1 “ꠄꠞꠟꠣꠉꠤ, ꠅ ꠛꠘꠤ ꠁꠍꠞꠣꠁꠟ, ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠤꠅ, ꠀꠞ ꠔꠣꠘ ꠝꠞ꠆ꠎꠤ ꠎꠥꠉꠣꠁꠀ ꠌꠟꠤꠅ, ꠔꠣꠘ ꠖꠦꠅꠀ ꠡꠞꠤꠅꠔ, ꠢꠇꠟ ꠘꠤꠅꠝ-ꠇꠣꠘꠥꠘ, ꠢꠥꠇꠥꠝ-ꠀꠢꠇꠣꠝ ꠢꠞ-ꠢꠣꠝꠦꠡꠣ ꠝꠣꠘꠤꠅ। 2 ꠔꠥꠝꠞꠣ ꠅꠈꠘ ꠝꠘꠅ ꠞꠣꠈꠤꠅ, ꠁꠔꠣ ꠀꠝꠤ ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠘꠣ ꠇꠁꠀ ꠈꠣꠟꠤ ꠔꠥꠝꠞꠣꠞ ꠉꠦꠍꠦ ꠇꠁꠀꠞ, ꠔꠣꠞꠣ ꠔ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠦꠖꠣꠄꠅꠔ ꠖꠦꠈꠍꠦ ꠘꠣ, ꠁꠔꠣ ꠌꠤꠘꠦꠅ ꠘꠣ। ꠔꠥꠝꠞꠣꠞ ꠉꠦꠍꠦ ꠔꠣꠘ ꠀꠙꠘ ꠝꠢꠤꠝꠣ, ꠔꠣꠘ ꠇꠥꠖꠞꠔꠤ ꠀꠔꠞ ꠛꠣꠢꠣꠖꠥꠞꠤ, 3 ꠀꠞ ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘꠞ ꠃꠙꠞꠦ, ꠔꠣꠞ ꠀꠡ꠆ꠔꠣ ꠖꠦꠡꠞ ꠃꠙꠞꠦ ꠔꠣꠁꠘ ꠎꠔ ꠘꠝꠥꠘꠣꠞ ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠦꠈꠣꠁꠍꠂꠘ ꠁꠔꠣ ꠔ ꠔꠣꠞꠣ ꠖꠦꠈꠍꠦ ꠘꠣ। 4 ꠔꠣꠞꠣ ꠝꠤꠡꠞꠞ ꠍꠤꠙꠣꠁ ꠖꠟ, ꠁꠔꠣꠞ ꠊꠥꠠꠣ, ꠊꠥꠠꠣꠞ ꠉꠣꠠꠤꠘ ꠀꠞ ꠁꠔꠣꠞꠦ ꠔꠣꠁꠘ ꠇꠤꠟꠣ ꠘꠤꠟ ꠖꠞꠤꠀꠔ ꠛꠥꠠꠣꠁꠀ ꠝꠣꠞꠤꠀ ꠄꠇ꠆ꠇꠦꠞꠦ ꠛꠤꠘꠣꠡ ꠇꠞꠍꠂꠘ, ꠁꠔꠣꠅ ꠔ ꠖꠦꠈꠍꠦ ꠘꠣ, 5 ꠅꠃ ꠎꠣꠉꠣꠔ ꠀꠁꠀ ꠔꠥꠝꠞꠣ ꠙꠃꠍꠤꠛꠣꠞ ꠀꠉꠦ ꠝꠞꠥꠜꠥꠝꠤꠞ ꠝꠣꠎꠦ ꠔꠣꠁꠘ ꠔꠥꠝꠞꠣꠞ ꠃꠙꠞꠦ ꠎꠔꠔꠣ ꠊꠐꠣꠁꠍꠂꠘ, ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘ꠆ꠔꠦ ꠁꠔꠣꠅ ꠖꠦꠈꠍꠦ ꠘꠣ। 6 ꠔꠣꠁꠘ ꠞꠥꠛꠦꠘ ꠈꠣꠘ꠆ꠖꠣꠘꠞ ꠁꠟꠤꠀꠛꠞ ꠙꠥꠀ ꠖꠣꠕꠘ ꠀꠞ ꠀꠛꠤꠞꠣꠝꠞꠦ ꠎꠦ ꠡꠣꠎꠣ ꠖꠤꠍꠂꠘ ꠝꠣꠘꠤ, ꠖꠥꠘꠤꠀꠞ ꠝꠣꠐꠤ ꠚꠣꠐꠤꠀ ꠀ ꠇꠞꠤꠀ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟꠞ ꠝꠣꠎꠈꠣꠘ ꠕꠣꠇꠤ ꠔꠣꠞꠣꠞꠦ ꠉꠤꠟꠤꠟꠤꠟ, ꠔꠣꠞꠣꠞ ꠛꠃ-ꠛꠣꠁꠌ꠆ꠌꠣꠁꠘ ꠡꠥꠖ꠆ꠖꠣ ꠀꠡ꠆ꠔꠣ ꠙꠞꠤꠛꠣꠞ, ꠔꠣꠞꠣꠞ ꠊꠞ-ꠖꠥꠀꠞ, ꠀꠞ ꠢꠦꠝꠣꠘ-ꠎꠣꠘꠥꠀꠞ ꠡꠢ ꠢꠇꠟ ꠝꠣꠟ-ꠍꠣꠝꠣꠘꠣ ꠝꠣꠐꠤꠞ ꠔꠟꠦ ꠢꠣꠝꠣꠁꠉꠦꠟ, ꠁꠔꠣꠅ ꠄꠞꠣ ꠖꠦꠈꠍꠦ ꠘꠣ। 7 ꠅꠁꠟꠦ ꠔꠥꠝꠞꠣ ꠘꠤꠎꠞ ꠌꠃꠈꠦ ꠝꠣꠛꠥꠖꠞ ꠢꠇꠟ ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠦꠈꠍ।

8 “ꠔꠦ ꠅꠈꠘ ꠀꠝꠤ ꠔꠥꠝꠞꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠞꠣꠝ, ꠔꠥꠝꠞꠣ ꠁꠔꠣ ꠢꠇ꠆ꠇꠟꠔꠣ ꠝꠣꠘꠤꠅ, ꠔꠦꠃ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠎꠦ ꠖꠦꠡ ꠖꠈꠟꠞ ꠟꠣꠉꠤ ꠎꠣꠁꠞꠣꠄ, ꠔꠥꠝꠞꠣ ꠛꠟꠀꠟꠣ ꠛꠘꠤꠀ ꠢꠘꠞ ꠖꠈꠟꠖꠣꠞꠤ ꠙꠣꠁꠛꠣꠄ। 9 ꠝꠣꠛꠥꠖꠦ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠞꠦ ꠀꠞ ꠔꠣꠞꠣꠞ ꠀꠅꠟꠣꠖ ꠅꠇꠟꠞꠦ ꠎꠦ ꠖꠦꠡ ꠖꠤꠛꠣꠞ ꠟꠣꠉꠤ ꠇꠍꠝ ꠈꠣꠁꠍꠟꠣ, ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠢꠃ ꠀꠞꠣꠝꠞ ꠖꠦꠡꠅ ꠔꠥꠝꠞꠣꠞ ꠢꠣꠄꠀꠔꠤ ꠟꠣꠝ꠆ꠛꠣ ꠅꠁꠛ। 10 ꠁ ꠖꠦꠡꠈꠣꠘ ꠔ ꠢꠃ ꠝꠤꠡꠞ ꠖꠦꠡꠞ ꠟꠣꠈꠣꠘ ꠘꠣꠄ ꠎꠦꠈꠣꠘ ꠕꠣꠇꠤ ꠔꠥꠝꠞꠣ ꠛꠣꠞ ꠅꠁꠀ ꠀꠁꠍ, ꠝꠘꠅ ꠅꠞ ꠘꠤ, ꠢꠣꠉ-ꠔꠞꠇꠣꠞꠤꠞ ꠈꠦꠔꠅ ꠎꠦꠟꠣ ꠙꠣꠘꠤ ꠖꠦꠁꠘ, ꠢꠃ ꠖꠦꠡꠅ ꠛꠤꠌꠤ ꠛꠣꠁꠘ ꠖꠤꠀ ꠢꠣꠞꠟꠦ ꠔꠥꠝꠞꠣ ꠙꠣꠅꠞ ꠘꠣꠃꠠꠣ ꠖꠤꠀ ꠅꠟꠣ ꠙꠣꠘꠤ ꠢꠤꠌꠤꠔꠣꠄ? 11 ꠅꠁꠟꠦ ꠉꠣꠋ ꠙꠣꠞ ꠅꠁꠀ ꠎꠦ ꠖꠦꠡ ꠔꠥꠝꠞꠣ ꠖꠈꠟ ꠇꠞꠣꠔ ꠎꠣꠁꠞꠣꠄ, ꠁ ꠖꠦꠡꠅ ꠙꠣꠠꠤꠀ ꠔꠟ ꠎꠣꠉꠣ ꠀꠞ ꠙꠣꠠ-ꠙꠞꠛꠔꠦ ꠜꠞꠣ, ꠁ ꠎꠝꠤꠘꠦ ꠀꠟ꠆ꠟꠣꠞ ꠖꠦꠅꠀ ꠝꠦꠊꠞ ꠙꠣꠘꠤ ꠈꠣꠄ। 12 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠁ ꠖꠦꠡꠞ ꠈꠤꠀꠟ ꠞꠣꠈꠂꠘ। ꠛꠍꠞꠞ ꠙꠄꠟꠣ ꠕꠣꠇꠤ ꠢꠦꠡ ꠙꠞ꠆ꠎꠘ꠆ꠔ ꠔꠣꠘ ꠖꠄꠀꠞ ꠘꠎꠞ ꠕꠣꠇꠦ ꠁ ꠎꠝꠤꠘꠞ ꠃꠙꠞꠦ।

13 “ꠔꠦ ꠀꠝꠤ ꠀꠁꠎ ꠔꠥꠝꠞꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠀꠞ, ꠁꠔꠣ ꠔꠥꠝꠞꠣ ꠈꠥꠛ ꠈꠤꠀꠟꠤ ꠅꠁꠀ ꠝꠣꠘꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠤꠅ, ꠀꠞ ꠙꠥꠞꠣꠙꠥꠞ ꠖꠤꠟꠦ-ꠎꠣꠘꠦ ꠔꠣꠘ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠤꠅ। 14 ꠔꠦꠃ ꠝꠣꠛꠥꠖꠦ ꠎꠞꠥꠞ ꠝꠣꠚꠤꠇ ꠛꠍꠞꠞ ꠙꠄꠟꠣ ꠀꠞ ꠡꠦꠡꠦꠅ ꠞꠢꠝꠔꠤ ꠝꠦꠊ ꠖꠤꠀ, ꠔꠥꠝꠞꠣꠞ ꠈꠦꠔꠞ ꠚꠡꠟ, ꠀꠋꠉꠥꠞꠞ ꠞꠡ, ꠎꠄꠔꠥꠘꠞ ꠔꠦꠟ ꠢꠇ꠆ꠇꠟꠔꠣ ꠎꠥꠉꠣꠘ ꠖꠤꠛꠣ। 15 ꠔꠥꠝꠞꠣꠞ ꠙꠡꠥꠞ ꠙꠣꠟꠞ ꠟꠣꠉꠤ ꠎꠝꠤꠘꠅ ꠊꠣꠡ ꠖꠤꠛꠣ, ꠔꠥꠝꠞꠣ ꠔꠥꠡ꠆ꠐ ꠅꠁꠀ ꠈꠣꠘꠤ-ꠙꠣꠘꠤ ꠈꠣꠁꠛꠣꠄ।

16 “ꠔꠣ-ꠅ ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠀꠞꠘꠣꠄ ꠔꠥꠝꠞꠣꠞ ꠝꠘ ꠇꠥ-ꠙꠕꠦ ꠎꠣꠁꠛꠉꠤ, ꠀꠞ ꠔꠥꠝꠞꠣ ꠛꠦ-ꠙꠕꠤ ꠛꠘꠤꠀ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠛꠣꠄ, ꠁꠔꠣꠞꠦ ꠜꠇ꠆ꠔꠤ ꠇꠞꠛꠣꠄ। 17 ꠁꠟꠣ ꠇꠞꠟꠦ ꠔꠥꠝꠞꠣꠞ ꠃꠙꠞꠦ ꠝꠣꠛꠥꠖꠞ ꠉꠥꠍꠣꠞ ꠀꠉꠥꠁꠘ ꠉꠞꠝ ꠅꠁꠛ, ꠔꠣꠁꠘ ꠀꠍꠝꠣꠘꠞ ꠞꠢꠝꠔꠤ ꠖꠥꠀꠞ ꠛꠘ꠆ꠖ ꠇꠞꠤꠟꠤꠛꠣ, ꠔꠦꠃ ꠝꠦꠊ-ꠙꠣꠘꠤ ꠛꠘ꠆ꠖ ꠅꠁꠀ ꠎꠝꠤꠘꠅ ꠀꠞ ꠚꠡꠟ ꠚꠟꠤꠔ ꠘꠣꠄ, ꠀꠞ ꠝꠣꠛꠥꠖꠦ ꠔꠥꠝꠞꠣꠞꠦ ꠎꠦ ꠖꠦꠡ ꠖꠣꠘ ꠇꠞꠞꠣ, ꠢꠃ ꠀꠞꠣꠝꠞ ꠖꠦꠡ ꠕꠣꠇꠤ ꠔꠥꠝꠞꠣꠞꠦ ꠎꠟꠖꠤ ꠇꠞꠤ ꠚꠥꠍꠤꠀ ꠚꠣꠟꠣꠁꠟ ꠅꠁꠛ। 18 ꠄꠞꠟꠣꠉꠤ ꠔꠥꠝꠞꠣꠞ ꠝꠘꠞ ꠝꠣꠎꠦ, ꠔꠥꠝꠞꠣꠞ ꠖꠤꠟꠞ ꠜꠤꠔꠞꠦ ꠀꠝꠣꠞ ꠅꠃ ꠢꠥꠇꠥꠝ ꠈꠣꠘ ꠉꠣꠕꠤꠀ ꠞꠣꠈꠤꠅ, ꠔꠥꠝꠞꠣꠞ ꠖꠥꠁꠅ ꠀꠔꠅ ꠁꠔꠣ ꠘꠤꠡꠣꠘꠣ ꠢꠤꠡꠣꠛꠦ ꠛꠣꠘ꠆ꠖꠤꠀ ꠕꠁꠅ, ꠀꠞ ꠇꠙꠣꠟꠞ ꠝꠣꠎꠦꠅ ꠟꠣꠉꠣꠁꠅ। 19 ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘ꠆ꠔꠞꠦꠅ ꠁꠔꠣ ꠢꠇ꠆ꠇꠟꠔꠣ ꠔꠣꠟꠤꠝ ꠖꠤꠅ। ꠔꠥꠝꠞꠣ ꠊꠞꠅ ꠞꠅꠀꠞ ꠡꠝꠄ, ꠙꠕꠦ-ꠊꠣꠐꠦ ꠀꠐꠤꠛꠣꠞ ꠡꠝꠄ, ꠢꠥꠔꠤꠛꠣꠞ ꠡꠝꠄ ꠀꠞ ꠢꠥꠔꠘꠅ ꠕꠣꠇꠤ ꠃꠑꠤꠀ ꠢꠣꠞꠟꠦ ꠢꠣꠝꠦꠡꠣ ꠅꠔꠣ ꠛꠦꠙꠣꠞꠦ ꠛꠣꠔꠌꠤꠔ ꠇꠞꠤꠅ। 20 ꠁꠔꠣ ꠟꠦꠈꠤꠀ ꠔꠥꠝꠞꠣꠞ ꠛꠣꠠꠤꠞ ꠉꠦꠁꠐꠅ ꠀꠞ ꠖꠥꠀꠞꠞ ꠌꠃꠇꠣꠑꠅ ꠟꠣꠉꠣꠁꠅ। 21 ꠁꠔꠣ ꠝꠣꠘꠟꠦ ꠝꠣꠛꠥꠖꠦ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠉꠦꠍꠦ ꠎꠦ ꠖꠦꠡ ꠖꠤꠛꠣꠞ ꠇꠍꠝ ꠈꠣꠁꠍꠟꠣ, ꠢꠃ ꠖꠦꠡꠅ ꠔꠥꠝꠞꠣ ꠀꠞ ꠔꠥꠝꠞꠣꠞ ꠀꠅꠟꠣꠖꠞ ꠢꠣꠄꠀꠔꠤ ꠅꠔꠖꠤꠘ ꠞꠁꠛ, ꠎꠔꠖꠤꠘ ꠁ ꠖꠥꠘꠤꠀꠞ ꠃꠙꠞꠦ ꠀꠍꠝꠣꠘ ꠞꠁꠛ।

22 “ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠖꠤꠀꠞ, ꠔꠥꠝꠞꠣ ꠎꠥꠖꠤ ꠈꠥꠛ ꠈꠤꠀꠟꠤ ꠅꠁꠀ ꠁꠔꠣ ꠝꠣꠘꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠅ, ꠔꠣꠘ ꠛꠣꠔꠣꠁꠟ ꠙꠕꠦ ꠌꠟꠅ ꠀꠞ ꠔꠣꠘ ꠀꠡꠤꠇ ꠛꠘꠤꠀ ꠞꠅ, 23 ꠔꠦ ꠝꠣꠛꠥꠖꠦ ꠔꠥꠝꠞꠣꠞ ꠍꠣꠝꠘꠦ ꠕꠣꠇꠤ ꠢꠃ ꠖꠦꠡꠞ ꠢꠇꠟ ꠎꠣꠔꠤꠞꠦ ꠛꠣꠞ ꠇꠞꠤ ꠖꠤꠛꠣ, ꠔꠦꠃ ꠔꠥꠝꠞꠣ ꠘꠤꠎꠞ ꠕꠣꠇꠤ ꠀꠞꠅ ꠛꠠ ꠛꠠ ꠀꠞ ꠛꠟꠀꠟꠣ ꠎꠣꠔꠤꠞꠦ ꠈꠦꠖꠣꠁꠀ ꠢꠘꠞ ꠖꠈꠟꠖꠣꠞꠤ ꠙꠣꠁꠛꠣꠄ। 24 ꠔꠥꠝꠞꠣꠞ ꠙꠣꠅꠖꠤ ꠎꠦꠔꠣ ꠎꠣꠉꠣꠞ ꠃꠙꠞꠦ ꠀꠐꠤꠛꠣꠄ, ꠁꠔꠣ ꠢꠇꠟ ꠎꠣꠉꠣ ꠔꠥꠝꠞꠣꠞ ꠖꠈꠟꠅ ꠀꠁꠛ। ꠖꠃꠇꠘꠞ ꠝꠞꠥꠜꠥꠝꠤ ꠕꠣꠇꠤ ꠟꠦꠛꠣꠘꠘ ꠙꠞ꠆ꠎꠘ꠆ꠔ, ꠚꠥꠞꠣꠔ ꠉꠣꠋ ꠕꠣꠇꠤ ꠙꠁꠌꠝꠞ ꠖꠞꠤꠀ ꠙꠞ꠆ꠎꠘ꠆ꠔ ꠖꠈꠟꠖꠣꠞꠤ ꠙꠣꠁꠛꠣꠄ। 25 ꠇꠥꠘꠥ ꠛꠦꠐꠣ ꠔꠥꠝꠞꠣꠞ ꠍꠣꠝꠘꠦ ꠃꠛꠣꠘꠤꠞ ꠔꠣꠇ꠆ꠇꠔ ꠅꠁꠔ ꠘꠣꠄ, ꠔꠥꠝꠞꠣ ꠢꠃ ꠖꠦꠡꠞ ꠎꠦꠈꠣꠘꠅ ꠎꠣꠁꠛꠣꠄ, ꠅꠈꠣꠘꠞ ꠝꠣꠘꠡꠦꠃ ꠔꠥꠝꠞꠣꠞꠦ ꠒꠞꠣꠁꠛꠣ, ꠔꠣꠞꠣꠞ ꠜꠤꠔꠞꠦ ꠇꠣꠙꠤꠛ, ꠁꠔꠣ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠅꠀꠖꠣ ꠝꠣꠚꠤꠇꠃ ꠇꠞꠣꠁꠛꠣ।

26 “ꠢꠥꠘꠅ, ꠀꠁꠎ ꠀꠝꠤ ꠔꠥꠝꠞꠣꠞ ꠍꠣꠝꠘꠦ ꠞꠢꠝꠔ ꠀꠞ ꠟꠣꠘ꠆ꠘꠔ ꠖꠥꠁꠅꠔꠣ ꠖꠦꠈꠣꠁꠟꠣꠝ। 27 ꠀꠝꠤ ꠅꠈꠘ ꠔꠥꠝꠞꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠟꠣꠝ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠅꠃ ꠢꠥꠇꠥꠝ-ꠀꠢꠇꠣꠝ ꠎꠥꠖꠤ ꠔꠥꠝꠞꠣ ꠝꠣꠘꠅ, ꠔꠦ ꠔꠥꠝꠞꠣ ꠅꠃ ꠞꠢꠝꠔ ꠙꠣꠁꠛꠣꠄ। 28 ꠀꠞ ꠁꠔꠣ ꠘꠣ ꠝꠣꠘꠤꠀ ꠔꠥꠝꠞꠣ ꠎꠥꠖꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝꠞ ꠃꠟꠐꠣ ꠌꠟꠅ, ꠁ ꠙꠕ ꠕꠣꠇꠤ ꠢꠞꠤꠀ ꠇꠥꠘꠥ ꠖꠦꠛ-ꠖꠦꠛꠤꠞ ꠈꠞꠦ ꠈꠞꠦ ꠎꠣꠅ, ꠔꠦ ꠔꠥꠝꠞꠣ ꠟꠣꠘ꠆ꠘꠔꠤ ꠅꠁꠛꠣꠄ।

29 “ꠔꠥꠝꠞꠣ ꠎꠦ ꠖꠦꠡ ꠖꠈꠟ ꠇꠞꠣꠞ ꠟꠣꠉꠤ ꠎꠣꠁꠞꠣꠄ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦꠛꠟꠣ ꠔꠥꠝꠞꠣꠞꠦ ꠢꠃ ꠖꠦꠡꠅ ꠘꠤꠀ ꠢꠣꠞꠣꠁꠛꠣ, ꠢꠣꠞꠣꠁꠀ ꠢꠣꠞꠟꠦ ꠔꠥꠝꠞꠣ ꠅꠃ ꠞꠢꠝꠔꠞ ꠇꠕꠣ ꠉꠞꠤꠍꠤꠝ ꠙꠣꠠꠞ ꠃꠙꠞꠦ ꠃꠑꠤꠀ ꠄꠟꠣꠘ ꠇꠞꠛꠣꠄ, ꠀꠞ ꠅꠃ ꠟꠣꠘ꠆ꠘꠔꠞ ꠇꠕꠣ ꠄꠟꠣꠘ ꠇꠞꠛꠣꠄ ꠁꠛꠣꠟ ꠙꠣꠠꠞ ꠃꠙꠞꠦ ꠃꠑꠤꠀ। 30 ꠔꠥꠝꠞꠣ ꠔ ꠌꠤꠘꠅ, ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠙꠕꠞ ꠙꠁꠌꠝꠦꠖꠤ ꠉꠤꠟꠉꠟꠞ ꠗꠣꠞꠅ ꠅꠃ ꠖꠥꠁꠅ ꠙꠣꠠ ꠀꠍꠦ, ꠀꠞꠣꠛꠣ ꠘꠣꠝꠞ ꠔꠟ ꠎꠣꠉꠣꠞ ꠛꠣꠡꠤꠘ꠆ꠖꠣ ꠇꠦꠘꠣꠘꠤ ꠅꠇꠟꠞ ꠖꠦꠡꠞ ꠝꠥꠞꠤꠞ ꠄꠟꠘ ꠛꠘꠞ ꠇꠣꠘ꠆ꠖꠣꠞ ꠅꠃ ꠖꠥꠁꠅ ꠙꠣꠠ ꠌꠤꠘꠅ ꠘꠣ ꠘꠤ? 31 ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠞꠣ, ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠢꠃ ꠖꠦꠡꠅ ꠢꠣꠝꠣꠁꠀ ꠢꠣꠞꠤ ꠔꠥꠝꠞꠣ ꠎꠦꠛꠟꠣ ꠢꠘꠅ ꠛꠡꠔ ꠇꠞꠛꠣꠄ, 32 ꠢꠃ ꠡꠝꠄ ꠔꠥꠝꠞꠣ ꠅꠃ ꠢꠥꠇꠥꠝ-ꠀꠢꠇꠣꠝ ꠀꠞ ꠘꠤꠅꠝ-ꠇꠣꠘꠥꠘ ꠈꠥꠛ ꠈꠤꠀꠟ ꠇꠞꠤꠀ ꠀꠝꠟ ꠇꠞꠤꠅ, ꠎꠦꠔꠣ ꠅꠈꠘ ꠔꠥꠝꠞꠣꠞꠦ ꠇꠁꠟꠣꠝ।