24
ꠛꠤꠀ-ꠡꠣꠖꠤꠞ ꠛꠦꠙꠣꠞꠦ
1 ꠢꠎꠞꠔ ꠝꠥꠍꠣꠄ ꠀꠞꠅ ꠇꠁꠞꠣ, “ꠛꠤꠀꠞ ꠛꠣꠖꠦ ꠎꠥꠖꠤ ꠇꠥꠘꠥ ꠎꠣꠝꠣꠁꠄ ꠔꠣꠞ ꠛꠃꠞ ꠝꠣꠎꠦ ꠈꠥꠔ ꠙꠣꠄ, ꠙꠣꠁꠀ ꠔꠣꠁꠞ ꠃꠙꠞꠦ ꠘꠣꠞꠣꠎ ꠅꠄ, ꠀꠞ ꠔꠣꠟꠣꠇ ꠘꠣꠝꠣ ꠟꠦꠈꠤꠀ ꠔꠣꠁꠞ ꠀꠔꠅ ꠖꠤꠀ ꠛꠤꠖꠣꠄ ꠇꠞꠤ ꠖꠦꠄ। 2 ꠀꠞ ꠅꠃ ꠛꠃꠄ ꠉꠤꠀ ꠎꠥꠖꠤ ꠖꠥꠍꠞꠣ ꠎꠣꠝꠣꠁꠞ ꠉꠦꠍꠦ ꠛꠤꠀ ꠛꠄ, 3 ꠛꠣꠖꠦ ꠢꠃ ꠖꠥꠍꠞꠣ ꠎꠣꠝꠣꠁꠄꠅ ꠔꠣꠁꠞꠦ ꠘꠣꠙꠍꠘ꠆ꠖ ꠇꠞꠤꠀ ꠎꠥꠖꠤ ꠅꠟꠣ ꠔꠣꠟꠣꠇ ꠖꠤꠟꠣꠄ, ꠛꠣ ꠢꠃ ꠎꠣꠝꠣꠁ ꠝꠞꠤꠎꠣꠄ, 4 ꠔꠦ ꠔꠣꠁꠞ ꠢꠃ ꠙꠄꠟꠣ ꠎꠣꠝꠣꠁꠄ ꠔꠣꠁꠞꠦ ꠀꠞ ꠛꠤꠀ ꠇꠞꠔ ꠙꠣꠞꠔ ꠘꠣꠄ, ꠔꠣꠁ ꠔ ꠄꠘ ꠟꠣꠉꠤ ꠘꠣꠙꠣꠇ ꠅꠁꠉꠦꠍꠦ। ꠁꠟꠣꠈꠣꠘ ꠛꠤꠀ-ꠡꠣꠖꠤꠞꠦ ꠝꠣꠛꠥꠖꠦ ꠊꠤꠘ ꠇꠞꠂꠘ। ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠞꠣ, ꠔꠥꠝꠞꠣ ꠁꠟꠣ ꠉꠥꠘꠣ ꠇꠞꠤꠀ ꠁ ꠖꠦꠡꠞꠦ ꠘꠣꠙꠣꠇ ꠛꠣꠘꠣꠁꠅ ꠘꠣ।
5 “ꠘꠄꠀ ꠛꠤꠀ ꠇꠞꠣ ꠇꠥꠘꠥ ꠛꠦꠐꠣꠞꠦ ꠎꠥꠖ꠆ꠖꠔ ꠙꠣꠑꠣꠁꠅ ꠘꠣ, ꠎꠥꠞ-ꠎꠛꠞꠖꠡ꠆ꠔꠤ ꠇꠞꠤꠀ ꠔꠣꠞꠦ ꠇꠥꠘꠥ ꠇꠣꠝꠞ ꠜꠣꠞ ꠖꠤꠅ ꠘꠣ। ꠢꠦ ꠙꠥꠞꠣ ꠄꠇ ꠛꠍꠞ ꠇꠣꠝ-ꠇꠣꠎ ꠘꠣ ꠇꠞꠤꠀ, ꠔꠣꠞ ꠛꠃꠞ ꠟꠉꠦ ꠈꠥꠡꠤ-ꠛꠣꠡꠤ ꠇꠞꠣꠞ ꠡꠥꠎꠥꠉ ꠖꠤꠅ।
ꠡꠝꠣꠎꠅ ꠌꠟꠣꠞ ꠢꠥꠇꠥꠝ-ꠀꠢꠇꠣꠝ
6 “ꠀꠅꠟꠣꠔꠤ ꠝꠣꠟꠞ ꠛꠘ꠆ꠖꠇ ꠢꠤꠡꠣꠛꠦ ꠔꠥꠝꠞꠣ ꠇꠦꠃꠞꠞ ꠊꠣꠁꠟ-ꠍꠤꠀ, ꠛꠣ ꠈꠣꠟꠤ ꠍꠤꠀ ꠛꠘ꠆ꠖꠇ ꠞꠣꠈꠤꠅ ꠘꠣ। ꠁꠟꠣ ꠇꠞꠟꠦ ꠔꠣꠞ ꠎꠣꠘ ꠛꠣꠌꠣꠘꠤꠞ ꠈꠣꠘꠤ-ꠈꠥꠞꠣꠇꠤꠞ ꠙꠕ ꠛꠘ꠆ꠖ ꠅꠁꠎꠤꠛ।
7 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠛꠘꠤ ꠁꠍꠞꠣꠁꠟꠞ ꠀꠞꠇ ꠜꠣꠁꠞꠦ ꠌꠥꠞꠤ ꠇꠞꠤꠀ ꠘꠤꠀ ꠉꠥꠟꠣꠝ ꠛꠣꠘꠣꠁꠟꠣꠄ, ꠛꠣ ꠖꠥꠍꠞꠣ ꠎꠣꠉꠣꠔ ꠛꠦꠌꠤꠀ ꠢꠣꠞꠤ ꠗꠞꠣ ꠈꠣꠄ, ꠔꠦ ꠔꠣꠞꠦ ꠎꠣꠘꠦ ꠝꠣꠞꠛꠣꠄ। ꠅꠃ ꠘꠝꠥꠘꠣꠄ ꠔꠥꠝꠞꠣꠞ ꠡꠝꠣꠎ ꠕꠣꠇꠤ ꠁꠟꠣ ꠘꠣꠚꠞꠝꠣꠘꠤꠞꠦ ꠚꠥꠍꠤꠀ ꠚꠣꠟꠣꠁꠛꠣꠄ।
8 “ꠇꠦꠃꠞꠞ ꠉꠔꠞꠅ ꠙꠌꠣ-ꠇꠥꠡ꠆ꠑ ꠛꠦꠝꠣꠞ ꠖꠦꠈꠣ ꠖꠤꠟꠦ, ꠟꠦꠛꠤ ꠈꠣꠘ꠆ꠖꠣꠘꠞ ꠁꠝꠣꠝ ꠅꠇꠟꠞ ꠙꠞꠣꠝꠤꠡ ꠝꠣꠚꠤꠇ ꠌꠟꠤꠅ। ꠀꠝꠤ ꠔꠣꠞꠣꠞꠦ ꠎꠦꠔꠣ ꠢꠥꠇꠥꠝ ꠖꠤꠍꠤ, ꠔꠥꠝꠞꠣ ꠈꠥꠛ ꠈꠤꠀꠟꠤ ꠅꠁꠀ ꠁꠔꠣ ꠝꠣꠘꠤꠅ। 9 ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠅꠁꠀ ꠀꠁꠛꠣꠞ ꠙꠕꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠀꠝꠣꠞ ꠛꠁꠘ ꠝꠞꠤꠅꠝꠞ ꠎꠦ ꠖꠡꠣ ꠊꠐꠣꠁꠍꠤꠟ, ꠁꠔꠣ ꠔꠥꠝꠞꠣ ꠝꠘꠅ ꠞꠣꠈꠤꠅ।
10 “ꠔꠥꠝꠣꠞ ꠀꠞꠤ-ꠚꠞꠤꠞꠦ ꠇꠥꠘ꠆ꠔꠣ ꠀꠅꠟꠣꠔ ꠖꠤꠟꠦ, ꠔꠣꠞ ꠉꠦꠍ ꠕꠣꠇꠤ ꠇꠥꠘꠥ ꠝꠣꠟ ꠛꠘ꠆ꠖꠇ ꠘꠤꠛꠣꠞ ꠘꠤꠅꠔꠦ, ꠔꠥꠝꠤ ꠔꠣꠞ ꠊꠞꠅ ꠢꠣꠝꠣꠁꠅ ꠘꠣ। 11 ꠔꠥꠝꠤ ꠊꠞꠞ ꠛꠣꠞꠦ ꠃꠛꠣꠁꠅ, ꠀꠞ ꠎꠣꠞꠦ ꠀꠅꠟꠣꠔ ꠖꠤꠍ, ꠢꠦ ꠔꠣꠞ ꠊꠞ ꠕꠣꠇꠤ ꠛꠘ꠆ꠖꠇꠤ ꠝꠣꠟ ꠀꠘꠤꠀ ꠔꠥꠝꠣꠞꠦ ꠖꠤꠛ। 12 ꠀꠅꠟꠣꠔ ꠘꠦꠅꠞꠣ ꠎꠘ ꠉꠞꠤꠛ-ꠖꠥꠈꠤ ꠅꠁꠟꠦ, ꠔꠣꠞ ꠖꠦꠅꠀ ꠛꠘ꠆ꠖꠇꠤ ꠈꠦꠔꠣ-ꠇꠝꠟꠤ ꠘꠤꠀ ꠔꠥꠝꠤ ꠞꠣꠁꠔ ꠊꠥꠝꠣꠁꠅ ꠘꠣ। 13 ꠢꠣꠁꠘ꠆ꠎꠣ ꠛꠣꠟꠣ ꠔꠥꠝꠤ ꠔꠣꠞ ꠝꠣꠟ ꠚꠤꠞꠣꠁ ꠖꠤꠅ, ꠅꠔꠣ ꠃꠠꠤꠀ ꠢꠦ ꠞꠣꠁꠔ ꠊꠥꠝꠣꠁꠀ ꠔꠥꠝꠣꠞꠦ ꠖꠥꠀ ꠖꠤꠛ। ꠔꠦꠃ ꠔꠥꠝꠣꠞ ꠜꠣꠟꠣꠁ ꠅꠁꠛ, ꠀꠞ ꠛꠘ꠆ꠖꠇꠤ ꠍꠣꠝꠣꠘꠣ ꠚꠤꠞꠔ ꠖꠦꠅꠀ ꠔ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠎꠞꠅ ꠘꠦꠇꠤꠞ ꠇꠣꠝ।
14 “ꠔꠥꠝꠞꠣꠞ ꠛꠘꠤ ꠁꠍꠞꠣꠁꠟ ꠡꠝꠣꠎꠞ ꠇꠥꠘꠥ ꠜꠣꠁ*24:14 “ꠛꠘꠤ ꠁꠍꠞꠣꠁꠟ ꠡꠝꠣꠎꠞ ꠇꠥꠘꠥ ꠜꠣꠁ।” ꠁꠛꠞꠣꠘꠤ ꠜꠣꠡꠣꠄ, ꠔꠥꠝꠞꠣꠞ ꠜꠣꠁꠀꠁꠘ꠆ꠔꠞ ꠝꠣꠎꠦ ꠇꠦꠃ। ꠛꠣ ꠔꠥꠝꠞꠣꠞ ꠖꠦꠡꠅ ꠞꠅꠞꠣ ꠜꠤꠘ ꠎꠣꠔꠤꠞ ꠇꠥꠘꠥ ꠝꠣꠘꠡꠞ ꠉꠦꠍꠦ ꠙꠣꠅꠘꠣ ꠕꠣꠇꠟꠦ, ꠀꠞ ꠢꠦ ꠉꠞꠤꠛ-ꠖꠥꠈꠤ, ꠞꠥꠎꠤ ꠇꠣꠝꠟꠣ ꠎꠘ ꠅꠁꠟꠦ, ꠔꠣꠞ ꠃꠙꠞꠦ ꠎꠥꠟꠥꠝ ꠇꠞꠤꠅ ꠘꠣ। 15 ꠡꠥꠞꠥꠎ ꠒꠥꠛꠣꠞ ꠀꠉꠦ ꠔꠥꠝꠞꠣ ꠔꠣꠞ ꠙꠣꠅꠘꠣ ꠝꠎꠥꠞꠤ ꠖꠤꠟꠣꠁꠅ, ꠢꠦ ꠔ ꠉꠞꠤꠛ ꠝꠣꠘꠥꠡ, ꠅꠃ ꠝꠎꠥꠞꠤ ꠖꠤꠀꠃ ꠔꠣꠞ ꠎꠤꠘ꠆ꠖꠦꠉꠤ ꠌꠟꠦ। ꠀꠞꠘꠣꠄ ꠝꠎꠥꠞꠤꠞ ꠟꠣꠉꠤ ꠢꠦ ꠝꠣꠛꠥꠖꠞ ꠖꠞꠛꠣꠞꠅ ꠚꠞꠤꠀꠖ ꠇꠞꠟꠦ, ꠔꠥꠝꠞꠣ ꠉꠥꠘꠣꠞ ꠜꠣꠉꠤ ꠅꠁꠛꠣꠄ।
16 “ꠙꠥꠀ-ꠙꠥꠠꠤꠞ ꠅꠙꠞꠣꠗꠞ ꠟꠣꠉꠤ ꠔꠣꠞꠣꠞ ꠝꠣ-ꠛꠣꠚꠞꠦ, ꠛꠣ ꠝꠣ-ꠛꠣꠚꠞ ꠅꠙꠞꠣꠗꠦ ꠙꠥꠀ-ꠙꠥꠠꠤꠞꠦ ꠎꠣꠘꠦ ꠝꠣꠞꠣ ꠎꠣꠁꠔ ꠘꠣꠄ। ꠙꠞꠔꠦꠇ ꠎꠘꠦ ꠘꠤꠎꠞ ꠅꠙꠞꠣꠗꠞ ꠡꠣꠎꠣ ꠘꠤꠎꠦ ꠙꠣꠁꠛ।
17 “ꠇꠥꠘꠥ ꠛꠤꠖꠦꠡꠤ ꠝꠥꠍꠣꠚꠤꠞ ꠛꠣ ꠄꠔꠤꠝꠞ ꠃꠙꠞꠦ ꠘꠣ-ꠢꠇ ꠛꠤꠌꠣꠞ ꠅꠁꠔꠦ ꠖꠤꠅ ꠘꠣ। ꠇꠥꠘꠥ ꠠꠣꠠꠤ ꠛꠦꠐꠤꠞ ꠚꠤꠘ꠆ꠖꠤꠛꠣꠞ ꠇꠣꠙꠠ ꠛꠘ꠆ꠖꠇ ꠞꠣꠈꠤꠅ ꠘꠣ। 18 ꠝꠘꠅ ꠞꠣꠈꠤꠅ, ꠝꠤꠡꠞ ꠖꠦꠡꠅ ꠔꠥꠝꠞꠣ ꠉꠥꠟꠣꠝ ꠀꠍꠟꠣꠄ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠢꠘ ꠕꠣꠇꠤ ꠀꠎꠣꠖ ꠇꠞꠤ ꠀꠘꠍꠂꠘ। ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞꠦ ꠁꠔꠣ ꠇꠣꠝ ꠇꠞꠣꠞ ꠢꠥꠇꠥꠝ ꠖꠤꠞꠣꠝ।
19 “ꠔꠥꠝꠞꠣꠞ ꠎꠝꠤꠘꠞ ꠗꠣꠘ ꠇꠣꠐꠣꠞ ꠛꠣꠖꠦ, ꠗꠣꠘꠞ ꠇꠥꠘꠥ ꠝꠥꠁꠐ ꠚꠣꠃꠞꠤꠀ ꠉꠦꠟꠦꠉꠤ, ꠁꠐꠣ ꠀꠘꠣꠞ ꠟꠣꠉꠤ ꠀꠞ ꠚꠤꠞꠔ ꠎꠣꠁꠅ ꠘꠣ। ꠛꠤꠖꠦꠡꠤ ꠝꠥꠍꠣꠚꠤꠞ, ꠄꠔꠤꠝ ꠀꠞ ꠠꠣꠠꠤ ꠛꠦꠐꠤꠘ꠆ꠔꠞ ꠟꠣꠉꠤ ꠁꠐꠣ ꠖꠤꠟꠣꠁꠅ, ꠔꠦꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠢꠇꠟ ꠇꠣꠝ-ꠇꠣꠎꠅ ꠞꠢꠝ-ꠛꠞꠇꠔ ꠖꠤꠛꠣ। 20 ꠎꠄꠔꠥꠘ ꠉꠣꠍꠞ ꠚꠟ ꠙꠣꠠꠤꠛꠣꠞ ꠇꠣꠟꠅ ꠄꠇꠁ ꠒꠣꠟꠞ ꠚꠟ ꠖꠥꠁꠛꠣꠞ ꠙꠣꠠꠤꠅ ꠘꠣ। ꠄꠇꠛꠣꠞ ꠙꠣꠠꠣꠞ ꠛꠣꠖꠦ ꠎꠦꠔꠣ ꠞꠄ, ꠁꠔꠣ ꠛꠤꠖꠦꠡꠤ ꠝꠥꠍꠣꠚꠤꠞ, ꠄꠔꠤꠝ ꠀꠞ ꠠꠣꠠꠤ ꠛꠦꠐꠤꠘ꠆ꠔꠞ ꠟꠣꠉꠤ ꠕꠁꠅ। 21 ꠔꠥꠝꠞꠣꠞ ꠀꠋꠉꠥꠞ ꠛꠣꠉꠣꠘꠞ ꠄꠇ ꠟꠔ ꠕꠣꠇꠤ ꠖꠥꠁ ꠛꠣꠞ ꠀꠋꠉꠥꠞ ꠙꠣꠠꠤꠅ ꠘꠣ, ꠄꠇꠛꠣꠞ ꠙꠣꠠꠣꠞ ꠛꠣꠖꠦ ꠎꠦꠔꠣ ꠞꠄ, ꠁꠔꠣ ꠛꠤꠖꠦꠡꠤ ꠝꠥꠍꠣꠚꠤꠞ, ꠄꠔꠤꠝ ꠀꠞ ꠠꠣꠠꠤ ꠛꠦꠐꠤꠘ꠆ꠔꠞ ꠟꠣꠉꠤ ꠕꠁ ꠖꠤꠅ। 22 ꠚꠣꠃꠞꠤꠅ ꠘꠣ, ꠔꠥꠝꠞꠣ ꠔ ꠀꠉꠦ ꠝꠤꠡꠞ ꠖꠦꠡꠅ ꠉꠥꠟꠣꠝ ꠀꠍꠟꠣꠄ। ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞꠦ ꠁꠔꠣ ꠇꠞꠣꠞ ꠢꠥꠇꠥꠝ ꠖꠤꠞꠣꠝ।”