1 “ꠔꠥꠝꠞꠣꠞ ꠖꠥꠡꠝꠘꠞ ꠟꠉꠦ ꠟꠣꠠꠣꠁ ꠇꠞꠣꠔ ꠉꠤꠀ ꠎꠥꠖꠤ ꠖꠦꠈꠅ, ꠔꠣꠞꠣꠞ ꠊꠥꠠꠣ, ꠊꠥꠠꠣꠞ ꠉꠣꠠꠤ, ꠔꠣꠞꠣꠞ ꠍꠤꠙꠣꠁ ꠔꠥꠝꠞꠣ ꠕꠣꠇꠤ ꠛꠦꠡꠤ, ꠔꠦ ꠒꠞꠣꠁꠅ ꠘꠣ। ꠎꠣꠘ ꠔ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ, ꠎꠦꠁꠘ ꠔꠥꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤꠀ ꠀꠘꠍꠂꠘ, ꠔꠣꠁꠘ ꠘꠤꠎꠦ ꠔꠥꠝꠞꠣꠞ ꠟꠉꠦ ꠀꠍꠂꠘ। 2 ꠟꠣꠠꠣꠁꠞ ꠘꠤꠅꠔꠦ ꠛꠣꠞꠘꠤꠞ ꠀꠉꠦ ꠁꠝꠣꠝ ꠍꠣꠛꠦ ꠀꠁꠀ ꠍꠤꠙꠣꠁ ꠅꠇꠟꠞꠦ ꠇꠁꠛꠣ, 3 ꠅ ꠛꠘꠤ ꠁꠍꠞꠣꠁꠟ, ꠢꠥꠘꠅ, ꠔꠥꠝꠞꠣ ꠀꠁꠎ ꠔꠥꠝꠞꠣꠞ ꠖꠥꠡꠝꠘꠞ ꠟꠉꠦ ꠟꠣꠠꠣꠁ ꠇꠞꠣꠔ ꠎꠣꠁꠞꠣꠄ, ꠅꠈꠘ ꠔꠥꠝꠞꠣꠞ ꠝꠘꠞꠦ ꠇꠝꠎꠥꠞ ꠛꠣꠘꠣꠁꠅ ꠘꠣ, ꠒꠞꠣꠁꠅ ꠘꠣ, ꠒꠞꠣꠁꠀ ꠘꠤꠞꠣꠡ ꠅꠁꠅ ꠘꠣ, ꠖꠥꠡꠝꠘꠞ ꠒꠞꠦ ꠇꠣꠙꠤꠅ ꠘꠣ। 4 ꠖꠥꠡꠝꠘꠞ ꠟꠉꠦ ꠟꠣꠠꠣꠁꠔ ꠎꠤꠔꠣꠘꠤꠞ ꠟꠣꠉꠤ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔ ꠔꠥꠝꠞꠣꠞ ꠟꠉꠦ ꠅꠁꠀ ꠎꠣꠁꠞꠣ।

5 “ꠛꠣꠖꠦ ꠔꠣꠞꠣꠞ ꠅꠚꠤꠡꠣꠞ ꠅꠇꠟ ꠀꠁꠀ ꠍꠤꠙꠣꠁ ꠅꠇꠟꠞꠦ ꠎꠤꠇꠣꠁꠛꠣ, ꠔꠥꠝꠞꠣꠞ ꠝꠣꠎꠦ ꠁꠟꠣ ꠇꠥꠘꠥ ꠍꠤꠙꠣꠁ ꠀꠍꠦ ꠘꠤ, ꠎꠦꠉꠥꠄ ꠘꠄꠀ ꠊꠞ ꠛꠣꠘꠣꠁꠀ ꠢꠣꠞꠤ, ꠅꠃ ꠊꠞꠅ ꠛꠡꠔ ꠇꠞꠣꠞ ꠟꠣꠉꠤ ꠖꠥꠀꠞ ꠅꠘꠥꠡ꠆ꠑꠣꠘ ꠛꠣꠇꠤ ꠞꠣꠈꠍꠦ? ꠔꠦ ꠔꠥꠝꠤ ꠘꠤꠎꠞ ꠛꠣꠠꠤꠔ ꠎꠣꠅꠉꠤ, ꠀꠞꠘꠣꠄ ꠟꠣꠠꠣꠁꠔ ꠉꠤꠀ ꠝꠞꠤꠉꠦꠟꠦ ꠖꠥꠍꠞꠣ ꠝꠣꠘꠥꠡ ꠀꠁꠀ ꠅꠃ ꠅꠘꠥꠡ꠆ꠑꠣꠘ ꠇꠞꠤꠟꠣꠁꠛ। 6 ꠀꠞ ꠇꠥꠘꠥ ꠍꠤꠙꠣꠁ ꠀꠍꠦ ꠘꠤ, ꠎꠦꠉꠥꠄ ꠀꠋꠉꠥꠞꠞ ꠛꠣꠉꠣꠘ ꠇꠞꠤꠀ ꠙꠄꠟꠣꠇꠥꠞ ꠚꠟ ꠘꠣ ꠈꠣꠁꠀ ꠟꠣꠠꠣꠁꠔ ꠀꠁꠍꠦ? ꠔꠦ ꠔꠥꠝꠤꠅ ꠛꠣꠠꠤꠔ ꠎꠣꠅꠉꠤ, ꠀꠞꠘꠣꠄ ꠟꠣꠠꠣꠁꠔ ꠉꠤꠀ ꠝꠞꠤꠉꠦꠟꠦ ꠖꠥꠍꠞꠣ ꠝꠣꠘꠡꠦ ꠀꠁꠀ ꠔꠥꠝꠣꠞ ꠛꠣꠉꠣꠘꠞ ꠚꠟ ꠈꠣꠁꠟꠤꠛ। 7 ꠀꠞ ꠔꠥꠝꠞꠣ ꠇꠦꠃꠞꠞ ꠀꠈꠔ ꠇꠞꠤꠀ ꠢꠣꠞꠤ ꠛꠣꠡꠞ ꠞꠣꠁꠔ ꠛꠣꠇꠤ ꠞꠁꠍꠦ ꠘꠤ? ꠔꠦ ꠔꠥꠝꠤꠅ ꠛꠣꠠꠤꠔ ꠎꠣꠅꠉꠤ, ꠀꠞꠘꠣꠄ ꠟꠣꠠꠣꠁꠔ ꠉꠤꠀ ꠝꠞꠤꠉꠦꠟꠦ ꠖꠥꠍꠞꠣ ꠛꠦꠐꠣꠄ ꠀꠁꠀ ꠅꠃ ꠇꠁꠘꠣꠞꠦ ꠛꠤꠀ ꠇꠞꠤꠟꠤꠛ। 8 ꠅꠃ ꠅꠚꠤꠡꠣꠞ ꠅꠇꠟꠦ ꠀꠞꠅ ꠎꠤꠇꠣꠁꠛꠣ, ꠔꠥꠝꠞꠣꠞ ꠝꠣꠎꠦ ꠁꠟꠣ ꠇꠥꠘꠥ ꠍꠤꠙꠣꠁ ꠀꠍꠦ ꠘꠤ, ꠎꠦꠉꠥꠞ ꠎꠣꠘꠅ ꠒꠞ ꠇꠞꠦꠞ, ꠝꠘꠦ ꠇꠣꠙꠦꠞ? ꠔꠦ ꠔꠥꠝꠤꠅ ꠔꠥꠝꠣꠞ ꠛꠣꠠꠤꠔ ꠎꠣꠅꠉꠤ, ꠀꠞꠘꠣꠄ ꠔꠥꠝꠣꠞꠦ ꠖꠦꠈꠤꠀ ꠟꠉꠞ ꠍꠤꠙꠣꠁ ꠅꠇꠟꠅ ꠇꠝꠎꠥꠞ ꠅꠁꠎꠤꠛꠣ। 9 ꠅꠃ ꠘꠝꠥꠘꠣꠄ ꠅꠚꠤꠡꠣꠞ ꠅꠇꠟꠞ ꠎꠤꠇꠣꠘꠤ ꠡꠦꠡ ꠅꠁꠟꠦ, ꠔꠣꠞꠣ ꠍꠤꠙꠣꠁ ꠖꠟ ꠅꠇꠟꠞ ꠃꠙꠞꠦ ꠇꠣꠝꠣꠘ꠆ꠒꠣꠞ ꠛꠅꠀꠁꠟ ꠇꠞꠛꠣ।

10 “ꠔꠥꠝꠞꠣ ꠇꠥꠘꠥ ꠉꠣꠃ ꠛꠣ ꠐꠣꠃꠘꠞ ꠟꠉꠦ ꠟꠣꠠꠣꠁ ꠇꠞꠣꠞ ꠘꠤꠅꠔꠦ ꠎꠦꠛꠟꠣ ꠢꠃ ꠎꠣꠉꠣꠞ ꠗꠣꠞꠅ ꠎꠣꠁꠛꠣꠄ, ꠉꠤꠀ ꠢꠘꠞ ꠝꠣꠘꠡꠞ ꠉꠦꠍꠦ ꠈꠛꠞꠤꠀ ꠙꠣꠑꠣꠁꠀ ꠇꠁꠅ, ꠔꠣꠞꠣ ꠎꠣꠘꠥ ꠀꠙꠥꠡꠦ ꠔꠥꠝꠞꠣꠞ ꠔꠣꠛꠦꠖꠣꠞꠤ ꠝꠣꠘꠤꠟꠣꠁꠘ। 11 ꠔꠣꠞꠣ ꠎꠥꠖꠤ ꠞꠣꠎꠤ ꠅꠁꠀ ꠐꠣꠃꠘꠅ ꠢꠣꠝꠣꠘꠤꠞ ꠉꠦꠁꠐ ꠈꠥꠟꠤꠀ ꠖꠤꠟꠣꠁꠘ, ꠔꠦ ꠔꠣꠞꠣ ꠢꠇꠟ ꠔꠥꠝꠞꠣꠞ ꠞꠣꠁꠅꠔ ꠛꠘꠤꠀ ꠈꠣꠎꠘꠣ ꠖꠤꠛꠣ ꠀꠞ ꠔꠥꠝꠞꠣꠞ ꠉꠥꠟꠣꠝꠤ ꠇꠞꠛꠣ। 12 ꠀꠞ ꠞꠣꠎꠤ ꠘꠣ ꠅꠁꠀ ꠟꠣꠠꠣꠁ ꠇꠞꠔ ꠌꠣꠁꠟꠦ, ꠔꠥꠝꠞꠣ ꠅꠃ ꠐꠣꠃꠘꠞꠦ ꠛꠦꠞꠤꠀ ꠞꠣꠈꠤꠅ। 13 ꠛꠣꠖꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠢꠃ ꠎꠣꠉꠣꠞꠦ ꠔꠥꠝꠞꠣꠞ ꠀꠔꠅ ꠡꠙꠤꠀ ꠢꠣꠞꠟꠦ, ꠔꠥꠝꠞꠣ ꠢꠇꠟ ꠛꠦꠐꠣꠁꠘ꠆ꠔꠞꠦ ꠎꠣꠘꠦ ꠝꠣꠞꠤꠟꠤꠅ। 14 ꠅꠁꠟꠦ ꠢꠘꠞ ꠛꠦꠐꠤ ꠝꠣꠘꠥꠡ, ꠢꠥꠞꠥꠔ꠆ꠔꠣꠁꠘ, ꠙꠡꠥꠞ ꠙꠣꠟ ꠀꠞ ꠢꠃ ꠎꠣꠉꠣꠞ ꠢꠇ꠆ꠇꠟꠔꠣ ꠉꠘꠤꠝꠔꠞ ꠝꠣꠟ ꠢꠤꠡꠣꠛꠦ ꠔꠥꠝꠞꠣ ꠘꠤꠔꠣꠄ ꠙꠣꠞꠛꠣꠄ। ꠖꠥꠡꠝꠘꠞ ꠎꠝꠤꠘ ꠕꠣꠇꠤ ꠉꠘꠤꠝꠔꠞ ꠝꠣꠟ ꠢꠤꠡꠣꠛꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠔꠔꠣ ꠖꠣꠘ ꠇꠞꠛꠣ, ꠁꠔꠣ ꠔꠥꠝꠞꠣ ꠜꠥꠉ-ꠖꠈꠟ ꠇꠞꠔꠣꠄ ꠙꠣꠞꠛꠣꠄ। 15 ꠎꠦꠔꠣ ꠐꠣꠃꠘ ꠅꠇꠟ ꠔꠥꠝꠞꠣꠞ ꠖꠦꠡ ꠕꠣꠇꠤ ꠛꠣꠇ꠆ꠇꠣ ꠖꠥꠞꠁ ꠀꠞ ꠔꠥꠝꠞꠣꠞ ꠇꠣꠘ꠆ꠖꠣ-ꠇꠣꠍꠣꠞ ꠎꠣꠔꠤ ꠅꠇꠟꠞ ꠐꠣꠃꠘ ꠘꠣꠄ, ꠅꠔꠣ ꠐꠣꠃꠘꠞ ꠝꠣꠘꠡꠞ ꠟꠉꠦ ꠅꠃ ꠟꠣꠈꠣꠘ ꠛꠦꠛꠢꠣꠞ ꠇꠞꠤꠅ।

16 “ꠅꠁꠟꠦ ꠔꠥꠝꠞꠣꠞ ꠇꠣꠘ꠆ꠖꠣ-ꠇꠣꠍꠣꠞ ꠎꠦꠔꠣ ꠎꠣꠔꠤ ꠅꠇꠟꠞꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠀꠔꠅ ꠖꠤꠞꠣ, ꠁꠔꠣ ꠇꠥꠘꠥꠉꠥꠞꠦꠃ ꠎꠤꠘ꠆ꠖꠣ ꠞꠣꠈꠤꠅ ꠘꠣ। 17 ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ, ꠢꠤꠐ꠆ꠐꠤ, ꠀꠝꠥꠞꠤ, ꠇꠦꠘꠣꠘꠤ, ꠚꠣꠞꠤꠎꠤ, ꠢꠤꠛ꠆ꠛꠤ ꠀꠞ ꠎꠤꠛꠥꠎꠤ ꠅꠇꠟꠞꠦ ꠙꠥꠞꠣꠙꠥꠞ ꠘꠤꠙꠣꠔ ꠇꠞꠛꠣꠄ। 18 ꠀꠞꠘꠣꠄ ꠔꠣꠞꠣ ꠘꠤꠎꠞ ꠖꠦꠛ-ꠖꠦꠛꠤꠞꠦ ꠙꠥꠎꠣ ꠇꠞꠣꠞ ꠛꠣꠟꠣ ꠎꠔ ꠎꠊꠁꠘ꠆ꠘ ꠘꠣꠚꠞꠝꠣꠘꠤ ꠇꠞꠂꠘ, ꠔꠣꠞꠣꠞ ꠅꠔꠣ ꠔꠥꠝꠞꠣꠅ ꠢꠤꠇꠤꠛꠣꠄ, ꠢꠤꠇꠤꠀ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠖꠞꠛꠣꠞꠅ ꠉꠥꠘꠣꠞ ꠇꠣꠝ ꠇꠞꠛꠣꠄ।

19 “ꠇꠥꠘꠥ ꠉꠣꠃ ꠛꠣ ꠐꠣꠃꠘꠞ ꠟꠉꠦ ꠟꠣꠠꠣꠁꠔ ꠉꠤꠀ ꠔꠥꠝꠞꠣ ꠎꠦꠛꠟꠣ ꠛꠃꠔ ꠟꠣꠝ꠆ꠛꠣ ꠡꠝꠄ ꠗꠞꠤ ꠛꠦꠞꠤꠀ ꠞꠣꠈꠅ, ꠅꠃ ꠡꠝꠄ ꠢꠘꠞ ꠚꠟꠖꠣꠞ ꠇꠥꠘꠥꠎꠣꠔ ꠉꠣꠍ-ꠙꠣꠟꠣ ꠇꠥꠠꠣꠟꠖꠤ ꠇꠣꠐꠤꠅ ꠘꠣ। ꠔꠥꠝꠞꠣ ꠁꠔꠣꠞ ꠚꠟ ꠈꠣꠁꠅ, ꠅꠁꠟꠦ ꠉꠣꠍ ꠇꠣꠐꠤꠅ ꠘꠣ। ꠉꠣꠍ-ꠉꠣꠍꠣꠟꠤ ꠔ ꠔꠥꠝꠞꠣꠞ ꠖꠥꠡꠝꠘ ꠘꠣꠄ ꠎꠦꠘ ꠅꠔꠣꠞꠦ ꠢꠣꠝꠟꠣ ꠇꠞꠔꠣꠄ। 20 ꠔꠣ-ꠅ ꠎꠦꠔꠣ ꠉꠣꠍ ꠇꠥꠘꠥ ꠚꠟ-ꠚꠟꠣꠖꠤꠞ ꠉꠣꠍ ꠘꠣꠄ, ꠁꠔꠣ ꠇꠣꠐꠤꠀ ꠢꠘꠞ ꠛꠣꠡꠤꠘ꠆ꠖꠣ ꠅꠇꠟꠞꠦ ꠟꠣꠠꠣꠁꠔ ꠀꠞꠣꠘꠤꠞ ꠀꠉ ꠙꠞ꠆ꠎꠘ꠆ꠔ, ꠅꠔꠣ ꠖꠤꠀ ꠀꠔꠤꠀꠞ ꠛꠣꠘꠣꠁꠀ ꠢꠣꠝꠟꠣ ꠇꠞꠔꠣꠄ ꠙꠣꠞꠛꠣꠄ।