1 “ꠔꠥꠝꠞꠣ ꠔ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠈꠣꠍ ꠙ꠆ꠞꠎꠣ। ꠄꠞꠟꠣꠉꠤ ꠔꠥꠝꠞꠣ ꠇꠥꠘꠥ ꠝꠥꠞ꠆ꠖꠣꠞ ꠟꠣꠉꠤ ꠇꠣꠘ꠆ꠖꠣ-ꠇꠣꠐꠤ ꠛꠣ ꠀꠢꠣꠎꠣꠞꠤ ꠇꠞꠣꠔ ꠉꠤꠀ, ꠘꠤꠎꠞ ꠡꠞꠤꠟꠞꠦ ꠇꠣꠐꠣ-ꠌꠤꠞꠣ ꠇꠞꠤꠅ ꠘꠣ, ꠀꠞ ꠝꠣꠕꠣꠞ ꠍꠣꠝꠘꠞ ꠉꠣꠟꠣꠞ ꠌꠥꠟ ꠇꠣꠝꠣꠁꠅ ꠘꠣ। 2 ꠝꠘꠅ ꠞꠣꠈꠤꠅ, ꠔꠥꠝꠞꠣ ꠅꠁꠟꠣꠄ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠈꠣꠍ ꠙꠛꠤꠔ꠆ꠞ ꠎꠣꠔꠤ। ꠖꠥꠘꠤꠀꠞ ꠢꠇꠟ ꠎꠣꠔꠤꠞ ꠝꠣꠎ ꠕꠣꠇꠤ, ꠝꠣꠛꠥꠖꠦ ꠔꠣꠘ ꠈꠣꠍ ꠙ꠆ꠞꠎꠣ ꠀꠞ ꠔꠣꠘ ꠘꠤꠎꠞ ꠡꠝ꠆ꠙꠖ ꠢꠤꠡꠣꠛꠦ ꠔꠥꠝꠞꠣꠞꠦ ꠀꠟꠉ ꠇꠞꠍꠂꠘ।

3 “ꠔꠦ ꠇꠥꠘꠥꠎꠣꠔ ꠘꠚꠞꠔꠤ ꠈꠣꠘꠤ ꠔꠥꠝꠞꠣ ꠈꠣꠁꠅ ꠘꠣ। 4 ꠅꠃ ꠟꠣꠈꠣꠘ ꠙꠡꠥꠞ ꠉꠥꠡ꠆ꠔ ꠈꠣꠁꠔꠣꠄ ꠙꠣꠞꠛꠣꠄ: ꠉꠞꠥ, ꠝꠦꠠꠣ, ꠍꠣꠉꠟ, ꠁꠔꠣ ꠔ ꠢꠣꠟꠣꠟ। 5 ꠀꠞ ꠅꠞꠤꠘ, ꠝꠣꠄꠀ-ꠅꠞꠤꠘ, ꠌꠤꠔꠞꠣ-ꠅꠞꠤꠘ, ꠎꠋꠟꠤ ꠍꠣꠉꠟ, ꠟꠣꠝ꠆ꠛꠣ ꠢꠤꠋꠉꠤ ꠞꠣꠝ-ꠍꠣꠉꠟ, ꠙꠤꠍꠘꠦ ꠗꠟꠣ ꠅꠞꠤꠘ ꠀꠞ ꠙꠣꠠꠤꠀ ꠝꠦꠠꠣ ꠈꠣꠁꠅ। 6 ꠎꠦꠔꠣ ꠙꠡꠥꠞ ꠈꠥꠞꠣ ꠙꠥꠞꠣꠙꠥꠞ ꠖꠥꠁ ꠅꠋꠡ ꠟꠣꠈꠣꠘ ꠌꠤꠞꠣ, ꠀꠞ ꠎꠦꠔꠣ ꠙꠡꠥꠁꠘ꠆ꠔꠦ ꠈꠣꠘꠤꠞꠦ ꠙꠣꠎꠣꠁꠘ, ꠁꠔꠣꠞ ꠉꠥꠡ꠆ꠔ ꠎꠣꠁꠎ। 7 ꠅꠁꠟꠦ ꠎꠦꠔꠣ ꠙꠡꠥꠞ ꠈꠣꠟꠤ ꠈꠥꠞꠣ ꠌꠤꠞꠣ ꠅꠁꠟꠦ ꠙꠣꠎꠣꠁꠘ ꠘꠣ, ꠛꠣ ꠎꠦꠔꠣ ꠙꠡꠥꠁꠘ꠆ꠔꠦ ꠈꠣꠟꠤ ꠈꠣꠘꠤꠞꠦ ꠙꠣꠎꠣꠁꠘ ꠅꠁꠟꠦ ꠈꠥꠞꠣ ꠌꠤꠞꠣ ꠘꠣꠁ, ꠅꠔꠣ ꠙꠡꠥꠞ ꠉꠥꠡ꠆ꠔ ꠔꠥꠝꠞꠣ ꠈꠣꠁꠅ ꠘꠣ। ꠔꠦ ꠔꠥꠝꠞꠣ ꠃꠐ, ꠈꠞꠉꠥꠡ ꠛꠣ ꠡꠣꠚꠘ-ꠃꠘ꠆ꠖꠥꠞꠞ ꠉꠥꠡ꠆ꠔ ꠈꠣꠁꠅ ꠘꠣ, ꠁꠔꠣꠄ ꠈꠣꠘꠤꠞꠦ ꠙꠣꠎꠣꠁꠘ ꠅꠁꠟꠦ ꠁꠔꠣꠞ ꠈꠥꠞꠣ ꠌꠤꠞꠣ ꠘꠣꠄ, ꠄꠞꠟꠣꠉꠤ ꠢꠣꠞꠣꠝ। 8 ꠀꠞ ꠡꠥꠅꠞꠞ ꠉꠥꠡ꠆ꠔꠅ ꠢꠣꠞꠣꠝ, ꠁꠔꠣꠞ ꠈꠥꠞꠣ ꠌꠤꠞꠣ ꠅꠁꠟꠦꠅ ꠁꠔꠣꠄ ꠈꠣꠘꠤꠞꠦ ꠙꠣꠎꠣꠁꠘ ꠘꠣ। ꠁꠔꠣ ꠙꠡꠥ ꠅꠇꠟꠞ ꠝꠞꠣ ꠟꠣꠡꠅ ꠗꠞꠣ-ꠍꠀ ꠘꠣꠎꠣꠁꠎ।

9 “ꠙꠣꠘꠤꠞ ꠝꠣꠎꠦ ꠛꠡꠔ ꠇꠞꠞꠣ ꠎꠦꠔꠣ ꠎꠣꠘꠖꠣꠞꠞ ꠚꠁꠞ ꠀꠞ ꠒꠣꠈꠘꠣ ꠀꠍꠦ, ꠁꠔꠣ ꠔꠥꠝꠞꠣꠞ ꠟꠣꠉꠤ ꠢꠣꠟꠣꠟ। 10 ꠅꠁꠟꠦ ꠎꠦꠔꠣꠞ ꠚꠁꠞ ꠀꠞ ꠒꠣꠈꠘꠣ ꠘꠣꠁ, ꠁꠔꠣ ꠘꠣꠎꠣꠁꠎ। ꠁꠔꠣ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ।

11 “ꠢꠇꠟ ꠎꠣꠔꠞ ꠙꠣꠇ-ꠙꠛꠤꠔ꠆ꠞ ꠙꠣꠈꠤ ꠔꠥꠝꠞꠣꠞ ꠟꠣꠉꠤ ꠢꠣꠟꠣꠟ। 12 ꠅꠁꠟꠦ ꠛꠠ ꠌꠤꠟ, ꠢꠇꠥꠘ, ꠢꠣꠚ-ꠈꠣꠃꠞꠤ, 13 ꠢꠇꠟ ꠎꠣꠔꠞ ꠌꠤꠟ, 14 ꠢꠇꠟ ꠎꠣꠔ ꠇꠣꠃꠀ, 15 ꠃꠐꠙꠣꠈꠤ, ꠘꠤꠝ ꠙꠣꠈꠤ, ꠉꠣꠋꠌꠤꠟ, ꠢꠇꠟ ꠘꠝꠥꠘꠣꠞ ꠛꠣꠎ ꠙꠣꠈꠤ, 16 ꠢꠇꠟ ꠎꠣꠔ ꠙꠦꠌꠣ, ꠢꠇꠟ ꠎꠣꠔꠞ ꠇꠥꠠꠣ, 17 ꠍꠟꠣ-ꠇꠣꠇ, ꠛꠟꠥꠀ ꠙꠣꠈꠤ, ꠙꠣꠘꠤ-ꠈꠣꠃꠞꠤ, 18 ꠢꠇꠟ ꠎꠣꠔꠞ ꠎꠣꠐꠤꠀ, ꠢꠇꠟ ꠎꠣꠔꠞ ꠛꠉꠟꠣ, ꠝꠘ-ꠌꠥꠞꠣ ꠙꠣꠈꠤ ꠀꠞ ꠛꠣꠖꠥꠞ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ।

19 “ꠀꠞ ꠒꠣꠈꠘꠣ ꠀꠟꠣ ꠢꠇꠟ ꠎꠣꠔꠞ ꠙꠥꠇ-ꠎꠥꠇ, ꠎꠦꠔꠣꠄ ꠑꠦꠋ ꠖꠤꠀ ꠀꠐꠂꠘ, ꠁꠔꠣ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ, ꠁꠔꠣ ꠔ ꠘꠣꠙꠣꠇ। 20 ꠅꠁꠟꠦ ꠒꠣꠈꠘꠣ ꠀꠟꠣ ꠢꠇꠟ ꠎꠣꠔꠞ ꠙꠣꠇ-ꠙꠛꠤꠔ꠆ꠞ ꠚꠞꠤꠋ ꠔꠥꠝꠞꠣꠞ ꠟꠣꠉꠤ ꠢꠣꠟꠣꠟ।

21 “ꠔꠥꠝꠞꠣ ꠅꠁꠟꠣꠄ ꠔ ꠔꠥꠝꠞꠣꠞ ꠝꠣꠛꠥꠖꠞ ꠘꠣꠝꠦ ꠄꠇꠐꠣ ꠙꠣꠇ-ꠙꠛꠤꠔ꠆ꠞ ꠎꠣꠔꠤ, ꠄꠞꠟꠣꠉꠤ ꠅꠝꠘꠦ ꠅꠝꠘꠦ ꠝꠞꠤ ꠎꠣꠅꠀ ꠇꠥꠘꠥ ꠎꠤꠛ-ꠎꠣꠘꠥꠀꠞꠞ ꠉꠥꠡ꠆ꠔ ꠔꠥꠝꠞꠣ ꠈꠣꠁꠅ ꠘꠣ, ꠁꠔꠣ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ। ꠅꠁꠟꠦ ꠔꠥꠝꠞꠣꠞ ꠉꠣꠃꠔ ꠛꠣ ꠐꠣꠃꠘꠅ ꠛꠡꠔ ꠇꠞꠞꠣ ꠖꠥꠍꠞꠣ ꠎꠦꠇꠥꠘꠥ ꠎꠣꠔꠤꠞ ꠝꠣꠘꠡꠞꠦ ꠁꠔꠣ ꠈꠣꠛꠣꠁꠔꠣꠄ ꠙꠣꠞꠛꠣꠄ, ꠜꠤꠘ ꠎꠣꠔꠤꠞ ꠉꠦꠍꠦ ꠛꠦꠌꠔꠣꠄꠅ ꠙꠣꠞꠛꠣꠄ।

“ꠀꠞ ꠢꠥꠘꠅ, ꠔꠥꠝꠞꠣ ꠛꠇꠞꠤꠞ ꠛꠣꠁꠌ꠆ꠌꠣꠞꠦ ꠔꠣꠞ ꠝꠣʼꠞ ꠖꠥꠗ ꠖꠤꠀ ꠞꠣꠘ꠆ꠖꠤꠅ ꠘꠣ।

22 “ꠙꠞꠔꠦꠇ ꠛꠍꠞ ꠔꠥꠝꠞꠣꠞ ꠎꠝꠤꠘꠅ ꠎꠦꠔꠣ ꠚꠄ-ꠚꠡꠟ ꠙꠣꠅ, ꠁꠔꠣꠞ ꠖꠡ ꠛꠣꠐꠞ ꠄꠇ ꠛꠣꠐ ꠀꠔꠞꠣ ꠇꠞꠤ ꠕꠁꠅ। 23 ꠀꠞ ꠔꠥꠝꠞꠣꠞ ꠝꠣꠛꠥꠖꠦ ꠔꠣꠘ ꠛꠣꠄꠔꠥꠟ꠆ꠟꠣ ꠡꠞꠤꠚ ꠢꠤꠡꠣꠛꠦ ꠎꠦ ꠎꠣꠉꠣꠞꠦ ꠙꠍꠘ꠆ꠖ ꠇꠞꠛꠣ, ꠢꠃ ꠎꠣꠉꠣꠔ ꠅꠔꠣ ꠟꠁꠀ ꠀꠁꠅ। ꠔꠥꠝꠞꠣꠞ ꠈꠦꠔꠞ ꠚꠡꠟ, ꠀꠋꠉꠥꠞꠞ ꠡꠞꠛꠔ, ꠎꠄꠔꠥꠘꠞ ꠔꠦꠟꠞ ꠖꠡ ꠛꠣꠐꠞ ꠄꠇ ꠛꠣꠐ ꠀꠘꠤꠅ। ꠁꠔꠣ ꠚꠡꠟꠞ ꠟꠉꠦ ꠔꠥꠝꠞꠣꠞ ꠙꠣꠟꠣ ꠉꠞꠥ-ꠍꠣꠉꠟꠞ ꠙꠄꠟꠣ ꠛꠣꠁꠌ꠆ꠌꠣꠞꠦ ꠎꠛ ꠇꠞꠤꠀ ꠢꠇ꠆ꠇꠟꠔꠣ ꠝꠣꠛꠥꠖꠞ ꠍꠣꠝꠘꠦ ꠈꠣꠁꠅ, ꠅꠃ ꠟꠣꠈꠣꠘ ꠔꠥꠝꠞꠣ ꠢꠣꠝꠦꠡꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞꠦ ꠒꠞꠣꠁꠀ ꠌꠟꠣ ꠢꠤꠇꠤꠅ। 24 ꠅꠁꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠎꠣꠉꠣ ꠎꠥꠖꠤ ꠛꠣꠇ꠆ꠇꠣ ꠖꠥꠞꠁ ꠅꠄ, ꠀꠞ ꠝꠣꠛꠥꠖꠞ ꠞꠢꠝ-ꠛꠞꠇꠔꠦ ꠙꠣꠅꠀ ꠅꠃ ꠍꠣꠝꠣꠘꠣ ꠟꠁꠀ ꠢꠤꠘꠅ ꠎꠣꠁꠔꠣꠄ ꠘꠣ ꠙꠣꠞ, 25 ꠔꠦ ꠅꠃ ꠍꠣꠝꠣꠘꠣ ꠛꠦꠌꠤꠀ ꠁꠔꠣꠞ ꠐꠦꠇꠣ ꠟꠁꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠢꠃ ꠎꠣꠉꠣꠔ ꠎꠣꠁꠅ। 26 ꠉꠤꠀ ꠅꠃ ꠐꠦꠇꠣꠖꠤ ꠔꠥꠝꠞꠣꠞ ꠈꠥꠡꠤ ꠝꠣꠚꠤꠇ ꠉꠞꠥ-ꠍꠣꠉꠟ, ꠀꠋꠉꠥꠞꠞ ꠡꠞꠛꠔ, ꠔꠣꠠꠤ, ꠛꠣ ꠔꠥꠝꠞꠣꠞ ꠙꠍꠘ꠆ꠖꠞ ꠎꠦꠇꠥꠘꠥꠔꠣ ꠇꠤꠘꠤꠟꠣꠁꠅ। ꠛꠣꠖꠦ ꠙꠞꠤꠛꠣꠞꠞ ꠢꠇꠟꠞꠦ ꠟꠁꠀ ꠁꠔꠣ ꠈꠣꠘꠤ-ꠖꠣꠘꠤ ꠈꠣꠁꠀ ꠢꠣꠞꠤ, ꠀꠟ꠆ꠟꠣ ꠝꠣꠛꠥꠖꠞ ꠍꠣꠝꠘꠦ ꠈꠥꠡꠤ-ꠛꠣꠡꠤ ꠇꠞꠤꠅ। 27 ꠅꠃ ꠡꠝꠄ ꠔꠥꠝꠞꠣꠞ ꠉꠣꠃ ꠛꠣ ꠐꠣꠃꠘꠅ ꠛꠡꠔ ꠇꠞꠞꠣ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠞꠦ ꠚꠣꠃꠞꠤꠅ ꠘꠣ। ꠇꠣꠞꠘ ꠔꠥꠝꠞꠣꠞ ꠔ ꠎꠣꠉꠣ-ꠎꠝꠤꠘ ꠀꠍꠦ, ꠅꠁꠟꠦ ꠔꠣꠞꠣꠞ ꠁꠔꠣ ꠇꠥꠘ꠆ꠔꠣ ꠘꠣꠁ।

28 “ꠙꠞꠔꠦꠇ ꠔꠤꠘ ꠛꠍꠞ ꠛꠣꠖꠦ ꠛꠣꠖꠦ ꠔꠥꠝꠞꠣꠞ ꠈꠦꠔꠞ ꠚꠡꠟꠞ ꠖꠡ ꠛꠣꠐꠞ ꠄꠇ ꠛꠣꠐ ꠀꠘꠤꠀ ꠐꠣꠃꠘꠅ ꠖꠟꠣ ꠇꠞꠤꠅ। 29 ꠔꠦꠃ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠦ, ꠎꠦꠞꠣ ꠎꠣꠉꠣ-ꠎꠝꠤꠘ ꠛꠣ ꠗꠘ-ꠍꠣꠝꠣꠘꠣꠞ ꠛꠣꠐ ꠙꠣꠁꠍꠦ ꠘꠣ ꠄꠞꠣ, ꠀꠞ ꠛꠤꠖꠦꠡꠤ ꠝꠥꠍꠣꠚꠤꠞ ꠅꠇꠟꠦ, ꠄꠔꠤꠝ ꠅꠇꠟꠦ, ꠠꠣꠠꠤ ꠛꠦꠐꠤꠘ꠆ꠔꠦ ꠁꠔꠣ ꠙꠦꠐ ꠜꠞꠤꠀ ꠈꠣꠁꠛꠣ। ꠀꠞ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠢꠇꠟ ꠇꠣꠝꠞ ꠝꠣꠎꠦ ꠞꠢꠝ-ꠛꠞꠇꠔ ꠖꠤꠛꠣ।