1 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠞꠣ, ꠢꠘꠅ ꠛꠘ꠆ꠖꠞ ꠝꠣꠎꠦ ꠎꠥꠖꠤ ꠇꠥꠘꠥ ꠝꠣꠘꠡꠞ ꠟꠣꠡ ꠙꠠꠤ ꠞꠁꠍꠦ ꠖꠦꠈꠣ ꠎꠣꠄ, ꠀꠞ ꠔꠣꠞ ꠈꠥꠘꠤꠞ ꠇꠥꠘꠥ ꠙꠞꠤꠌꠄ ꠘꠣ ꠝꠤꠟꠦ, 2 ꠔꠦ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠀꠞ ꠢꠣꠇꠤꠝ-ꠡꠣꠟꠤꠡ ꠅꠇꠟ ꠛꠣꠞ ꠅꠁ ꠀꠁꠀ, ꠝꠣꠙꠤꠀ ꠖꠦꠈꠛꠣ ꠅꠃ ꠟꠣꠡꠞ ꠉꠦꠍ ꠕꠣꠇꠤ ꠇꠥꠘ ꠉꠣꠃ ꠇꠔꠈꠣꠘ ꠖꠥꠞꠁ। 3 ꠖꠦꠈꠤꠀ ꠢꠇꠟ ꠕꠣꠇꠤ ꠇꠣꠍꠣꠞ ꠉꠣꠃꠞ ꠝꠥꠞꠛ꠆ꠛꠤ ꠅꠇꠟꠦ ꠅꠃ ꠟꠣꠈꠣꠘ ꠄꠇ ꠉꠣꠁ-ꠛꠣꠍꠥꠞ ꠙꠍꠘ꠆ꠖ ꠇꠞꠛꠣ, ꠎꠦꠐꠣ ꠖꠤꠀ ꠇꠥꠘꠥꠎꠣꠔ ꠇꠣꠝ-ꠇꠣꠎ, ꠀꠟ-ꠌꠣꠡ ꠇꠞꠣ ꠅꠁꠍꠦ ꠘꠣ। 4 ꠛꠣꠖꠦ ꠢꠘꠞ ꠝꠥꠞꠛ꠆ꠛꠤ ꠅꠇꠟꠦ ꠅꠃ ꠛꠣꠍꠥꠞ ꠟꠁꠀ ꠅꠝꠘ ꠄꠇ ꠎꠣꠉꠣꠔ ꠎꠣꠁꠛꠣ, ꠎꠦꠈꠣꠘꠅ ꠙꠣꠘꠤꠞ ꠚꠥꠔ ꠀꠟꠣ ꠈꠣꠟ ꠀꠍꠦ, ꠀꠞ ꠈꠣꠟꠞ ꠙꠣꠞꠞ ꠎꠝꠤꠘꠅ ꠇꠥꠘꠥꠎꠣꠔ ꠀꠟ-ꠌꠣꠡ ꠛꠣ ꠀꠟꠤ ꠚꠣꠟꠣꠁꠟ ꠅꠁꠍꠦ ꠘꠣ। ꠢꠘꠅ ꠉꠤꠀ ꠅꠃ ꠛꠣꠍꠥꠞꠞ ꠉꠞ꠆ꠖꠘꠣ ꠜꠣꠋꠉꠤꠟꠤꠛꠣ। 5 ꠛꠣꠖꠦ ꠟꠦꠛꠤ ꠈꠣꠘ꠆ꠖꠣꠘꠞ ꠁꠝꠣꠝ ꠅꠇꠟ ꠅꠃ ꠎꠣꠉꠣꠔ ꠀꠁꠛꠣ। ꠇꠣꠞꠘ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠞꠣꠞꠦ ꠙꠍꠘ꠆ꠖ ꠇꠞꠍꠂꠘ, ꠔꠣꠘ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠣ, ꠔꠣꠘ ꠘꠣꠝꠦ ꠝꠣꠘꠡꠞ ꠟꠣꠉꠤ ꠖꠥꠀ-ꠖꠥꠞꠥꠖ ꠇꠞꠣ, ꠀꠞ ꠢꠇꠟ ꠘꠝꠥꠘꠣꠞ ꠚꠤꠔꠘꠣ-ꠚꠍꠣꠖ, ꠝꠣꠞꠣ-ꠝꠣꠞꠤꠞ ꠛꠤꠌꠣꠞ ꠇꠞꠣꠞ ꠟꠣꠉꠤ। 6 ꠛꠣꠍꠥꠞꠞ ꠉꠞ꠆ꠖꠘꠣ ꠜꠣꠋꠉꠤꠀ ꠢꠣꠞꠟꠦ ꠇꠣꠘ꠆ꠖꠣ-ꠇꠣꠍꠣꠞ ꠉꠣꠃꠞ ꠢꠃ ꠝꠥꠞꠛ꠆ꠛꠤ ꠅꠇꠟꠦ, ꠅꠃ ꠈꠣꠟꠞ ꠙꠣꠘꠤꠖꠤ ꠛꠣꠍꠥꠞꠞ ꠃꠙꠞꠦ ꠔꠣꠞꠣꠞ ꠀꠔ ꠗꠁꠛꠣ। 7 ꠗꠁꠀ ꠇꠁꠛꠣ, ꠅꠃ ꠝꠣꠘꠥꠡ ꠈꠥꠘ ꠅꠁꠔꠦ ꠀꠝꠞꠣ ꠇꠦꠃ ꠖꠦꠈꠍꠤ ꠘꠣ, ꠀꠝꠞꠣꠞ ꠀꠔꠦ ꠔꠣꠞꠦ ꠝꠣꠞꠍꠤꠅ ꠘꠣ। 8 ꠅ ꠝꠣꠛꠥꠖ, ꠔꠥꠝꠣꠞ ꠀꠎꠣꠖ ꠇꠞꠣ ꠛꠘꠤ ꠁꠍꠞꠣꠁꠟꠞꠦ ꠔꠥꠝꠤ ꠅꠈꠘ ꠝꠣꠚꠤ ꠖꠦꠅ, ꠈꠥꠘ ꠅꠀ ꠅꠃ ꠘꠤ-ꠅꠙꠞꠣꠗꠤ ꠎꠘꠞ ꠟꠣꠉꠤ ꠔꠥꠝꠣꠞ ꠁ ꠛꠘ꠆ꠖꠣ ꠅꠇꠟꠞꠦ ꠔꠥꠝꠤ ꠖꠣꠄꠁ ꠇꠞꠤꠅ ꠘꠣ। ꠅꠈꠣꠘ ꠇꠁꠀ ꠢꠣꠞꠟꠦ ꠢꠃ ꠈꠥꠘꠞ ꠖꠣꠄ ꠕꠣꠇꠤ ꠔꠣꠞꠣ ꠞꠦꠢꠣꠁ ꠙꠣꠁꠛꠣ। 9 ꠅꠃ ꠘꠝꠥꠘꠣꠄ ꠔꠥꠝꠞꠣꠞ ꠡꠝꠣꠎ ꠕꠣꠇꠤ ꠘꠤ-ꠅꠙꠞꠣꠗꠤ ꠝꠣꠘꠡꠞ ꠈꠥꠘꠞ ꠖꠣꠄ-ꠜꠣꠞ ꠢꠞꠣꠁꠔꠣꠄ ꠙꠣꠞꠛꠣꠄ, ꠇꠣꠞꠘ ꠀꠟ꠆ꠟꠣ ꠝꠣꠛꠥꠖꠦ ꠎꠦꠟꠣ ꠙꠍꠘ꠆ꠖ ꠇꠞꠂꠘ, ꠔꠥꠝꠞꠣ ꠅꠟꠣꠃ ꠇꠞꠍ।

10 “ꠖꠥꠡꠝꠘꠞ ꠟꠉꠦ ꠟꠣꠠꠣꠁꠔ ꠉꠤꠀ ꠢꠣꠞꠟꠦ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦꠛꠟꠣ ꠖꠥꠡꠝꠘ ꠅꠇꠟꠞꠦ ꠔꠥꠝꠞꠣꠞ ꠀꠔꠅ ꠡꠙꠤꠀ ꠖꠤꠛꠣ, ꠀꠞ ꠔꠥꠝꠞꠣ ꠔꠣꠞꠣꠞꠦ ꠛꠘ꠆ꠖꠤ ꠇꠞꠛꠣꠄ, 11 ꠅꠃ ꠡꠝꠄ ꠔꠣꠞꠣꠞ ꠝꠣꠎꠞ ꠇꠥꠘꠥ ꠡꠥꠘ꠆ꠖꠞꠤ ꠛꠦꠐꠤꠞꠦ ꠖꠦꠈꠤꠀ ꠔꠥꠝꠞꠣꠞ ꠝꠣꠎꠦ ꠇꠦꠃ ꠎꠥꠖꠤ ꠀꠡꠤꠇ ꠛꠘꠤꠎꠣꠄ, ꠀꠞ ꠅꠃ ꠛꠦꠐꠤꠞꠦ ꠛꠤꠀ ꠇꠞꠣꠞ ꠈꠤꠀꠟ ꠅꠄ, 12 ꠔꠦ ꠔꠣꠁꠞꠦ ꠘꠤꠎꠞ ꠛꠣꠠꠤꠔ ꠀꠘꠛꠣꠄ। ꠛꠣꠖꠦ ꠔꠣꠁ ꠘꠤꠎꠞ ꠝꠣꠕꠣꠞ ꠌꠥꠟ ꠇꠣꠝꠣꠁꠛ, ꠘꠃꠇ ꠇꠣꠐꠤꠛ, 13 ꠀꠞ ꠛꠘ꠆ꠖꠤ ꠇꠣꠟꠤꠘ ꠢꠣꠟꠔꠞ ꠇꠣꠙꠠ-ꠌꠥꠙꠠ ꠚꠣꠟꠣꠁꠀ, ꠔꠥꠝꠣꠞ ꠛꠣꠠꠤꠔ ꠞꠁꠀ ꠔꠣꠁꠞ ꠝꠣ-ꠛꠣꠚꠞ ꠟꠣꠉꠤ ꠙꠥꠞꠣ ꠄꠇ ꠝꠣꠡ ꠇꠣꠘ꠆ꠖꠣ-ꠇꠣꠐꠤ, ꠀꠢꠣꠎꠣꠞꠤ ꠇꠞꠛ। ꠅꠃ ꠄꠇ ꠝꠣꠡ ꠛꠣꠖꠦ ꠔꠣꠁꠞꠦ ꠛꠤꠀ ꠇꠞꠤꠀ ꠢꠣꠞꠟꠦ, ꠔꠥꠝꠞꠣ ꠎꠣꠝꠣꠁ-ꠛꠃ ꠅꠁꠛꠣꠄ। 14 ꠛꠤꠀ-ꠡꠣꠖꠤꠞ ꠛꠣꠖꠦ ꠎꠥꠖꠤ ꠔꠥꠝꠤ ꠅꠃ ꠛꠦꠐꠤꠞ ꠃꠙꠞꠦ ꠈꠥꠡꠤ ꠘꠣ ꠅꠅ, ꠔꠦ ꠔꠣꠁꠞꠦ ꠔꠣꠁꠞ ꠈꠥꠡꠤ ꠝꠣꠚꠤꠇ ꠍꠣꠠꠤ ꠖꠤꠔꠦ ꠅꠁꠛ। ꠔꠣꠁꠞꠦ ꠛꠣꠘ꠆ꠖꠤ ꠢꠤꠡꠣꠛꠦ ꠞꠣꠈꠣ ꠛꠣ ꠛꠦꠌꠣꠞ ꠄꠈꠔꠤꠀꠞ ꠔꠥꠝꠣꠞ ꠘꠣꠁ, ꠇꠣꠞꠘ ꠔꠥꠝꠤ ꠔꠣꠁꠞ ꠁꠎ꠆ꠎꠔ ꠘꠡ꠆ꠐ ꠇꠞꠍ।

15 “ꠇꠥꠘꠥ ꠛꠦꠐꠣꠞ ꠎꠥꠖꠤ ꠖꠥꠁ ꠛꠃ ꠅꠄ, ꠀꠞ ꠛꠦꠐꠣꠄ ꠄꠇ ꠛꠃꠞꠦ ꠝꠣꠄꠀ ꠇꠞꠦ, ꠖꠥꠍꠞꠣ ꠛꠃꠞꠦ ꠝꠣꠄꠀ ꠘꠣ ꠇꠞꠦ। ꠅꠃ ꠖꠥꠁꠅ ꠛꠃꠞ ꠊꠞꠅ ꠎꠥꠖꠤ ꠙꠥꠀꠂꠘ ꠅꠁꠘ, ꠄꠞ ꠝꠣꠎꠞ ꠛꠠ ꠙꠥꠀ ꠎꠥꠖꠤ ꠢꠃ ꠝꠣꠄꠀ ꠘꠣ ꠇꠞꠣ ꠛꠃꠞ ꠊꠞꠅ ꠅꠄ, 16 ꠔꠦ ꠔꠣꠘ ꠎꠝꠤ-ꠝꠤꠞꠣꠡ ꠛꠣꠐꠤꠀ ꠖꠤꠛꠣꠞ ꠇꠣꠟꠅ, ꠔꠣꠘ ꠝꠣꠄꠀꠞ ꠛꠃꠞ ꠊꠞꠞ ꠙꠥꠀꠞꠦ ꠛꠠ ꠙꠥꠀꠞ ꠢꠇ ꠖꠤꠔꠣ ꠙꠣꠞꠔꠣ ꠘꠣꠄ। 17 ꠛꠞꠋ ꠛꠠ ꠙꠥꠀꠞꠦ ꠔꠣꠘ ꠅꠁꠘ꠆ꠘ ꠙꠥꠀꠂꠘ ꠕꠣꠇꠤ ꠒꠣꠛꠟ ꠖꠤꠔꠦ ꠅꠁꠛ। ꠢꠦ ꠔ ꠅꠁꠟ ꠔꠣꠘ ꠎꠥꠀꠘꠇꠤꠞ ꠙꠄꠟꠣ ꠚꠟ, ꠛꠠ ꠙꠥꠔꠞ ꠖꠣꠛꠤꠖꠣꠞ ꠈꠣꠟꠤ ꠢꠦ-ꠃ।

18 “ꠇꠦꠃꠞꠞ ꠇꠥꠘꠥ ꠙꠥꠀꠄ ꠎꠥꠖꠤ ꠝꠣ-ꠛꠣꠚꠞ ꠇꠕꠣ ꠘꠣ ꠢꠥꠘꠦ, ꠝꠣ-ꠛꠣꠚꠞ ꠢꠥꠇꠥꠝꠞ ꠃꠟꠐꠣ ꠌꠟꠦ, ꠔꠣꠞꠣꠞ ꠛꠥꠎ-ꠡꠣꠡꠘ ꠘꠣ ꠝꠣꠘꠤꠀ ꠇꠥ-ꠙꠕꠦ ꠎꠣꠄꠉꠤ, 19 ꠔꠦ ꠔꠣꠞ ꠝꠣ-ꠛꠣꠚꠦ ꠔꠣꠞꠦ ꠗꠞꠤꠀ ꠝꠥꠞꠛ꠆ꠛꠤ ꠅꠇꠟꠞ ꠉꠦꠍꠦ ꠘꠤꠛꠣ, ꠔꠣꠞꠣꠞ ꠉꠣꠃ ꠛꠣ ꠐꠣꠃꠘꠅ ꠢꠣꠝꠣꠘꠤꠞ ꠉꠦꠁꠐꠞ ꠉꠦꠍꠦ ꠙꠣꠁꠘ꠆ꠌꠣꠁꠔꠤ ꠛꠂꠑꠇ ꠈꠣꠘꠣꠔ ꠘꠤꠛꠣ। 20 ꠘꠤꠀ ꠢꠃ ꠝꠥꠞꠛ꠆ꠛꠤ ꠅꠇꠟꠞꠦ ꠇꠁꠛꠣ, ꠀꠝꠞꠣꠞ ꠅꠃ ꠙꠥꠀ ꠈꠥꠛ ꠘꠣꠚꠞꠝꠣꠘ ꠀꠞ ꠇꠥ-ꠙꠕꠤ ꠛꠘꠤꠉꠦꠍꠦ, ꠢꠦ ꠀꠝꠞꠣꠞ ꠇꠕꠣ ꠝꠣꠘꠦ ꠘꠣ, ꠝꠖ ꠈꠣꠁꠀ ꠝꠣꠔꠟꠣꠝꠤ ꠇꠞꠦ, ꠀꠞ ꠐꠦꠇꠣ-ꠙꠄꠡꠣ ꠃꠠꠣꠄ। 21 ꠔꠦꠃ ꠢꠃ ꠐꠣꠃꠘꠞ ꠢꠇꠟ ꠛꠦꠐꠣꠁꠘ꠆ꠔꠦ ꠙꠣꠔ꠆ꠔꠞ ꠝꠣꠞꠤꠀ ꠔꠣꠞꠦ ꠎꠣꠘꠦ ꠝꠣꠞꠤꠟꠤꠛꠣ। ꠅꠃ ꠘꠝꠥꠘꠣꠄ ꠔꠥꠝꠞꠣꠞ ꠝꠣꠎ ꠕꠣꠇꠤ ꠅꠟꠣꠈꠣꠘ ꠘꠣꠚꠞꠝꠣꠘꠤ ꠚꠥꠍꠤꠀ ꠚꠣꠟꠣꠁꠛꠣꠄ। ꠀꠞ ꠁꠔꠣ ꠢꠥꠘꠤꠀ ꠢꠇꠟ ꠛꠘꠤ ꠁꠍꠞꠣꠁꠟꠦ ꠒꠞꠣꠁꠛꠣ।

22 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠝꠃꠔꠞ ꠡꠣꠎꠣ ꠙꠣꠅꠀꠞ ꠎꠥꠇꠣ ꠅꠙꠞꠣꠗ ꠇꠞꠦ, ꠀꠞ ꠔꠣꠞꠦ ꠝꠣꠞꠣꠞ ꠛꠣꠖꠦ ꠟꠣꠡ ꠉꠣꠍꠅ ꠟꠐꠇꠣꠁꠟ ꠅꠄ, 23 ꠔꠦ ꠔꠣꠞ ꠟꠣꠡꠞꠦ ꠞꠣꠁꠔ ꠙꠞ꠆ꠎꠘ꠆ꠔ ꠉꠣꠍꠅ ꠟꠐꠇꠣꠁꠀ ꠞꠣꠈꠤꠅ ꠘꠣ, ꠖꠤꠘ ꠕꠣꠇꠔꠦꠃ ꠔꠣꠞꠦ ꠝꠣꠐꠤ ꠖꠤꠟꠣꠁꠅ। ꠎꠣꠘ ꠔ, ꠉꠣꠍꠅ ꠟꠐꠇꠣꠁꠟ ꠝꠣꠘꠥꠡ ꠀꠟ꠆ꠟꠣꠞ ꠟꠣꠘ꠆ꠘꠔꠤ। ꠈꠤꠀꠟ ꠞꠣꠈꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠞꠣ, ꠁꠔꠣ ꠔꠥꠝꠞꠣ ꠘꠣꠙꠣꠇ ꠛꠣꠘꠣꠁꠅ ꠘꠣ।