1 ꠝꠥꠍꠣ ꠘꠛꠤꠄ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠞꠦ ꠟꠁꠀ ꠝꠣꠘꠡꠞꠦ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠀꠁꠎ ꠎꠦꠔꠣ ꠎꠦꠔꠣ ꠢꠥꠇꠥꠝ ꠖꠤꠞꠣꠝ, ꠔꠥꠝꠞꠣ ꠁꠔꠣ ꠙꠥꠞꠣꠙꠥꠞ ꠀꠝꠟ ꠇꠞꠤꠅ। 2 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡ ꠖꠣꠘ ꠇꠞꠞꠣ, ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠢꠣꠞꠤ ꠔꠥꠝꠞꠣ ꠎꠦꠛꠟꠣ ꠢꠃ ꠖꠦꠡꠅ ꠎꠣꠁꠛꠣꠄ, ꠎꠣꠅꠀꠞ ꠛꠣꠖꠦ ꠇꠁꠄꠇꠐꠣ ꠛꠠ ꠛꠠ ꠙꠣꠔ꠆ꠔꠞ ꠈꠣꠠꠣ ꠇꠞꠤ ꠢꠣꠎꠣꠁꠀ, ꠁꠔꠣꠞꠦ ꠌꠥꠘꠣ ꠖꠤꠀ ꠙꠣꠇꠣ ꠇꠞꠤꠅ। 3 ꠀꠞ ꠅꠔꠣꠞ ꠃꠙꠞꠦ ꠅꠃ ꠔꠃꠞꠣꠔꠞ ꠔꠣꠝꠣꠝ ꠢꠥꠇꠥꠝ-ꠀꠢꠇꠣꠝ ꠟꠦꠈꠤꠅ। ꠛꠥꠎꠞꠣꠄ ꠘꠤ, ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠝꠣꠛꠥꠖ ꠀꠟ꠆ꠟꠣꠄ, ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠎꠦ ꠖꠦꠡꠈꠣꠘ ꠔꠥꠝꠞꠣꠞꠦ ꠖꠤꠛꠣꠞ ꠅꠀꠖꠣ ꠇꠞꠍꠂꠘ, ꠁꠘ ꠕꠣꠇꠤ ꠢꠃ ꠖꠦꠡꠅ ꠉꠤꠀ ꠢꠣꠞꠟꠦ, 4 ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠁꠛꠣꠟ ꠙꠣꠠꠞ ꠃꠙꠞꠦ ꠃꠑꠤꠀ, ꠀꠝꠣꠞ ꠛꠣꠔꠣꠁꠟ ꠀꠁꠎꠇꠥꠞ ꠢꠥꠇꠥꠝ ꠝꠣꠚꠤꠇ ꠔꠥꠝꠞꠣ ꠢꠃ ꠙꠣꠔ꠆ꠔꠞ ꠅꠇꠟ ꠢꠣꠎꠣꠁꠀ ꠈꠣꠠꠣ ꠇꠞꠤꠅ, ꠀꠞ ꠁꠔꠣꠞꠦ ꠌꠥꠘꠣ ꠖꠤꠀ ꠙꠣꠇꠣ ꠇꠞꠤꠅ। 5 ꠀꠞ ꠢꠘꠅ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠙꠣꠔ꠆ꠔꠞꠖꠤ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠅ। ꠅꠃ ꠙꠣꠔ꠆ꠔꠞꠞ ꠝꠣꠎꠦ ꠟꠥꠀꠞ ꠇꠥꠘꠥ ꠀꠔꠤꠀꠞ ꠟꠣꠉꠣꠁꠅ ꠘꠣ। 6 ꠀꠡ꠆ꠔꠣ ꠀꠡ꠆ꠔꠣ ꠙꠣꠔ꠆ꠔꠞ ꠖꠤꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠅꠃ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠅ, ꠛꠣꠘꠣꠁꠀ ꠄꠞ ꠃꠙꠞꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠅ। 7 ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠅ ꠀꠖꠣꠄ ꠇꠞꠤꠅ। ꠅꠃ ꠇꠥꠞꠛꠣꠘꠤꠞ ꠉꠥꠡ꠆ꠔ ꠈꠣꠁꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠈꠥꠡꠤ-ꠛꠣꠡꠤ ꠇꠞꠤꠅ। 8 ꠀꠞ ꠌꠥꠘꠣ ꠟꠦꠙꠣ ꠢꠃ ꠙꠣꠔ꠆ꠔꠞꠞ ꠃꠙꠞꠦ ꠔꠃꠞꠣꠔꠞ ꠅꠃ ꠢꠥꠇꠥꠝ-ꠀꠢꠇꠣꠝ ꠅꠇꠟ ꠈꠥꠛ ꠡꠥꠘ꠆ꠖꠞ ꠇꠞꠤ ꠟꠦꠈꠤꠅ।”

9 ꠛꠣꠖꠦ ꠝꠥꠍꠣ ꠘꠛꠤꠄ ꠟꠦꠛꠤ ꠈꠣꠘ꠆ꠖꠣꠘꠞ ꠁꠝꠣꠝ ꠅꠇꠟꠞꠦ ꠟꠁꠀ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠇꠁꠟꠣ, “ꠅ ꠛꠘꠤ ꠁꠍꠞꠣꠁꠟ, ꠘꠤꠞꠣꠁ ꠅꠅ, ꠀꠞ ꠀꠝꠣꠞ ꠇꠕꠣ ꠢꠥꠘꠅ, ꠅꠈꠘ ꠔ ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠈꠣꠍ ꠙ꠆ꠞꠎꠣ ꠛꠘꠤꠉꠦꠍ। 10 ꠔꠦ ꠔꠥꠝꠞꠣ ꠔꠣꠘ ꠢꠥꠇꠥꠝꠦ ꠌꠟꠤꠅ, ꠀꠞ ꠀꠝꠤ ꠀꠁꠎ ꠎꠦꠔꠣ ꠘꠤꠅꠝ-ꠇꠣꠘꠥꠘ, ꠢꠥꠇꠥꠝ-ꠀꠢꠇꠣꠝ ꠎꠣꠘꠣꠁꠟꠣꠝ, ꠁꠔꠣ ꠀꠝꠟ ꠇꠞꠤꠅ।”

11 ꠝꠥꠍꠣ ꠘꠛꠤꠄ ꠅꠃ ꠖꠤꠘ ꠝꠣꠘꠡꠞꠦ ꠢꠥꠇꠥꠝ ꠖꠤꠟꠣ, ꠇꠁꠟꠣ, 12 “ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠢꠣꠞꠟꠦ ꠅꠃ ꠡꠝꠄ ꠡꠤꠝꠤꠅꠘ, ꠟꠦꠛꠤ, ꠄꠢꠥꠖꠣ, ꠁꠍꠣꠈꠞ, ꠁꠃꠍꠥꠚ, ꠀꠞ ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠝꠣꠘꠥꠡ ꠅꠇꠟ ꠉꠤꠀ ꠘꠦꠇ ꠖꠥꠀꠞ ꠘꠤꠡꠣꠘꠣ ꠢꠤꠡꠣꠛꠦ ꠉꠞꠤꠍꠤꠝ ꠙꠣꠠꠞ ꠃꠙꠞꠦ ꠃꠑꠤꠅ। 13 ꠀꠞ ꠛꠖ꠆ꠖꠥꠀꠞ ꠘꠤꠡꠣꠘꠣ ꠢꠤꠡꠣꠛꠦ ꠞꠥꠛꠦꠘ, ꠍꠣꠖꠥ, ꠀꠡꠤꠞ, ꠍꠛꠥꠟꠘ, ꠖꠣꠘ ꠀꠞ ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠝꠣꠘꠥꠡ ꠉꠤꠀ ꠁꠛꠣꠟ ꠙꠣꠠꠞ ꠃꠙꠞꠦ ꠃꠑꠤꠅ। 14 ꠛꠣꠖꠦ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠥꠡ ꠅꠇꠟ ꠃꠛꠣꠁꠀ, ꠛꠘꠤ ꠁꠍꠞꠣꠁꠟꠞ ꠔꠣꠝꠣꠝ ꠝꠣꠘꠡꠞꠦ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠛꠣꠄ,

15 “ꠎꠦ ꠝꠣꠘꠡꠦ ꠟꠣꠇꠠꠤ ꠛꠣ ꠙꠣꠔ꠆ꠔꠞ ꠈꠥꠖꠤꠀ, ꠡꠥꠘꠣ-ꠞꠥꠙꠣ ꠛꠣ ꠙꠤꠔꠟ ꠉꠟꠣꠁꠀ ꠇꠥꠘꠥ ꠝꠥꠞ꠆ꠔꠤ ꠛꠣꠘꠣꠄ, ꠀꠞ ꠙꠥꠎꠣ ꠇꠞꠣꠞ ꠘꠤꠅꠔꠦ ꠅꠉꠥꠞꠦ ꠘꠤꠀ ꠟꠥꠇꠣꠁꠟ ꠎꠣꠉꠣꠔ ꠕꠄ, ꠢꠦ ꠔ ꠟꠣꠘ꠆ꠘꠔꠤ। ꠁ ꠝꠥꠞ꠆ꠔꠤꠞꠦ ꠔ ꠝꠣꠛꠥꠖꠦ ꠊꠤꠘ ꠇꠞꠂꠘ, ꠁꠔꠣ ꠈꠣꠟꠤ ꠇꠣꠝꠣꠞꠞ ꠀꠔꠞ ꠇꠣꠝ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।

16 “ꠝꠣ-ꠛꠣꠚꠞꠦ ꠎꠦꠉꠤꠄ ꠛꠦꠁꠎ꠆ꠎꠔ ꠇꠞꠦ, ꠢꠦ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।

17 “ꠖꠈꠟꠖꠣꠞꠤꠞ ꠘꠤꠅꠔꠦ ꠎꠝꠤꠘꠞ ꠀꠁꠟ ꠛꠣ ꠡꠤꠝꠣꠘꠣ ꠈꠥꠐꠤ ꠎꠦꠉꠤꠄ ꠢꠞꠣꠄ, ꠢꠦ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।

18 “ꠀꠘ꠆ꠖꠣ ꠝꠣꠘꠡꠞꠦ ꠎꠦꠉꠤꠄ ꠜꠥꠟ ꠙꠕ ꠖꠦꠈꠣꠁ ꠖꠦꠄ, ꠢꠦ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।

19 “ꠛꠤꠖꠦꠡꠤ ꠝꠥꠍꠣꠚꠤꠞ, ꠄꠔꠤꠝ, ꠀꠞ ꠠꠣꠠꠤ ꠛꠦꠐꠤꠘ꠆ꠔꠞ ꠛꠤꠌꠣꠞ-ꠡꠣꠟꠤꠡꠤꠔ ꠎꠦꠉꠤꠄ ꠛꠦ-ꠁꠘꠍꠣꠚꠤ ꠇꠞꠦ, ꠢꠦ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।

20 “ꠢꠣꠔꠘ ꠝꠣʼꠞ ꠟꠉꠦ ꠎꠦꠉꠤꠄ ꠎꠤꠘꠣ ꠇꠞꠦ, ꠢꠦ ꠀꠙꠘ ꠛꠣꠚꠞꠦ ꠛꠦꠁꠎ꠆ꠎꠔ ꠇꠞꠦ। ꠢꠦ ꠔ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।

21 “ꠇꠥꠘꠥ ꠙꠡꠥꠞ ꠟꠉꠦ ꠎꠦꠉꠤꠄ ꠎꠤꠘꠣ ꠇꠞꠦ, ꠢꠦ ꠔ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।

22 “ꠎꠦꠉꠤꠄ ꠘꠤꠎꠞ ꠛꠁꠘꠞ ꠟꠉꠦ, ꠢꠣꠔꠘ ꠝꠣʼꠞ, ꠛꠣ ꠢꠣꠔꠘ ꠛꠣꠚꠞ ꠔꠞꠚꠣ ꠛꠁꠘꠞ ꠟꠉꠦ ꠎꠤꠘꠣ ꠇꠞꠦ, ꠢꠦ ꠔ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।

23 “ꠘꠤꠎꠞ ꠢꠠꠤꠞ ꠟꠉꠦ ꠎꠦꠉꠤꠄ ꠎꠤꠘꠣ ꠇꠞꠦ, ꠢꠦ ꠔ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।

24 “ꠎꠦꠉꠤꠄ ꠟꠥꠇꠣꠁꠀ ꠇꠥꠘꠥ ꠝꠣꠘꠡꠞꠦ ꠈꠥꠘ ꠇꠞꠦ, ꠢꠦ ꠔ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।

25 “ꠘꠤ-ꠅꠙꠞꠣꠗꠤ ꠝꠣꠘꠡꠞꠦ ꠈꠥꠘ ꠇꠞꠣꠞ ꠌꠥꠇ꠆ꠔꠤꠄ ꠎꠦꠉꠤꠄ ꠐꠦꠇꠣ ꠈꠣꠄ, ꠢꠦ ꠔ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।

26 “ꠅꠃ ꠡꠞꠤꠅꠔꠞ ꠇꠥꠘꠥ ꠢꠥꠇꠥꠝ-ꠀꠢꠇꠣꠝ ꠎꠦꠉꠤꠄ ꠝꠣꠘꠦ ꠘꠣ, ꠎꠦꠉꠤꠄ ꠁꠔꠣ ꠀꠝꠟ ꠇꠞꠦ ꠘꠣ, ꠢꠦ ꠔ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।