18
ꠁꠝꠣꠝ ꠍꠣꠛ ꠀꠞ ꠟꠦꠛꠤ ꠈꠣꠘ꠆ꠖꠣꠘꠞ ꠜꠞꠘ-ꠙꠥꠡꠘ
1 “ꠟꠦꠛꠤ ꠈꠣꠘ꠆ꠖꠣꠘꠞ ꠁꠝꠣꠝ ꠅꠇꠟꠦ ꠀꠞ ꠀꠡ꠆ꠔꠣ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠦ, ꠛꠘꠤ ꠁꠍꠞꠣꠁꠟꠞ ꠀꠞꠅ ꠈꠣꠘ꠆ꠖꠣꠘꠞ ꠟꠣꠈꠣꠘ ꠇꠥꠘꠥ ꠎꠝꠤ-ꠝꠤꠞꠣꠡ ꠛꠣ ꠗꠘ-ꠍꠣꠝꠣꠘꠣ ꠙꠣꠁꠔꠣ ꠘꠣꠄ। ꠝꠣꠛꠥꠖꠞ ꠘꠣꠝꠦ ꠖꠦꠅꠀ ꠢꠇꠟ ꠎꠣꠔꠞ ꠇꠥꠞꠛꠣꠘꠤꠞ ꠉꠥꠡ꠆ꠔ ꠀꠞ ꠢꠇꠟ ꠟꠤꠟ꠆ꠟꠣ-ꠍꠖꠉꠣꠞ ꠛꠣꠐꠅ ꠔꠣꠞꠣ ꠈꠣꠁꠛꠣ। 2 ꠔꠣꠞꠣ ꠘꠤꠎꠞ ꠛꠘꠤ ꠁꠍꠞꠣꠁꠟꠞ ꠎꠣꠔꠤꠞ ꠜꠣꠁꠀꠁꠘ꠆ꠔꠞ ꠟꠣꠈꠣꠘ ꠇꠥꠘꠥ ꠎꠝꠤ-ꠝꠤꠞꠣꠡ ꠙꠣꠁꠔꠣ ꠘꠣꠄ। ꠡ꠆ꠛꠄꠅꠋ ꠀꠟ꠆ꠟꠣ ꠝꠣꠛꠥꠖꠃ ꠔꠣꠞꠣꠞ ꠝꠤꠞꠣꠡ, ꠔꠣꠁꠘ ꠘꠤꠎꠦꠅ ꠔꠣꠞꠣꠞꠦ ꠁ ꠅꠀꠖꠣ ꠖꠤꠍꠂꠘ।
3 “ꠝꠣꠘꠡꠦ ꠎꠔ ꠉꠞꠥ-ꠍꠣꠉꠟ ꠇꠥꠞꠛꠣꠘꠤ ꠖꠤꠛꠣ, ꠁꠔꠣꠞ ꠇꠣꠘ꠆ꠖꠞ ꠉꠥꠡ꠆ꠔ, ꠖꠥꠁꠅ ꠉꠣꠟ ꠀꠞ ꠙꠦꠐꠞ ꠜꠤꠔꠞꠞ ꠢꠇ꠆ꠇꠟꠔꠣ ꠁꠝꠣꠝ ꠍꠣꠛꠞꠦ ꠖꠤꠛꠣꠄ, ꠁꠔꠣ ꠔꠣꠘ ꠙꠣꠅꠘꠣ। 4 ꠔꠥꠝꠞꠣꠞ ꠈꠦꠔꠞ ꠙꠄꠟꠣ ꠚꠡꠟ, ꠛꠣꠉꠣꠘꠞ ꠀꠋꠉꠥꠞ ꠕꠣꠇꠤ ꠛꠣꠘꠣꠁꠟ ꠙꠄꠟꠣ ꠡꠞꠛꠔ ꠀꠞ ꠎꠄꠔꠥꠘ ꠕꠣꠇꠤ ꠛꠣꠘꠣꠁꠟ ꠔꠦꠟꠞ ꠙꠄꠟꠣ ꠅꠋꠡ, ꠍꠣꠉꠟ-ꠝꠦꠠꠣꠞ ꠙꠄꠟꠣ ꠛꠣꠞ ꠇꠣꠐꠣ ꠞꠥꠝꠣ ꠁꠝꠣꠝ ꠍꠣꠛꠞꠦ ꠖꠤꠛꠣꠄ। 5 ꠎꠣꠘ ꠔ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠢꠇꠟ ꠈꠣꠘ꠆ꠖꠣꠘꠞ ꠝꠣꠎ ꠕꠣꠇꠤ ꠟꠦꠛꠤ ꠈꠣꠘ꠆ꠖꠣꠘꠞꠦ ꠙꠍꠘ꠆ꠖ ꠇꠞꠤꠀ ꠀꠟꠉ ꠇꠞꠍꠂꠘ, ꠎꠣꠔꠦ ꠔꠣꠞꠣ ꠢꠞ-ꠢꠣꠝꠦꠡꠣ ꠝꠣꠛꠥꠖꠞ ꠄꠛꠣꠖꠔ-ꠛꠘ꠆ꠖꠦꠉꠤꠞ ꠇꠣꠝꠅ ꠞꠂꠘ।
6 “ꠀꠞ ꠁꠍꠞꠣꠁꠟ ꠖꠦꠡꠞ ꠎꠦꠇꠥꠘꠥ ꠐꠣꠃꠘ ꠕꠣꠇꠤ ꠟꠦꠛꠤ ꠈꠣꠘ꠆ꠖꠣꠘꠞ ꠇꠥꠘꠥ ꠀꠅꠟꠣꠖ ꠎꠥꠖꠤ ꠝꠣꠛꠥꠖꠞ ꠀꠡꠤꠇ ꠛꠘꠤꠀ ꠝꠣꠛꠥꠖꠞ ꠙꠍꠘ꠆ꠖ ꠇꠞꠣ ꠎꠣꠉꠣꠔ ꠀꠄ, 7 ꠔꠦ ꠢꠦ-ꠅ ꠔꠣꠞ ꠈꠣꠘ꠆ꠖꠣꠘꠞ ꠜꠣꠁꠀꠁꠘ꠆ꠔꠞ ꠟꠣꠈꠣꠘ ꠀꠟ꠆ꠟꠣ ꠝꠣꠛꠥꠖꠞ ꠖꠞꠛꠣꠞꠅ ꠄꠛꠣꠖꠔ-ꠛꠘ꠆ꠖꠦꠉꠤꠞ ꠇꠣꠝ ꠇꠞꠛ। 8 ꠛꠣꠇꠤ ꠁꠝꠣꠝ ꠅꠇꠟꠞ ꠟꠣꠈꠣꠘ ꠢꠦ-ꠅ ꠔꠣꠞ ꠈꠣꠘꠣ-ꠙꠤꠘꠣꠞ ꠛꠣꠐ ꠙꠣꠁꠛ, ꠄꠞꠟꠉꠦ ꠔꠣꠞ ꠝꠃꠞꠡꠤ ꠍꠣꠝꠣꠘꠣ ꠛꠦꠌꠣꠞ ꠐꠦꠇꠣ-ꠙꠄꠡꠣꠅ ꠙꠣꠁꠛ।
ꠎꠣꠖꠥ-ꠝꠘꠔ꠆ꠞ ꠕꠣꠇꠤ ꠙꠛꠤꠔ꠆ꠞ ꠞꠅꠀ
9 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡ ꠖꠤꠞꠣ, ꠢꠃ ꠖꠦꠡꠞ ꠛꠣꠡꠤꠘ꠆ꠖꠣ ꠅꠇꠟꠦ ꠎꠦꠟꠣ ꠎꠊꠁꠘ꠆ꠘ ꠘꠣꠚꠞꠝꠣꠘꠤ ꠇꠞꠂꠘ, ꠔꠥꠝꠞꠣ ꠁꠔꠣ ꠢꠤꠇꠤꠅ ꠘꠣ। 10 ꠔꠥꠝꠞꠣꠞ ꠝꠣꠎꠦ ꠎꠣꠘꠥ ꠁꠟꠣ ꠇꠥꠘꠥ ꠝꠣꠘꠥꠡ ꠘꠣ ꠝꠤꠟꠦ, ꠎꠦꠉꠥꠄ ꠔꠣꠞ ꠘꠤꠎꠞ ꠀꠅꠟꠣꠖꠞꠦ ꠀꠉꠥꠘꠤꠔ ꠚꠣꠟꠣꠁꠀ ꠛꠟꠤ ꠖꠦꠄ, ꠔꠣꠛꠎꠣꠔꠤ ꠝꠘꠔ꠆ꠞ ꠙꠠꠦ, ꠉꠘꠣ-ꠛꠣꠍꠣ ꠇꠞꠦ, ꠎꠣꠖꠥ-ꠐꠥꠘꠣ ꠇꠞꠦ, 11 ꠎꠦꠉꠥꠄ ꠔꠘꠔ꠆ꠞ-ꠝꠘꠔ꠆ꠞ ꠌꠣꠟꠣꠄ, ꠎꠤꠘ-ꠜꠥꠔ-ꠙꠦꠞꠔ ꠡꠣꠗꠘ ꠇꠞꠦ ꠀꠞ ꠝꠥꠞ꠆ꠖꠣꠞ ꠞꠥꠢꠖꠤ ꠀꠎꠤꠞꠣꠔ ꠇꠞꠦ। 12 ꠁꠔꠣ ꠘꠣꠚꠞꠝꠣꠘꠤ ꠇꠣꠝ ꠎꠦꠉꠥꠄ ꠇꠞꠦ, ꠝꠣꠛꠥꠖꠦ ꠔꠣꠞꠦ ꠊꠤꠘ ꠇꠞꠂꠘ। ꠅꠔꠣ ꠇꠣꠝ ꠇꠞꠣꠄ ꠝꠣꠛꠥꠖꠦ ꠢꠃ ꠎꠣꠔꠤ ꠅꠇꠟꠞꠦ, ꠔꠥꠝꠞꠣꠞ ꠍꠣꠝꠘꠦ ꠕꠣꠇꠤ ꠈꠦꠖꠣꠁ ꠖꠤꠞꠣ। 13 ꠄꠞꠟꠣꠉꠤ ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠘꠤꠞ꠆ꠖꠥꠡꠤ ꠞꠁꠅ।”
ꠢꠎꠞꠔ ꠝꠥꠍꠣ (ꠀ꠩) ꠅꠞ ꠟꠣꠈꠣꠘ ꠄꠇ ꠘꠛꠤ
14 ꠢꠎꠞꠔ ꠝꠥꠍꠣꠄ ꠀꠞꠅ ꠇꠁꠟꠣ, “ꠝꠘꠅ ꠞꠣꠈꠤꠅ, ꠔꠥꠝꠞꠣ ꠎꠦꠔꠣ ꠎꠣꠔꠤ ꠅꠇꠟꠞꠦ ꠈꠦꠖꠣꠁꠀ ꠖꠤꠞꠣꠄ, ꠁꠔꠣ ꠔ ꠎꠣꠖꠥꠉꠤꠞ ꠀꠞ ꠉꠘꠇ ꠅꠇꠟꠞ ꠇꠕꠣꠄ ꠌꠟꠦ, ꠅꠁꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠟꠣꠉꠤ ꠁꠔꠣ ꠘꠤꠡꠦꠗ ꠇꠞꠍꠂꠘ। 15 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠡꠝꠣꠎ ꠕꠣꠇꠤ, ꠔꠥꠝꠞꠣꠞ ꠜꠣꠁꠀꠁꠘ꠆ꠔꠞ ꠝꠣꠎ ꠕꠣꠇꠤ*18:15 “ꠔꠥꠝꠞꠣꠞ ꠜꠣꠁꠀꠁꠘ꠆ꠔꠞ ꠝꠣꠎ ꠕꠣꠇꠤ” ꠝꠣꠘꠤ, ꠈꠣꠟꠤ ꠛꠘꠤ ꠁꠍꠞꠣꠁꠟ ꠎꠣꠔꠤ ꠕꠣꠇꠤ, ꠅꠁꠘ꠆ꠘ ꠀꠞ ꠇꠥꠘꠥ ꠎꠣꠔꠤ ꠕꠣꠇꠤ ꠘꠣꠁ। ১৫:৭ ꠀꠞ ২৪:১৪ ꠀꠄꠀꠔ ꠖꠦꠈꠅ।, ꠀꠝꠣꠞ ꠟꠣꠈꠣꠘ ꠄꠇꠎꠘ ꠘꠛꠤ ꠙꠣꠑꠣꠁꠛꠣ, ꠔꠥꠝꠞꠣ ꠢꠇꠟ ꠄꠘ ꠢꠥꠇꠥꠝꠦ ꠌꠟꠔꠦ ꠅꠁꠛ। 16 ꠢꠃ ꠔꠥꠞ ꠙꠣꠠꠞ ꠗꠣꠞꠅ ꠔꠥꠝꠞꠣ ꠢꠇꠟ ꠎꠦ ꠖꠤꠘ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠅꠁꠍꠟꠣꠄ, ꠢꠃ ꠖꠤꠘ ꠔ ꠔꠥꠝꠞꠣ ꠀꠟ꠆ꠟꠣ ꠝꠣꠛꠥꠖꠞ ꠉꠦꠍꠦ ꠝꠣꠋꠉꠤꠀ ꠇꠁꠍꠟꠣꠄ, ꠀꠝꠞꠣ ꠀꠞ ꠀꠟ꠆ꠟꠣ ꠝꠣꠛꠥꠖꠞ ꠝꠥꠈꠞ ꠀꠅꠀꠎ ꠢꠥꠘꠔꠣꠝ ꠌꠣꠁ ꠘꠣ, ꠔꠣꠘ ꠘꠥꠞꠞ ꠀꠉꠥꠁꠘꠅ ꠀꠞ ꠖꠦꠈꠔꠣꠝ ꠌꠣꠁ ꠘꠣ, ꠀꠞꠘꠣꠄ ꠀꠝꠞꠣ ꠝꠞꠤꠎꠤꠝꠥ।
17 “ꠔꠦꠃ ꠝꠣꠛꠥꠖꠦ ꠀꠝꠣꠞꠦ ꠇꠁꠟꠣ, ꠔꠣꠞꠣ ꠑꠤꠇ ꠝꠣꠔꠃ ꠝꠣꠔꠤꠍꠂꠘ। 18 ꠀꠝꠤ ꠔꠣꠞꠣꠞ ꠟꠣꠉꠤ ꠔꠣꠞꠣꠞ ꠘꠤꠎꠞ ꠜꠣꠁꠀꠁꠘ†18:18 “ꠔꠣꠞꠣꠞ ꠘꠤꠎꠞ ꠜꠣꠁꠀꠁꠘ” ꠝꠣꠘꠤ, ꠛꠘꠤ ꠁꠍꠞꠣꠁꠟ ꠎꠣꠔꠤ। ১৮:১৫ ꠀꠄꠀꠔꠞ ꠘꠥꠐ ꠖꠦꠈꠅ। ꠕꠣꠇꠤ ꠔꠥꠝꠣꠞ ꠟꠣꠈꠣꠘ ꠄꠇꠎꠘ ꠘꠛꠤ ꠙꠣꠑꠣꠁꠝꠥ, ꠄꠘ ꠝꠥꠈꠅ ꠀꠝꠣꠞ ꠇꠣꠟꠣꠝ ꠡꠞꠤꠚ ꠖꠤꠝꠥ, ꠀꠞ ꠀꠝꠤ ꠄꠘꠞꠦ ꠎꠦꠔꠣ ꠎꠦꠔꠣ ꠢꠤꠇꠣꠁ ꠖꠤꠝꠥ, ꠄꠁꠘ ꠔꠥꠝꠞꠣꠞꠦ ꠅꠔꠣ ꠎꠣꠘꠣꠁꠛꠣ। 19 ꠀꠞ ꠀꠝꠣꠞ ꠘꠣꠝ ꠟꠁꠀ ꠔꠣꠁꠘ ꠀꠝꠣꠞ ꠇꠣꠟꠣꠝ ꠅꠇꠟ ꠛꠣꠔꠣꠁꠛꠣ, ꠘꠣ-ꠝꠣꠘꠞꠣ ꠅꠇꠟꠞꠦ ꠀꠝꠤ ꠖꠣꠄꠁ ꠇꠞꠝꠥ। 20 ꠅꠁꠟꠦ ꠀꠝꠤ ꠎꠦꠔꠣ ꠇꠁꠍꠤ ꠘꠣ ꠇꠥꠘꠥ ꠘꠛꠤꠄ ꠎꠥꠖꠤ ꠛꠖ ꠡꠣꠅꠡ ꠇꠞꠤ ꠀꠝꠣꠞ ꠘꠣꠝꠦ ꠁꠟꠣ ꠇꠥꠘꠥ ꠇꠣꠟꠣꠝ ꠛꠣꠔꠣꠄ, ꠛꠣ ꠇꠥꠘꠥ ꠖꠦꠛ-ꠖꠦꠛꠤꠞ ꠘꠣꠝ ꠟꠁꠀ ꠁꠟꠣꠈꠣꠘ ꠝꠣꠔ ꠝꠣꠔꠦ, ꠔꠦ ꠢꠦ ꠝꠞꠔꠦꠃ ꠅꠁꠛ।
21 “ꠅꠈꠘ ꠇꠥꠘꠥ ꠛꠥꠟꠤ ꠢꠥꠘꠣꠞ ꠛꠣꠖꠦ ꠔꠥꠝꠞꠣꠞ ꠝꠘꠞ ꠝꠣꠎꠦ ꠌꠤꠘ꠆ꠔꠣ ꠀꠁꠔ ꠙꠣꠞꠦ, ꠁꠈꠣꠘ ꠝꠣꠛꠥꠖꠦ ꠛꠣꠔꠣꠁꠍꠂꠘ ꠇꠤ ꠘꠣ, ꠇꠤꠟꠣ ꠛꠥꠎꠝꠥ? 22 ꠄꠞꠟꠣꠉꠤ ꠢꠥꠘꠅ, ꠝꠣꠛꠥꠖꠞ ꠘꠣꠝ ꠟꠁꠀ ꠇꠥꠘꠥ ꠘꠛꠤꠄ ꠇꠥꠘ꠆ꠔꠣ ꠇꠅꠀꠞ ꠛꠣꠖꠦ ꠎꠥꠖꠤ ꠁꠔꠣ ꠘꠣ ꠚꠟꠦ, ꠛꠣ ꠅꠟꠣ ꠘꠣ ꠊꠐꠦ, ꠔꠦ ꠛꠥꠎꠤꠟꠤꠅ ꠁꠈꠣꠘ ꠝꠣꠛꠥꠖꠞ ꠇꠕꠣ ꠘꠣꠄ। ꠢꠃ ꠘꠛꠤꠄ ꠔꠣꠞ ꠛꠖ ꠡꠣꠅꠡꠦ ꠁꠔꠣ ꠇꠁꠍꠦ, ꠁꠟꠣꠈꠣꠘ ꠎꠘꠞꠦ ꠔꠥꠝꠞꠣ ꠒꠞꠣꠁꠅ ꠘꠣ।”