1 ꠝꠥꠍꠣ ꠘꠛꠤꠄ ꠔꠣꠞꠣꠞꠦ ꠀꠞꠅ ꠇꠁꠟꠣ, “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦꠔꠣ ꠖꠦꠡꠞ ꠖꠈꠟꠖꠣꠞꠤ ꠖꠤꠞꠣ, ꠢꠘꠞ ꠛꠣꠡꠤꠘ꠆ꠖꠣ ꠅꠇꠟꠞꠦ ꠔꠣꠁꠘ ꠛꠤꠘꠣꠡ ꠇꠞꠤꠀ ꠢꠣꠞꠟꠦ, ꠔꠥꠝꠞꠣ ꠎꠦꠛꠟꠣ ꠔꠣꠞꠣꠞ ꠛꠣꠠꠤ-ꠊꠞ ꠀꠞ ꠐꠣꠃꠘꠅ ꠢꠣꠝꠣꠁꠀ ꠛꠡꠔ ꠇꠞꠛꠣꠄ, 2-3 ꠢꠃ ꠡꠝꠄ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠖꠦꠅꠀ ꠅꠃ ꠎꠝꠤꠘꠞꠦ ꠔꠤꠘ ꠛꠣꠐꠦ ꠛꠣꠐꠤꠅ, ꠀꠞ ꠄꠇꠐꠣ ꠄꠇꠐꠣ ꠇꠞꠤ ꠝꠥꠐ ꠔꠤꠘꠐꠣ ꠐꠣꠃꠘꠞꠦ ꠙꠍꠘ꠆ꠖ ꠇꠞꠤꠀ ꠀꠟꠉ ꠇꠞꠤꠅ, ꠀꠞ ꠅꠔꠣ ꠐꠣꠃꠘꠅ ꠎꠣꠁꠛꠣꠞ ꠟꠣꠉꠤ ꠞꠣꠡ꠆ꠔꠣ ꠎꠥꠁꠔ-ꠎꠣꠁꠔ ꠞꠣꠈꠤꠅ। ꠔꠦꠃ ꠔꠥꠝꠞꠣꠞ ꠝꠣꠎꠞ ꠇꠦꠃ ꠎꠥꠖꠤ ꠅꠘꠤꠌ꠆ꠍꠣꠄ ꠇꠦꠃꠞꠞꠦ ꠈꠥꠘ ꠇꠞꠤꠟꠣꠄ, ꠔꠦ ꠅꠃ ꠘꠝꠥꠘꠣꠞ ꠈꠥꠘꠤ ꠜꠣꠉꠤꠀ ꠉꠤꠀ ꠢꠃ ꠐꠣꠃꠘꠅ ꠛꠘꠛꠣꠡꠤ ꠅꠁꠀ ꠀꠡꠞꠄ ꠟꠁꠛ।

4 “ꠝꠘꠞ ꠝꠣꠎꠦ ꠇꠥꠘꠥꠎꠣꠔ ꠁꠋꠡꠣ-ꠖꠥꠡꠝꠘꠤ ꠍꠣꠠꠣ ꠁꠌ꠆ꠍꠣ ꠘꠣ ꠇꠞꠤꠀ ꠀꠈꠔꠣ ꠎꠥꠖꠤ ꠄꠇꠎꠘꠦ ꠀꠞꠇ ꠎꠘꠞꠦ ꠈꠥꠘ ꠇꠞꠤꠟꠣꠄ, ꠔꠦ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠅꠃ ꠈꠥꠘꠤ ꠜꠣꠉꠤꠀ ꠉꠤꠀ ꠔꠣꠞ ꠇꠣꠘ꠆ꠖꠣ-ꠇꠣꠍꠣꠞ ꠛꠘꠛꠣꠡꠤ ꠐꠣꠃꠘꠅ ꠀꠡꠞꠄ ꠟꠁꠛ। 5 ꠝꠘꠅ ꠇꠞꠅ, ꠄꠇꠎꠘ ꠝꠣꠘꠥꠡ ꠖꠥꠍꠞꠣ ꠎꠘꠞ ꠟꠉ ꠅꠁꠀ ꠎꠋꠉꠟꠅ ꠟꠣꠇꠠꠤ ꠇꠣꠐꠣꠔ ꠉꠦꠟ, ꠉꠤꠀ ꠇꠥꠠꠣꠟꠖꠤ ꠉꠣꠍ ꠇꠣꠐꠤꠛꠣꠞ ꠛꠣꠟꠣ ꠀꠈꠔꠣꠃ ꠇꠥꠠꠣꠟꠞ ꠀꠍꠣꠞꠤ ꠕꠣꠇꠤ ꠇꠥꠠꠣꠟ ꠍꠥꠐꠤꠀ, ꠖꠥꠍꠞꠣ ꠎꠘꠞ ꠉꠔꠞꠅ ꠟꠣꠉꠤꠀ ꠢꠦ ꠝꠞꠤꠉꠦꠟ, ꠅꠃ ꠢꠣꠟꠔꠦ ꠈꠥꠘꠤ ꠉꠤꠀ ꠔꠣꠞ ꠇꠣꠘ꠆ꠖꠣ-ꠇꠣꠍꠣꠞ ꠀꠡꠞꠄ ꠐꠣꠃꠘꠅ ꠎꠣꠘ ꠛꠣꠌꠣꠘꠤꠞ ꠡꠥꠎꠥꠉ ꠙꠣꠁꠛ। 6 ꠀꠞꠘꠣꠄ ꠈꠥꠘꠞ ꠛꠖꠟꠣ ꠟꠅꠞꠣꠄ ꠉꠥꠍꠣ ꠇꠞꠤꠀ ꠛꠖꠟꠣ ꠟꠁꠛꠣꠞ ꠘꠤꠅꠔꠦ ꠅꠃ ꠝꠣꠘꠡꠞꠦ ꠗꠞꠔ ꠌꠣꠁꠛ, ꠀꠞ ꠎꠣꠘ ꠛꠣꠌꠣꠘꠤꠞ ꠀꠡꠞꠄ ꠐꠣꠃꠘ ꠗꠣꠞꠅ ꠘꠣ ꠞꠁꠟꠦ ꠔꠣꠞꠦ ꠗꠞꠤꠀ ꠝꠣꠞꠤꠟꠔ ꠙꠣꠞꠦ। ꠀꠍꠟꠦ ꠔ ꠢꠤ ꠛꠦꠐꠣꠄ ꠁꠌ꠆ꠍꠣ ꠇꠞꠤꠀ ꠈꠥꠘ ꠇꠞꠍꠦ ꠘꠣ, ꠢꠦ ꠡꠣꠎꠣ ꠙꠣꠁꠛꠣꠞ ꠇꠕꠣ ꠘꠣꠄ। 7 ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞꠦ ꠢꠥꠇꠥꠝ ꠖꠤꠞꠣꠝ, ꠔꠥꠝꠞꠣꠞ ꠟꠣꠉꠤ ꠔꠤꠘꠐꠣ ꠀꠡꠞꠄ ꠐꠣꠃꠘ ꠀꠟꠉ ꠇꠞꠤ ꠞꠣꠈꠤꠅ।

8 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠟꠉꠦ ꠇꠍꠝ ꠝꠣꠚꠤꠇ ꠎꠣꠉꠣ ꠛꠣꠠꠣꠁꠀ ꠎꠦꠛꠟꠣ ꠔꠥꠝꠞꠣꠞꠦ ꠀꠡ꠆ꠔꠣ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠛꠣ, 9 ꠅꠃ ꠡꠝꠄ ꠔꠥꠝꠞꠣ ꠀꠞꠅ ꠔꠤꠘꠈꠣꠘ ꠀꠡꠞꠄ ꠐꠣꠃꠘ ꠀꠟꠉ ꠇꠞꠤ ꠞꠣꠈꠛꠣꠄ। ꠈꠣꠟꠤ ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ ꠖꠤꠍꠤ ꠔꠥꠝꠞꠣ ꠎꠥꠖꠤ ꠈꠥꠛ ꠈꠤꠀꠟꠤ ꠅꠁꠀ ꠁꠔꠣ ꠝꠣꠘꠤꠀ ꠌꠟꠅ ꠀꠞ ꠎꠥꠖꠤ ꠢꠞ-ꠢꠣꠝꠦꠡꠣ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠅ ꠀꠞ ꠔꠣꠘ ꠙꠕꠦ ꠌꠟꠅ, ꠔꠦ ꠔꠣꠁꠘ ꠘꠤꠌ꠆ꠌꠄ ꠔꠥꠝꠞꠣꠞꠦ ꠀꠡ꠆ꠔꠣ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠛꠣꠃ। 10 ꠅꠃ ꠀꠡꠞꠄ ꠐꠣꠃꠘ ꠞꠣꠈꠣꠞ ꠇꠣꠞꠘ ꠅꠁꠟ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠞꠣ, ꠢꠃ ꠎꠝꠤꠘꠅ ꠎꠣꠘꠥ ꠇꠥꠘꠥ ꠘꠤ-ꠅꠙꠞꠣꠗꠤꠞ ꠟꠃ ꠘꠣ ꠙꠠꠦ, ꠀꠞ ꠔꠥꠝꠞꠣ ꠇꠥꠘꠥꠎꠣꠔ ꠈꠥꠘꠞ ꠖꠣꠄꠁ ꠘꠣ ꠅꠅ।

11 “ꠅꠁꠟꠦ ꠇꠦꠃ ꠎꠥꠖꠤ ꠞꠣꠉ-ꠉꠥꠍꠣ, ꠁꠋꠡꠣ ꠇꠞꠤꠀ ꠀꠞꠇ ꠎꠘꠞꠦ ꠈꠥꠘ ꠇꠞꠣꠞ ꠘꠤꠅꠔꠦ ꠃꠔ ꠙꠣꠔꠤꠀ ꠞꠄ, ꠛꠣꠖꠦ ꠢꠣꠝꠟꠣ ꠇꠞꠤꠀ ꠈꠥꠘ ꠇꠞꠤꠟꠣꠄ, ꠀꠞ ꠅꠃ ꠈꠥꠘꠤ ꠉꠤꠀ ꠇꠥꠘꠥ ꠀꠡꠞꠄ ꠐꠣꠃꠘꠅ ꠢꠣꠝꠣꠁ ꠎꠣꠄ, 12 ꠔꠦ ꠔꠣꠞ ꠉꠣꠃ ꠛꠣ ꠐꠣꠃꠘꠞ ꠝꠥꠞꠛ꠆ꠛꠤ-ꠡꠣꠟꠤꠡ ꠅꠇꠟꠦ, ꠝꠣꠘꠥꠡ ꠙꠣꠑꠣꠁꠀ ꠔꠣꠞꠦ ꠗꠞꠣꠁ ꠀꠘꠤꠀ, ꠅꠉꠥꠞꠦ ꠝꠣꠞꠤꠟꠣꠅꠀꠞ ꠟꠣꠉꠤ ꠈꠥꠘꠞ ꠛꠖꠟꠣ ꠟꠅꠞꠣꠞ ꠀꠔꠅ ꠡꠙꠤ ꠖꠤꠛꠣ। 13 ꠅꠃ ꠈꠥꠘꠤꠞꠦ ꠔꠥꠝꠞꠣ ꠇꠥꠘꠥ ꠖꠄꠀ-ꠝꠣꠄꠀ ꠇꠞꠤꠅ ꠘꠣ। ꠔꠥꠝꠞꠣ ꠛꠘꠤ ꠁꠍꠞꠣꠁꠟꠞ ꠝꠣꠎ ꠕꠣꠇꠤ ꠘꠤ-ꠅꠙꠞꠣꠗꠤꠞꠦ ꠈꠥꠘꠞ ꠖꠣꠄ-ꠜꠣꠞ ꠚꠥꠍꠤꠀ ꠚꠣꠟꠣꠁꠅ, ꠔꠦꠃ ꠔꠥꠝꠞꠣꠞ ꠜꠣꠟꠣꠁ ꠅꠁꠛ।

14 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠞꠣ, ꠢꠃ ꠖꠦꠡꠞ ꠎꠝꠤꠘꠞ ꠙꠥꠞꠣꠘ ꠀꠝꠟꠅ ꠉꠣꠠꠣ ꠀꠞꠤ-ꠚꠞꠤꠞ ꠇꠥꠘꠥ ꠡꠤꠝꠣꠘꠣ ꠈꠥꠐꠤ ꠃꠘ꠆ꠘꠁꠡ-ꠛꠤꠡ ꠇꠞꠤꠅ ꠘꠣ।

15 “ꠇꠦꠃꠞꠞ ꠛꠦꠙꠣꠞꠦ ꠇꠥꠘꠥꠎꠣꠔ ꠉꠥꠘꠣ ꠛꠣ ꠅꠙꠞꠣꠗꠞ ꠘꠣꠟꠤꠡ ꠀꠁꠟꠦ, ꠔꠦ ꠈꠣꠟꠤ ꠄꠇꠎꠘꠞ ꠡꠣꠇ꠆ꠇꠤ ꠢꠥꠘꠤꠀ ꠞꠣꠄ ꠖꠤꠅ ꠘꠣ, ꠖꠥꠁ ꠛꠣ ꠔꠤꠘ ꠎꠘꠞ ꠡꠣꠇ꠆ꠇꠤ ꠙꠞꠝꠣꠘ ꠟꠁꠀ ꠛꠤꠌꠣꠞ-ꠡꠣꠟꠤꠡꠞ ꠞꠣꠄ ꠖꠤꠅ।

16 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠀꠞꠇ ꠎꠘꠞ ꠈꠦꠔꠤ ꠇꠞꠣꠞ ꠘꠤꠅꠔꠦ ꠇꠥꠘꠥ ꠘꠣꠟꠤꠡ ꠖꠦꠄ, 17 ꠔꠦ ꠅꠃ ꠛꠣꠖꠤ ꠀꠞ ꠛꠤꠛꠣꠖꠤ ꠖꠥꠁꠅ ꠙꠇ꠆ꠇ ꠢꠃ ꠀꠝꠟꠞ ꠢꠣꠇꠤꠝ ꠀꠞ ꠁꠝꠣꠝ ꠍꠣꠛ ꠅꠇꠟꠞ ꠉꠦꠍꠦ ꠉꠤꠀ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠅꠁꠛꠣ। 18 ꠛꠣꠖꠦ ꠡꠣꠟꠤꠡ ꠅꠇꠟꠦ ꠈꠥꠛ ꠈꠤꠀꠟ ꠇꠞꠤꠀ ꠁꠔꠣꠞ ꠔꠣꠟ꠆ꠟꠣꠡ ꠇꠞꠛꠣ, ꠔꠣꠟ꠆ꠟꠣꠡꠤ ꠇꠣꠟꠅ ꠎꠥꠖꠤ ꠗꠞꠣ ꠙꠠꠦ ꠢꠦ ꠔꠣꠞ ꠀꠙꠘ ꠎꠣꠔꠤꠞ ꠜꠣꠁꠞ ꠛꠦꠙꠣꠞꠦ ꠝꠤꠍꠣ ꠘꠣꠟꠤꠡ ꠖꠤꠍꠦ, 19 ꠔꠦ ꠅꠃ ꠘꠣꠟꠤꠡ ꠖꠤꠀ ꠢꠦ ꠢꠃ ꠎꠘꠞ ꠎꠦꠔꠣ ꠈꠦꠔꠤ ꠇꠞꠔ ꠌꠣꠁꠍꠤꠟ, ꠔꠥꠝꠞꠣ ꠅꠉꠥꠞ ꠅꠃꠟꠣ ꠈꠦꠔꠤ ꠇꠞꠤꠅ। ꠅꠃ ꠘꠝꠥꠘꠣꠄ ꠔꠥꠝꠞꠣ ꠘꠤꠎꠞ ꠡꠝꠣꠎ ꠕꠣꠇꠤ ꠘꠣꠚꠞꠝꠣꠘꠤꠞꠦ ꠚꠥꠍꠤꠀ ꠚꠣꠟꠣꠁꠅ। 20 ꠁꠔꠣ ꠢꠥꠘꠤꠀ ꠛꠣꠇꠤ ꠢꠇꠟ ꠛꠘꠤ ꠁꠍꠞꠣꠁꠟꠦ ꠒꠞꠣꠁꠛꠣ, ꠔꠦꠃ ꠁꠟꠣ ꠇꠣꠝ ꠀꠞ ꠇꠦꠃ ꠇꠞꠔ ꠘꠣꠄ। 21 ꠁꠟꠣ ꠅꠙꠞꠣꠗꠤꠞꠦ ꠔꠥꠝꠞꠣ ꠇꠥꠘꠥ ꠟꠣꠈꠣꠘ ꠖꠄꠀ-ꠝꠣꠄꠀ ꠇꠞꠤꠅ ꠘꠣ, ꠎꠣꠘꠞ ꠛꠖꠟꠣ ꠎꠣꠘ, ꠌꠃꠈꠞ ꠛꠖꠟꠣ ꠌꠃꠈ, ꠖꠣꠔꠞ ꠛꠖꠟꠣ ꠖꠣꠔ, ꠀꠔꠞ ꠛꠖꠟꠣ ꠀꠔ, ꠙꠣꠅꠞ ꠛꠖꠟꠣ ꠙꠣꠅ ꠀꠖꠣꠄ ꠇꠞꠤꠅ।