ ꠀꠅꠟꠣꠖ ꠅꠇꠟꠞ ꠌꠤꠞꠇꠣꠟꠤꠘ ꠜꠣꠟꠣꠁ ꠅꠁꠛ।
30 “ꠅꠈꠘ ꠔꠥꠝꠤ ꠟꠣꠝꠣꠔ ꠎꠣꠅ ꠀꠞ ꠔꠣꠞꠣꠞꠦ ꠇꠅ, ꠔꠣꠞꠣꠞ ꠔꠣꠝ꠆ꠛꠥꠔ ꠚꠤꠞꠤꠀ ꠎꠣꠁꠔꠣꠉꠤ। 31 ꠅꠁꠟꠦ ꠔꠥꠝꠤ ꠅꠘꠅ ꠀꠝꠣꠞ ꠇꠣꠘ꠆ꠖꠣꠔ ꠞꠁꠅ। ꠀꠝꠤ ꠔꠥꠝꠣꠞꠦ ꠀꠝꠣꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ, ꠀꠁꠘ-ꠇꠣꠘꠥꠘ ꠀꠞ ꠡꠞꠤꠅꠔ ꠛꠣꠔꠣꠁꠝꠥ, ꠔꠥꠝꠤ ꠉꠤꠀ ꠔꠣꠞꠣꠞꠦ ꠅꠔꠣ ꠢꠤꠇꠣꠁꠛꠣꠄ। ꠔꠦꠃ ꠀꠝꠤ ꠔꠣꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠀꠞ, ꠢꠃ ꠖꠦꠡꠅ ꠉꠤꠀ ꠢꠣꠞꠤ ꠔꠣꠞꠣ ꠅꠔꠣ ꠀꠝꠟ ꠇꠞꠛꠣ।
32 “ꠄꠞꠟꠣꠉꠤꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠖꠤꠍꠂꠘ, ꠁꠔꠣ ꠎꠔꠘ ꠇꠞꠤꠀ ꠀꠖꠣꠄ ꠇꠞꠤꠅ, ꠁꠔꠣꠞ ꠔꠤꠟ ꠙꠞꠤꠝꠣꠘ ꠢꠦꠞ-ꠚꠦꠞ ꠇꠞꠤꠅ ꠘꠣ। 33 ꠔꠣꠁꠘ ꠎꠦ ꠙꠕꠦ ꠌꠟꠣꠞ ꠟꠣꠉꠤ ꠢꠥꠇꠥꠝ ꠖꠤꠍꠂꠘ, ꠑꠤꠇ ꠅꠃ ꠙꠕꠦ ꠌꠟꠤꠅ, ꠔꠦꠃ ꠔꠥꠝꠞꠣ ꠎꠣꠘꠦ ꠛꠣꠌꠛꠣꠄ, ꠔꠥꠝꠞꠣꠞ ꠜꠣꠟꠣꠁ ꠅꠁꠛ, ꠀꠞ ꠔꠥꠝꠞꠣ ꠎꠦ ꠖꠦꠡꠞ ꠖꠈꠟꠖꠣꠞꠤ ꠙꠣꠁꠛꠣꠄ, ꠢꠃ ꠖꠦꠡꠅ ꠔꠥꠝꠞꠣꠞ ꠢꠣꠄꠀꠔꠤ ꠛꠃꠔ ꠟꠣꠝ꠆ꠛꠣ ꠅꠁꠛ।