1 “ꠔꠥꠝꠞꠣꠞꠦ ꠢꠤꠇꠣꠘꠤꠞ ꠘꠤꠅꠔꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠀꠝꠣꠞꠦ ꠅꠃ ꠢꠥꠇꠥꠝ-ꠀꠢꠇꠣꠝ, ꠡꠞꠤꠅꠔ ꠀꠞ ꠀꠁꠘ-ꠇꠣꠘꠥꠘ ꠖꠤꠍꠂꠘ, ꠎꠣꠔꠦ ꠢꠃ ꠎꠦ ꠖꠦꠡ ꠖꠈꠟ ꠇꠞꠣꠞ ꠘꠤꠅꠔꠦ ꠔꠥꠝꠞꠣ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠎꠣꠁꠞꠣꠄ, ꠢꠘꠅ ꠉꠤꠀ ꠢꠣꠞꠤ ꠔꠥꠝꠞꠣ ꠁꠔꠣ ꠀꠝꠟ ꠇꠞꠅ। 2 ꠔꠦꠃ ꠔꠥꠝꠞꠣ, ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘ ꠀꠞ ꠔꠣꠞꠣꠞ ꠀꠅꠟꠣꠖ ꠅꠇꠟꠦ ꠢꠣꠞꠣ ꠎꠤꠘ꠆ꠖꠦꠉꠤ ꠀꠟ꠆ꠟꠣ ꠝꠣꠛꠥꠖꠞꠦ ꠒꠞꠣꠁꠀ ꠔꠣꠘ ꠖꠦꠅꠀ ꠘꠤꠅꠝ ꠀꠞ ꠢꠥꠇꠥꠝ ꠅꠇꠟ ꠀꠝꠟ ꠇꠞꠤꠅ। ꠅꠟꠣ ꠇꠞꠟꠦ ꠔꠥꠝꠞꠣ ꠛꠃꠔ ꠖꠤꠘ ꠛꠣꠌꠤꠀ ꠞꠁꠛꠣꠄ। 3 ꠅ ꠛꠘꠤ ꠁꠍꠞꠣꠁꠟ, ꠔꠥꠝꠞꠣ ꠀꠝꠣꠞ ꠇꠕꠣ ꠢꠥꠘꠅ ꠀꠞ ꠢꠥꠡꠤꠀꠞ ꠅꠁꠀ ꠁꠔꠣ ꠀꠝꠟ ꠇꠞꠅ, ꠔꠦꠃ ꠔꠥꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠞ ꠝꠣꠛꠥꠖ ꠀꠟ꠆ꠟꠣꠞ ꠅꠀꠖꠣ ꠝꠣꠚꠤꠇ, ꠢꠃ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠖꠦꠡꠅ ꠔꠥꠝꠞꠣꠞ ꠜꠣꠟꠣꠁ ꠅꠁꠛ ꠀꠞ ꠔꠥꠝꠞꠣ ꠛꠃꠔ ꠛꠣꠠꠤꠛꠣꠄ।

4 “ꠅ ꠛꠘꠤ ꠁꠍꠞꠣꠁꠟ, ꠢꠥꠘꠅ, ꠀꠟ꠆ꠟꠣ ꠀꠝꠞꠣꠞ ꠝꠣꠛꠥꠖ, ꠔꠣꠁꠘꠃ ꠄꠇ। 5 ꠔꠥꠝꠞꠣ ꠙꠞꠔꠦꠇꠦ ꠔꠥꠝꠞꠣꠞ ꠀꠡ꠆ꠔꠣ ꠖꠤꠟ, ꠀꠡ꠆ꠔꠣ ꠎꠣꠘ ꠀꠞ ꠢꠇꠟ ꠛꠟ-ꠡꠇ꠆ꠔꠤ ꠖꠤꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠤꠅ। 6 ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠦ ꠢꠥꠇꠥꠝ ꠖꠤꠀꠞ, ꠁꠔꠣ ꠔꠥꠝꠞꠣꠞ ꠖꠤꠟꠅ ꠉꠣꠕꠤꠀ ꠞꠣꠈꠤꠅ। 7 ꠔꠥꠝꠞꠣ ꠢꠇꠟꠦ ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘꠞꠦ ꠁꠔꠣ ꠈꠤꠀꠟ ꠇꠞꠤ ꠢꠤꠇꠣꠁꠅ। ꠀꠞ ꠊꠞꠅ ꠛꠁꠀ, ꠙꠕꠦ-ꠊꠣꠐꠦ ꠌꠟꠣꠞ ꠡꠝꠄ, ꠊꠥꠝꠣꠘꠤꠞ ꠡꠝꠄ, ꠊꠥꠝ ꠕꠣꠇꠤ ꠃꠑꠣꠞ ꠛꠣꠖꠦꠅ ꠅꠔꠣ ꠛꠦꠙꠣꠞꠦ ꠝꠣꠔꠣ-ꠝꠣꠔꠤ ꠇꠞꠤꠅ। 8 ꠝꠘꠅ ꠞꠣꠈꠣꠞ ꠘꠤꠡꠣꠘꠣ ꠢꠤꠡꠣꠛꠦ ꠁꠔꠣ ꠀꠔꠅ ꠛꠣꠘ꠆ꠖꠤꠀ ꠞꠣꠈꠤꠅ ꠀꠞ ꠇꠙꠣꠟꠞ ꠝꠣꠎꠦ ꠟꠣꠉꠣꠁꠅ। 9 ꠔꠥꠝꠞꠣꠞ ꠖꠥꠀꠞꠞ ꠌꠃꠇꠣꠑꠅ ꠀꠞ ꠝꠥꠟ ꠉꠦꠁꠐꠅ ꠟꠦꠈꠤꠀ ꠞꠣꠈꠤꠅ।

10 “ꠔꠥꠝꠞꠣꠞ ꠛꠣꠚ-ꠖꠣꠖꠣ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠉꠦꠍꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠇꠍꠝ ꠈꠣꠁꠀ ꠎꠦ ꠖꠦꠡ ꠖꠦꠅꠀꠞ ꠅꠀꠖꠣ ꠇꠞꠍꠂꠘ, ꠢꠃ ꠖꠦꠡ ꠔꠣꠁꠘ ꠔꠥꠝꠞꠣꠞꠦ ꠘꠤꠛꠣ। ꠢꠤꠘꠅ ꠡꠥꠘ꠆ꠖꠞ ꠡꠥꠘ꠆ꠖꠞ ꠀꠞ ꠛꠠ ꠛꠠ ꠐꠣꠃꠘ ꠅꠇꠟ ꠀꠍꠦ, ꠎꠦꠔꠣ ꠔꠥꠝꠞꠣ ꠛꠣꠘꠣꠁꠍ ꠘꠣ, ꠈꠣꠟꠤ ꠄꠝꠘꠦꠃ ꠙꠣꠁꠛꠣꠄ। 11 ꠀꠞ ꠝꠣꠟ-ꠍꠣꠝꠣꠘꠣꠄ ꠜꠞꠣ ꠢꠣꠎꠣꠁꠟ-ꠙꠣꠠꠣꠁꠟ ꠊꠞ-ꠖꠥꠀꠞ ꠙꠣꠁꠛꠣꠄ, ꠎꠦꠔꠣ ꠔꠥꠝꠞꠣ ꠎꠥꠉꠣꠁꠍ ꠘꠣ, ꠙꠣꠘꠤꠞ ꠇꠥꠀ ꠙꠣꠁꠛꠣꠄ ꠎꠦꠔꠣ ꠔꠥꠝꠞꠣ ꠈꠥꠖꠤꠍ ꠘꠣ, ꠀꠋꠉꠥꠞꠞ ꠛꠣꠉꠣꠘ ꠀꠞ ꠎꠄꠔꠥꠘꠞ ꠛꠣꠉꠣꠘ ꠙꠣꠁꠛꠣꠄ ꠎꠦꠔꠣ ꠔꠥꠝꠞꠣ ꠟꠣꠉꠣꠁꠍ ꠘꠣ। 12 ꠅꠁꠟꠦ ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠁꠔꠣ ꠢꠇꠟꠔꠣ ꠙꠣꠁꠀ ꠢꠣꠞꠤ ꠝꠣꠟꠖꠣꠞ ꠛꠘꠤꠀ ꠔꠥꠝꠞꠣꠞ ꠢꠃ ꠀꠟ꠆ꠟꠣ ꠝꠣꠛꠥꠖꠞꠦ ꠚꠣꠃꠞꠤꠅ ꠘꠣ, ꠎꠦꠁꠘ ꠔꠥꠝꠞꠣꠞꠦ ꠝꠤꠡꠞ ꠖꠦꠡꠞ ꠉꠥꠟꠣꠝꠤ ꠕꠣꠇꠤ ꠈꠣꠟꠣꠍ ꠇꠞꠤꠀ ꠀꠘꠍꠂꠘ।

13 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠒꠞꠣꠁꠀ ꠌꠟꠤꠅ, ꠈꠣꠟꠤ ꠔꠣꠘ ꠄꠛꠣꠖꠔ ꠇꠞꠤꠅ, ꠀꠞ ꠔꠣꠘ ꠘꠣꠝꠦ ꠇꠍꠝ ꠈꠣꠁꠅ। 14 ꠔꠥꠝꠞꠣ ꠀꠞꠤ-ꠚꠞꠤ ꠎꠣꠔꠤꠞ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠤꠅ ꠘꠣ। 15 ꠎꠣꠘ ꠔ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠎꠦꠁꠘ ꠔꠥꠝꠞꠣꠞ ꠟꠉꠦ ꠀꠍꠂꠘ, ꠔꠣꠁꠘ ꠔ ꠟꠣ-ꠡꠞꠤꠇ ꠝꠣꠛꠥꠖ, ꠇꠥꠘꠥ ꠡꠞꠤꠇ ꠡꠁꠎ꠆ꠎ ꠇꠞꠂꠘ ꠘꠣ। ꠄꠞꠟꠣꠉꠤ ꠢꠥꠡꠤꠀꠞ ꠞꠁꠅ, ꠁꠔꠣꠞ ꠙꠥꠎꠣ ꠇꠞꠟꠦ ꠔꠣꠁꠘ ꠉꠥꠍꠣꠄ ꠀꠉꠥꠁꠘ ꠅꠁꠀ ꠔꠥꠝꠞꠣꠞꠦ ꠖꠥꠘꠤꠀ ꠕꠣꠇꠤ ꠚꠥꠍꠤꠟꠤꠛꠣ। 16 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠙꠞꠤꠇ꠆ꠇꠣ ꠇꠞꠣꠔ ꠟꠣꠉꠤꠅ ꠘꠣ, ꠎꠦꠟꠣ ꠀꠉꠦ ꠢꠃ ꠝꠣꠍꠣ ꠘꠣꠝꠞ ꠎꠣꠉꠣꠔ ꠇꠞꠍꠟꠣꠄ। 17 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠔ ꠢꠥꠇꠥꠝ-ꠀꠢꠇꠣꠝ, ꠢꠥꠡꠤꠀꠞꠤ ꠀꠞ ꠘꠤꠅꠝ-ꠇꠣꠘꠥꠘ ꠖꠤꠍꠂꠘ, ꠁꠔꠣ ꠔꠥꠝꠞꠣ ꠈꠤꠀꠟ ꠇꠞꠤ ꠝꠣꠘꠤꠅ। 18-19 ꠀꠞ ꠝꠣꠛꠥꠖꠞ ꠘꠎꠞꠅ ꠎꠦꠔꠣ ꠡꠑꠤꠇ, ꠔꠣꠁꠘ ꠎꠦꠔꠣ ꠜꠣꠟꠣ ꠙꠣꠁꠘ, ꠔꠥꠝꠞꠣ ꠅꠔꠣꠃ ꠇꠞꠤꠅ, ꠔꠦꠃ ꠔꠥꠝꠞꠣꠞ ꠜꠣꠟꠣꠁ ꠅꠁꠛ। ꠝꠣꠛꠥꠖꠦ ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠉꠦꠍꠦ ꠎꠦ ꠖꠦꠡ ꠖꠤꠛꠣꠞ ꠇꠍꠝ ꠇꠞꠍꠂꠘ, ꠢꠃ ꠖꠦꠡ ꠕꠣꠇꠤ ꠔꠥꠝꠞꠣꠞ ꠖꠥꠡꠝꠘꠞꠦ ꠔꠣꠁꠘ ꠈꠦꠖꠣꠁꠀ ꠖꠤꠛꠣ। ꠀꠞ ꠝꠣꠛꠥꠖꠞ ꠅꠀꠖꠣ ꠝꠣꠚꠤꠇ ꠢꠃ ꠀꠞꠣꠝꠞ ꠖꠦꠡꠞ ꠖꠈꠟꠖꠣꠞꠤꠅ ꠔꠥꠝꠞꠣ ꠙꠣꠁꠛꠣꠄ।

20 “ꠜꠛꠤꠡꠔꠦ ꠎꠦꠛꠟꠣ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠦ ꠔꠥꠝꠞꠣꠞꠦ ꠎꠤꠇꠣꠁꠛꠣ, ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠅꠃ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ, ꠘꠤꠅꠝ-ꠇꠣꠘꠥꠘ, ꠀꠞ ꠢꠥꠡꠤꠀꠞꠤ ꠖꠤꠍꠂꠘ ꠁꠔꠣꠞ ꠝꠣꠘꠤ ꠇꠤꠔꠣ? 21 ꠅꠃ ꠡꠝꠄ ꠎꠥꠀꠙ ꠖꠤꠅ, ꠝꠤꠡꠞ ꠖꠦꠡꠅ ꠀꠝꠞꠣ ꠚꠦꠞꠣꠃꠘꠞ ꠉꠥꠟꠣꠝ ꠀꠍꠟꠣꠝ, ꠅꠁꠟꠦ ꠀꠟ꠆ꠟꠣꠄ ꠔꠣꠘ ꠛꠟꠀꠟꠣ ꠇꠥꠖꠞꠔꠤ ꠀꠔ ꠖꠤꠀ ꠀꠝꠞꠣꠞꠦ ꠛꠣꠞ ꠇꠞꠤꠀ ꠀꠘꠍꠂꠘ। 22 ꠝꠣꠛꠥꠖꠦ ꠀꠝꠞꠣꠞ ꠌꠈꠥꠞ ꠍꠣꠝꠘꠦ ꠚꠦꠞꠣꠃꠘ ꠀꠞ ꠔꠣꠞ ꠛꠣꠠꠤꠞ ꠢꠇꠟꠞ ꠃꠙꠞꠦ, ꠀꠡ꠆ꠔꠣ ꠝꠤꠡꠞ ꠖꠦꠡꠞ ꠃꠙꠞꠦ ꠛꠠ ꠛꠠ ꠉꠎꠛꠤ ꠘꠤꠡꠣꠘꠣ, ꠛꠦꠎꠥꠁꠔꠣ ꠛꠣꠟꠣ-ꠝꠍꠤꠛꠔ ꠀꠞ ꠇꠥꠖꠞꠔꠤ ꠇꠣꠝ ꠖꠦꠈꠣꠁꠟꠣ। 23 ꠅꠁꠟꠦ ꠀꠝꠞꠣꠞꠦ ꠔꠣꠁꠘ ꠢꠃ ꠖꠦꠡ ꠕꠣꠇꠤ ꠛꠣꠞ ꠇꠞꠤꠀ ꠀꠘꠟꠣ, ꠎꠣꠔꠦ ꠎꠦ ꠖꠦꠡ ꠖꠤꠛꠣꠞ ꠟꠣꠉꠤ ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠞ ꠉꠦꠍꠦ ꠇꠍꠝ ꠈꠣꠁꠍꠟꠣ, ꠢꠃ ꠖꠦꠡꠅ ꠀꠝꠞꠣꠞꠦ ꠙꠣꠞ ꠇꠞꠤꠀ ꠖꠈꠟꠖꠣꠞꠤ ꠖꠦꠁꠘ। 24 ꠀꠞ ꠔꠣꠁꠘ ꠢꠥꠇꠥꠝ ꠖꠤꠟꠣ, ꠀꠝꠞꠣ ꠎꠣꠘꠥ ꠔꠣꠘ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠝꠣꠘꠤ, ꠔꠣꠘꠞꠦ ꠒꠞꠣꠁꠀ ꠌꠟꠤ, ꠔꠦꠃ ꠀꠝꠞꠣꠞ ꠜꠣꠟꠣꠁ ꠅꠁꠛ ꠀꠞ ꠀꠝꠞꠣ ꠅꠈꠘꠇꠥꠞ ꠟꠣꠈꠣꠘ ꠢꠣꠝꠦꠡꠣ ꠛꠣꠌꠤꠀ ꠞꠁꠝꠥ। 25 ꠅꠈꠘ ꠀꠝꠞꠣ ꠎꠥꠖꠤ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠔꠣꠘ ꠖꠦꠅꠀ ꠘꠤꠅꠝ-ꠇꠣꠘꠥꠘ ꠈꠤꠀꠟ ꠇꠞꠤꠀ ꠝꠣꠘꠤ, ꠔꠦ ꠁꠐꠣꠃ ꠅꠁꠟ ꠀꠝꠞꠣꠞ ꠙꠞꠦꠎꠉꠣꠞꠤ।”