1 “ꠅꠈꠘ ꠔꠥꠝꠞꠣꠞ ꠝꠣꠎꠞ ꠇꠥꠘꠥ ꠙꠤꠞ-ꠖꠞꠛꠦꠡꠦ ꠛꠣ ꠁꠡ꠆ꠔꠦꠈꠣꠞꠣ ꠇꠞꠞꠣꠄ ꠇꠥꠘ꠆ꠔꠣ ꠊꠐꠤꠛ ꠇꠁꠀ ꠎꠥꠖꠤ ꠀꠉꠣꠝ ꠈꠛꠞ ꠎꠣꠘꠣꠄ, ꠀꠞ ꠇꠥꠘꠥ ꠇꠦꠞꠣꠝꠔꠤꠞ ꠇꠕꠣ ꠇꠄ, 2 ꠇꠅꠀꠞ ꠛꠣꠖꠦ ꠢꠣꠍꠣꠃ ꠎꠥꠖꠤ ꠅꠟꠣ ꠚꠟꠤ ꠎꠣꠄ, ꠀꠞ ꠅꠃ ꠎꠘꠦꠃ ꠇꠥꠘꠥ ꠖꠦꠛ-ꠖꠦꠛꠤꠞ ꠇꠕꠣ ꠢꠥꠘꠣꠁꠀ ꠔꠥꠝꠞꠣꠞꠦ ꠇꠄ, ꠌꠟꠅ, ꠀꠝꠞꠣ ꠉꠤꠀ ꠢꠃ ꠖꠦꠛꠔꠣꠞ ꠙꠥꠎꠣ ꠇꠞꠤ, 3 ꠔꠦ ꠔꠥꠝꠞꠣ ꠅꠃ ꠙꠤꠞ-ꠖꠞꠛꠦꠡ ꠛꠣ ꠁꠡ꠆ꠔꠦꠈꠣꠞꠣ ꠇꠞꠞꠣꠞ ꠇꠕꠣ ꠝꠣꠘꠤꠅ ꠘꠣ। ꠝꠘꠅ ꠞꠣꠈꠤꠅ, ꠔꠥꠝꠞꠣ ꠎꠣꠘꠦ-ꠙꠞꠣꠘꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠞꠣꠄ ꠇꠤ ꠘꠣ, ꠅꠃꠈꠣꠘ ꠎꠣꠌꠣꠁ ꠇꠞꠣꠞ ꠟꠣꠉꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠙꠞꠤꠇ꠆ꠇꠣ ꠇꠞꠂꠘ। 4 ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠌꠟꠤꠅ, ꠈꠣꠟꠤ ꠔꠣꠘꠞꠦꠃ ꠒꠞꠣꠁꠅ, ꠔꠣꠘ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠅ, ꠔꠣꠘ ꠇꠣꠟꠣꠝ ꠢꠥꠘꠤꠀ ꠀꠝꠟ ꠇꠞꠤꠅ, ꠔꠣꠘ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠤꠅ, ꠀꠞ ꠔꠣꠘ ꠀꠡꠤꠇ ꠛꠘꠤꠀ ꠞꠁꠅ। 5 ꠄꠞꠟꠣꠉꠤ ꠢꠃ ꠜꠘ꠆ꠒ ꠙꠤꠞ-ꠖꠞꠛꠦꠡ ꠛꠣ ꠁꠡ꠆ꠔꠦꠈꠣꠞꠣ ꠇꠞꠞꠣꠞꠦ ꠎꠣꠘꠦ ꠝꠣꠞꠤꠟꠣꠁꠅ। ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠎꠦ ꠀꠟ꠆ꠟꠣ ꠝꠣꠛꠥꠖꠦ ꠔꠥꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤꠀ ꠀꠘꠍꠂꠘ, ꠉꠥꠟꠣꠝꠤ ꠕꠣꠇꠤ ꠔꠥꠝꠞꠣꠞꠦ ꠀꠎꠣꠖ ꠇꠞꠍꠂꠘ, ꠅꠃ ꠜꠘ꠆ꠒꠄ ꠔ ꠔꠥꠝꠞꠣꠞꠦ ꠢꠃ ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠘꠣꠚꠞꠝꠣꠘꠤꠞ ꠟꠣꠉꠤ ꠐꠣꠘꠦꠞ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠛꠣꠔꠣꠁꠟ ꠙꠕ ꠕꠣꠇꠤ ꠛꠦ-ꠙꠕꠤ ꠛꠣꠘꠣꠁꠔ ꠌꠣꠞ। ꠄꠞꠟꠣꠉꠤ ꠔꠥꠝꠞꠣꠞ ꠝꠣꠎ ꠕꠣꠇꠤ ꠅꠃ ꠈꠣꠞꠣꠙꠤꠞꠦ ꠛꠤꠘꠣꠡ ꠇꠞꠤꠟꠣꠁꠛꠣꠄ।

6 “ꠅꠈꠘ ꠔꠥꠝꠞꠣꠞ ꠀꠙꠘ ꠜꠣꠁ, ꠔꠥꠝꠞꠣꠞ ꠘꠤꠎꠞ ꠙꠥꠀ ꠛꠣ ꠙꠥꠠꠤ, ꠔꠥꠝꠞꠣꠞ ꠎꠣꠘꠞ ꠐꠥꠇꠞꠣ ꠛꠃ, ꠛꠣ ꠔꠥꠝꠞꠣꠞ ꠝꠣꠄꠀꠞ ꠛꠘ꠆ꠖꠥ ꠀꠁꠀ ꠎꠥꠖꠤ ꠘꠤꠞꠣꠟꠣꠄ ꠇꠄ, ‘ꠌꠟꠅ, ꠀꠝꠞꠣ ꠉꠤꠀ ꠖꠦꠛ-ꠖꠦꠛꠤꠞ ꠜꠎꠘꠣ ꠇꠞꠤ।’ ꠁꠔꠣ ꠖꠦꠛꠔꠣꠁꠘ ꠔꠥꠝꠣꠞ ꠛꠣ ꠔꠥꠝꠣꠞ ꠛꠣꠚ-ꠖꠣꠖꠣꠞ ꠅꠌꠤꠘꠣ, 7 ꠔꠥꠝꠣꠞ ꠀꠡ-ꠙꠣꠡ ꠄꠟꠣꠇꠣꠞ ꠛꠣ ꠖꠥꠞꠁꠞ ꠖꠦꠡꠞ ꠇꠥꠘꠥ ꠖꠦꠛꠔꠣ ꠅꠃꠇ, ꠖꠥꠘꠤꠀꠞ ꠄꠇ ꠡꠤꠝꠣꠘꠣ ꠕꠣꠇꠤ ꠀꠞꠦꠇ ꠡꠤꠝꠣꠘꠣꠞ ꠎꠦꠇꠥꠘꠥ ꠎꠣꠔꠤꠞ ꠎꠦꠇꠥꠘꠥ ꠖꠦꠛꠔꠣ ꠅꠃꠇ, 8 ꠢꠦ ꠎꠥꠖꠤ ꠔꠥꠝꠣꠞꠦ ꠢꠘꠅ ꠘꠤꠔ ꠌꠣꠄ, ꠔꠦ ꠔꠥꠝꠤ ꠎꠣꠁꠅ ꠘꠣ, ꠔꠣꠞ ꠇꠕꠣ ꠢꠥꠘꠤꠅ ꠘꠣ, ꠔꠣꠞꠦ ꠖꠄꠀ ꠖꠦꠈꠣꠁꠅ ꠘꠣ, ꠔꠣꠞ ꠎꠣꠘ ꠛꠣꠌꠣꠁꠅ ꠘꠣ, ꠀꠞ ꠟꠥꠇꠣꠘꠤꠞ ꠎꠣꠉꠣ ꠖꠤꠅ ꠘꠣ। 9 ꠔꠣꠞꠦ ꠘꠤꠌ꠆ꠌꠤꠔ ꠎꠣꠘꠦ ꠝꠣꠞꠤꠟꠣꠁꠅ। ꠎꠣꠘꠦ ꠝꠣꠞꠤꠟꠣꠅꠀꠞ ꠟꠣꠉꠤ ꠙꠄꠟꠣ ꠔꠥꠝꠣꠞ ꠘꠤꠎꠞ ꠀꠔꠖꠤ ꠡꠥꠞꠥ ꠇꠞꠅ, ꠛꠣꠖꠦ ꠢꠇꠟꠦ ꠀꠁꠀ ꠡꠞꠤꠇ ꠅꠁꠛꠣ। 10 ꠅꠉꠥꠞꠦ ꠙꠣꠔ꠆ꠔꠞꠖꠤ ꠁꠐꠣꠁꠀ ꠎꠣꠘꠦ ꠝꠣꠞꠤꠟꠤꠅ, ꠢꠦ ꠔ ꠔꠥꠝꠣꠞꠦ ꠢꠃ ꠀꠟ꠆ꠟꠣ ꠝꠣꠛꠥꠖꠞ ꠄꠛꠣꠖꠔꠤ ꠕꠣꠇꠤ ꠢꠞꠣꠁꠀ ꠇꠥ-ꠙꠕꠦ ꠘꠤꠔ ꠌꠣꠞ, ꠎꠦꠁꠘ ꠔꠥꠝꠣꠞꠦ ꠝꠤꠡꠞ ꠖꠦꠡꠞ ꠉꠥꠟꠣꠝꠤ ꠕꠣꠇꠤ ꠀꠎꠣꠖ ꠇꠞꠤꠀ ꠀꠘꠍꠂꠘ। 11 ꠅꠉꠥꠞꠦ ꠝꠣꠞꠤꠟꠣꠅꠀꠞ ꠈꠛꠞ ꠢꠥꠘꠤꠀ ꠢꠇꠟ ꠛꠘꠤ ꠁꠍꠞꠣꠁꠟꠦ ꠒꠞꠣꠁꠛꠣ, ꠄꠞꠛꠣꠖꠦ ꠁꠟꠣ ꠘꠣꠚꠞꠝꠣꠘꠤ ꠇꠞꠣꠞ ꠡꠣꠅꠡ ꠀꠞ ꠇꠦꠃꠞꠞ ꠅꠁꠔ ꠘꠣꠄ।

12 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠛꠡꠔ ꠈꠣꠘꠣꠞ ꠟꠣꠉꠤ ꠎꠦ ꠉꠣꠃ ꠀꠞ ꠐꠣꠃꠘ ꠅꠇꠟ ꠖꠣꠘ ꠇꠞꠞꠣ, ꠁꠔꠣ ꠇꠥꠘꠥ ꠎꠣꠉꠣꠞ ꠛꠦꠙꠣꠞꠦ ꠔꠥꠝꠞꠣ ꠎꠥꠖꠤ ꠢꠥꠘꠅ, 13 ꠢꠘꠞ ꠛꠘꠤ ꠁꠍꠞꠣꠁꠟꠞ ꠝꠣꠎꠞ ꠇꠥꠘꠥ ꠘꠣꠚꠞꠝꠣꠘꠞ ꠖꠟ ꠛꠣꠞ ꠅꠁꠀ, ꠢꠃ ꠎꠣꠉꠣꠞ ꠝꠣꠘꠡꠞꠦ ꠛꠦ-ꠙꠕꠦ ꠘꠤꠛꠣꠞ ꠟꠣꠉꠤ ꠇꠞ, ꠌꠟꠅ, ꠀꠝꠞꠣ ꠉꠤꠀ ꠘꠄꠀ ꠘꠄꠀ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠤ। 14 ꠔꠦ ꠔꠥꠝꠞꠣ ꠈꠥꠛ ꠜꠣꠟꠣꠝꠘ꠆ꠔꠦ ꠈꠥꠎ-ꠈꠛꠞ ꠟꠁꠅ ꠀꠞ ꠔꠖꠘ꠆ꠔ ꠇꠞꠤꠅ। ꠔꠖꠘ꠆ꠔ ꠇꠞꠤꠀ ꠎꠥꠖꠤ ꠁꠔꠣ ꠎꠊꠁꠘ꠆ꠘ ꠇꠣꠝꠞ ꠙꠞꠝꠣꠘ ꠝꠤꠟꠦ, 15 ꠔꠦ ꠢꠘꠞ ꠢꠇꠟ ꠛꠣꠡꠤꠘ꠆ꠖꠣꠞꠦ ꠎꠣꠘꠦ ꠝꠣꠞꠤꠟꠤꠅ। ꠢꠃ ꠉꠣꠃ ꠛꠣ ꠐꠣꠃꠘꠞ ꠢꠇꠟ ꠝꠣꠘꠥꠡ ꠀꠞ ꠙꠡꠥ-ꠙꠋꠇꠤꠞꠦ ꠔꠟꠥꠀꠞꠖꠤ ꠇꠣꠐꠤꠟꠤꠅ। 16 ꠢꠤꠘ ꠕꠣꠇꠤ ꠀꠘꠣ ꠢꠇꠟ ꠝꠣꠟ-ꠍꠣꠝꠣꠘꠣ ꠐꠣꠃꠘꠞ ꠝꠄꠖꠣꠘꠅ ꠘꠤꠀ ꠎꠣꠟꠣꠁꠟꠤꠅ। ꠢꠃ ꠀꠡ꠆ꠔꠣ ꠉꠣꠃꠞꠦ ꠛꠣ ꠐꠣꠃꠘꠞꠦꠅ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠈꠣꠘ ꠎꠣꠟꠣꠁꠀ ꠍꠣꠟꠤ ꠇꠞꠤꠅ। ꠢꠃ ꠎꠣꠉꠣꠞꠦ ꠌꠤꠞꠇꠣꠟꠞ ꠟꠣꠉꠤ ꠛꠤꠘꠣꠡ ꠇꠞꠤꠅ, ꠇꠦꠃ ꠎꠣꠘꠥ ꠇꠥꠘꠥꠖꠤꠘ ꠢꠤꠘꠅ ꠇꠥꠘ꠆ꠔꠣ ꠛꠣꠘꠣꠁꠔ ꠘꠣ ꠙꠣꠞꠦ। 17 ꠝꠣꠛꠥꠖꠞ ꠛꠦꠎꠥꠁꠔꠣ ꠉꠥꠍꠣ ꠕꠣꠇꠤ ꠞꠦꠢꠣꠁ ꠙꠣꠅꠀꠞ ꠟꠣꠉꠤ, ꠢꠘꠞ ꠇꠥꠘꠥ ꠝꠣꠟ-ꠍꠣꠝꠣꠘꠣ ꠎꠣꠘꠥ ꠔꠥꠝꠞꠣꠞ ꠉꠦꠍꠦ ꠘꠣ ꠞꠄ, ꠁꠔꠣ ꠔ ꠟꠣꠘ꠆ꠘꠔꠤ ꠝꠣꠟ। ꠔꠦꠃ ꠝꠣꠛꠥꠖꠦ ꠔꠥꠝꠞꠣꠞꠦ ꠞꠢꠝ-ꠛꠞꠇꠔ ꠀꠞ ꠖꠄꠀ-ꠝꠣꠄꠀ ꠇꠞꠛꠣ, ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠟꠉꠞ ꠅꠀꠖꠣ ꠝꠣꠚꠤꠇ ꠔꠣꠁꠘ ꠔꠥꠝꠞꠣꠞ ꠀꠅꠟꠣꠖ-ꠅꠀꠞꠤꠡ ꠛꠣꠠꠣꠁꠛꠣ। 18 ꠈꠣꠟꠤ ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠎꠣꠘꠣꠁꠀꠞ, ꠅꠔꠣ ꠢꠇꠟꠔꠣ ꠝꠣꠘꠤꠅ, ꠀꠟ꠆ꠟꠣ ꠝꠣꠛꠥꠖꠞ ꠈꠥꠡꠤ ꠝꠣꠚꠤꠇ ꠌꠟꠤꠀ ꠔꠥꠝꠞꠣꠞ ꠎꠤꠘ꠆ꠖꠦꠉꠤ ꠇꠣꠐꠣꠁꠅ।