1 ꠝꠥꠍꠣ ꠘꠛꠤꠄ ꠔꠣꠞꠣꠞꠦ ꠀꠞꠅ ꠇꠁꠞꠣ, “ꠝꠣꠘꠡꠞ ꠝꠣꠎꠦ ꠇꠣꠁꠎ꠆ꠎꠣ-ꠚꠍꠣꠖ ꠟꠣꠉꠤꠀ ꠎꠥꠖꠤ ꠁꠔꠣ ꠢꠣꠇꠤꠝꠞ ꠀꠖꠣꠟꠔꠅ ꠎꠣꠄ, ꠔꠦ ꠢꠣꠇꠤꠝ ꠅꠇꠟꠦ ꠅꠙꠞꠣꠗꠤ ꠎꠘꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠛꠣ, ꠀꠞ ꠘꠤ-ꠅꠙꠞꠣꠗꠤꠞꠦ ꠈꠣꠟꠣꠍ ꠖꠤꠛꠣ। 2 ꠅꠃ ꠛꠤꠌꠣꠞꠅ ꠖꠥꠡꠤ ꠎꠘꠞꠦ ꠍꠤꠋꠟꠣꠖꠤ ꠝꠣꠞꠣꠞ ꠞꠣꠄ ꠖꠤꠟꠦ, ꠢꠣꠇꠤꠝꠦ ꠔꠣꠞꠦ ꠝꠣꠐꠤꠔ ꠢꠥꠔꠣꠁꠀ ꠔꠣꠞ ꠙꠣꠅꠘꠣ ꠝꠣꠁꠞ ꠔꠣꠘ ꠘꠤꠎꠞ ꠍꠣꠝꠘꠦ ꠝꠣꠞꠣꠁꠛꠣ, 3 ꠅꠁꠟꠦ ꠌꠣꠟ꠆ꠟꠤꠡꠐꠣꠞ ꠛꠦꠡꠤ ꠝꠣꠞꠣ ꠎꠣꠁꠔ ꠘꠣꠄ। ꠀꠞꠘꠣꠄ ꠘꠤꠎꠞ ꠎꠣꠔꠤꠞ ꠄꠇ ꠜꠣꠁꠞꠦ ꠡꠝꠣꠎꠞ ꠍꠣꠝꠘꠦ ꠛꠦꠁꠎ꠆ꠎꠔ ꠇꠞꠣ ꠅꠁꠛ।

4 “ꠗꠣꠘ ꠝꠣꠠꠣ ꠖꠤꠛꠣꠞ ꠇꠣꠟꠅ ꠉꠞꠥꠞ ꠝꠥꠈꠅ ꠢꠥꠚꠤ ꠟꠣꠉꠣꠁꠅ ꠘꠣ।

5 “ꠄꠇ ꠙꠞꠤꠛꠣꠞꠞ ꠢꠇꠟ ꠜꠣꠁꠀꠁꠘ ꠄꠇꠈꠣꠘꠅ ꠞꠅꠀꠞ ꠇꠣꠟꠅ ꠎꠥꠖꠤ ꠛꠤꠀꠔꠤ ꠇꠥꠘꠥ ꠜꠣꠁ ꠝꠞꠤꠎꠣꠄ, ꠀꠞ ꠔꠣꠞ ꠇꠥꠘꠥ ꠙꠥꠀꠂꠘ ꠘꠣ ꠕꠣꠇꠦ, ꠔꠦ ꠔꠣꠞ ꠠꠣꠠꠤ ꠛꠃꠄ ꠔꠣꠁꠞ ꠖꠦꠅꠞ ꠍꠣꠠꠣ ꠖꠥꠍꠞꠣ ꠇꠦꠃꠞꠞ ꠉꠦꠍꠦ ꠛꠤꠀ ꠛꠁꠔ ꠙꠣꠞꠔ ꠘꠣꠄ। ꠔꠣꠁꠞ ꠖꠦꠅꠞꠦ ꠔꠣꠁꠞꠦ ꠛꠤꠀ ꠇꠞꠤꠀ ꠔꠣꠞ ꠃꠙꠞꠦ ꠛꠞ꠆ꠔꠣꠁꠟ ꠖꠣꠄꠁꠔ꠆ꠔ ꠀꠖꠣꠄ ꠇꠞꠛ। 6 ꠔꠣꠞꠣꠞ ꠙꠄꠟꠣ ꠙꠥꠀꠞ ꠎꠘꠝ ꠅꠁꠟꠦ, ꠁ ꠙꠥꠀ ꠅꠃ ꠝꠞꠣ ꠜꠣꠁꠞ ꠅꠀꠞꠤꠡ ꠢꠤꠡꠣꠛꠦ ꠉꠁꠘ꠆ꠘ ꠅꠁꠛ, ꠔꠦꠃ ꠅꠃ ꠜꠣꠁꠞ ꠘꠣꠝ ꠛꠘꠤ ꠁꠍꠞꠣꠁꠟ ꠕꠣꠇꠤ ꠝꠥꠍꠤ ꠎꠣꠁꠔ ꠘꠣꠄ। 7 ꠅꠁꠟꠦ ꠔꠣꠁꠞ ꠖꠦꠅꠞꠦ ꠎꠥꠖꠤ ꠔꠣꠁꠞꠦ ꠛꠤꠀ ꠇꠞꠔ ꠞꠣꠎꠤ ꠘꠣ ꠅꠄ, ꠔꠦ ꠔꠣꠁ ꠢꠃ ꠉꠣꠃ ꠛꠣ ꠐꠣꠃꠘꠞ ꠙꠣꠁꠘ꠆ꠌꠣꠁꠔꠞ ꠉꠦꠍꠦ ꠉꠤꠀ ꠢꠘꠞ ꠝꠥꠞꠛ꠆ꠛꠤ ꠅꠇꠟꠞꠦ ꠇꠁꠛ, ꠀꠝꠣꠞ ꠖꠦꠅꠞꠦ ꠀꠝꠣꠞꠦ ꠛꠤꠀ ꠇꠞꠔ ꠞꠣꠎꠤ ꠘꠣꠄ, ꠢꠦ ꠔꠣꠞ ꠝꠞꠣ ꠜꠣꠁꠞ ꠘꠣꠝ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠎꠤꠘ꠆ꠖꠣ ꠞꠣꠈꠔ ꠌꠣꠄ ꠘꠣ। ꠀꠝꠣꠞ ꠛꠦꠙꠣꠞꠦ ꠔꠣꠞ ꠃꠙꠞꠦ ꠛꠞ꠆ꠔꠣꠁꠟ ꠖꠣꠄ-ꠖꠣꠄꠁꠔ꠆ꠔ ꠀꠖꠣꠄ ꠇꠞꠦꠞ ꠘꠣ। 8 ꠔꠦꠃ ꠢꠃ ꠝꠥꠞꠛ꠆ꠛꠤ ꠅꠇꠟꠦ ꠔꠣꠞꠦ ꠀꠘꠣꠁꠀ ꠛꠥꠎꠣꠁꠛꠣ, ꠄꠞꠛꠣꠖꠦꠅ ꠢꠦ ꠘꠤꠇꠣ ꠇꠞꠔꠦ ꠞꠣꠎꠤ ꠘꠣ ꠅꠁꠟꠦ, 9 ꠅꠃ ꠠꠣꠠꠤ ꠛꠦꠐꠤꠄ ꠢꠃ ꠝꠥꠞꠛ꠆ꠛꠤ ꠅꠇꠟꠞ ꠍꠣꠝꠘꠦ, ꠔꠣꠞ ꠇꠣꠍꠣꠔ ꠉꠤꠀ ꠔꠣꠞ ꠙꠣꠅꠞ ꠄꠇꠈꠣꠘ ꠎꠥꠔꠣ ꠘꠤꠎꠦ ꠈꠥꠟꠤꠀ ꠘꠤꠛꠉꠤ, ꠀꠞ ꠔꠣꠞ ꠝꠥꠈꠅ ꠍꠦꠚ ꠚꠣꠟꠣꠁꠀ ꠇꠁꠛ, ꠀꠙꠘ ꠜꠣꠁꠞ ꠛꠋꠡ ꠎꠦꠉꠤꠄ ꠛꠣꠌꠣꠁꠔ ꠌꠣꠄ ꠘꠣ, ꠅꠉꠥꠞ ꠖꠡꠣ ꠅꠟꠣ ꠅꠃꠇ। 10 ꠛꠣꠖꠦ ꠅꠃ ꠛꠦꠐꠣꠞ ꠛꠋꠡꠞꠦ ꠛꠘꠤ ꠁꠍꠞꠣꠁꠟꠞ ꠝꠣꠎꠦ, ꠎꠥꠔꠣ ꠀꠞꠣꠅꠀꠞꠣꠞ ꠛꠋꠡ ꠘꠣꠝꠦ ꠒꠣꠇꠣ ꠅꠁꠛ।

11 “ꠖꠥꠁ ꠛꠦꠐꠣꠄ ꠝꠣꠞꠣ-ꠝꠣꠞꠤꠞ ꠇꠣꠟꠅ ꠎꠥꠖꠤ, ꠄꠇꠎꠘꠞ ꠛꠃ ꠉꠤꠀ ꠔꠣꠁꠞ ꠎꠣꠝꠣꠁꠞꠦ ꠢꠃ ꠛꠦꠐꠣꠞ ꠀꠔ ꠕꠣꠇꠤ ꠛꠣꠌꠣꠘꠤꠞ ꠘꠤꠅꠔꠦ, ꠢꠃ ꠛꠦꠐꠣꠞ ꠙꠥꠞꠥꠡꠣꠟꠤ ꠘꠚꠍꠅ ꠌꠤꠙꠤꠀ ꠗꠞꠦ, 12 ꠔꠦ ꠔꠥꠝꠞꠣ ꠢꠃ ꠛꠦꠐꠤꠞ ꠀꠔ ꠇꠣꠐꠤꠀ ꠚꠣꠟꠣꠁ ꠖꠤꠅ। ꠔꠣꠁꠞꠦ ꠇꠥꠘꠥ ꠖꠄꠀ ꠇꠞꠤꠅ ꠘꠣ।

13 “ꠝꠣꠙꠅ ꠐꠉꠤꠛꠣꠞ ꠟꠣꠉꠤ ꠔꠥꠝꠞꠣꠞ ꠕꠟꠤꠞ ꠝꠣꠎꠦ ꠄꠇꠁ ꠝꠣꠙꠞ ꠢꠥꠞꠥ-ꠛꠠ ꠖꠥꠁ ꠙꠣꠔ꠆ꠔꠞ ꠞꠣꠈꠤꠅ ꠘꠣ। 14 ꠔꠥꠝꠞꠣꠞ ꠊꠞꠅ ꠄꠇꠁ ꠝꠣꠙꠞ ꠢꠥꠞꠥ-ꠛꠠ ꠖꠥꠁꠐꠣ ꠢꠦꠞ-ꠙꠦꠐꠥ ꠞꠣꠈꠤꠅ ꠘꠣ। 15 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠞꠣ, ꠢꠘꠅ ꠟꠣꠝ꠆ꠛꠣ ꠢꠣꠄꠀꠔꠤ ꠙꠣꠁꠛꠣꠞ ꠟꠣꠉꠤ, ꠔꠥꠝꠞꠣꠞ ꠝꠣꠙꠤꠛꠣꠞ ꠙꠣꠔ꠆ꠔꠞ ꠀꠞ ꠢꠦꠞ-ꠙꠦꠐꠥꠞ ꠃꠎꠘ ꠡꠑꠤꠇ ꠞꠣꠈꠤꠅ। 16 ꠇꠣꠞꠘ ꠎꠦꠉꠤꠄ ꠝꠣꠙꠞ ꠝꠣꠎꠦ ꠐꠉꠣ-ꠐꠉꠤ ꠇꠞꠦ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠞꠦ ꠊꠤꠘ ꠇꠞꠂꠘ।

17 “ꠝꠤꠡꠞ ꠖꠦꠡ ꠕꠣꠇꠤ ꠔꠥꠝꠞꠣ ꠛꠣꠞ ꠅꠁꠀ ꠀꠁꠛꠣꠞ ꠙꠕꠅ, ꠀꠝꠣꠟꠦꠇꠤ ꠅꠇꠟꠦ ꠔꠥꠝꠞꠣꠞ ꠟꠉꠦ ꠎꠦ ꠛꠦꠛꠢꠣꠞ ꠇꠞꠍꠤꠟ, ꠁꠔꠣ ꠚꠣꠃꠞꠤꠅ ꠘꠣ। 18 ꠀꠐꠤꠔꠦ ꠀꠐꠤꠔꠦ ꠔꠥꠝꠞꠣꠞ ꠇꠦꠃ ꠇꠦꠃ ꠎꠦꠛꠟꠣ ꠢꠦꠞꠣꠘ ꠅꠁꠀ ꠙꠤꠍꠦ ꠙꠠꠤ ꠉꠦꠍꠤꠟ, ꠅꠃ ꠡꠝꠄ ꠀꠝꠣꠟꠦꠇꠤ ꠅꠇꠟꠦ ꠀꠁꠀ ꠢꠣꠝꠟꠣ ꠇꠞꠍꠤꠟ, ꠔꠣꠞꠣ ꠔ ꠀꠟ꠆ꠟꠣꠞꠦꠅ ꠒꠞꠣꠁꠍꠦ ꠘꠣ। 19 ꠔꠥꠝꠞꠣꠞ ꠀꠟ꠆ꠟꠣ ꠝꠣꠛꠥꠖꠦ ꠔꠥꠝꠞꠣꠞꠦ ꠎꠦ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠞꠣ, ꠢꠃ ꠖꠦꠡꠞ ꠀꠡ-ꠙꠣꠡꠞ ꠖꠥꠡꠝꠘ ꠅꠇꠟ ꠕꠣꠇꠤ ꠔꠣꠁꠘ ꠎꠦꠛꠟꠣ ꠔꠥꠝꠞꠣꠞꠦ ꠡꠣꠘ꠆ꠔꠤ ꠖꠤꠛꠣ, ꠢꠃ ꠡꠝꠄ ꠔꠥꠝꠞꠣ ꠖꠥꠘꠤꠀ ꠕꠣꠇꠤ ꠀꠝꠣꠟꠦꠇꠤ ꠅꠇꠟꠞ ꠘꠣꠝ ꠝꠤꠐꠣꠁꠟꠤꠛꠣꠄ। ꠁ ꠢꠥꠇꠥꠝ ꠈꠣꠘ ꠔꠥꠝꠞꠣ ꠇꠥꠘꠥ ꠖꠤꠘꠃ ꠚꠣꠃꠞꠤꠅ ꠘꠣ।