1 ꠢꠎꠞꠔ ꠝꠥꠍꠣꠄ ꠀꠞꠅ ꠇꠁꠟꠣ, “ꠀꠞ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠁꠟꠣꠈꠣꠘ ꠇꠥꠘꠥ ꠉꠞꠥ-ꠍꠣꠉꠟꠞꠦ ꠇꠥꠞꠛꠣꠘꠤ ꠖꠤꠅ ꠘꠣ, ꠎꠦꠔꠣꠞ ꠉꠔꠞꠅ ꠈꠥꠔ ꠀꠍꠦ, ꠔꠣꠁꠘ ꠔ ꠈꠥꠔ ꠀꠟꠣ ꠇꠥꠞꠛꠣꠘꠤꠞꠦ ꠊꠤꠘ ꠇꠞꠂꠘ।

2 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠉꠣꠃ ꠀꠞ ꠐꠣꠃꠘ ꠅꠇꠟ ꠖꠣꠘ ꠇꠞꠛꠣ, ꠅꠃ ꠎꠣꠉꠣꠔ ꠎꠥꠖꠤ ꠁꠟꠣꠈꠣꠘ ꠇꠥꠘꠥ ꠛꠦꠐꠣ ꠛꠣ ꠛꠦꠐꠤ ꠝꠤꠟꠦ, ꠎꠦꠉꠥꠄ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠅꠀꠖꠣ-ꠌꠥꠇ꠆ꠔꠤꠞ ꠃꠟꠐꠣ ꠉꠤꠀ ꠔꠣꠁꠘ ꠎꠦꠔꠣ ꠇꠣꠝ ꠊꠤꠘ ꠇꠞꠂꠘ ꠅꠔꠣ ꠇꠣꠝ ꠇꠞꠦ, 3 ꠅꠉꠥꠄ ꠎꠥꠖꠤ ꠀꠟ꠆ꠟꠣ ꠍꠣꠠꠣ ꠖꠥꠍꠞꠣ ꠇꠥꠘꠥ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠦ, ꠌꠣꠘ꠆ꠖ, ꠡꠥꠞꠥꠎ, ꠔꠦꠞꠣꠞ ꠙꠥꠎꠣ ꠇꠞꠦ, 4 ꠀꠞ ꠁꠔꠣ ꠔꠥꠝꠞꠣꠞꠦ ꠎꠣꠘꠣꠁꠟ ꠅꠄ, ꠔꠦ ꠔꠥꠝꠞꠣ ꠈꠥꠛ ꠡꠣꠛꠗꠣꠘꠦ ꠔꠣꠟ꠆ꠟꠣꠡ ꠇꠞꠤꠀ ꠖꠦꠈꠤꠅ ꠁꠔꠣ ꠢꠣꠍꠣ ꠘꠣ ꠝꠤꠍꠣ। ꠢꠣꠍꠣ ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠜꠤꠔꠞꠦ ꠁꠟꠣ ꠟꠣꠘ꠆ꠘꠔꠤ ꠇꠣꠝ ꠇꠞꠣꠄ, 5 ꠢꠃ ꠛꠦꠐꠣ ꠛꠣ ꠛꠦꠐꠤꠞꠦ ꠡꠣꠎꠣ ꠖꠤꠅ। ꠅꠉꠥꠞꠦ ꠗꠞꠤꠀ ꠉꠣꠃ ꠛꠣ ꠐꠣꠃꠘꠞ ꠙꠣꠁꠘ꠆ꠌꠣꠁꠔꠤ ꠛꠂꠑꠇ ꠈꠣꠘꠣꠔ ꠀꠘꠤꠅ, ꠀꠘꠤꠀ ꠙꠣꠔ꠆ꠔꠞ ꠝꠣꠞꠤꠀ ꠝꠣꠞꠤꠟꠤꠅ। 6 ꠅꠁꠟꠦ ꠝꠞꠣꠞ ꠎꠥꠇꠣ ꠅꠙꠞꠣꠗ ꠙꠞꠝꠣꠘꠞ ꠟꠣꠉꠤ ꠖꠥꠁ ꠛꠣ ꠔꠤꠘ ꠎꠘꠞ ꠡꠣꠇ꠆ꠇꠤ ꠟꠣꠉꠛ, ꠄꠇꠟꠣ ꠄꠇ ꠎꠘꠞ ꠡꠣꠇ꠆ꠇꠤꠄ ꠝꠣꠞꠣ ꠎꠣꠁꠔ ꠘꠣꠄ। 7 ꠔꠣꠞꠦ ꠝꠣꠞꠣꠞ ꠛꠣꠟꠣ ꠙꠄꠟꠣ ꠡꠣꠇ꠆ꠇꠤ ꠅꠇꠟꠦ ꠙꠣꠔ꠆ꠔꠞ ꠝꠣꠞꠛꠣ, ꠛꠣꠖꠦ ꠢꠇꠟ ꠝꠣꠘꠡꠦ ꠝꠣꠞꠛꠣ। ꠅꠃ ꠘꠝꠥꠘꠣꠄ ꠔꠥꠝꠞꠣꠞ ꠡꠝꠣꠎꠞ ꠜꠤꠔꠞ ꠕꠣꠇꠤ ꠅꠟꠣꠈꠣꠘ ꠘꠣꠚꠞꠝꠣꠘꠤꠞꠦ ꠈꠦꠖꠣꠁꠛꠣꠄ।

8 “ꠔꠥꠝꠞꠣꠞ ꠉꠦꠍꠦ ꠎꠥꠖꠤ ꠁꠟꠣꠈꠣꠘ ꠇꠑꠤꠘ ꠇꠥꠘꠥ ꠘꠣꠟꠤꠡ ꠀꠄ, ꠎꠦꠔꠣꠞ ꠛꠤꠌꠣꠞ ꠇꠞꠣꠞ ꠈꠦꠝꠔꠣ ꠔꠥꠝꠞꠣꠞ ꠀꠖꠣꠟꠔꠞ ꠘꠣꠁ, ꠔꠦ ꠁꠔꠣ ꠟꠁꠀ ꠀꠟ꠆ꠟꠣ ꠝꠣꠛꠥꠖꠞ ꠙꠍꠘ꠆ꠖ ꠇꠞꠣ ꠎꠣꠉꠣꠔ ꠎꠣꠁꠅ। ꠗꠞꠤꠟꠣꠅ, ꠇꠥꠘꠥ ꠈꠥꠘ-ꠈꠣꠞꠣꠙꠤ, ꠝꠣꠞꠣ-ꠝꠣꠞꠤ, ꠎꠛꠞ-ꠖꠈꠟꠖꠣꠞꠤ ꠙꠞꠝꠣꠘ-ꠔꠖꠘ꠆ꠔꠞ ꠛꠤꠌꠣꠞ-ꠀꠌꠣꠞ। 9 ꠉꠤꠀ ꠟꠦꠛꠤ ꠈꠣꠘ꠆ꠖꠣꠘꠞ ꠁꠝꠣꠝ ꠅꠇꠟ ꠀꠞ ꠢꠃ ꠀꠝꠟꠞ ꠙꠞꠗꠣꠘ ꠢꠣꠇꠤꠝ ꠍꠣꠛꠞ ꠖꠞꠛꠣꠞꠅ ꠘꠣꠟꠤꠡ ꠢꠥꠘꠣꠁꠅ, ꠢꠥꠘꠣꠁꠟꠦ ꠔꠣꠞꠣ ꠔꠥꠝꠞꠣꠞꠦ ꠛꠤꠌꠣꠞꠞ ꠞꠣꠄ ꠛꠣꠔꠣꠁ ꠖꠤꠛꠣ। 10 ꠀꠞ ꠝꠣꠛꠥꠖꠞ ꠙꠍꠘ꠆ꠖ ꠇꠞꠣ ꠎꠣꠉꠣꠔ ꠔꠣꠞꠣ ꠎꠦ ꠞꠣꠄ ꠎꠣꠘꠣꠁꠛꠣ, ꠅꠃ ꠞꠣꠄꠅꠞ ꠝꠞ꠆ꠝ ꠛꠥꠎꠤꠀ ꠔꠥꠝꠞꠣ ꠇꠣꠝ ꠇꠞꠛꠣꠄ, ꠔꠣꠞꠣ ꠎꠦꠔꠣ ꠢꠤꠇꠣꠁ ꠖꠤꠛꠣ, ꠈꠥꠛ ꠈꠤꠀꠟ ꠇꠞꠤꠀ ꠁꠔꠣ ꠝꠣꠘꠤꠅ। 11 ꠀꠟ꠆ꠟꠣꠁ ꠡꠞꠤꠅꠔꠞ ꠢꠥꠇꠥꠝꠞ ꠛꠦꠙꠣꠞꠦ ꠔꠣꠞꠣ ꠎꠦꠟꠣ ꠔꠣꠟꠤꠝ ꠖꠤꠛꠣ, ꠔꠣꠞꠣ ꠎꠦꠟꠣꠈꠣꠘ ꠛꠤꠌꠣꠞꠞ ꠞꠣꠄ ꠖꠤꠛꠣ, ꠅꠔꠣꠞ ꠝꠞ꠆ꠝ ꠛꠥꠎꠤꠀ ꠔꠥꠝꠞꠣ ꠇꠣꠝ ꠇꠞꠤꠅ, ꠔꠣꠞꠣꠞ ꠇꠕꠣ ꠕꠣꠇꠤ ꠃꠘ꠆ꠘꠤꠡ-ꠛꠤꠡ ꠇꠤꠌ꠆ꠍꠥ ꠇꠞꠤꠅ ꠘꠣ। 12 ꠇꠥꠘꠥ ꠝꠣꠘꠡꠦ ꠛꠦꠐꠣꠉꠤꠞꠤ ꠖꠦꠈꠣꠁꠀ ꠎꠥꠖꠤ ꠢꠃ ꠢꠣꠇꠤꠝꠞ ꠞꠣꠄ ꠘꠣ ꠝꠣꠘꠦ, ꠛꠣ ꠀꠟ꠆ꠟꠣ ꠝꠣꠛꠥꠖꠞ ꠈꠣꠖꠤꠝ ꠅꠃ ꠁꠝꠣꠝ ꠍꠣꠛꠞ ꠢꠥꠇꠥꠝ ꠘꠣ ꠝꠣꠘꠦ, ꠔꠦ ꠔꠣꠞꠦ ꠘꠤꠌ꠆ꠌꠤꠔ ꠎꠣꠘꠦ ꠝꠣꠞꠤꠟꠤꠅ। ꠛꠘꠤ ꠁꠍꠞꠣꠁꠟꠞ ꠜꠤꠔꠞꠦ ꠕꠣꠇꠤ ꠅꠃ ꠘꠝꠥꠘꠣꠄ ꠘꠣꠚꠞꠝꠣꠘꠤ ꠈꠦꠖꠣꠁꠅ। 13 ꠔꠦꠃ ꠁꠔꠣ ꠢꠥꠘꠤꠀ ꠢꠇꠟ ꠝꠣꠘꠡꠦ ꠒꠞꠣꠁꠛꠣ, ꠔꠣꠞꠣ ꠀꠞ ꠛꠦꠐꠣꠉꠤꠞꠤ ꠖꠦꠈꠣꠘꠤꠞ ꠡꠣꠅꠡ ꠙꠣꠁꠔꠣ ꠘꠣꠄ।

14 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠞꠣ, ꠢꠘꠅ ꠉꠤꠀ ꠛꠡꠔ ꠇꠞꠤꠀ ꠢꠣꠞꠟꠦ ꠔꠥꠝꠞꠣ ꠇꠁꠛꠣꠄ, ꠀꠅ, ꠀꠝꠞꠣꠞ ꠀꠡ-ꠙꠣꠡꠞ ꠎꠣꠔꠤ ꠅꠇꠟꠞ ꠟꠣꠈꠣꠘ ꠀꠝꠞꠣꠞ ꠘꠤꠎꠞ ꠎꠣꠔꠤꠞ ꠟꠣꠉꠤꠅ ꠄꠇꠎꠘ ꠛꠣꠖꠡꠣ ꠛꠣꠘꠣꠁ। 15 ꠢꠃ ꠡꠝꠄ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠣꠞꠦ ꠙꠍꠘ꠆ꠖ ꠇꠞꠛꠣ, ꠔꠣꠞꠦꠃ ꠔꠥꠝꠞꠣꠞ ꠛꠣꠖꠡꠣ ꠛꠣꠘꠣꠁꠅ। ꠢꠦ ꠎꠣꠘꠥ ꠔꠥꠝꠞꠣꠞ ꠘꠤꠎꠞ ꠎꠣꠔꠤꠞ ꠜꠣꠁ ꠅꠄ, ꠇꠥꠘꠥ ꠜꠤꠘ ꠎꠣꠔꠤꠞ ꠝꠣꠘꠡꠞꠦ ꠔꠥꠝꠞꠣꠞ ꠛꠣꠖꠡꠣ ꠛꠣꠘꠣꠁꠅ ꠘꠣ। 16 ꠁ ꠛꠣꠖꠡꠣꠄ ꠔꠣꠞ ꠘꠤꠎꠞ ꠟꠣꠉꠤ ꠛꠃꠔ ꠊꠥꠠꠣ ꠎꠣꠘꠥ ꠘꠣ ꠎꠝꠣꠄ, ꠊꠥꠠꠣ ꠎꠥꠉꠣꠘꠤꠞ ꠘꠤꠅꠔꠦ ꠢꠦ ꠎꠣꠘꠥ ꠛꠘꠤ ꠁꠍꠞꠣꠁꠟꠞ ꠝꠣꠘꠡꠞꠦ ꠝꠤꠡꠞ ꠖꠦꠡꠅ ꠘꠣ ꠙꠣꠑꠣꠄ। ꠝꠘꠅ ꠞꠣꠈꠤꠅ, ꠝꠣꠛꠥꠖꠦ ꠀꠉꠦ ꠢꠥꠇꠥꠝ ꠖꠤꠍꠂꠘ, ꠔꠥꠝꠞꠣ ꠀꠞ ꠇꠥꠘꠥꠖꠤꠘ ꠢꠤ ꠙꠕꠦꠖꠤ ꠎꠣꠁꠅ ꠘꠣ। 17 ꠁ ꠛꠣꠖꠡꠣꠄ ꠎꠣꠘꠥ ꠛꠃꠔ ꠛꠤꠀ-ꠡꠣꠖꠤ ꠘꠣ ꠇꠞꠦ, ꠀꠞꠘꠣꠄ ꠔꠣꠞ ꠖꠤꠟ ꠛꠦ-ꠙꠕꠦ ꠎꠣꠁꠛꠉꠤ। ꠢꠦ ꠎꠣꠘꠥ ꠘꠤꠎꠞ ꠟꠣꠉꠤ ꠛꠦꠡ ꠇꠞꠤ ꠡꠥꠘꠣ-ꠞꠥꠙꠣ ꠘꠣ ꠎꠝꠣꠄ।

18 “ꠔꠣꠞꠦ ꠞꠣꠎ-ꠉꠖꠤꠔ ꠛꠅꠀꠘꠤꠞ ꠇꠣꠟꠅ ꠟꠦꠛꠤ ꠈꠣꠘ꠆ꠖꠣꠘꠞ ꠁꠝꠣꠝ ꠍꠣꠛ ꠅꠇꠟꠞ ꠉꠦꠍꠦ ꠎꠦ ꠔꠃꠞꠣꠔ ꠇꠤꠔꠣꠛ ꠕꠣꠇꠛ, ꠅꠃ ꠇꠤꠔꠣꠛꠞ ꠀꠞꠅ ꠄꠇ ꠇꠙꠤ ꠟꠦꠈꠤꠀ ꠔꠣꠞ ꠘꠤꠎꠞ ꠟꠣꠉꠤ ꠘꠤꠔꠦ ꠅꠁꠛ। 19 ꠁꠈꠣꠘ ꠔꠣꠞ ꠘꠤꠎꠞ ꠉꠦꠍꠦ ꠞꠁꠛ, ꠔꠣꠞ ꠖꠤꠟꠅ ꠀꠟ꠆ꠟꠣ ꠝꠣꠛꠥꠖꠞ ꠒꠞ-ꠈꠚ ꠞꠣꠈꠣꠞ ꠟꠣꠉꠤ ꠅꠃ ꠔꠃꠞꠣꠔ ꠀꠞ ꠄꠞ ꠜꠤꠔꠞꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠙꠥꠞꠣꠙꠥꠞ ꠝꠣꠘꠤꠀ ꠌꠟꠣꠞ ꠘꠤꠅꠔꠦ, ꠢꠦ ꠎꠤꠘ꠆ꠖꠦꠉꠤꠜꠞ ꠅꠃ ꠇꠤꠔꠣꠛ ꠔꠤꠟꠣꠅꠔ ꠇꠞꠛ। 20 ꠔꠦꠃ ꠔꠣꠞ ꠎꠣꠔꠤꠞ ꠜꠣꠁꠀꠁꠘ ꠕꠣꠇꠤ ꠘꠤꠎꠞꠦ ꠛꠠ ꠝꠘꠅ ꠇꠞꠔ ꠘꠣꠄ, ꠢꠦ ꠔꠃꠞꠣꠔꠞ ꠢꠥꠇꠥꠝ-ꠀꠢꠇꠣꠝꠞ ꠃꠘ꠆ꠘꠤꠡ-ꠛꠤꠡ ꠇꠞꠔ ꠘꠣꠄ। ꠔꠦꠃ ꠢꠦ ꠀꠞ ꠔꠣꠞ ꠀꠅꠟꠣꠖ ꠅꠇꠟꠞ ꠉꠖꠤ ꠡ꠆ꠕꠣꠄꠁ ꠅꠁꠛ, ꠔꠣꠞꠣ ꠛꠃꠔ ꠖꠤꠘ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠛꠣꠖꠡꠣꠁ ꠇꠞꠛꠣ।