1 ꠢꠎꠞꠔ ꠝꠥꠍꠣꠄ ꠀꠞꠅ ꠇꠁꠞꠣ, “ꠇꠥꠘꠥ ꠛꠦꠐꠣꠞ ꠎꠥꠖꠤ ꠅꠘ꠆ꠒꠇꠥꠡ ꠍꠦꠌꠣ ꠅꠄ, ꠛꠣ ꠔꠣꠞ ꠙꠥꠞꠥꠡꠣꠟꠤ ꠘꠚꠍ ꠇꠣꠐꠤꠀ ꠚꠣꠟꠣꠁꠟ ꠅꠄ, ꠔꠦ ꠢꠤ ꠛꠦꠐꠣ ꠝꠣꠛꠥꠖꠞ ꠛꠘ꠆ꠖꠣ ꠅꠇꠟꠞ ꠝꠣꠢꠚꠤꠟꠅ ꠢꠣꠝꠣꠘꠤꠞ ꠡꠥꠎꠥꠉ ꠘꠣꠁ।

2 “ꠇꠥꠘꠥ ꠚꠥꠋꠉꠣ ꠝꠣꠘꠥꠡ ꠝꠣꠛꠥꠖꠞ ꠛꠘ꠆ꠖꠣ ꠅꠇꠟꠞ ꠝꠣꠢꠚꠤꠟꠅ ꠢꠣꠝꠣꠘꠤꠞ ꠡꠥꠎꠥꠉ ꠘꠣꠁ, ꠔꠣꠞ ꠌꠃꠖ꠆ꠖ ꠍꠤꠠꠤꠞ ꠇꠦꠃꠞꠞ ꠢꠣꠝꠣꠘꠤꠞ ꠙꠕ ꠘꠣꠁ।

3 “ꠛꠘꠤ-ꠀꠝ꠆ꠝꠣꠘ ꠛꠣ ꠝꠥꠀꠛꠤ ꠎꠣꠔꠤꠞ ꠇꠥꠘꠥ ꠝꠣꠘꠥꠡ ꠝꠣꠛꠥꠖꠞ ꠛꠘ꠆ꠖꠣ ꠅꠇꠟꠞ ꠝꠣꠢꠚꠤꠟꠅ ꠢꠣꠝꠣꠘꠤꠞ ꠡꠥꠎꠥꠉ ꠘꠣꠁ, ꠔꠣꠞꠣꠞ ꠌꠃꠖ꠆ꠖ ꠍꠤꠠꠤꠞ ꠇꠦꠃ ꠢꠣꠝꠣꠘꠤꠞ ꠙꠕ ꠙꠣꠁꠔ ꠘꠣꠄ। 4 ꠝꠘꠅ ꠀꠍꠦ ꠘꠤ, ꠔꠥꠝꠞꠣ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠅꠁꠀ ꠀꠁꠛꠣꠞ ꠇꠣꠟꠅ, ꠙꠕꠞ ꠝꠣꠎꠦ ꠔꠣꠞꠣ ꠔꠥꠝꠞꠣꠞ ꠈꠣꠘꠤ-ꠙꠣꠘꠤ ꠟꠁꠀ ꠀꠉꠥꠀꠁ ꠀꠁꠍꠦ ꠘꠣ, ꠛꠞꠋ ꠔꠥꠝꠞꠣꠞꠦ ꠛꠖ꠆ꠖꠥꠀ ꠖꠤꠛꠣꠞ ꠟꠣꠉꠤ ꠛꠣꠟꠣꠝ ꠛꠤꠘ ꠛꠣꠃꠞ ꠘꠣꠝꠞ ꠄꠇ ꠙꠤꠞꠞꠦ ꠔꠣꠞꠣ ꠊꠥꠡ ꠖꠤꠍꠤꠟ, ꠖꠤꠀ ꠅꠞꠣꠝ-ꠘꠢꠞꠄꠁꠝ ꠖꠦꠡꠞ ꠚꠔꠥꠞ ꠐꠣꠃꠘ ꠕꠣꠇꠤ ꠔꠣꠞꠦ ꠜꠣꠠꠣ ꠇꠞꠤ ꠀꠘꠍꠤꠟ। 5 ꠅꠁꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠅꠃ ꠛꠣꠟꠣꠝꠞ ꠀꠞꠎꠤꠔ ꠡꠣꠄ ꠖꠤꠍꠂꠘ ꠘꠣ, ꠔꠣꠁꠘ ꠔ ꠔꠥꠝꠞꠣꠞꠦ ꠝꠢꠛ꠆ꠛꠔ ꠇꠞꠂꠘ, ꠄꠞꠟꠣꠉꠤ ꠢꠃ ꠛꠣꠟꠣꠝ ꠙꠤꠞꠞ ꠛꠖ꠆ꠖꠥꠀꠞꠦ ꠛꠖꠟꠣꠁꠀ ꠔꠣꠁꠘ ꠘꠦꠇ-ꠖꠥꠀ ꠛꠣꠘꠣꠁꠟꠣ। 6 ꠅꠈꠘ ꠔꠥꠝꠞꠣ ꠎꠤꠘ꠆ꠖꠦꠉꠤꠄ ꠇꠥꠘꠥꠖꠤꠘ ꠁꠔꠣꠞ ꠇꠥꠘꠥ ꠜꠣꠟꠣꠁ ꠛꠣ ꠃꠙꠇꠣꠞ ꠇꠞꠤꠅ ꠘꠣ।

7 “ꠔꠣ-ꠅ ꠁꠖꠥꠝꠤ ꠅꠇꠟꠞꠦ ꠔꠥꠝꠞꠣ ꠁꠋꠡꠣ ꠇꠞꠤꠅ ꠘꠣ, ꠄꠞꠣ ꠔ ꠔꠥꠝꠞꠣꠞ ꠜꠣꠁ। ꠝꠤꠡꠞꠤ ꠝꠣꠘꠡꠞꠦ ꠁꠋꠡꠣ ꠇꠞꠤꠅ ꠘꠣ, ꠔꠥꠝꠞꠣ ꠝꠥꠍꠣꠚꠤꠞ ꠢꠣꠟꠔꠦ ꠀꠉꠦ ꠔꠣꠞꠣꠞ ꠖꠦꠡꠅ ꠛꠡꠔ ꠇꠞꠍ। 8 ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠣꠞ ꠔꠤꠘ ꠍꠤꠠꠤ ꠕꠣꠇꠤ ꠔꠣꠞꠣ ꠝꠣꠛꠥꠖꠞ ꠛꠘ꠆ꠖꠣ ꠅꠇꠟꠞ ꠝꠣꠢꠚꠤꠟꠅ ꠢꠣꠝꠣꠁꠔꠣ ꠙꠣꠞꠛꠣ।

9 “ꠖꠥꠡꠝꠘꠞ ꠟꠉꠦ ꠟꠣꠠꠣꠁꠔ ꠛꠣꠞ ꠅꠁꠀ ꠔꠥꠝꠞꠣ ꠢꠇꠟ ꠘꠝꠥꠘꠣꠞ ꠘꠣꠙꠣꠇꠤ ꠕꠣꠇꠤ ꠛꠣꠌꠤꠀ ꠞꠁꠅ। 10 ꠞꠣꠁꠔꠞ ꠛꠣꠟꠣ ꠇꠥꠘꠥ ꠍꠤꠙꠣꠁꠞ ꠎꠃꠛꠘꠞ ꠙꠣꠘꠤ ꠛꠣꠞ ꠅꠁꠀ ꠘꠣꠙꠣꠇ ꠛꠘꠤꠉꠦꠟꠦ, ꠢꠦ ꠇꠦꠝ꠆ꠙꠞ ꠛꠣꠞꠦ ꠎꠣꠁꠔꠦ ꠅꠁꠛ। 11 ꠛꠣꠖꠦ ꠛꠤꠀꠟꠤ ꠛꠣꠟꠣ ꠢꠦ ꠘꠣꠁꠀ ꠢꠣꠞꠤ, ꠡꠥꠞꠥꠎ ꠒꠥꠛꠤꠀ ꠢꠣꠞꠟꠦ ꠇꠦꠝ꠆ꠙꠅ ꠀꠁꠀ ꠢꠣꠝꠣꠁꠛ।

12 “ꠙꠣꠄꠈꠣꠘꠣ ꠇꠞꠣꠞ ꠟꠣꠉꠤ ꠔꠥꠝꠞꠣ ꠇꠦꠝ꠆ꠙꠞ ꠛꠣꠞꠦ ꠄꠇ ꠎꠣꠉꠣ ꠛꠣꠘꠣꠁꠛꠣꠄ। 13 ꠔꠥꠝꠞꠣꠞ ꠀꠔꠤꠀꠞ-ꠙꠔ꠆ꠞꠞ ꠟꠉꠦ ꠝꠣꠐꠤ ꠈꠥꠠꠤꠛꠣꠞ ꠇꠥꠖꠣꠟ ꠞꠣꠈꠤꠅ। ꠙꠣꠄꠈꠣꠘꠣ ꠇꠞꠤꠀ ꠢꠣꠞꠟꠦ ꠇꠥꠖꠣꠟꠖꠤ ꠉꠣꠔ ꠈꠥꠖꠤꠀ ꠝꠣꠐꠤꠞ ꠔꠟꠦ ꠢꠣꠞꠣꠁꠅ। 14 ꠈꠤꠀꠟ ꠞꠣꠈꠤꠅ, ꠔꠥꠝꠞꠣꠞꠦ ꠛꠣꠌꠣꠘꠤꠞ ꠟꠣꠉꠤ, ꠀꠞ ꠖꠥꠡꠝꠘꠞꠦ ꠔꠥꠝꠞꠣꠞ ꠀꠔꠅ ꠡꠙꠤꠛꠣꠞ ꠈꠤꠀꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔꠥꠝꠞꠣꠞ ꠇꠦꠝ꠆ꠙꠞ ꠜꠤꠔꠞꠦ ꠊꠥꠞꠣ-ꠚꠤꠞꠣ ꠇꠞꠂꠘ। ꠄꠞꠟꠣꠉꠤ ꠔꠥꠝꠞꠣꠞ ꠇꠦꠝ꠆ꠙꠞꠦ ꠙꠣꠇ-ꠙꠛꠤꠔ꠆ꠞ ꠞꠣꠈꠤꠅ, ꠀꠞꠘꠣꠄ ꠔꠥꠝꠞꠣꠞ ꠘꠣꠙꠣꠇꠤ ꠖꠦꠈꠤꠀ ꠝꠣꠛꠥꠖꠦ ꠔꠥꠝꠞꠣꠞ ꠃꠙꠞꠦ ꠕꠣꠇꠤ ꠝꠥꠈ ꠚꠤꠞꠣꠁꠟꠤꠛꠣ।

15 “ꠇꠥꠘꠥ ꠝꠣꠘꠡꠞ ꠇꠤꠘꠣ ꠉꠥꠟꠣꠝ ꠜꠣꠉꠤꠀ ꠀꠁꠀ ꠎꠥꠖꠤ ꠔꠥꠝꠞꠣꠞ ꠉꠦꠍꠦ ꠀꠡꠞꠄ ꠟꠄ, ꠔꠦ ꠔꠣꠞꠦ ꠔꠣꠞ ꠝꠣꠟꠤꠇꠞ ꠉꠦꠍꠦ ꠚꠤꠞꠣꠁ ꠖꠤꠅ ꠘꠣ। 16 ꠢꠦ ꠔꠥꠝꠞꠣꠞ ꠖꠦꠡꠞ ꠎꠦꠈꠣꠘꠅ ꠞꠁꠔ ꠌꠣꠄ, ꠅꠘꠅꠃ ꠔꠣꠞꠦ ꠎꠣꠉꠣ ꠖꠤꠅ, ꠔꠣꠞꠦ ꠖꠥꠈ ꠖꠤꠅ ꠘꠣ।

17 “ꠛꠘꠤ ꠁꠍꠞꠣꠁꠟꠞ ꠇꠥꠘꠥ ꠛꠦꠐꠤꠘ꠆ꠔꠦ ꠎꠣꠘꠥ ꠝꠘ꠆ꠖꠤꠞ-ꠀꠈꠠꠣꠞ ꠘꠐꠤꠉꠤꠞꠤ ꠘꠣ ꠇꠞꠦ। ꠇꠥꠘꠥ ꠛꠦꠐꠣꠄꠅ ꠎꠣꠘꠥ ꠅꠟꠣ ꠘꠐꠣꠉꠤꠞꠤ ꠘꠣ ꠇꠞꠦ। 18 ꠘꠐꠤ ꠛꠦꠐꠤ ꠛꠣ ꠘꠐꠣ ꠛꠦꠐꠣꠞ ꠞꠥꠎꠤ-ꠞꠥꠎꠉꠣꠞꠞ ꠐꠦꠇꠣ-ꠙꠄꠡꠣꠞ ꠇꠥꠘꠥꠎꠣꠔ ꠝꠣꠘ꠆ꠘꠔ-ꠇꠥꠞꠛꠣꠘꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠊꠞꠅ ꠀꠘꠤꠅ ꠘꠣ। ꠁꠟꠣꠈꠣꠘ ꠛꠦꠐꠣ-ꠛꠦꠐꠤꠘ꠆ꠔꠞꠦ ꠔ ꠝꠣꠛꠥꠖꠦ ꠊꠤꠘ ꠇꠞꠂꠘ।

19 “ꠔꠥꠝꠞꠣꠞ ꠎꠣꠔꠤꠞ ꠇꠥꠘꠥ ꠜꠣꠁꠞ ꠉꠦꠍ ꠕꠣꠇꠤ ꠡꠥꠖ ꠈꠣꠁꠅ ꠘꠣ, ꠁꠔꠣ ꠐꠦꠇꠣ-ꠙꠄꠡꠣ, ꠈꠣꠘꠤ-ꠈꠥꠞꠣꠇꠤꠞ ꠎꠤꠘꠤꠡ ꠛꠣ ꠀꠞꠅ ꠇꠥꠘꠥꠔꠣ ꠅꠁꠟꠦꠅ ꠇꠥꠘꠥꠎꠣꠔ ꠡꠥꠖ ꠟꠁꠅ ꠘꠣ। 20 ꠅꠁꠘ꠆ꠘ ꠎꠣꠔꠤꠞ ꠉꠦꠍ ꠕꠣꠇꠤ ꠡꠥꠖ ꠘꠤꠔꠣꠄ ꠙꠣꠞꠛꠣꠄ, ꠅꠁꠟꠦ ꠛꠘꠤ ꠁꠍꠞꠣꠁꠟ ꠕꠣꠇꠤ ꠡꠥꠖ ꠈꠣꠅꠀ ꠢꠣꠞꠣꠝ। ꠁꠔꠣ ꠝꠣꠘꠤꠀ ꠌꠟꠟꠦ ꠔꠥꠝꠞꠣ ꠎꠦ ꠖꠦꠡꠞ ꠖꠈꠟꠖꠣꠞꠤ ꠙꠣꠁꠞꠣꠄ, ꠢꠃ ꠎꠣꠉꠣꠔ ꠉꠤꠀ ꠢꠣꠞꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠢꠇꠟ ꠇꠣꠝ-ꠇꠣꠎꠅ ꠞꠢꠝ-ꠛꠞꠇꠔ ꠖꠤꠛꠣ।

21 “ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠇꠥꠘꠥꠔꠣ ꠝꠣꠘ꠆ꠘꠔ ꠇꠞꠟꠦ, ꠁꠔꠣ ꠎꠟꠖꠤ ꠇꠞꠤ ꠀꠖꠣꠄ ꠇꠞꠤꠅ, ꠁꠔꠣ ꠀꠖꠣꠄ ꠘꠣ ꠇꠞꠟꠦ ꠔꠥꠝꠞꠣꠞ ꠉꠥꠘꠣ ꠅꠁꠛ। ꠀꠞ ꠁ ꠢꠤꠡꠣꠛ ꠔ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠛꠣꠖ ꠖꠤꠔꠣ ꠘꠣꠄ। 22 ꠅꠁꠟꠦ ꠇꠥꠘꠥꠎꠣꠔ ꠝꠣꠘ꠆ꠘꠔ ꠘꠣ ꠇꠞꠟꠦ ꠉꠥꠘꠣ ꠘꠣꠄ। 23 ꠔꠥꠝꠞꠣꠞ ꠎꠛꠣꠘ ꠕꠣꠇꠤ ꠎꠦ ꠝꠣꠘ꠆ꠘꠔ ꠇꠞꠍ, ꠁꠐꠣ ꠘꠤꠌ꠆ꠌꠤꠔ ꠀꠖꠣꠄ ꠇꠞꠛꠣꠄ, ꠇꠣꠞꠘ ꠔꠥꠝꠣꠞ ꠘꠤꠎꠞ ꠎꠛꠣꠘꠦ, ꠘꠤꠎꠞ ꠈꠥꠡꠤꠄ ꠀꠟ꠆ꠟꠣ ꠝꠣꠛꠥꠖꠞ ꠘꠣꠝꠦ ꠁꠔꠣ ꠝꠣꠘꠍ, ꠄꠞꠟꠣꠉꠤ ꠀꠖꠣꠄꠅ ꠇꠞꠛꠣꠄ।

24 “ꠔꠥꠝꠞꠣꠞ ꠀꠞꠤ-ꠚꠞꠤꠞ ꠀꠋꠉꠥꠞꠞ ꠛꠣꠉꠣꠘꠅ ꠢꠣꠝꠣꠁꠟꠦ ꠘꠤꠎꠞ ꠢꠣꠃꠍ ꠝꠤꠐꠣꠁꠀ ꠀꠋꠉꠥꠞ ꠈꠣꠁꠅ, ꠅꠁꠟꠦ ꠇꠥꠘꠥ ꠛꠃꠟ ꠛꠣ ꠛꠡ꠆ꠔꠣꠔ ꠇꠞꠤ ꠇꠥꠘ꠆ꠔꠣ ꠘꠤꠔꠣꠄ ꠙꠣꠞꠔꠣꠄ ꠘꠣꠄ। 25 ꠇꠦꠃꠞꠞ ꠎꠝꠤꠘꠅ ꠉꠤꠀ ꠀꠔꠖꠤ ꠇꠥꠘꠥꠎꠣꠔ ꠚꠄ-ꠚꠍꠟꠞ ꠍꠠꠣ ꠍꠤꠠꠤꠔꠣꠄ ꠙꠣꠞꠛꠣꠄ, ꠅꠁꠟꠦ ꠇꠣꠌꠤ ꠖꠤꠀ ꠖꠣꠁꠀ ꠘꠤꠔꠣꠄ ꠙꠣꠞꠔꠣꠄ ꠘꠣꠄ।”