1 “ꠅ ꠛꠘꠤ ꠁꠍꠞꠣꠁꠟ, ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠍꠂꠘ, ꠢꠃ ꠖꠦꠡꠅ ꠉꠤꠀ ꠀꠝꠣꠞ ꠛꠣꠔꠣꠁꠟ ꠅꠃ ꠢꠥꠇꠥꠝ-ꠀꠢꠇꠣꠝ ꠀꠞ ꠘꠤꠅꠝ-ꠇꠣꠘꠥꠘ ꠢꠞ-ꠢꠣꠝꠦꠡꠣ ꠝꠣꠘꠤꠀ ꠌꠟꠤꠅ। 2 ꠢꠘꠞ ꠎꠔ ꠎꠣꠔꠤꠞꠦ ꠈꠦꠖꠣꠁꠀ ꠢꠣꠞꠤ ꠔꠥꠝꠞꠣ ꠖꠈꠟꠖꠣꠞꠤ ꠙꠣꠁꠞꠣꠄ, ꠔꠣꠞꠣꠞ ꠢꠥꠞꠥ-ꠛꠠ ꠢꠇꠟ ꠙꠣꠠ-ꠙꠞꠛꠔꠞ ꠃꠙꠞꠦ, ꠒꠣꠟ-ꠙꠣꠟꠣ ꠝꠦꠟꠣꠁꠟ ꠔꠞꠔꠣꠎꠣ ꠢꠇꠟ ꠉꠣꠍꠞ ꠔꠟꠦ ꠔꠣꠞꠣ ꠎꠦꠔꠣ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠂꠘ, ꠔꠥꠝꠞꠣ ꠁꠔꠣ ꠖꠦꠛ-ꠖꠦꠛꠤꠞ ꠀꠡ꠆ꠔꠣꠘꠣ ꠜꠣꠋꠉꠤꠀ ꠄꠇ꠆ꠇꠦꠛꠣꠞꠦ ꠌꠥꠞꠝꠣꠞ ꠇꠞꠤꠟꠣꠁꠅ। 3 ꠔꠣꠞꠣꠞ ꠢꠇꠟ ꠛꠟꠤ ꠈꠣꠘꠣ ꠜꠣꠋꠉꠤꠟꠤꠅ, ꠙꠥꠎꠣꠞ ꠙꠣꠔ꠆ꠔꠞ ꠅꠇꠟ ꠌꠥꠞꠝꠣꠞ ꠇꠞꠤꠅ, ꠀꠡꠦꠞꠣ-ꠖꠦꠛꠤꠞ ꠘꠤꠡꠣꠘꠣ ꠈꠥꠐꠤ ꠅꠇꠟ ꠀꠉꠥꠁꠘꠖꠤ ꠎꠣꠟꠣꠁꠟꠤꠅ, ꠔꠣꠞꠣꠞ ꠛꠣꠘꠣꠁꠟ ꠝꠥꠞ꠆ꠔꠤ ꠅꠇꠟ ꠜꠣꠋꠉꠤꠟꠤꠅ, ꠁꠔꠣꠞ ꠘꠣꠝ ꠢꠤ ꠎꠝꠤꠘ ꠕꠣꠇꠤ ꠙꠥꠞꠣꠙꠥꠞ ꠚꠥꠍꠤꠀ ꠚꠣꠟꠣꠁꠅ।

4 “ꠀꠞ ꠔꠣꠞꠣꠞ ꠖꠦꠛ-ꠖꠦꠛꠤꠞ ꠙꠥꠎꠣꠞ ꠘꠝꠥꠘꠣꠄ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠤꠅ ꠘꠣ। 5 ꠅꠁꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠖꠤꠖꠣꠞ-ꠖꠞꠡꠘ ꠖꠤꠛꠣꠞ ꠈꠤꠀꠟꠦ, ꠔꠣꠘ ꠘꠤꠎꠞ ꠛꠣꠄꠔꠥꠟ꠆ꠟꠣ ꠡꠞꠤꠚ ꠢꠤꠡꠣꠛꠦ, ꠔꠥꠝꠞꠣꠞ ꠢꠇꠟ ꠈꠣꠘ꠆ꠖꠣꠘꠞꠦ ꠖꠦꠅꠀ ꠎꠣꠉꠣ ꠕꠣꠇꠤ ꠔꠣꠁꠘ ꠎꠦ ꠎꠣꠉꠣꠞꠦ ꠙꠍꠘ꠆ꠖ ꠇꠞꠛꠣ, ꠔꠥꠝꠞꠣ ꠔꠣꠘ ꠄꠛꠣꠖꠔꠤꠞ ꠟꠣꠉꠤ ꠢꠃ ꠎꠣꠉꠣꠔ ꠀꠎꠤꠞ ꠅꠁꠅ। 6 ꠔꠥꠝꠞꠣ ꠎꠣꠞꠎꠤꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠢꠇꠟ ꠎꠣꠔꠞ ꠙꠡꠥ ꠇꠥꠞꠛꠣꠘꠤ, ꠢꠇꠟ ꠞꠥꠎꠤ-ꠞꠥꠎꠉꠣꠞꠞ ꠖꠡ ꠛꠣꠐꠞ ꠄꠇ ꠛꠣꠐ, ꠟꠤꠟ꠆ꠟꠣ-ꠍꠖꠉꠣ, ꠝꠣꠘ꠆ꠘꠔꠞ ꠇꠥꠞꠛꠣꠘꠤ, ꠖꠣꠘ-ꠈꠄꠞꠣꠔ ꠀꠞ ꠔꠥꠝꠞꠣꠞ ꠙꠡꠥꠞ ꠙꠄꠟꠣ ꠛꠣꠁꠌ꠆ꠌꠣꠞꠦ ꠅꠃ ꠎꠣꠉꠣꠔ ꠀꠘꠤꠅ। 7 ꠅꠈꠣꠘꠅ ꠔꠥꠝꠞꠣꠞ ꠙꠞꠤꠛꠣꠞꠞ ꠢꠇꠟꠞꠦ ꠟꠁꠀ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠈꠣꠘꠣ-ꠙꠤꠘꠣ ꠇꠞꠤꠅ, ꠀꠞ ꠔꠣꠘ ꠞꠢꠝ-ꠛꠞꠇꠔ ꠙꠣꠅꠀ ꠢꠇꠟ ꠟꠣꠈꠣꠘ ꠇꠣꠝꠣꠁ-ꠞꠥꠎꠉꠣꠞꠞ ꠟꠣꠉꠤ ꠈꠥꠡꠤ-ꠛꠣꠡꠤ ꠇꠞꠤꠅ।

8 “ꠀꠞ ꠅꠈꠘ ꠀꠝꠞꠣ ꠎꠦꠟꠣ ꠎꠦꠝꠘꠦ ꠈꠥꠡꠤ ꠅꠝꠘꠦꠃ ꠌꠟꠞꠣꠝ, ꠢꠘꠅ ꠉꠤꠀ ꠢꠣꠞꠟꠦ ꠔꠥꠝꠞꠣ ꠁꠟꠣ ꠇꠞꠤꠅ ꠘꠣ। 9 ꠔꠥꠝꠞꠣ ꠡꠥꠈ-ꠡꠣꠘ꠆ꠔꠤꠄ ꠛꠡꠔ ꠇꠞꠣꠞ ꠟꠣꠉꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦ ꠎꠣꠉꠣꠞ ꠖꠈꠟꠖꠣꠞꠤ ꠖꠤꠞꠣ, ꠔꠥꠝꠞꠣ ꠔ ꠅꠈꠘꠅ ꠢꠤꠘꠅ ꠉꠦꠍ ꠘꠣ। 10 ꠔꠣ-ꠅ ꠔꠥꠝꠞꠣ ꠎꠦꠛꠟꠣ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠖꠦꠅꠀ ꠖꠦꠡꠅ ꠉꠤꠀ ꠛꠡꠔꠤ ꠇꠞꠛꠣꠄ, ꠢꠃ ꠡꠝꠄ ꠝꠣꠛꠥꠖꠦ ꠔꠥꠝꠞꠣꠞ ꠌꠣꠁꠞꠅ ꠉꠣꠟꠣꠞ ꠖꠥꠡꠝꠘꠞ ꠀꠔ ꠕꠣꠇꠤ ꠡꠣꠘ꠆ꠔꠤ ꠖꠤꠀ ꠢꠣꠞꠟꠦ, 11 ꠔꠣꠁꠘ ꠘꠤꠎꠞ ꠛꠣꠄꠔꠥꠟ꠆ꠟꠣ ꠡꠞꠤꠚ ꠢꠤꠡꠣꠛꠦ ꠎꠦ ꠎꠣꠉꠣꠞꠦ ꠙꠍꠘ꠆ꠖ ꠇꠞꠛꠣ, ꠢꠃ ꠎꠣꠉꠣꠔ ꠔꠥꠝꠞꠣ ꠀꠝꠣꠞ ꠛꠣꠔꠣꠁꠟ ꠢꠇꠟꠔꠣ ꠟꠁꠀ ꠀꠎꠤꠞ ꠅꠁꠅ। ꠔꠥꠝꠞꠣꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠢꠇꠟ ꠎꠣꠔꠞ ꠇꠥꠞꠛꠣꠘꠤꠞ ꠙꠡꠥ, ꠢꠇꠟ ꠞꠥꠎꠤ-ꠞꠥꠎꠉꠣꠞꠞ ꠖꠡ ꠛꠣꠐꠞ ꠄꠇ ꠛꠣꠐ, ꠟꠤꠟ꠆ꠟꠣ-ꠍꠖꠉꠣ, ꠖꠣꠘ-ꠈꠄꠞꠣꠔ ꠀꠞ ꠢꠇꠟ ꠘꠝꠥꠘꠣꠞ ꠝꠣꠘ꠆ꠘꠔꠞ ꠇꠥꠞꠛꠣꠘꠤ ꠟꠁꠀ ꠅꠘꠅ ꠀꠁꠅ। 12 ꠀꠁꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠔꠥꠝꠞꠣ ꠘꠤꠎꠦ, ꠔꠥꠝꠞꠣꠞ ꠙꠥꠀ-ꠙꠥꠠꠤꠘ, ꠔꠥꠝꠞꠣꠞ ꠛꠣꠘ꠆ꠖꠤ-ꠉꠥꠟꠣꠝ, ꠔꠥꠝꠞꠣꠞ ꠉꠣꠃ ꠀꠞ ꠐꠣꠃꠘꠞ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠥꠡ ꠅꠇꠟ, ꠎꠦꠞꠣ ꠔꠥꠝꠞꠣꠞ ꠟꠣꠈꠣꠘ ꠇꠥꠘꠥ ꠎꠣꠉꠣ-ꠎꠝꠤ ꠙꠣꠁꠍꠦ ꠘꠣ, ꠔꠥꠝꠞꠣ ꠢꠇꠟꠦ ꠝꠤꠟꠤꠀ ꠈꠥꠡꠤ-ꠛꠣꠡꠤ ꠇꠞꠤꠅ। 13 ꠀꠞ ꠈꠥꠛ ꠢꠥꠡꠤꠀꠞ ꠞꠁꠅ, ꠔꠥꠝꠞꠣ ꠘꠤꠎꠞ ꠙꠍꠘ꠆ꠖ ꠝꠔ ꠎꠦꠍꠣ ꠎꠣꠉꠣꠔ ꠎꠣꠟꠣꠁꠟ ꠇꠥꠞꠛꠣꠘꠤ ꠖꠤꠅ ꠘꠣ। 14 ꠛꠞꠋ ꠔꠥꠝꠞꠣꠞ ꠈꠣꠘ꠆ꠖꠣꠘ ꠅꠇꠟꠞꠦ ꠖꠦꠅꠀ ꠎꠝꠤꠘ ꠕꠣꠇꠤ ꠔꠣꠁꠘ ꠎꠦ ꠈꠣꠘ꠆ꠖꠣꠘꠞ ꠎꠣꠉꠣ ꠙꠍꠘ꠆ꠖ ꠇꠞꠛꠣ, ꠈꠣꠟꠤ ꠢꠃ ꠎꠣꠉꠣꠔ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠅ, ꠀꠞ ꠢꠃ ꠎꠣꠉꠣꠞ ꠟꠣꠉꠤ ꠀꠝꠣꠞ ꠛꠣꠔꠣꠁꠟ ꠢꠇꠟ ꠇꠣꠝ-ꠇꠣꠎ ꠇꠞꠤꠅ।

15 “ꠔꠣ-ꠅ ꠔꠥꠝꠞꠣꠞ ꠝꠘꠞ ꠡꠈ ꠅꠁꠟꠦ ꠙꠣꠇ-ꠘꠣꠙꠣꠇ ꠢꠣꠟꠔꠦꠅ ꠢꠇꠟꠦꠃ ꠎꠦꠇꠥꠘꠥ ꠎꠣꠔꠞ ꠎꠋꠟꠤ ꠅꠞꠤꠘꠞ ꠉꠥꠡ꠆ꠔ ꠈꠣꠅꠀ ꠎꠦꠟꠣ ꠎꠣꠁꠎ ꠀꠍꠦ, ꠅꠟꠣ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠞꠢꠝ-ꠛꠞꠇꠔꠦ ꠙꠣꠅꠀ ꠙꠡꠥꠞꠦ ꠎꠛ ꠇꠞꠤꠀ, ꠔꠥꠝꠞꠣꠞ ꠄꠟꠣꠇꠣꠞ ꠉꠣꠃ ꠛꠣ ꠐꠣꠃꠘꠅ ꠈꠣꠁꠔꠣꠄ ꠙꠣꠞꠛꠣꠄ। 16 ꠈꠣꠟꠤ ꠔꠥꠝꠞꠣ ꠇꠥꠘꠥ ꠟꠃ ꠈꠣꠁꠅ ꠘꠣ, ꠟꠃꠞꠦ ꠙꠣꠘꠤꠞ ꠘꠝꠥꠘꠣꠄ ꠝꠣꠐꠤꠔ ꠓꠣꠟꠤ ꠖꠤꠛꠣꠄ।

17 “ꠔꠥꠝꠞꠣꠞ ꠢꠇꠟ ꠎꠣꠔꠞ ꠚꠄ-ꠚꠡꠟꠞ, ꠀꠋꠉꠥꠞꠞ ꠡꠞꠛꠔꠞ ꠀꠞ ꠔꠦꠟꠞ ꠖꠡ ꠛꠣꠐꠞ ꠄꠇ ꠛꠣꠐ, ꠔꠥꠝꠞꠣꠞ ꠉꠞꠥ-ꠍꠣꠉꠟꠞ ꠙꠄꠟꠣ ꠛꠣꠁꠌ꠆ꠌꠣ, ꠔꠥꠝꠞꠣꠞ ꠝꠣꠘ꠆ꠘꠔꠞ ꠢꠇꠟꠔꠣ, ꠔꠥꠝꠞꠣꠞ ꠟꠤꠟ꠆ꠟꠣ-ꠍꠖꠉꠣ, ꠖꠣꠘ-ꠈꠄꠞꠣꠔ, ꠁꠔꠣ ꠇꠥꠘ꠆ꠔꠣꠃ ꠔꠥꠝꠞꠣꠞ ꠛꠡꠔꠤ ꠄꠟꠣꠇꠣꠞ ꠇꠥꠘꠥ ꠉꠣꠃꠔ ꠛꠣ ꠐꠣꠃꠘꠅ ꠈꠣꠁꠅ ꠘꠣ। 18 ꠁꠔꠣ ꠈꠣꠟꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠎꠣꠉꠣꠔ ꠘꠤꠀ ꠔꠣꠘ ꠍꠣꠝꠘꠦ ꠈꠣꠁꠅ। ꠔꠥꠝꠞꠣ ꠘꠤꠎꠦ, ꠔꠥꠝꠞꠣꠞ ꠙꠥꠀ-ꠙꠥꠠꠤꠘ, ꠔꠥꠝꠞꠣꠞ ꠉꠥꠟꠣꠝ-ꠛꠣꠘ꠆ꠖꠤ, ꠀꠞ ꠔꠥꠝꠞꠣꠞ ꠉꠣꠃ ꠛꠣ ꠐꠣꠃꠘꠞ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠦ ꠈꠣꠁꠛꠣ। ꠔꠥꠝꠞꠣꠞ ꠢꠇꠟ ꠘꠝꠥꠘꠣꠞ ꠇꠣꠝ-ꠇꠣꠎꠞ ꠝꠣꠎꠦ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠈꠥꠡꠤ-ꠛꠣꠡꠤ ꠇꠞꠤꠅ। 19 ꠔꠣ-ꠅ ꠔꠥꠝꠞꠣꠞ ꠖꠦꠡꠅ ꠎꠔꠖꠤꠘ ꠛꠡꠔ ꠇꠞꠛꠣꠄ, ꠅꠔꠖꠤꠘ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠞ ꠃꠙꠞꠦ ꠈꠤꠀꠟ-ꠘꠎꠞ ꠞꠣꠈꠤꠅ।

20 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠘ ꠅꠀꠖꠣ ꠝꠣꠚꠤꠇ ꠔꠥꠝꠞꠣꠞ ꠖꠦꠡꠞ ꠡꠤꠝꠣꠘꠣ ꠛꠣꠠꠣꠁꠀ ꠢꠣꠞꠟꠦ, ꠔꠥꠝꠞꠣ ꠎꠦꠛꠟꠣ ꠉꠥꠡ꠆ꠔ ꠈꠣꠁꠛꠣꠞ ꠘꠤꠅꠔꠦ ꠇꠁꠛꠣꠄ, ꠉꠥꠡ꠆ꠔ ꠈꠣꠁꠔꠣꠝ ꠝꠘꠦ ꠌꠣꠞ, ꠢꠃ ꠡꠝꠄ ꠔꠥꠝꠞꠣꠞ ꠝꠘꠞ ꠡꠈ ꠝꠤꠐꠣꠁꠀ ꠉꠥꠡ꠆ꠔ ꠈꠣꠁꠅ। 21 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠛꠣꠄꠔꠥꠟ꠆ꠟꠣ ꠡꠞꠤꠚ ꠢꠤꠡꠣꠛꠦ ꠎꠦ ꠎꠣꠉꠣ ꠙꠍꠘ꠆ꠖ ꠇꠞꠛꠣ, ꠢꠤ ꠎꠣꠉꠣ ꠎꠥꠖꠤ ꠔꠥꠝꠞꠣꠞ ꠛꠡꠔ ꠈꠣꠘꠣ ꠕꠣꠇꠤ ꠛꠣꠇ꠆ꠇꠣ ꠖꠥꠞꠁ ꠅꠄ, ꠔꠦ ꠔꠥꠝꠞꠣ ꠀꠝꠣꠞ ꠛꠣꠔꠣꠁꠟ ꠢꠥꠇꠥꠝ ꠝꠣꠚꠤꠇ ꠔꠥꠝꠞꠣꠞ ꠝꠣꠛꠥꠖꠞ ꠖꠦꠅꠀ ꠉꠞꠥ-ꠍꠣꠉꠟꠞ ꠙꠣꠟ ꠕꠣꠇꠤ ꠙꠡꠥ ꠘꠤꠀ ꠎꠛ ꠇꠞꠤꠅ, ꠀꠞ ꠎꠣꠞꠎꠤꠞ ꠉꠣꠃ ꠛꠣ ꠐꠣꠃꠘꠅ ꠘꠤꠎꠞ ꠈꠥꠡꠤꠄ ꠉꠥꠡ꠆ꠔ ꠈꠣꠁꠅ। 22 ꠡꠤꠇꠣꠞꠞ ꠎꠋꠟꠤ ꠅꠞꠤꠘꠞ ꠉꠥꠡ꠆ꠔꠞ ꠟꠣꠈꠣꠘ ꠔꠥꠝꠞꠣ ꠁꠔꠣ ꠈꠣꠁꠅ, ꠙꠣꠇ-ꠘꠣꠙꠣꠇ ꠢꠣꠟꠔꠦ ꠢꠇꠟꠦꠃ ꠈꠣꠁꠅ। 23 ꠅꠁꠟꠦ ꠢꠥꠡꠤꠀꠞ ꠞꠁꠅ, ꠟꠃ ꠈꠣꠁꠅ ꠘꠣ, ꠟꠃ ꠅꠁꠟꠉꠤ ꠎꠣꠘ, ꠔꠥꠝꠞꠣ ꠉꠥꠡ꠆ꠔꠞ ꠟꠉꠦ ꠎꠣꠘ ꠈꠣꠁꠅ ꠘꠣ। 24 ꠔꠥꠝꠞꠣ ꠇꠥꠘꠥꠝꠘ꠆ꠔꠦꠃ ꠟꠃ ꠈꠣꠁꠅ ꠘꠣ, ꠁꠔꠣꠞꠦ ꠙꠣꠘꠤꠞ ꠘꠝꠥꠘꠣꠄ ꠝꠣꠐꠤꠔ ꠓꠣꠟꠤ ꠖꠤꠅ। 25 ꠔꠥꠝꠞꠣ ꠟꠃ ꠈꠣꠁꠅ ꠘꠣ, ꠝꠣꠛꠥꠖꠞ ꠘꠎꠞꠅ ꠎꠦꠇꠐꠣ ꠡꠑꠤꠇ, ꠅꠇꠐꠣ ꠀꠝꠟ ꠇꠞꠟꠦ ꠔꠥꠝꠞꠣ ꠀꠞ ꠔꠥꠝꠞꠣꠞ ꠜꠛꠤꠡꠔ ꠀꠅꠟꠣꠖ ꠅꠇꠟꠞ ꠜꠣꠟꠣꠁ ꠅꠁꠛ।

26 “ꠝꠣꠛꠥꠖꠞ ꠙꠍꠘ꠆ꠖ ꠇꠞꠣ ꠎꠣꠉꠣꠔ ꠔꠥꠝꠞꠣꠞ ꠙꠣꠇ-ꠙꠛꠤꠔ꠆ꠞ ꠎꠤꠘꠤꠡ ꠀꠞ ꠝꠣꠘ꠆ꠘꠔꠞ ꠎꠤꠘꠤꠡ ꠟꠁꠀ ꠎꠣꠁꠅ। 27 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠔꠥꠝꠞꠣꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠉꠥꠡ꠆ꠔ ꠀꠞ ꠟꠃ ꠎꠣꠟꠣꠁꠅ। ꠅꠁꠟꠦ ꠔꠥꠝꠞꠣꠞ ꠅꠁꠘ꠆ꠘ ꠢꠇꠟ ꠇꠥꠞꠛꠣꠘꠤꠞ ꠟꠃ ꠇꠥꠞꠛꠣꠘꠤ ꠈꠣꠘꠣꠞ ꠝꠣꠎꠦ ꠓꠣꠟꠤꠅ ꠀꠞ ꠁ ꠇꠥꠞꠛꠣꠘꠤꠞ ꠉꠥꠡ꠆ꠔ ꠔꠥꠝꠞꠣ ꠈꠣꠁꠅ। 28 ꠔꠥꠝꠞꠣ ꠀꠞ ꠔꠥꠝꠞꠣꠞ ꠜꠛꠤꠡꠔ ꠀꠅꠟꠣꠖ ꠅꠇꠟꠞ ꠎꠣꠔꠦ ꠢꠞ-ꠢꠣꠝꠦꠡꠣ ꠀꠄ-ꠃꠘ꠆ꠘꠔꠤ ꠅꠄ, ꠅꠔꠣꠞ ꠟꠣꠉꠤ ꠔꠥꠝꠞꠣ ꠀꠝꠣꠞ ꠛꠣꠔꠣꠁꠟ ꠅꠃ ꠢꠥꠇꠥꠝ ꠈꠣꠘꠣꠁꠘ ꠎꠔꠘ ꠇꠞꠤ ꠝꠣꠘꠤꠅ, ꠁꠟꠣ ꠌꠟꠟꠦ ꠔꠥꠝꠞꠣ ꠀꠟ꠆ꠟꠣ ꠝꠣꠛꠥꠖꠞ ꠘꠎꠞꠅ ꠎꠦꠔꠣ ꠡꠑꠤꠇ ꠀꠞ ꠜꠣꠟꠣ, ꠅꠐꠣꠃ ꠔꠥꠝꠞꠣ ꠇꠞꠛꠣꠄ।

29 “ꠔꠥꠝꠞꠣ ꠎꠔ ꠎꠣꠔꠤꠞꠦ ꠛꠦ-ꠖꠈꠟ ꠇꠞꠛꠣꠄ, ꠔꠣꠞꠣꠞꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠍꠣꠝꠘ ꠕꠣꠇꠤ ꠈꠦꠖꠣꠁꠀ ꠢꠣꠞꠟꠦ, ꠔꠥꠝꠞꠣ ꠎꠦꠛꠟꠣ ꠢꠃ ꠖꠦꠡꠞ ꠖꠈꠟꠖꠣꠞꠤ ꠙꠣꠁꠀ ꠢꠘꠅ ꠛꠡꠔ ꠇꠞꠛꠣꠄ, 30 ꠢꠃ ꠡꠝꠄ ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠀꠞꠘꠣꠄ ꠔꠥꠝꠞꠣꠅ ꠔꠣꠞꠣꠞ ꠚꠣꠘ꠆ꠖꠅ ꠙꠠꠤꠀ ꠔꠣꠞꠣꠞ ꠖꠦꠛꠔꠣꠞ ꠜꠎꠘꠣ ꠇꠞꠤꠀ ꠎꠥꠖꠤ ꠇꠅ, ꠅꠔꠣ ꠝꠣꠘꠡꠦ ꠎꠦꠟꠣ ꠔꠣꠞꠣꠞ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠂꠘ, ꠀꠝꠞꠣꠅ ꠅꠟꠣ ꠔꠣꠞꠣꠞ ꠟꠣꠈꠣꠘ ꠙꠥꠎꠣ ꠇꠞꠔꠣꠝ। 31 ꠈꠛꠞꠖꠣꠞ! ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠄꠛꠣꠖꠔ-ꠛꠘ꠆ꠖꠦꠉꠤ ꠔꠣꠞꠣꠞ ꠙꠥꠎꠣꠞ ꠘꠝꠥꠘꠣꠄ ꠇꠞꠤꠅ ꠘꠣ। ꠔꠣꠞꠣ ꠔ ꠎꠣꠞꠎꠤꠞ ꠖꠦꠛ-ꠖꠦꠛꠤꠞ ꠘꠣꠝꠦ ꠝꠣꠛꠥꠖꠞ ꠘꠣꠙꠍꠘ꠆ꠖꠞ ꠢꠇꠟ ꠘꠝꠥꠘꠣꠞ ꠀꠇꠣꠝ-ꠇꠥꠇꠣꠝ ꠇꠞꠦ, ꠄꠝꠘꠇꠤ ꠔꠣꠞꠣꠞ ꠖꠦꠛ-ꠖꠦꠛꠤꠞ ꠘꠣꠝꠦ ꠘꠤꠎꠞ ꠙꠥꠀ-ꠙꠥꠠꠤꠘꠞꠦ ꠀꠉꠥꠘꠤꠔ ꠎꠣꠟꠣꠁꠀ ꠛꠟꠤ ꠖꠤꠟꠣꠄ।

32 “ꠔꠦ ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠎꠣꠘꠣꠁꠟꠣꠝ, ꠔꠥꠝꠞꠣ ꠈꠣꠟꠤ ꠅꠔꠣꠃ ꠝꠣꠘꠤꠅ। ꠁꠔꠣꠞ ꠟꠉꠦ ꠖꠥꠍꠞꠣ ꠇꠥꠘ꠆ꠔꠣ ꠛꠣꠠꠣꠁꠅ ꠘꠣ, ꠀꠞ ꠇꠥꠘ꠆ꠔꠣ ꠛꠣꠖꠅ ꠖꠤꠅ ꠘꠣ।