1 “ꠅꠈꠘ ꠀꠝꠤ ꠔꠥꠝꠞꠣꠞꠦ ꠎꠦ ꠢꠥꠇꠥꠝ ꠖꠤꠞꠣꠝ, ꠔꠥꠝꠞꠣ ꠈꠥꠛ ꠈꠤꠀꠟꠤ ꠅꠁꠀ ꠁꠔꠣ ꠀꠝꠟ ꠇꠞꠤꠅ, ꠔꠦꠃ ꠔꠥꠝꠞꠣ ꠛꠣꠌꠤꠀ ꠞꠁꠛꠣꠄ, ꠔꠥꠝꠞꠣꠞ ꠀꠅꠟꠣꠖ ꠛꠣꠠꠤꠛ, ꠀꠞ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠉꠦꠍꠦ ꠝꠣꠛꠥꠖꠦ ꠇꠍꠝ ꠈꠣꠁꠀ ꠎꠦ ꠖꠦꠡ ꠖꠤꠛꠣꠞ ꠅꠀꠖꠣ ꠇꠞꠍꠂꠘ, ꠢꠃ ꠖꠦꠡꠅ ꠢꠣꠝꠣꠁꠀ ꠖꠈꠟ ꠇꠞꠔꠣꠄ ꠙꠣꠞꠛꠣꠄ। 2 ꠀꠞ ꠔꠥꠝꠞꠣ ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠅꠃ ꠌꠣꠟ꠆ꠟꠤꠡ ꠛꠍꠞꠦ ꠝꠞꠥꠜꠥꠝꠤꠞ ꠝꠣꠎꠖꠤ ꠔꠥꠝꠞꠣꠞꠦ ꠇꠤꠟꠣ ꠟꠁꠀ ꠀꠁꠍꠟꠣ, ꠔꠥꠝꠞꠣꠞ ꠛꠠꠣꠁ-ꠛꠦꠐꠣꠉꠤꠞꠤ ꠜꠣꠋꠉꠤꠛꠣꠞ ꠟꠣꠉꠤ, ꠀꠞ ꠔꠥꠝꠞꠣ ꠔꠣꠘ ꠢꠥꠇꠥꠝ-ꠀꠢꠇꠣꠝ ꠝꠣꠘꠛꠣꠄ ꠇꠤ ꠘꠣ ꠅꠈꠣꠘ ꠙꠞꠤꠇ꠆ꠇꠣ ꠇꠞꠣꠞ ꠘꠤꠅꠔꠦ, ꠔꠥꠝꠞꠣꠞ ꠖꠤꠟꠞ ꠈꠛꠞ ꠎꠣꠘꠣꠞ ꠟꠣꠉꠤ ꠔꠣꠁꠘ ꠔꠥꠝꠞꠣꠞꠦ ꠘꠔ ꠇꠞꠍꠂꠘ। 3 ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞꠦ ꠈꠣꠘꠤ-ꠈꠥꠞꠣꠇꠤ ꠘꠣ ꠖꠤꠀ ꠃꠙꠣꠡ ꠞꠣꠈꠟꠣ, ꠛꠣꠖꠦ ꠎꠦ ꠈꠣꠘꠤ ꠔꠣꠞꠣ ꠌꠤꠘꠔꠣ ꠘꠣ, ꠝꠣꠘ꠆ꠘꠣ ꠘꠣꠝꠞ ꠅꠃ ꠈꠣꠘꠤ ꠈꠣꠅꠀꠁꠀ ꠔꠣꠁꠘ ꠔꠥꠝꠞꠣꠞ ꠛꠠꠣꠁ-ꠛꠦꠐꠣꠉꠤꠞꠤ ꠜꠣꠋꠉꠤꠍꠂꠘ। ꠔꠣꠁꠘ ꠔꠥꠝꠞꠣꠞꠦ ꠢꠤꠇꠣꠁꠔꠣ ꠌꠣꠁꠟꠣ, ꠈꠣꠟꠤ ꠞꠥꠐꠤ ꠈꠣꠁꠟꠦꠃ ꠝꠣꠘꠥꠡ ꠛꠣꠌꠦ ꠘꠣ, ꠛꠞꠋ ꠀꠟ꠆ꠟꠣꠞ ꠙꠞꠔꠦꠇ ꠇꠣꠟꠣꠝꠦꠃ ꠝꠣꠘꠡꠞ ꠎꠣꠘ ꠛꠣꠌꠦ। 4 ꠅꠃ ꠌꠣꠟ꠆ꠟꠤꠡ ꠛꠍꠞꠞ ꠝꠣꠎꠦ ꠔꠥꠝꠞꠣꠞ ꠉꠔꠞꠞ ꠇꠣꠙꠠ-ꠌꠥꠙꠠ ꠘꠡ꠆ꠐ ꠅꠁꠍꠦ ꠘꠣ, ꠖꠤꠘ-ꠞꠣꠁꠔ ꠀꠐꠤꠟꠦꠅ ꠔꠥꠝꠞꠣꠞ ꠙꠣꠅ ꠚꠥꠟꠍꠦ ꠘꠣ। 5 ꠅꠈꠘ ꠔꠥꠝꠞꠣꠞ ꠖꠤꠟꠅ ꠉꠣꠕꠤꠀ ꠞꠣꠈꠤꠅ, ꠛꠣꠚꠦ ꠎꠦꠟꠣ ꠘꠤꠎꠞ ꠙꠥꠀꠞꠦ ꠡꠣꠡꠘ ꠇꠞꠦ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦꠅ ꠅꠟꠣ ꠡꠣꠡꠘ ꠇꠞꠂꠘ।

6 “ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠤꠅ, ꠔꠣꠘ ꠙꠕꠦ ꠌꠟꠤꠅ, ꠀꠞ ꠔꠣꠘꠞꠦ ꠒꠞꠣꠁꠅ। 7 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠀꠞꠣꠝꠞ ꠖꠦꠡꠅ ꠘꠤꠞꠣ, ꠁ ꠎꠣꠉꠣꠔ ꠙꠣꠠ-ꠙꠞꠛꠔ, ꠙꠣꠠꠤꠀ ꠈꠣꠟ, ꠙꠣꠘꠤꠞ ꠁꠘ꠆ꠖꠣꠞꠣ ꠀꠍꠦ, ꠀꠞ ꠝꠣꠐꠤꠞ ꠔꠟꠦꠅ ꠙꠣꠘꠤ ꠀꠍꠦ। 8 ꠢꠤꠘꠅ ꠉꠝ, ꠛꠣꠞ꠆ꠟꠤ, ꠀꠋꠉꠥꠞ, ꠒꠥꠝꠥꠞ ꠉꠣꠍ, ꠀꠘꠥꠀꠞ ꠚꠟ, ꠎꠄꠔꠥꠘꠞ ꠔꠦꠟ ꠀꠞ ꠝꠃ ꠀꠍꠦ। 9 ꠢꠤ ꠖꠦꠡꠅ ꠛꠃꠔ ꠈꠣꠘꠤ-ꠙꠣꠘꠤ ꠙꠣꠁꠛꠣꠄ, ꠇꠥꠘ꠆ꠔꠣꠞ ꠅꠜꠣꠛ ꠔꠥꠝꠞꠣꠞ ꠅꠁꠔ ꠘꠣꠄ। ꠢꠤꠘꠞ ꠙꠣꠔ꠆ꠔꠞꠞ ꠝꠣꠎꠦ ꠟꠥꠀ ꠀꠍꠦ, ꠢꠘꠞ ꠙꠣꠠ ꠈꠥꠖꠤꠟꠦ ꠔꠥꠝꠞꠣ ꠔꠣꠝꠣ-ꠙꠤꠔꠟ ꠙꠣꠁꠛꠣꠄ। 10 ꠢꠃ ꠖꠦꠡꠅ ꠙꠦꠐ ꠜꠞꠤꠀ ꠈꠣꠘꠣ-ꠙꠤꠘꠣ ꠈꠣꠁꠀ ꠢꠣꠞꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠖꠦꠅꠀ ꠅꠃ ꠀꠞꠣꠝꠞ ꠖꠦꠡꠞ ꠟꠣꠉꠤ ꠔꠣꠘ ꠡꠥꠇꠞꠤꠀ ꠀꠖꠣꠄ ꠇꠞꠤꠅ।

11 “ꠔꠣ-ꠅ ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠇꠥꠘꠥ ꠡꠝꠄ ꠚꠣꠃꠞꠤꠅ ꠘꠣ, ꠀꠞ ꠀꠝꠤ ꠅꠈꠘ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ, ꠘꠤꠅꠝ-ꠇꠣꠘꠥꠘ, ꠀꠞ ꠡꠞꠤꠅꠔ ꠎꠣꠘꠣꠁꠞꠣꠝ, ꠁꠔꠣ ꠀꠝꠟ ꠇꠞꠔꠦ ꠇꠥꠘꠥ ꠉꠣꠚꠟꠔꠤ ꠇꠞꠤꠅ ꠘꠣ। 12 ꠢꠘꠅ ꠉꠤꠀ ꠙꠦꠐ ꠜꠞꠤ ꠈꠣꠘꠣ-ꠙꠤꠘꠣ ꠈꠣꠁꠀ, ꠡꠥꠘ꠆ꠖꠞ ꠇꠞꠤ ꠊꠞ-ꠛꠣꠠꠤ ꠛꠣꠘꠣꠁꠀ, 13 ꠔꠥꠝꠞꠣꠞ ꠉꠞꠥ-ꠍꠣꠉꠟꠞ ꠙꠣꠟ ꠛꠣꠠꠤꠟꠦ, ꠡꠥꠘꠣ-ꠞꠥꠙꠣ ꠎꠝꠣꠁꠀ, ꠢꠇꠟ ꠝꠘ꠆ꠔꠦ ꠗꠘ-ꠍꠣꠝꠣꠘꠣ ꠛꠣꠠꠤꠀ ꠢꠣꠞꠟꠦ ꠢꠥꠡꠤꠀꠞ ꠞꠁꠅ। 14 ꠔꠥꠝꠞꠣꠞ ꠖꠤꠟꠞꠦ ꠛꠠꠣꠁ-ꠛꠦꠐꠣꠉꠤꠞꠤ ꠇꠞꠔꠦ ꠖꠤꠅ ꠘꠣ। ꠀꠞ ꠢꠃ ꠀꠟ꠆ꠟꠣ ꠝꠣꠛꠥꠖꠞꠦ ꠚꠣꠃꠞꠤꠅ ꠘꠣ, ꠎꠦꠁꠘ ꠔꠥꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ, ꠢꠃ ꠉꠥꠟꠣꠝꠤ ꠕꠣꠇꠤ ꠛꠣꠞ ꠇꠞꠤꠀ ꠀꠘꠍꠂꠘ। 15 ꠔꠣꠁꠘ ꠔ ꠔꠥꠝꠞꠣꠞꠦ ꠛꠦꠎꠥꠁꠔꠣ ꠛꠤꠙꠖ-ꠀꠙꠖꠦ ꠜꠞꠣ ꠛꠤꠞꠣꠐ ꠝꠞꠥꠜꠥꠝꠤ ꠕꠣꠇꠤ, ꠇꠑꠤꠘ ꠛꠤꠡꠣꠇ꠆ꠔ ꠢꠣꠚ, ꠛꠤꠡꠣꠇ꠆ꠔ ꠇꠣꠇꠠꠣ-ꠛꠤꠍꠣꠄ ꠜꠞꠣ ꠙꠕꠦꠖꠤ ꠔꠥꠝꠞꠣꠞꠦ ꠙꠣꠞ ꠇꠞꠤ ꠀꠘꠍꠂꠘ। ꠡꠇ꠆ꠔ ꠙꠣꠔ꠆ꠔꠞꠞ ꠜꠤꠔꠞ ꠕꠣꠇꠤ ꠔꠥꠝꠞꠣꠞ ꠟꠣꠉꠤ ꠙꠣꠘꠤ ꠛꠣꠞ ꠇꠞꠍꠂꠘ। 16 ꠔꠣꠁꠘ ꠢꠃ ꠝꠞꠥꠜꠥꠝꠤꠞ ꠝꠣꠎꠦ ꠔꠥꠝꠞꠣꠞꠦ ꠝꠣꠘ꠆ꠘꠣ ꠈꠣꠛꠣꠁꠍꠂꠘ, ꠎꠦꠔꠣꠞ ꠘꠣꠝ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠦ ꠢꠥꠘꠍꠂꠘꠅ ꠘꠣ। ꠔꠥꠝꠞꠣꠞ ꠜꠤꠔꠞꠞ ꠛꠠꠣꠁ-ꠛꠦꠐꠣꠉꠤꠞꠤ ꠜꠣꠋꠉꠤꠛꠣꠞ ꠟꠣꠉꠤ, ꠀꠞ ꠔꠥꠝꠞꠣꠞꠦ ꠙꠞꠤꠇ꠆ꠇꠣ ꠇꠞꠣꠞ ꠘꠤꠅꠔꠦꠃ ꠁꠔꠣ ꠇꠞꠍꠂꠘ, ꠎꠣꠔꠦ ꠢꠦꠡꠦ ꠔꠥꠝꠞꠣꠞ ꠜꠣꠟꠣꠁ ꠅꠄ। 17 ꠔꠥꠝꠞꠣ ꠝꠘꠦ ꠝꠘꠦ ꠇꠁꠅ ꠘꠣ, ꠀꠝꠣꠞ ꠘꠤꠎꠞ ꠛꠟ-ꠡꠇ꠆ꠔꠤꠄ ꠘꠤꠎꠞ ꠇꠣꠝꠣꠁ ꠖꠤꠀ ꠗꠘꠤ ꠅꠁꠍꠤ। 18 ꠅꠁꠟꠦ ꠔꠥꠝꠞꠣꠞ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠉꠦꠍꠦ ꠇꠍꠝ ꠈꠣꠁꠀ ꠎꠦꠔꠣ ꠅꠀꠖꠣ-ꠌꠥꠇ꠆ꠔꠤ ꠇꠞꠍꠟꠣ, ꠅꠔꠣ ꠅꠈꠘ ꠙꠥꠞꠣꠙꠥꠞ ꠇꠞꠣꠞ ꠟꠣꠉꠤ ꠔꠥꠝꠞꠣꠞꠦ ꠁ ꠗꠘ-ꠍꠣꠝꠣꠘꠣ ꠖꠤꠍꠂꠘ, ꠄꠞꠟꠣꠉꠤ ꠔꠣꠘꠞꠦ ꠝꠘꠅ ꠞꠣꠈꠤꠅ।

19 “ꠔꠥꠝꠞꠣ ꠎꠥꠖꠤ ꠇꠥꠘꠥ ꠖꠤꠘ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠚꠣꠃꠞꠤꠟꠣꠅ, ꠀꠞ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠣꠔ ꠟꠣꠉꠅ, ꠅꠔꠣꠞ ꠈꠦꠎꠝꠔ ꠛꠣ ꠜꠎꠘꠣ ꠇꠞꠅ, ꠔꠦ ꠀꠝꠤ ꠅꠈꠘ ꠔꠥꠝꠞꠣꠞꠦ ꠢꠥꠡꠤꠀꠞꠤ ꠖꠤꠀꠞ, ꠔꠥꠝꠞꠣ ꠘꠤꠌ꠆ꠌꠤꠔ ꠛꠤꠘꠣꠡ ꠅꠁꠎꠤꠛꠣꠄ। 20 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ-ꠀꠢꠇꠣꠝ ꠘꠣ ꠝꠣꠘꠟꠦ, ꠔꠥꠝꠞꠣꠞ ꠍꠣꠝꠘꠦ ꠢꠃ ꠎꠦꠔꠣ ꠎꠣꠔꠤ ꠅꠇꠟꠞꠦ ꠔꠣꠁꠘ ꠛꠤꠘꠣꠡ ꠇꠞꠍꠂꠘ, ꠔꠥꠝꠞꠣꠞꠦꠅ ꠅꠟꠣ ꠛꠤꠘꠣꠡ ꠇꠞꠛꠣ।”