1 “ꠔꠥꠝꠞꠣꠞ ꠎꠣꠔꠤꠞ ꠇꠥꠘꠥ ꠜꠣꠁꠞ ꠉꠞꠥ-ꠍꠣꠉꠟ ꠎꠥꠖꠤ ꠙꠕ ꠀꠞꠣꠁꠀ ꠎꠣꠅꠀꠔ ꠖꠦꠈꠅ, ꠔꠦ ꠔꠥꠝꠞꠣ ꠘꠤꠞꠣꠁ ꠘꠣ ꠕꠣꠇꠤꠀ, ꠁꠐꠣꠞꠦ ꠚꠤꠞꠣꠁꠀ ꠀꠘꠤꠀ ꠔꠣꠞ ꠝꠣꠟꠤꠇꠞ ꠉꠦꠍꠦ ꠖꠤꠅ। 2 ꠅꠃ ꠝꠣꠟꠤꠇ ꠎꠥꠖꠤ ꠔꠥꠝꠞꠣꠞ ꠗꠣꠞꠅ-ꠇꠣꠍꠞ ꠘꠣ ꠅꠄ, ꠛꠣ ꠅꠌꠤꠘꠣ ꠇꠥꠘꠥ ꠎꠘ ꠅꠄ, ꠔꠦ ꠁꠐꠣ ꠔꠥꠝꠞꠣ ꠘꠤꠎꠞ ꠛꠣꠠꠤꠔ ꠘꠤꠛꠣꠄꠉꠤ, ꠛꠣꠖꠦ ꠢꠦ ꠎꠦꠛꠟꠣ ꠔꠥꠇꠣꠘꠤꠔ ꠀꠁꠛ ꠅꠃ ꠡꠝꠄ ꠔꠣꠞꠦ ꠖꠤꠛꠣꠄ। 3 ꠔꠥꠝꠞꠣꠞ ꠎꠣꠔꠤꠞ ꠇꠥꠘꠥ ꠜꠣꠁꠞ ꠉꠣꠗꠣ, ꠔꠣꠞ ꠚꠤꠘ꠆ꠘꠞ ꠇꠣꠙꠠ, ꠛꠣ ꠔꠣꠞ ꠀꠞꠣꠁꠟ ꠎꠦꠇꠥꠘꠥ ꠍꠣꠝꠣꠘꠣ ꠙꠣꠁꠟꠦ ꠔꠥꠝꠞꠣ ꠅꠟꠣ ꠇꠞꠤꠅ, ꠘꠤꠞꠣꠁ ꠢꠞꠤꠀ ꠎꠣꠁꠅ ꠘꠣ।

4 “ꠔꠥꠝꠣꠞ ꠎꠣꠔꠤꠞ ꠜꠣꠁꠞ ꠇꠥꠘꠥ ꠉꠞꠥ-ꠉꠣꠗꠣ ꠙꠕꠞ ꠝꠣꠎꠦ ꠙꠠꠤꠉꠦꠍꠦ ꠖꠦꠈꠤꠀ ꠔꠥꠝꠤ ꠢꠞꠤꠀ ꠎꠣꠁꠅ ꠘꠣ, ꠁꠐꠣ ꠃꠛꠣꠘꠤꠞ ꠟꠣꠉꠤ ꠔꠥꠝꠤ ꠗꠞꠤꠀ ꠡꠣꠁꠎ꠆ꠎ ꠇꠞꠤꠅ।

5 “ꠛꠦꠐꠤꠘ꠆ꠔꠦ ꠛꠦꠐꠣꠁꠘ꠆ꠔꠞ ꠇꠣꠙꠠ ꠀꠞ ꠛꠦꠐꠣꠁꠘ꠆ꠔꠦ ꠛꠦꠐꠤꠘ꠆ꠔꠞ ꠇꠣꠙꠠ ꠚꠤꠘ꠆ꠖꠤꠅ ꠘꠣ। ꠎꠦꠉꠤꠄ ꠁꠟꠣ ꠇꠣꠝ ꠇꠞꠦ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠞꠦ ꠊꠤꠘ ꠇꠞꠂꠘ।

6 “ꠙꠕꠦꠖꠤ ꠀꠐꠤꠀ ꠎꠣꠁꠔꠦ ꠡꠝꠄ ꠇꠥꠘꠥ ꠉꠣꠍꠞ ꠒꠣꠟꠅ, ꠛꠣ ꠝꠣꠐꠤꠞ ꠃꠙꠞꠦ ꠇꠥꠘꠥ ꠙꠣꠈꠤꠞ ꠛꠣꠖꠣ ꠖꠦꠈꠟꠦ, ꠛꠣꠖꠣꠔ ꠇꠥꠘꠥ ꠙꠣꠈꠤꠄ ꠒꠤꠝꠅ ꠃꠝ ꠖꠦꠞ, ꠛꠣ ꠔꠣꠞ ꠛꠣꠁꠌ꠆ꠌꠣꠞ ꠟꠉꠦ ꠀꠍꠦ, ꠔꠦ ꠛꠣꠁꠌ꠆ꠌꠣꠞ ꠟꠉꠦ ꠔꠣꠞ ꠝꠣʼꠞꠦ ꠗꠞꠤꠀ ꠘꠤꠅ ꠘꠣ। 7 ꠡꠈ ꠅꠁꠟꠦ ꠛꠣꠁꠌ꠆ꠌꠣ ꠘꠤꠅꠉꠤ, ꠅꠁꠟꠦ ꠔꠣꠞ ꠝꠣʼꠞꠦ ꠘꠤꠌ꠆ꠌꠤꠔ ꠍꠣꠠꠤꠀ ꠎꠣꠁꠅ। ꠔꠦꠃ ꠔꠥꠝꠣꠞ ꠜꠣꠟꠣꠁ ꠅꠁꠛ, ꠔꠥꠝꠣꠞ ꠢꠣꠄꠀꠔꠤ ꠛꠣꠠꠤꠛ।

8 “ꠘꠄꠀ ꠊꠞ ꠛꠣꠘꠣꠁꠟꠦ ꠔꠥꠝꠞꠣ ꠊꠞꠞ ꠍꠣꠔꠞ ꠃꠙꠞꠦ ꠌꠣꠁꠞꠅ ꠉꠣꠟꠣꠛꠣꠄ ꠛꠦꠠꠣ ꠖꠤꠛꠣꠄ, ꠀꠞꠘꠣꠄ ꠍꠣꠔꠞ ꠃꠙꠞꠦ ꠕꠣꠇꠤ ꠇꠦꠃ ꠙꠠꠤꠀ ꠝꠞꠤꠉꠦꠟꠦ ꠔꠥꠝꠞꠣ ꠈꠥꠘꠞ ꠖꠣꠄꠁ ꠅꠁꠛꠣꠄ।

9 “ꠔꠥꠝꠞꠣꠞ ꠀꠋꠉꠥꠞꠞ ꠛꠣꠉꠣꠘꠅ ꠖꠥꠁ ꠎꠣꠔꠞ ꠛꠤꠌꠤ ꠟꠣꠉꠣꠁꠅ ꠘꠣ, ꠁꠟꠣ ꠇꠞꠟꠦ ꠀꠋꠉꠥꠞ ꠚꠟ ꠀꠞ ꠖꠥꠍꠞꠣ ꠎꠣꠔꠞ ꠛꠤꠌꠤꠞ ꠚꠟꠅ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ ꠅꠁꠎꠤꠛ।

10 “ꠉꠞꠥ ꠀꠞ ꠉꠣꠗꠣꠞꠦ ꠄꠇ ꠎꠥꠀꠟꠅ ꠟꠣꠉꠣꠁꠀ ꠀꠟ-ꠌꠣꠡ ꠇꠞꠤꠅ ꠘꠣ।

11 “ꠔꠥꠝꠞꠣ ꠖꠥꠁ ꠎꠣꠔꠞ ꠡꠥꠔꠣꠖꠤ ꠛꠣꠘꠣꠁꠟ ꠇꠣꠙꠠ ꠚꠤꠘ꠆ꠖꠤꠅ ꠘꠣ।

12 “ꠔꠥꠝꠞꠣꠞ ꠃꠠꠤꠛꠣꠞ ꠌꠣꠖ꠆ꠖꠞꠞ ꠌꠣꠁꠞꠅ ꠇꠥꠘꠣꠔ ꠡꠥꠔꠣꠉꠦꠍꠣ ꠖꠤꠅ।

13 “ꠇꠥꠘꠥ ꠛꠦꠐꠣꠄ ꠛꠤꠀ ꠇꠞꠤꠀ ꠛꠣꠡꠞ ꠊꠞ ꠇꠞꠣꠞ ꠛꠣꠖꠦ ꠎꠥꠖꠤ ꠛꠃꠞꠦ ꠙꠍꠘ꠆ꠖ ꠘꠣ ꠅꠄ, 14 ꠢꠦ ꠎꠥꠖꠤ ꠛꠃꠞ ꠘꠣꠝꠦ ꠛꠖꠘꠣꠝ ꠞꠐꠣꠁꠀ ꠔꠣꠁꠞ ꠉꠤꠛꠔ ꠉꠣꠁꠀ ꠇꠄ, ꠀꠝꠤ ꠔ ꠅꠃ ꠛꠦꠐꠤꠞꠦ ꠛꠤꠀ ꠇꠞꠍꠤ ꠑꠤꠇꠃ, ꠅꠁꠟꠦ ꠔꠣꠁꠞ ꠡꠔꠤꠔ꠆ꠔꠞ ꠇꠥꠘꠥ ꠌꠤꠘ꠆ꠘꠔ ꠙꠣꠁꠍꠤ ꠘꠣ। 15 ꠔꠦ ꠅꠃ ꠇꠁꠘꠣꠞ ꠝꠣ-ꠛꠣꠚꠦ ꠔꠣꠞꠣꠞ ꠙꠥꠠꠤꠞ ꠡꠔꠤꠔ꠆ꠔꠞ ꠌꠤꠘ ꠟꠣꠉꠣꠁꠟ ꠛꠤꠍꠘꠣꠞ ꠇꠣꠙꠠ ꠟꠁꠀ, ꠢꠘꠞ ꠉꠣꠃ ꠛꠣ ꠐꠣꠃꠘꠅ ꠢꠣꠝꠣꠘꠤꠞ ꠉꠦꠁꠐꠞ ꠝꠥꠈꠅ ꠝꠥꠞꠛ꠆ꠛꠤ-ꠡꠣꠟꠤꠡ ꠅꠇꠟꠞ ꠉꠦꠍꠦ ꠎꠣꠁꠛꠣ। 16 ꠉꠤꠀ ꠇꠁꠘꠣꠞ ꠛꠣꠚꠦ ꠝꠥꠞꠛ꠆ꠛꠤ ꠅꠇꠟꠞꠦ ꠇꠁꠛꠣ, ꠀꠝꠤ ꠔ ꠅꠃ ꠖꠣꠝꠣꠘ꠆ꠖꠞ ꠟꠉꠦ ꠀꠝꠣꠞ ꠙꠥꠠꠤꠞꠦ ꠡꠣꠖꠤ ꠖꠤꠍꠟꠣꠝ, ꠅꠈꠘ ꠢꠦ ꠀꠝꠣꠞ ꠙꠥꠠꠤꠞꠦ ꠙꠍꠘ꠆ꠖ ꠇꠞꠦ ꠘꠣ। 17 ꠀꠞ ꠢꠦ ꠛꠖꠘꠣꠝ ꠞꠐꠣꠁꠀ ꠇꠁꠍꠦ, ꠢꠦ ꠛꠥꠟꠦ ꠀꠝꠣꠞ ꠙꠥꠠꠤꠞ ꠡꠔꠤꠔ꠆ꠔꠞ ꠌꠤꠘ꠆ꠘꠔ ꠙꠣꠁꠍꠦ ꠘꠣ, ꠅꠁꠟꠦ ꠀꠙꠘꠣꠞꠣ ꠖꠦꠈꠃꠇ꠆ꠇꠣ, ꠀꠝꠣꠞ ꠙꠥꠠꠤꠞ ꠡꠔꠤꠔ꠆ꠔꠞ ꠌꠤꠘ꠆ꠘꠔ ꠟꠁꠀ ꠀꠝꠤ ꠀꠎꠤꠞ ꠅꠁꠍꠤ। ꠅꠈꠣꠘ ꠇꠁꠀ ꠢꠦ ꠅꠃ ꠛꠤꠍꠘꠣꠞ ꠇꠣꠙꠠ ꠝꠦꠟꠤꠀ ꠝꠥꠞꠛ꠆ꠛꠤ ꠅꠇꠟꠞꠦ ꠌꠤꠘ꠆ꠘꠔ ꠖꠦꠈꠣꠁꠛ। 18 ꠔꠦꠃ ꠢꠤ ꠝꠥꠞꠛ꠆ꠛꠤ ꠅꠇꠟꠦ ꠅꠃ ꠖꠣꠝꠣꠘ꠆ꠖꠞꠦ ꠡꠣꠎꠣ ꠖꠤꠛꠣ। 19 ꠔꠣꠞ ꠎꠞꠤꠝꠣꠘꠣ ꠛꠣꠛꠔ ꠄꠇ-ꠡ ꠔꠟꠣ ꠞꠥꠙꠣ ꠀꠖꠣꠄ ꠇꠞꠤꠀ ꠇꠁꠘꠣꠞ ꠛꠣꠚꠞꠦ ꠖꠤꠛꠣ, ꠇꠣꠞꠘ ꠅꠃ ꠖꠣꠝꠣꠘ꠆ꠖꠦ ꠛꠘꠤ ꠁꠍꠞꠣꠁꠟꠤ ꠄꠇ ꠡꠔꠤ ꠇꠁꠘꠣꠞ ꠛꠖꠘꠣꠝ ꠞꠐꠣꠁꠍꠦ। ꠀꠞ ꠅꠃ ꠇꠁꠘꠣꠞꠦ ꠟꠁꠀ ꠢꠦ ꠡꠋꠡꠣꠞ ꠇꠞꠔꠦ ꠅꠁꠛ, ꠎꠤꠘ꠆ꠖꠦꠉꠤꠄ ꠇꠥꠘꠥꠖꠤꠘ ꠔꠣꠁꠞꠦ ꠍꠣꠠꠣꠞ ꠇꠥꠘꠥ ꠙꠕ ꠘꠣꠁ।

20 “ꠀꠞ ꠖꠣꠝꠣꠘ꠆ꠖꠞ ꠇꠕꠣ ꠢꠣꠍꠣ ꠅꠁꠟꠦ, ꠅꠃ ꠇꠁꠘꠣꠞ ꠡꠔꠤꠔ꠆ꠔꠞ ꠌꠤꠘ꠆ꠘꠔ ꠘꠣ ꠙꠣꠁꠟꠦ, 21 ꠇꠁꠘꠣꠞꠦ ꠔꠣꠁꠞ ꠛꠣꠚꠞ ꠛꠣꠠꠤꠞ ꠉꠦꠁꠐꠞ ꠉꠦꠍꠦ ꠘꠤꠀ, ꠢꠘꠞ ꠛꠦꠐꠣꠁꠘ꠆ꠔꠦ ꠙꠣꠔ꠆ꠔꠞ ꠝꠣꠞꠤꠀ ꠔꠣꠁꠞꠦ ꠝꠣꠞꠤꠟꠤꠛꠣ। ꠔꠣꠁ ꠔ ꠛꠣꠚꠞ ꠛꠣꠠꠤꠔ ꠕꠣꠇꠣꠞ ꠇꠣꠟꠅ ꠎꠤꠘꠣꠞ ꠇꠣꠝ ꠇꠞꠤꠀ, ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠎꠊꠁꠘ꠆ꠘ ꠘꠣꠚꠞꠝꠣꠘꠤ ꠇꠞꠍꠦ। ꠅꠃ ꠘꠝꠥꠘꠣꠄ ꠔꠥꠝꠞꠣ ꠘꠤꠎꠞ ꠡꠝꠣꠎ ꠕꠣꠇꠤ ꠅꠟꠣ ꠘꠣꠚꠞꠝꠣꠘꠤꠞꠦ ꠚꠥꠍꠤꠀ ꠚꠣꠟꠣꠁꠛꠣꠄ।

22 “ꠇꠥꠘꠥ ꠛꠦꠐꠣꠄ ꠎꠥꠖꠤ ꠀꠞꠇ ꠛꠦꠐꠣꠞ ꠛꠃꠞ ꠟꠉꠦ ꠎꠤꠘꠣ ꠇꠞꠣꠔ ꠗꠞꠣ ꠈꠣꠄ, ꠔꠦ ꠅꠃ ꠛꠦꠐꠣ-ꠛꠦꠐꠤ ꠖꠥꠁꠅ ꠎꠘꠞꠦ ꠝꠣꠞꠤꠟꠤꠔꠦ ꠅꠁꠛ। ꠛꠘꠤ ꠁꠍꠞꠣꠁꠟ ꠕꠣꠇꠤ ꠔꠥꠝꠞꠣ ꠁ ꠟꠣꠈꠣꠘ ꠘꠣꠚꠞꠝꠣꠘꠤꠞ ꠘꠣꠝ ꠝꠤꠐꠣꠁꠛꠣꠄ।

23 “ꠛꠤꠀ ꠑꠤꠇ ꠅꠁꠉꠦꠍꠦ ꠁꠟꠣ ꠇꠥꠘꠥ ꠙꠥꠠꠤꠞꠦ ꠇꠦꠃ ꠐꠣꠃꠘꠞ ꠝꠣꠎꠦ ꠙꠣꠁꠀ ꠎꠥꠖꠤ ꠔꠣꠁꠞ ꠟꠉꠦ ꠎꠤꠘꠣ ꠇꠞꠦ, 24 ꠔꠦ ꠔꠣꠞꠣ ꠖꠥꠁꠅꠉꠥꠞꠦ ꠢꠃ ꠎꠣꠉꠣꠞ ꠝꠦꠁꠘ ꠉꠦꠁꠐꠞ ꠉꠦꠍꠦ ꠘꠤꠀ ꠙꠣꠔ꠆ꠔꠞ ꠝꠣꠞꠤꠀ ꠝꠣꠞꠤꠟꠤꠛꠣꠄ। ꠙꠥꠠꠤꠞꠦ ꠝꠣꠞꠤꠟꠤꠛꠣꠞ ꠇꠣꠞꠘ ꠅꠁꠟ, ꠔꠣꠁ ꠔ ꠢꠘꠅ ꠕꠣꠇꠤ ꠡꠣꠁꠎ꠆ꠎꠞ ꠟꠣꠉꠤ ꠇꠥꠘꠥ ꠌꠤꠇ-ꠌꠤꠟ꠆ꠟꠣꠘꠤ ꠖꠤꠍꠦ ꠘꠣ, ꠀꠞ ꠛꠦꠐꠣꠞꠦ ꠎꠣꠘꠦ ꠝꠣꠞꠣꠞ ꠇꠣꠞꠘ ꠅꠁꠟ, ꠢꠦ ꠀꠞꠇ ꠛꠦꠐꠣꠞ ꠛꠃꠞ ꠁꠎ꠆ꠎꠔ ꠝꠣꠞꠍꠦ। ꠅꠃ ꠘꠝꠥꠘꠣꠄ ꠔꠥꠝꠞꠣ ꠛꠘꠤ ꠁꠍꠞꠣꠁꠟ ꠕꠣꠇꠤ ꠅꠟꠣ ꠘꠣꠚꠞꠝꠣꠘꠤ ꠚꠥꠍꠤꠀ ꠚꠣꠟꠣꠁꠛꠣꠄ।

25 “ꠛꠤꠀ ꠑꠤꠇ ꠅꠁꠉꠦꠍꠦ ꠅꠝꠘ ꠇꠥꠘꠥ ꠙꠥꠠꠤꠞꠦ ꠇꠦꠃ ꠇꠥꠘꠥ ꠘꠤꠞꠣꠁ ꠎꠣꠉꠣꠔ ꠙꠣꠁꠀ ꠢꠣꠞꠤ, ꠎꠥꠞ ꠇꠞꠤꠀ ꠔꠣꠁꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠟꠦ, ꠈꠣꠟꠤ ꠅꠃ ꠛꠦꠐꠣ ꠝꠞꠛ। 26 ꠀꠞ ꠅꠃ ꠙꠥꠠꠤꠞꠦ ꠍꠣꠠꠤ ꠖꠤꠛꠣꠄ, ꠔꠣꠁ ꠔ ꠝꠞꠣꠞ ꠎꠥꠇꠣ ꠉꠥꠘꠣ ꠇꠞꠍꠦ ꠘꠣ। ꠁꠔꠣ ꠔ ꠄꠇꠎꠘꠦ ꠖꠥꠍꠞꠣ ꠎꠘꠞꠦ ꠈꠥꠘ ꠇꠞꠣꠞ ꠟꠣꠈꠣꠘꠃ। 27 ꠇꠣꠞꠘ ꠅꠃ ꠛꠦꠐꠣꠄ ꠔꠣꠁꠞꠦ ꠘꠤꠞꠣꠁ ꠎꠣꠉꠣꠔ ꠗꠞꠍꠦ, ꠌꠤꠇ-ꠌꠤꠟ꠆ꠟꠣꠘꠤ ꠖꠤꠟꠦꠅ ꠔꠣꠁꠞꠦ ꠛꠣꠌꠣꠘꠤꠞ ꠇꠦꠃ ꠔ ꠁꠘꠅ ꠀꠍꠤꠟ ꠘꠣ।

28 “ꠛꠤꠀ-ꠡꠣꠖꠤ ꠑꠤꠇ ꠅꠁꠍꠦ ꠘꠣ, ꠅꠝꠘ ꠇꠥꠘꠥ ꠙꠥꠠꠤꠞꠦ ꠙꠣꠁꠀ ꠇꠦꠃ ꠎꠥꠖꠤ ꠎꠥꠞ ꠇꠞꠤꠀ ꠔꠣꠁꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠦ, ꠀꠞ ꠔꠣꠞꠣ ꠗꠞꠣ ꠈꠣꠄ, 29 ꠔꠦ ꠅꠃ ꠛꠦꠐꠣꠄ ꠙꠥꠠꠤꠞ ꠛꠣꠚꠞꠦ ꠙꠁꠘ꠆ꠌꠣꠡ ꠔꠟꠣ ꠞꠥꠙꠣ ꠖꠤꠛ, ꠀꠞ ꠙꠥꠠꠤꠞ ꠁꠎ꠆ꠎꠔ ꠝꠣꠞꠣꠄ ꠔꠣꠁꠞꠦ ꠛꠤꠀ ꠇꠞꠔꠦ ꠅꠁꠛ। ꠎꠤꠘ꠆ꠖꠦꠉꠤꠄ ꠇꠥꠘꠥꠖꠤꠘ ꠔꠣꠁꠞꠦ ꠔꠣꠟꠣꠇ ꠖꠤꠔ ꠙꠣꠞꠔ ꠘꠣꠄ।

30 “ꠇꠥꠘꠥ ꠛꠦꠐꠣꠄ ꠔꠣꠞ ꠢꠣꠔꠘ ꠝꠣʼꠞꠦ ꠛꠤꠀ ꠇꠞꠣ ꠎꠣꠁꠎ ꠘꠣꠄ, ꠁꠟꠣ ꠇꠞꠟꠦ ꠢꠦ ꠔꠣꠞ ꠛꠣꠚꠞ ꠛꠃꠞ ꠟꠉꠦ ꠎꠤꠘꠣ ꠇꠞꠤꠀ ꠛꠣꠚꠞꠦ ꠛꠦꠁꠎ꠆ꠎꠔ ꠇꠞꠛ।”