1 ꠢꠎꠞꠔ ꠝꠥꠍꠣꠄ ꠀꠞꠅ ꠇꠁꠟꠣ, “ꠅ ꠛꠘꠤ ꠁꠍꠞꠣꠁꠟ ꠢꠥꠘꠅ, ꠔꠥꠝꠞꠣ ꠕꠣꠇꠤ ꠛꠟꠀꠟꠣ ꠀꠞ ꠙꠞꠤꠝꠣꠘꠦꠅ ꠛꠃꠔ ꠛꠦꠡꠤ, ꠛꠠ ꠛꠠ ꠎꠣꠔꠤꠞ ꠖꠦꠡꠞꠦ ꠖꠈꠟ ꠇꠞꠣꠞ ꠟꠣꠉꠤ ꠅꠈꠘ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠎꠣꠁꠛꠣꠄ, ꠔꠣꠞꠣꠞ ꠐꠣꠃꠘ ꠅꠇꠟꠅ ꠛꠠ ꠛꠠ, ꠅꠃ ꠐꠣꠃꠘꠞ ꠛꠣꠃꠘ꠆ꠒꠞꠤꠞ ꠅꠀꠟ ꠀꠍꠝꠣꠘꠅ ꠍꠁꠟꠤꠍꠦ। 2 ꠔꠣꠞꠣ ꠅꠁꠟꠣ ꠃꠌꠣ-ꠝꠥꠐꠣ ꠙꠄꠟꠥꠀꠘ, ꠄꠞꠣ ꠢꠇꠟꠃ ꠀꠘꠣꠇꠤ ꠛꠋꠡꠞ ꠝꠣꠘꠥꠡ। ꠔꠥꠝꠞꠣ ꠔ ꠀꠉꠦꠃ ꠔꠣꠞꠣꠞ ꠛꠦꠙꠣꠞꠦ ꠢꠥꠘꠍ, ꠀꠘꠣꠇꠤ ꠅꠇꠟꠞ ꠟꠉꠦ ꠟꠣꠉꠣꠞ ꠔꠣꠇ꠆ꠇꠔ ꠇꠣꠞ ꠀꠍꠦ? 3 ꠅꠁꠟꠦ ꠔꠥꠝꠞꠣ ꠅꠈꠣꠘ ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔ ꠔꠥꠝꠞꠣꠞ ꠀꠉꠦ ꠀꠉꠦ ꠎꠣꠁꠞꠣ, ꠔꠣꠁꠘ ꠎꠣꠟꠣꠁꠀ ꠍꠣꠞꠈꠣꠞ ꠇꠞꠞꠣ ꠀꠉꠥꠘꠤꠞ ꠟꠣꠈꠣꠘ। ꠔꠣꠁꠘꠃ ꠁꠔꠣꠞꠦ ꠖꠝꠣꠁꠀ ꠔꠥꠝꠞꠣꠞ ꠔꠟꠥꠀ ꠛꠣꠘꠣꠁꠛꠣ। ꠔꠦꠃ ꠝꠣꠛꠥꠖꠦ ꠀꠉꠦ ꠎꠦꠟꠣꠈꠣꠘ ꠇꠁꠍꠟꠣ, ꠔꠥꠝꠞꠣ ꠅꠟꠣꠃ ꠔꠣꠞꠣꠞꠦ ꠈꠦꠖꠣꠁ ꠖꠤꠀ ꠎꠟꠖꠤ ꠇꠞꠤ ꠛꠤꠘꠣꠡ ꠇꠞꠛꠣꠄ।

4 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦꠛꠟꠣ ꠔꠥꠝꠞꠣꠞ ꠍꠣꠝꠘꠦ ꠕꠣꠇꠤ ꠔꠣꠞꠣꠞꠦ ꠈꠦꠖꠣꠁꠀ ꠖꠤꠛꠣ, ꠢꠃ ꠡꠝꠄ ꠔꠥꠝꠞꠣ ꠝꠘꠦ ꠝꠘꠦ ꠇꠁꠅ ꠘꠣ, ꠀꠝꠞꠣꠞ ꠙꠞꠦꠎꠉꠣꠞꠤꠞ ꠚꠟ ꠢꠤꠡꠣꠛꠦ ꠝꠣꠛꠥꠖꠦ ꠀꠝꠞꠣꠞꠦ ꠅꠃ ꠖꠦꠡ ꠖꠈꠟ ꠇꠞꠣꠞ ꠟꠣꠉꠤ ꠀꠘꠍꠂꠘ। ꠀꠍꠟꠦ ꠢꠃ ꠎꠣꠔꠤ ꠅꠇꠟꠞ ꠘꠣꠚꠞꠝꠣꠘꠤꠞ ꠟꠣꠉꠤꠃ ꠝꠣꠛꠥꠖꠦ ꠔꠣꠞꠣꠞꠦ ꠔꠥꠝꠞꠣꠞ ꠍꠣꠝꠘꠦ ꠕꠣꠇꠤ ꠈꠦꠖꠣꠁ ꠖꠤꠛꠣ। 5 ꠔꠥꠝꠞꠣꠞ ꠙꠞꠦꠎꠉꠣꠞꠤ ꠛꠣ ꠡꠔꠔꠣꠞ ꠟꠣꠉꠤ ꠔ ꠢꠤ ꠖꠦꠡꠞ ꠖꠈꠟꠖꠣꠞꠤ ꠙꠣꠁꠞꠣꠄ ꠘꠣ, ꠛꠞꠋ ꠢꠃ ꠎꠣꠔꠤꠞ ꠘꠣꠚꠞꠝꠣꠘꠤꠞ ꠟꠣꠉꠤ, ꠀꠞ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠉꠦꠍꠦ ꠎꠦ ꠅꠀꠖꠣ ꠇꠞꠍꠟꠣ, ꠅꠈꠣꠘ ꠙꠥꠞꠘ ꠇꠞꠣꠞ ꠟꠣꠉꠤ, ꠔꠣꠁꠘꠃ ꠔꠥꠝꠞꠣꠞ ꠍꠣꠝꠘꠦ ꠕꠣꠇꠤ ꠁꠔꠣꠞꠦ ꠈꠦꠖꠣꠁꠀ ꠖꠤꠛꠣ। 6 ꠄꠞꠟꠣꠉꠤ ꠔꠥꠝꠞꠣ ꠎꠣꠘꠤꠀ ꠞꠣꠈꠤꠅ, ꠔꠥꠝꠞꠣꠞ ꠙꠞꠦꠎꠉꠣꠞꠤ ꠖꠦꠈꠤꠀ ꠔ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠅꠃ ꠀꠞꠣꠝꠞ ꠖꠦꠡꠞ ꠖꠈꠟꠖꠣꠞꠤ ꠔꠥꠝꠞꠣꠞꠦ ꠖꠤꠞꠣ ꠘꠣ, ꠔꠥꠝꠞꠣ ꠅꠁꠟꠣꠄ ꠉꠣꠠꠔꠦꠠꠣ-ꠄꠇꠉꠥꠁꠀ ꠎꠣꠔꠤ।

7 “ꠀꠞ ꠢꠃ ꠝꠞꠥꠜꠥꠝꠤꠞ ꠝꠣꠎꠦ ꠔꠥꠝꠞꠣ ꠇꠤꠟꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠉꠥꠍꠣ ꠔꠥꠟꠣꠁꠍꠟꠣꠄ, ꠁꠈꠣꠘ ꠝꠘꠅ ꠞꠣꠈꠤꠅ, ꠇꠥꠘꠥꠖꠤꠘ ꠚꠣꠃꠞꠤꠅ ꠘꠣ। ꠝꠤꠡꠞ ꠖꠦꠡ ꠍꠣꠠꠤꠀ ꠀꠅꠀꠞ ꠖꠤꠘ ꠕꠣꠇꠤ ꠅꠈꠣꠘꠅ ꠀꠅꠀ ꠙꠞ꠆ꠎꠘ꠆ꠔ, ꠢꠣꠝꠦꠡꠣ ꠔꠥꠝꠞꠣꠞ ꠝꠘꠞ ꠜꠤꠔꠞꠦ ꠝꠣꠛꠥꠖꠞ ꠛꠤꠞꠥꠗꠤꠔꠣ ꠀꠍꠦ। 8 ꠔꠥꠞ ꠙꠣꠠꠞ ꠝꠣꠎꠦꠅ ꠔꠥꠝꠞꠣ ꠝꠣꠛꠥꠖꠞ ꠉꠥꠍꠣ ꠔꠥꠟꠣꠁꠍꠟꠣꠄ, ꠄꠞꠟꠣꠉꠤ ꠔꠣꠁꠘ ꠔꠥꠝꠞꠣꠞꠦ ꠛꠤꠘꠣꠡ ꠇꠞꠤꠟꠔꠣ ꠌꠣꠁꠟꠣ। 9 ꠝꠣꠛꠥꠖꠦ ꠔꠥꠝꠞꠣꠞ ꠟꠉꠦ ꠎꠦ ꠅꠀꠖꠣ-ꠌꠥꠇ꠆ꠔꠤ ꠛꠅꠀꠁꠟ ꠇꠞꠍꠂꠘ, ꠅꠃ ꠌꠥꠇ꠆ꠔꠤ ꠘꠣꠝꠣ ꠟꠦꠈꠣ ꠖꠥꠁꠅ ꠈꠣꠘ ꠙꠣꠔ꠆ꠔꠞ ꠀꠘꠣꠞ ꠟꠣꠉꠤ ꠀꠝꠤ ꠙꠣꠠꠅ ꠃꠑꠤꠍꠟꠣꠝ, ꠌꠣꠟ꠆ꠟꠤꠡ ꠖꠤꠘ ꠌꠣꠟ꠆ꠟꠤꠡ ꠞꠣꠁꠔ ꠇꠥꠘꠥ ꠖꠣꠘꠣ-ꠙꠣꠘꠤ ꠘꠣ ꠈꠣꠁꠀ ꠀꠝꠤ ꠞꠥꠎꠣ ꠀꠍꠟꠣꠝ। 10 ꠀꠞ ꠝꠣꠛꠥꠖꠦ ꠔꠣꠘ ꠙꠛꠤꠔ꠆ꠞ ꠀꠔꠞ ꠀꠋꠉꠥꠁꠟꠖꠤ ꠟꠦꠈꠣ ꠢꠃ ꠖꠥꠁꠅ ꠈꠣꠘ ꠙꠣꠔ꠆ꠔꠞ ꠀꠝꠣꠞꠦ ꠖꠤꠟꠣ। ꠔꠥꠝꠞꠣ ꠢꠇꠟ ꠎꠦꠖꠤꠘ ꠔꠥꠞ ꠙꠣꠠꠅ ꠀꠁꠀ ꠖꠟꠣ ꠅꠁꠟꠣꠄ, ꠅꠃ ꠖꠤꠘ ꠝꠣꠛꠥꠖꠦ ꠎꠣꠟꠣꠁꠟ ꠀꠉꠥꠘꠤꠞ ꠝꠣꠎ ꠕꠣꠇꠤ ꠔꠥꠝꠞꠣꠞꠦ ꠎꠦꠔꠣ ꠛꠣꠔꠣꠁꠍꠟꠣ, ꠅꠃ ꠖꠥꠁꠅ ꠙꠣꠔ꠆ꠔꠞꠞ ꠝꠣꠎꠦ ꠔ ꠅꠔꠣ ꠟꠦꠈꠣ ꠀꠍꠤꠟ।

11 “ꠢꠃ ꠌꠣꠟ꠆ꠟꠤꠡ ꠖꠤꠘ ꠀꠞ ꠌꠣꠟ꠆ꠟꠤꠡ ꠞꠣꠁꠔꠞ ꠛꠣꠖꠦ ꠝꠣꠛꠥꠖꠦ ꠅꠃ ꠌꠥꠇ꠆ꠔꠤ ꠘꠣꠝꠣ ꠟꠦꠈꠣ ꠙꠣꠔ꠆ꠔꠞ ꠖꠥꠁꠅ ꠈꠣꠘ ꠀꠝꠣꠞ ꠀꠔꠅ ꠖꠤꠟꠣ। 12 ꠖꠤꠀ ꠇꠁꠟꠣ, ꠎꠣꠅ, ꠔꠥꠝꠤ ꠎꠟꠖꠤ ꠇꠞꠤ ꠟꠣꠝꠣꠔ ꠎꠣꠅ, ꠇꠣꠞꠘ ꠔꠥꠝꠤ ꠎꠦꠔꠣ ꠝꠣꠘꠡꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤꠀ ꠀꠘꠍ, ꠁꠔꠣ ꠇꠥ-ꠙꠕꠦ ꠉꠦꠍꠂꠘꠉꠤ। ꠀꠝꠣꠞ ꠛꠣꠔꠣꠁꠟ ꠙꠕ ꠕꠣꠇꠤ ꠔꠣꠞꠣ ꠅꠔ ꠎꠟꠖꠤ ꠛꠦ-ꠙꠕꠤ ꠅꠁꠉꠦꠍꠦ, ꠔꠣꠞꠣ ꠙꠥꠎꠣ ꠇꠞꠣꠞ ꠟꠣꠉꠤ ꠡꠥꠘꠣ ꠉꠟꠣꠁꠀ ꠄꠇ ꠝꠥꠞ꠆ꠔꠤ ꠛꠣꠘꠣꠁꠍꠦ। 13 ꠝꠣꠛꠥꠖꠦ ꠀꠝꠣꠞꠦ ꠀꠞꠅ ꠇꠁꠟꠣ, ꠀꠝꠤ ꠔ ꠁꠔꠣ ꠝꠣꠘꠡꠞꠦ ꠖꠦꠈꠟꠣꠝ, ꠁꠔꠣ ꠛꠠ ꠉꠣꠠꠔꠦꠠꠣ-ꠄꠇꠉꠥꠁꠀ ꠎꠣꠔꠤ। 14 ꠅꠈꠘ ꠔꠥꠝꠤ ꠀꠝꠣꠞ ꠉꠦꠍ ꠕꠣꠇꠤ ꠢꠞꠤ ꠎꠣꠅ, ꠇꠥꠘꠥ ꠛꠣꠗꠣ ꠖꠤꠅ ꠘꠣ, ꠀꠝꠤ ꠁꠔꠣꠞꠦ ꠛꠤꠘꠣꠡ ꠇꠞꠤꠟꠤꠝꠥ, ꠖꠥꠘꠤꠀ ꠕꠣꠇꠤ ꠁꠔꠣꠞ ꠘꠣꠝ ꠝꠤꠐꠣꠁꠟꠤꠝꠥ। ꠀꠞ ꠔꠥꠝꠣꠞ ꠝꠣꠎ ꠕꠣꠇꠤ ꠄꠇ ꠘꠄꠀ ꠎꠣꠔꠤ ꠙꠄꠖꠣ ꠇꠞꠝꠥ, ꠁꠔꠣ ꠀꠞꠅ ꠛꠠ ꠀꠞꠅ ꠛꠟꠀꠟꠣ ꠎꠣꠔꠤ ꠅꠁꠛ।

15 “ꠔꠦꠃ ꠀꠝꠤ ꠙꠣꠠ ꠕꠣꠇꠤ ꠟꠣꠝꠤꠀ ꠀꠁꠟꠣꠝ, ꠙꠣꠠꠞ ꠃꠙꠞꠦ ꠀꠉꠥꠁꠘ ꠎꠟꠦꠞ, ꠀꠞ ꠀꠝꠣꠞ ꠀꠔꠅ ꠀꠍꠤꠟ ꠌꠥꠇ꠆ꠔꠤ ꠘꠣꠝꠣ ꠟꠦꠈꠣ ꠢꠃ ꠖꠥꠁꠅ ꠈꠣꠘ ꠙꠣꠔ꠆ꠔꠞ। 16 ꠛꠣꠖꠦ ꠀꠝꠤ ꠌꠣꠁꠟꠣꠝ, ꠌꠣꠁꠀ ꠖꠦꠈꠤ ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠖꠞꠛꠣꠞꠅ ꠉꠥꠘꠣ ꠇꠞꠞꠣꠄ। ꠔꠥꠝꠞꠣ ꠙꠥꠎꠣ ꠇꠞꠣꠞ ꠟꠣꠉꠤ ꠡꠥꠘꠣ ꠉꠟꠣꠁꠀ ꠚꠞ꠆ꠝꠣꠔ ꠓꠣꠟꠤꠀ ꠄꠇ ꠉꠞꠥꠞ ꠛꠣꠍꠥꠞ ꠛꠣꠘꠣꠁꠟꠣꠄ। ꠝꠣꠛꠥꠖꠞ ꠛꠣꠔꠣꠁꠟ ꠙꠕ ꠍꠣꠠꠤꠀ ꠔꠥꠝꠞꠣ ꠅꠔ ꠎꠟꠖꠤ ꠛꠦ-ꠙꠕꠦ ꠉꠦꠟꠣꠄꠉꠤ! 17 ꠄꠞꠟꠣꠉꠤ ꠀꠝꠤ ꠅꠃ ꠖꠥꠁꠅ ꠈꠣꠘ ꠙꠣꠔ꠆ꠔꠞ ꠀꠝꠣꠞ ꠀꠔ ꠕꠣꠇꠤ ꠚꠣꠟꠣꠁ ꠖꠤꠟꠣꠝ, ꠔꠦꠃ ꠁꠔꠣ ꠜꠣꠋꠉꠤꠀ ꠔꠥꠝꠞꠣꠞ ꠌꠈꠥꠞ ꠍꠣꠝꠘꠦ ꠐꠥꠇꠞꠣ ꠐꠥꠇꠞꠣ ꠅꠁꠉꠦꠟ।

18 “ꠝꠣꠛꠥꠖꠦ ꠎꠦꠔꠣꠞꠦ ꠘꠣꠙꠍꠘ꠆ꠖ ꠇꠞꠂꠘ, ꠅꠟꠣꠈꠣꠘ ꠉꠥꠘꠣ ꠇꠞꠤꠀ ꠔꠥꠝꠞꠣ ꠔꠣꠘ ꠉꠥꠍꠣ ꠔꠥꠟꠣꠁꠟꠣꠄ, ꠄꠞꠟꠣꠉꠤ ꠀꠝꠤ ꠀꠉꠞ ꠟꠣꠈꠣꠘ ꠢꠤꠞꠛꠣꠞ ꠌꠣꠟ꠆ꠟꠤꠡ ꠖꠤꠘ ꠌꠣꠟ꠆ꠟꠤꠡ ꠞꠣꠁꠔ ꠇꠥꠘꠥ ꠖꠣꠘꠣ-ꠙꠣꠘꠤ ꠘꠣ ꠈꠣꠁꠀ, ꠔꠣꠘ ꠍꠣꠝꠘꠦ ꠍꠁꠎꠖꠣꠔ ꠙꠠꠤ ꠞꠁꠟꠣꠝ। 19 ꠝꠣꠛꠥꠖꠞ ꠛꠦꠎꠥꠁꠔꠣ ꠉꠥꠍꠣꠞꠦ ꠀꠝꠤ ꠈꠥꠛ ꠒꠞꠣꠁꠟꠣꠝ, ꠔꠣꠁꠘ ꠉꠥꠍꠣꠄ ꠀꠉꠥꠁꠘ ꠅꠁꠀ ꠔꠥꠝꠞꠣꠞꠦ ꠛꠤꠘꠣꠡ ꠇꠞꠤꠟꠔꠣ ꠌꠣꠁꠟꠣ, ꠅꠁꠟꠦ ꠅꠃꠛꠣꠞꠅ ꠔꠣꠁꠘ ꠀꠝꠣꠞ ꠚꠞꠤꠀꠖ ꠢꠥꠘꠟꠣ। 20 ꠝꠣꠛꠥꠖꠦ ꠢꠣꠞꠥꠘꠞ ꠃꠙꠞꠦꠅ ꠈꠥꠛ ꠉꠥꠍꠣ ꠅꠁꠀ ꠔꠣꠘꠞꠦ ꠡꠦꠡ ꠇꠞꠤꠟꠔꠣ ꠌꠣꠁꠟꠣ, ꠔꠦꠃ ꠀꠝꠤ ꠢꠣꠞꠥꠘꠞ ꠟꠣꠉꠤꠅ ꠔꠣꠘ ꠖꠞꠛꠣꠞꠅ ꠝꠤꠘꠔꠤ ꠇꠞꠟꠣꠝ। 21 ꠀꠞ ꠔꠥꠝꠞꠣꠞ ꠉꠥꠘꠣꠞ ꠀꠔꠤꠀꠞ ꠝꠣꠘꠤ ꠔꠥꠝꠞꠣꠞ ꠛꠣꠘꠣꠁꠟ ꠢꠃ ꠛꠣꠍꠥꠞꠞ ꠝꠥꠞ꠆ꠔꠤꠞꠦ ꠀꠉꠥꠘꠤꠔ ꠚꠣꠟꠣꠁꠀ ꠎꠣꠟꠣꠁꠀ ꠍꠣꠞꠈꠣꠞ ꠇꠞꠟꠣꠝ। ꠅꠉꠥꠞ ꠎꠣꠟꠣꠁꠟ ꠐꠥꠇꠞꠣꠞꠦ ꠙꠤꠡꠤꠀ ꠍꠣꠟꠤ ꠛꠣꠘꠣꠁꠀ ꠙꠣꠠꠤꠀ ꠉꠣꠋꠉꠞ ꠙꠣꠘꠤꠞ ꠚꠥꠔꠞ ꠝꠣꠎꠦ ꠚꠣꠟꠣꠁꠟꠣꠝ।

22 “ꠔꠥꠝꠞꠣ ꠔ ꠔꠣꠛꠦꠞꠣꠔ, ꠝꠣꠍꠣꠔ ꠀꠞ ꠇꠤꠛꠞꠥꠔ-ꠢꠥꠔꠣꠛꠣ ꠘꠣꠝꠞ ꠎꠣꠉꠣꠔ ꠝꠣꠛꠥꠖꠞ ꠉꠥꠍꠣ ꠔꠥꠟꠣꠁꠍꠟꠣꠄ। 23 ꠄꠞꠛꠣꠖꠦ ꠇꠣꠖꠦꠡ-ꠛꠞꠘꠦꠀ ꠕꠣꠇꠤ ꠞꠅꠀꠘꠣ ꠅꠀꠞ ꠇꠣꠟꠅ ꠝꠣꠛꠥꠖꠦ ꠎꠦꠛꠟꠣ ꠇꠁꠟꠣ, ꠀꠝꠤ ꠔꠥꠝꠞꠣꠞꠦ ꠀꠞꠣꠝꠞ ꠎꠦ ꠖꠦꠡ ꠖꠣꠘ ꠇꠞꠍꠤ, ꠔꠥꠝꠞꠣ ꠉꠤꠀ ꠅꠈꠣꠘ ꠖꠈꠟ ꠇꠞꠅ, ꠢꠃ ꠡꠝꠄꠅ ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝꠞ ꠛꠤꠞꠥꠗꠤꠔꠣ ꠇꠞꠟꠣꠄ, ꠔꠣꠘꠞꠦ ꠝꠣꠘꠟꠣꠄ ꠘꠣ, ꠔꠣꠘ ꠇꠕꠣꠞꠦꠅ ꠄꠇꠤꠘ ꠇꠞꠟꠣꠄ ꠘꠣ। 24 ꠀꠍꠟꠦ ꠀꠝꠤ ꠎꠦꠖꠤꠘ ꠕꠣꠇꠤ ꠔꠥꠝꠞꠣꠞꠦ ꠌꠤꠘꠤ, ꠢꠃ ꠖꠤꠘ ꠕꠣꠇꠤꠃ ꠖꠦꠈꠤꠀꠞ, ꠔꠥꠝꠞꠣ ꠢꠣꠝꠦꠡꠣ ꠝꠣꠛꠥꠖꠞ ꠢꠥꠇꠥꠝꠞ ꠃꠟꠐꠣ ꠌꠟꠞꠣꠄ।

25 “ꠎꠣꠁ ꠅꠃꠇ, ꠝꠣꠛꠥꠖꠦ ꠔꠥꠝꠞꠣꠞꠦ ꠛꠤꠘꠣꠡ ꠇꠞꠣꠞ ꠇꠕꠣ ꠇꠅꠀꠄ ꠀꠝꠤ ꠌꠣꠟ꠆ꠟꠤꠡ ꠖꠤꠘ ꠌꠣꠟ꠆ꠟꠤꠡ ꠞꠣꠁꠔ, ꠔꠣꠘ ꠍꠣꠝꠘꠦ ꠍꠁꠎꠖꠣꠔ ꠙꠠꠤ ꠞꠁꠟꠣꠝ। 26 ꠀꠝꠤ ꠔꠣꠘ ꠖꠞꠛꠣꠞꠅ ꠝꠤꠘꠔ ꠇꠞꠤ ꠇꠁꠟꠣꠝ, ꠅ ꠝꠣꠛꠥꠖ ꠝꠃꠟꠣ, ꠔꠥꠝꠤ ꠄꠞꠣꠞꠦ ꠛꠤꠘꠣꠡ ꠇꠞꠤꠅ ꠘꠣ, ꠄꠞꠣ ꠔ ꠔꠥꠝꠣꠞꠃ ꠛꠘ꠆ꠖꠣ, ꠔꠥꠝꠣꠞꠃ ꠈꠣꠍ ꠡꠝ꠆ꠙꠖ। ꠔꠥꠝꠣꠞ ꠇꠥꠖꠞꠔꠤ ꠇꠣꠝ ꠖꠤꠀ, ꠔꠥꠝꠣꠞ ꠘꠤꠎꠞ ꠛꠟꠀꠟꠣ ꠀꠔꠖꠤ ꠎꠦꠔꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠍ, ꠁꠔꠣꠞꠦ ꠝꠣꠞꠤꠅ ꠘꠣ। 27 ꠁꠔꠣꠞ ꠉꠣꠠꠔꠦꠠꠣꠝꠤ, ꠘꠣꠚꠞꠝꠣꠘꠤ ꠀꠞ ꠉꠥꠘꠣꠞ ꠛꠣꠄ ꠘꠣ ꠌꠣꠁꠀ, ꠔꠥꠝꠤ ꠈꠣꠟꠤ ꠔꠥꠝꠣꠞ ꠉꠥꠟꠣꠝ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠇꠕꠣ ꠝꠘꠅ ꠇꠞꠅ। 28 ꠅꠈꠘ ꠔꠥꠝꠤ ꠎꠥꠖꠤ ꠁꠔꠣꠞꠦ ꠝꠣꠞꠤꠟꠣꠅ, ꠔꠦ ꠔꠥꠝꠤ ꠎꠦ ꠖꠦꠡ ꠕꠣꠇꠤ ꠀꠝꠞꠣꠞꠦ ꠛꠣꠞ ꠇꠞꠤꠀ ꠀꠘꠍ, ꠢꠃ ꠖꠦꠡꠞ ꠝꠣꠘꠡꠦ ꠇꠁꠛ, ꠝꠣꠛꠥꠖꠦ ꠔꠣꠘ ꠅꠀꠖꠣ ꠇꠞꠣ ꠖꠦꠡꠅ ꠁꠔꠣꠞꠦ ꠘꠤꠔꠣ ꠙꠣꠞꠍꠂꠘ ꠘꠣ, ꠛꠣ ꠔꠣꠞꠣꠞꠦ ꠁꠋꠡꠣ ꠇꠞꠤꠀ ꠎꠣꠘꠦ ꠝꠣꠞꠣꠞ ꠟꠣꠉꠤ ꠅꠃ ꠝꠞꠥꠜꠥꠝꠤꠔ ꠘꠤꠍꠂꠘ। 29 ꠀꠍꠟꠦ ꠄꠞꠣ ꠔ ꠔꠥꠝꠣꠞꠃ ꠛꠘ꠆ꠖꠣ, ꠔꠥꠝꠣꠞ ꠘꠤꠎꠞ ꠡꠝ꠆ꠙꠖ। ꠔꠥꠝꠣꠞ ꠀꠙꠘ ꠇꠥꠖꠞꠔꠤ ꠀꠔ ꠟꠣꠉꠣꠁꠀ, ꠔꠥꠝꠣꠞ ꠛꠟ-ꠔꠣꠇ꠆ꠇꠔ ꠈꠣꠐꠣꠁꠀ ꠄꠞꠣꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤꠀ ꠀꠘꠍ।”