1 “ꠅ ꠛꠘꠤ ꠁꠍꠞꠣꠁꠟ ꠢꠥꠘꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠞꠣ, ꠔꠥꠝꠞꠣ ꠎꠦꠛꠟꠣ ꠢꠃ ꠖꠦꠡꠞ ꠖꠈꠟ ꠙꠣꠁꠀ ꠢꠘꠅ ꠛꠡꠔꠤ ꠇꠞꠛꠣꠄ, 2 ꠅꠃ ꠡꠝꠄ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠖꠦꠅꠀ ꠎꠝꠤꠘꠞ ꠢꠇꠟ ꠎꠣꠔꠞ ꠚꠡꠟ ꠕꠣꠇꠤ, ꠙꠄꠟꠣ ꠙꠣꠅꠀ ꠚꠡꠟꠞ ꠄꠇꠐꠣ ꠅꠋꠡ ꠄꠇ ꠐꠥꠇꠞꠤꠔ ꠜꠞꠤꠀ ꠀꠟꠉꠣꠁꠀ ꠕꠁꠅ। ꠀꠞ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠘꠤꠎꠞ ꠛꠣꠄꠔꠥꠟ꠆ꠟꠣ ꠡꠞꠤꠚ ꠢꠤꠡꠣꠛꠦ ꠎꠦ ꠎꠣꠉꠣꠞꠦ ꠙꠍꠘ꠆ꠖ ꠇꠞꠛꠣ, ꠅꠃ ꠚꠡꠟ ꠟꠁꠀ ꠢꠘꠅ ꠎꠣꠁꠅ। 3 ꠉꠤꠀ ꠢꠘꠅ ꠀꠎꠤꠞ ꠁꠝꠣꠝ ꠍꠣꠛꠞꠦ ꠇꠁꠅ, ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠉꠦꠍꠦ ꠇꠍꠝ ꠈꠣꠁꠀ ꠎꠦ ꠖꠦꠡꠈꠣꠘ ꠖꠤꠛꠣꠞ ꠅꠀꠖꠣ ꠇꠞꠍꠟꠣ, ꠀꠝꠞꠣ ꠅꠈꠘ ꠅꠘꠅ ꠀꠁꠍꠤ, ꠀꠁꠀ ꠔꠣꠘ ꠍꠣꠝꠘꠦ ꠀꠎꠤꠞ ꠅꠁꠍꠤ। 4 ꠔꠦꠃ ꠁꠝꠣꠝ ꠍꠣꠛꠦ ꠔꠥꠝꠞꠣꠞ ꠀꠔ ꠕꠣꠇꠤ ꠚꠟꠞ ꠐꠥꠇꠞꠤ ꠘꠤꠀ ꠀꠟ꠆ꠟꠣ ꠝꠣꠛꠥꠖꠞ ꠇꠥꠞꠛꠣꠘꠤ ꠈꠣꠘꠣꠞ ꠍꠣꠝꠘꠦ ꠕꠁꠛꠣ। 5 ꠛꠣꠖꠦ ꠔꠥꠝꠞꠣ ꠙꠞꠔꠦꠇꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠃꠛꠣꠁꠀ ꠇꠁꠅ, ꠀꠝꠞꠣꠞ ꠈꠣꠘ꠆ꠖꠣꠘꠞ ꠝꠥꠟ ꠝꠥꠞꠛ꠆ꠛꠤ ꠢꠎꠞꠔ ꠁꠀꠇꠥꠛ ꠀꠍꠟꠣ ꠄꠇꠎꠘ ꠅꠞꠣꠝꠤ ꠝꠥꠍꠣꠚꠤꠞ, ꠔꠣꠁꠘ ꠕꠥꠠꠣ ꠇꠄꠎꠘ ꠝꠣꠘꠡꠞꠦ ꠟꠉꠦ ꠟꠁꠀ ꠝꠤꠡꠞ ꠖꠦꠡꠅ ꠉꠦꠍꠟꠣꠉꠤ। ꠉꠤꠀ ꠝꠤꠡꠞ ꠖꠦꠡꠅ ꠝꠥꠍꠣꠚꠤꠞ ꠢꠣꠟꠔꠦ ꠛꠡꠔ ꠇꠞꠣꠞ ꠇꠣꠟꠅ ꠔꠣꠘ ꠃꠍꠤꠟ꠆ꠟꠣꠄ ꠔꠣꠞꠣ ꠄꠇ ꠝꠢꠣꠘ ꠎꠣꠔꠤ, ꠀꠞ ꠛꠃꠔ ꠛꠠ ꠛꠟꠀꠟꠣ ꠎꠣꠔꠤ ꠛꠘꠟꠣ। 6 ꠛꠣꠖꠦ ꠝꠤꠡꠞꠞ ꠝꠣꠘꠡꠦ ꠀꠝꠞꠣꠞ ꠟꠉꠦ ꠛꠎ꠆ꠎꠣꠔꠤ ꠇꠞꠟꠣ, ꠀꠝꠞꠣꠞꠦ ꠖꠥꠈ-ꠇꠡ꠆ꠐ ꠖꠤꠀ, ꠀꠝꠞꠣꠞꠦꠖꠤ ꠇꠑꠤꠘ ꠉꠥꠟꠣꠝꠤ ꠇꠞꠣꠁꠟ। 7 ꠀꠝꠞꠣ ꠖꠥꠈ ꠙꠣꠁꠀ ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠝꠣꠛꠥꠖ ꠀꠟ꠆ꠟꠣꠞ ꠖꠞꠛꠣꠞꠅ ꠇꠣꠘ꠆ꠖꠤꠟꠣꠝ। ꠔꠦꠃ ꠝꠣꠛꠥꠖꠦ ꠀꠝꠞꠣꠞ ꠚꠞꠤꠀꠖ ꠢꠥꠘꠤꠀ, ꠀꠝꠞꠣꠞ ꠖꠥꠈ-ꠇꠡ꠆ꠐ, ꠇꠑꠤꠘ ꠉꠥꠟꠣꠝꠤ, ꠀꠞ ꠀꠝꠞꠣꠞ ꠃꠙꠞꠞ ꠎꠥꠟꠥꠝꠞ ꠛꠣꠄ ꠘꠎꠞ ꠖꠤꠟꠣ। 8 ꠀꠞ ꠔꠣꠘ ꠛꠟꠀꠟꠣ-ꠝꠎꠛꠥꠔ ꠀꠔ ꠛꠣꠠꠣꠁꠀ, ꠈꠥꠛ ꠒꠞ-ꠈꠚ ꠖꠦꠈꠣꠁꠀ, ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠤꠀ ꠀꠞ ꠀꠌꠣꠘꠇ ꠉꠎꠛ ꠓꠣꠟꠤꠀ ꠝꠤꠡꠞ ꠖꠦꠡ ꠕꠣꠇꠤ ꠀꠝꠞꠣꠞꠦ ꠛꠣꠞ ꠇꠞꠤ ꠀꠘꠟꠣ। 9 ꠔꠣꠁꠘꠃ ꠀꠝꠞꠣꠞꠦ ꠅꠃ ꠖꠦꠡꠅ ꠀꠘꠍꠂꠘ, ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠀꠞꠣꠝꠞ ꠅꠃ ꠖꠦꠡ ꠀꠝꠞꠣꠞꠦ ꠖꠣꠘ ꠇꠞꠍꠂꠘ। 10 ꠄꠞꠟꠣꠉꠤ ꠅ ꠀꠝꠞꠣꠞ ꠝꠣꠛꠥꠖ, ꠔꠥꠝꠣꠞ ꠖꠦꠅꠀ ꠎꠝꠤꠘꠞ ꠚꠡꠟꠞ ꠙꠄꠟꠣ ꠛꠣꠐ ꠟꠁꠀ ꠀꠝꠤ ꠔꠥꠝꠣꠞ ꠍꠣꠝꠘꠦ ꠀꠎꠤꠞ ꠅꠁꠍꠤ। ꠅꠈꠣꠘ ꠇꠁꠀ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠅꠃ ꠐꠥꠇꠞꠤ ꠕꠁꠅ, ꠕꠁꠀ ꠔꠣꠘꠞꠦ ꠍꠁꠎꠖꠣ ꠇꠞꠤꠅ। 11 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠀꠞ ꠔꠥꠝꠞꠣꠞ ꠙꠞꠤꠛꠣꠞꠞꠦ ꠎꠔ ꠘꠝꠥꠘꠣꠞ ꠜꠣꠟꠣꠁ ꠇꠞꠍꠂꠘ, ꠅꠔꠣ ꠝꠘꠅ ꠇꠞꠤꠀ ꠔꠥꠝꠞꠣ ꠘꠤꠎꠦ, ꠟꠦꠛꠤ ꠈꠣꠘ꠆ꠖꠣꠘꠞ ꠢꠇꠟꠦ, ꠀꠞ ꠔꠥꠝꠞꠣꠞ ꠟꠉꠦ ꠞꠅꠞꠣ ꠛꠤꠖꠦꠡꠤ ꠝꠥꠍꠣꠚꠤꠞ ꠅꠇꠟꠦ ꠈꠥꠡꠤ-ꠛꠣꠡꠤ ꠇꠞꠤꠅ।

12 “ꠙꠞꠔꠤ ꠔꠤꠘ ꠛꠍꠞ ꠛꠣꠖꠦ ꠛꠣꠖꠦ ꠔꠥꠝꠞꠣ ꠚꠄ-ꠚꠡꠟꠞ ꠖꠡ ꠛꠣꠐꠞ ꠄꠇ ꠛꠣꠐ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠞꠦ, ꠛꠤꠖꠦꠡꠤ ꠝꠥꠍꠣꠚꠤꠞ ꠅꠇꠟꠞꠦ, ꠄꠔꠤꠝ ꠀꠞ ꠠꠣꠠꠤ ꠛꠦꠐꠤꠘ꠆ꠔꠞ ꠝꠣꠎꠦ ꠛꠤꠟꠣꠁ ꠖꠤꠅ। ꠔꠦꠃ ꠄꠞꠣ ꠙꠦꠐ ꠜꠞꠤ ꠈꠣꠁꠀ ꠔꠥꠝꠞꠣꠞ ꠖꠦꠡꠞ ꠝꠣꠎꠦ ꠀꠞꠣꠝꠦ ꠞꠁꠛꠣ। ꠄꠞꠟꠣꠉꠤ ꠁꠇꠐꠣꠞ ꠘꠣꠝ ꠅꠁꠟ ꠖꠡꠝꠣꠋꠡꠞ ꠛꠍꠞ।*26:12 ꠀꠍꠟꠦ ꠚꠡꠟꠞ ꠖꠡ ꠛꠣꠐꠞ ꠄꠇ ꠛꠣꠐ ꠙꠞꠔꠤ ꠛꠍꠞ ꠖꠦꠅꠀ ꠅꠄ, ꠅꠁꠟꠦ ꠅꠃ ꠔꠤꠘ ꠛꠍꠞ ꠛꠣꠖꠦ ꠛꠣꠖꠦ ꠅꠃ ꠖꠡꠝꠣꠋꠡꠞ ꠛꠍꠞ ꠅꠁꠟ ꠄꠇꠐꠣ ꠛꠤꠡꠦꠡ ꠘꠤꠅꠝ। 13 ꠛꠣꠖꠦ ꠔꠥꠝꠞꠣ ꠙꠞꠔꠦꠇꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠇꠁꠅ, ꠝꠣꠛꠥꠖ, ꠀꠝꠤ ꠔꠥꠝꠣꠞ ꠢꠥꠇꠥꠝ ꠝꠣꠚꠤꠇ ꠀꠝꠣꠞ ꠞꠥꠎꠤꠞ ꠙꠛꠤꠔ꠆ꠞ ꠛꠣꠐꠞꠦ, ꠀꠝꠣꠞ ꠊꠞ ꠕꠣꠇꠤ ꠘꠤꠀ ꠟꠦꠛꠤ ꠈꠣꠘ꠆ꠖꠣꠘꠞꠦ, ꠝꠥꠍꠣꠚꠤꠞ ꠅꠇꠟꠞꠦ, ꠄꠔꠤꠝ ꠀꠞ ꠠꠣꠠꠤ ꠛꠦꠐꠤꠘ꠆ꠔꠞꠦ ꠛꠤꠟꠣꠁ ꠖꠤꠍꠤ। ꠀꠝꠤ ꠔꠥꠝꠣꠞ ꠇꠥꠘꠥ ꠢꠥꠇꠥꠝꠞ ꠈꠦꠟꠣꠚ ꠇꠞꠍꠤ ꠘꠣ, ꠛꠣ ꠚꠣꠃꠞꠤꠍꠤ ꠘꠣ। 14 ꠝꠥꠞ꠆ꠖꠣꠞ ꠟꠣꠉꠤ ꠇꠣꠘ꠆ꠖꠣ-ꠇꠣꠐꠤ ꠀꠞ ꠀꠢꠣꠎꠣꠞꠤ ꠇꠞꠣꠞ ꠡꠝꠄ ꠀꠝꠤ ꠅꠃ ꠙꠛꠤꠔ꠆ꠞ ꠅꠋꠡꠞ ꠇꠥꠘꠥꠔꠣ ꠈꠣꠁꠍꠤ ꠘꠣ, ꠛꠣ ꠘꠣꠙꠣꠇ ꠢꠣꠟꠔꠦ ꠁꠔꠣ ꠛꠣꠠꠤꠞ ꠛꠣꠞꠦ ꠘꠤꠍꠤ ꠘꠣ, ꠀꠞ ꠁꠔꠣꠞ ꠇꠥꠘꠥ ꠅꠋꠡ ꠝꠥꠞ꠆ꠖꠣꠞ ꠘꠣꠝꠦ ꠖꠣꠘ-ꠈꠄꠞꠣꠔꠅ ꠇꠞꠍꠤ ꠘꠣ। ꠀꠝꠤ ꠀꠝꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠌꠟꠍꠤ, ꠔꠥꠝꠣꠞ ꠢꠥꠇꠥꠝ ꠝꠣꠚꠤꠇ ꠢꠇꠟ ꠇꠣꠝ ꠇꠞꠍꠤ। 15 ꠅꠈꠘ, ꠅ ꠝꠣꠛꠥꠖ, ꠔꠥꠝꠣꠞ ꠙꠛꠤꠔ꠆ꠞ ꠛꠡꠔ ꠈꠣꠘꠣ ꠕꠣꠇꠤ, ꠔꠥꠝꠣꠞ ꠀꠞꠡꠦ-ꠀꠎꠤꠝ ꠕꠣꠇꠤ ꠔꠟꠦꠖꠤ ꠌꠣꠁꠀ ꠖꠦꠈꠅ, ꠀꠞ ꠔꠥꠝꠣꠞ ꠈꠣꠍ ꠙ꠆ꠞꠎꠣ ꠛꠘꠤ ꠁꠍꠞꠣꠁꠟꠞꠦ ꠞꠢꠝ-ꠛꠞꠇꠔ ꠖꠦꠅ। ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠟꠉꠦ ꠇꠍꠝ ꠇꠞꠣ ꠅꠀꠖꠣ ꠝꠣꠚꠤꠇ, ꠔꠥꠝꠤ ꠀꠝꠞꠣꠞꠦ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠅꠃ ꠎꠦ ꠖꠦꠡꠈꠣꠘ ꠖꠣꠘ ꠇꠞꠍ, ꠄꠞ ꠝꠣꠐꠤꠔ ꠔꠥꠝꠤ ꠞꠢꠝ-ꠛꠞꠇꠔ ꠘꠣꠎꠤꠟ ꠇꠞꠅ।

16 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠀꠁꠎ ꠔꠥꠝꠞꠣꠞꠦ ꠅꠃ ꠢꠥꠇꠥꠝ ꠖꠤꠞꠣ, ꠔꠥꠝꠞꠣ ꠔꠣꠘ ꠛꠣꠔꠣꠁꠟ ꠘꠤꠅꠝ-ꠇꠣꠘꠥꠘ ꠀꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠌꠟꠤꠅ। ꠔꠥꠝꠞꠣ ꠖꠤꠟꠦ-ꠎꠣꠘꠦ ꠀꠡꠤꠇ ꠛꠘꠤꠀ ꠁꠔꠣ ꠀꠝꠟ ꠇꠞꠤꠅ। 17 ꠔꠥꠝꠞꠣ ꠔ ꠀꠁꠎ ꠡ꠆ꠛꠤꠇꠣꠞ ꠇꠞꠍ, ꠅꠃ ꠀꠟ꠆ꠟꠣꠃ ꠅꠁꠟꠣ ꠔꠥꠝꠞꠣꠞ ꠝꠣꠛꠥꠖ, ꠔꠥꠝꠞꠣ ꠔꠣꠘ ꠙꠕꠦ ꠌꠟꠛꠣꠄ, ꠔꠣꠘ ꠢꠥꠇꠥꠝ-ꠀꠢꠇꠣꠝ, ꠔꠣꠘ ꠡꠞꠤꠅꠔ ꠀꠞ ꠘꠤꠅꠝ-ꠇꠣꠘꠥꠘ ꠝꠣꠘꠛꠣꠄ, ꠔꠣꠘ ꠇꠕꠣ ꠢꠥꠘꠛꠣꠄ। 18 ꠄꠞꠟꠣꠉꠤ ꠝꠣꠛꠥꠖꠦꠅ ꠀꠁꠎ ꠡ꠆ꠛꠤꠇꠣꠞ ꠇꠞꠍꠂꠘ, ꠔꠣꠘ ꠅꠀꠖꠣ ꠝꠣꠚꠤꠇ ꠔꠥꠝꠞꠣ ꠅꠈꠘ ꠔꠣꠘ ꠙ꠆ꠞꠎꠣ, ꠔꠥꠝꠞꠣꠃ ꠔꠣꠘ ꠈꠣꠍ ꠡꠝ꠆ꠙꠖ, ꠔꠥꠝꠞꠣ ꠔꠣꠘ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠛꠣꠄ। 19 ꠔꠣꠁꠘ ꠀꠞꠅ ꠇꠁꠞꠣ, ꠔꠣꠘ ꠙꠄꠖꠣ ꠇꠞꠣ ꠔꠣꠝꠣꠝ ꠎꠣꠔꠤꠞ ꠃꠙꠞꠦ ꠔꠥꠝꠞꠣꠞꠦ ꠛꠠ ꠇꠞꠛꠣ। ꠔꠥꠝꠞꠣꠞ ꠁꠎ꠆ꠎꠔ, ꠡꠥꠘꠣꠝ ꠀꠞ ꠔꠣꠞꠤꠚ, ꠢꠇꠟ ꠎꠣꠔꠤꠞ ꠃꠙꠞꠦ ꠞꠁꠛ। ꠔꠣꠘ ꠅꠀꠖꠣ ꠝꠣꠚꠤꠇ ꠔꠥꠝꠞꠣ ꠅꠁꠛꠣꠄ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠄꠇ ꠙꠛꠤꠔ꠆ꠞ ꠙ꠆ꠞꠎꠣ।”