1 “ꠅ ꠛꠘꠤ ꠁꠍꠞꠣꠁꠟ, ꠀꠝꠤ ꠀꠁꠎ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠖꠤꠞꠣꠝ, ꠅꠔꠣ ꠀꠝꠟ ꠇꠞꠣꠞ ꠘꠤꠅꠔꠦ ꠔꠥꠝꠞꠣ ꠎꠥꠖꠤ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠇꠣꠟꠣꠝꠞꠦ ꠈꠤꠀꠟ ꠇꠞꠤ ꠝꠣꠘꠅ, ꠔꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠖꠥꠘꠤꠀꠞ ꠢꠇ꠆ꠇꠟ ꠎꠣꠔꠤꠞ ꠃꠙꠞꠦ ꠔꠥꠝꠞꠣꠞꠦ ꠃꠌꠣ ꠇꠞꠛꠣ। 2 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠇꠣꠟꠣꠝ ꠝꠣꠘꠤꠀ ꠌꠟꠟꠦ, ꠔꠥꠝꠞꠣ ꠅꠃ ꠞꠢꠝꠔ ꠙꠣꠁꠛꠣꠄ, ꠀꠞ ꠅꠃ ꠞꠢꠝꠔ ꠅꠇꠟ ꠢꠣꠝꠦꠡꠣ ꠔꠥꠝꠞꠣꠞ ꠟꠉꠦ ꠟꠉꠦ ꠞꠁꠛ,

3 “ꠔꠥꠝꠞꠣꠞ ꠛꠡꠔ-ꠛꠣꠠꠤ ꠀꠞ ꠈꠦꠔ-ꠈꠣꠝꠣꠞꠞ ꠝꠣꠎꠦ ꠞꠢꠝ-ꠛꠞꠇꠔ ꠙꠣꠁꠛꠣꠄ।

4 “ꠔꠣꠘ ꠞꠢꠝꠔꠦ ꠔꠥꠝꠞꠣ ꠛꠃꠔ ꠀꠅꠟꠣꠖ ꠙꠣꠁꠛꠣꠄ, ꠎꠝꠤꠘꠅ ꠛꠃꠔ ꠚꠡꠟ ꠚꠟꠤꠛ, ꠉꠞꠥ-ꠍꠣꠉꠟꠦ ꠛꠃꠔ ꠛꠣꠁꠌ꠆ꠌꠣ ꠖꠤꠛꠣ।

5 “ꠔꠥꠝꠣꠞ ꠃꠉꠣꠞꠅ ꠀꠞ ꠔꠥꠝꠣꠞ ꠌꠣꠃꠟꠞ ꠝꠐꠇꠤꠔ ꠛꠞꠇꠔ ꠙꠣꠁꠛꠣꠄ।

6 “ꠢꠇꠟ ꠢꠣꠟꠔꠦ ꠢꠇꠟ ꠇꠣꠝꠅ ꠔꠥꠝꠤ ꠞꠢꠝ-ꠛꠞꠇꠔ ꠙꠣꠁꠛꠣꠄ।

7 “ꠖꠥꠡꠝꠘꠤꠞ ꠘꠤꠅꠔꠦ ꠎꠦꠔꠣꠄ ꠔꠥꠝꠞꠣꠞ ꠟꠉꠦ ꠟꠣꠉꠛꠣ, ꠝꠣꠛꠥꠖꠦ ꠁꠔꠣꠞꠦ ꠔꠥꠝꠞꠣꠞ ꠉꠦꠍꠦ ꠀꠞꠣꠁꠛꠣ। ꠔꠣꠞꠣ ꠄꠇ ꠖꠥꠀꠞꠦꠖꠤ ꠔꠥꠝꠞꠣꠞꠦ ꠝꠣꠞꠣꠔ ꠀꠁꠟꠦ, ꠡꠣꠔ ꠖꠥꠀꠞꠦꠖꠤ ꠜꠣꠉꠤꠛꠣ।

8 “ꠔꠥꠝꠞꠣꠞ ꠃꠉꠣꠞꠞ ꠝꠣꠎꠦ ꠝꠣꠛꠥꠖꠦ ꠛꠞꠇꠔ ꠖꠤꠛꠣ, ꠔꠥꠝꠞꠣ ꠎꠦ ꠇꠣꠝꠅ ꠀꠔ ꠖꠤꠛꠣꠄ, ꠅꠃ ꠇꠣꠝꠅꠃ ꠔꠣꠁꠘ ꠛꠞꠇꠔ ꠖꠤꠛꠣ। ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡ ꠖꠣꠘ ꠇꠞꠞꠣ, ꠢꠘꠅ ꠔꠥꠝꠞꠣꠞꠦ ꠞꠢꠝ-ꠛꠞꠇꠔ ꠖꠤꠛꠣ।

9 “ꠔꠥꠝꠞꠣ ꠎꠥꠖꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ, ꠔꠣꠘ ꠛꠣꠔꠣꠁꠟ ꠙꠕꠦ ꠌꠟꠅ, ꠔꠦ ꠔꠣꠁꠘ ꠇꠍꠝ ꠈꠣꠁꠀ ꠎꠦꠟꠣ ꠅꠀꠖꠣ ꠇꠞꠍꠂꠘ, ꠅꠟꠣ ꠔꠣꠘ ꠘꠤꠎꠞ ꠙꠛꠤꠔ꠆ꠞ ꠙ꠆ꠞꠎꠣ ꠢꠤꠡꠣꠛꠦ ꠔꠥꠝꠞꠣꠞꠦ ꠇꠣꠁꠝ ꠇꠞꠛꠣ। 10 ꠀꠞ ꠀꠡ꠆ꠔꠣ ꠖꠥꠘꠤꠀꠞ ꠢꠇꠟ ꠎꠣꠔꠤꠄ ꠖꠦꠈꠛꠣ, ꠔꠥꠝꠞꠣꠃ ꠅꠁꠟꠣꠄ ꠝꠣꠛꠥꠖꠞ ꠈꠣꠍ ꠝꠣꠘꠥꠡ, ꠖꠦꠈꠤꠀ ꠔꠣꠞꠣ ꠢꠇꠟꠦ ꠔꠥꠝꠞꠣꠞꠦ ꠒꠞꠣꠁꠛꠣ।

11 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠉꠦꠍꠦ ꠎꠦ ꠖꠦꠡ ꠖꠤꠛꠣꠞ ꠟꠣꠉꠤ ꠇꠍꠝ ꠈꠣꠁꠍꠟꠣ, ꠅꠃ ꠖꠦꠡꠅ ꠔꠣꠁꠘ ꠔꠥꠝꠞꠣꠞ ꠛꠃꠔ ꠜꠣꠟꠣꠁ ꠇꠞꠛꠣ, ꠔꠥꠝꠞꠣꠞꠦ ꠛꠃꠔ ꠀꠅꠟꠣꠖ ꠖꠤꠛꠣ, ꠔꠥꠝꠞꠣꠞ ꠙꠡꠥꠞ ꠙꠣꠟꠣꠁꠘ꠆ꠔꠦ ꠛꠃꠔ ꠛꠣꠁꠌ꠆ꠌꠣ ꠖꠤꠛꠣ, ꠎꠝꠤꠘꠅ ꠛꠃꠔ ꠚꠡꠟ ꠚꠟꠤꠛ। 12 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠘ ꠀꠍꠝꠣꠘꠤ ꠞꠢꠝꠔꠞ ꠖꠥꠀꠞ ꠈꠥꠟꠤꠀ ꠖꠤꠛꠣ, ꠎꠞꠥꠞ ꠝꠣꠚꠤꠇ ꠝꠦꠊ-ꠙꠣꠘꠤ ꠖꠤꠀ ꠔꠥꠝꠞꠣꠞ ꠀꠔꠞ ꠢꠇꠟ ꠇꠣꠝꠞ ꠝꠣꠎꠦ ꠞꠢꠝ-ꠛꠞꠇꠔ ꠖꠤꠛꠣ, ꠛꠃꠔ ꠎꠣꠔꠤꠞꠦ ꠔꠥꠝꠞꠣ ꠐꠦꠇꠣ-ꠙꠄꠡꠣ ꠀꠅꠟꠣꠔ ꠖꠤꠛꠣꠄ, ꠅꠁꠟꠦ ꠔꠥꠝꠞꠣ ꠇꠥꠘꠥ ꠀꠅꠟꠣꠔ ꠘꠤꠛꠣꠞ ꠖꠞꠇꠣꠞ ꠅꠁꠔ ꠘꠣꠄ। 13 ꠝꠣꠛꠥꠖꠦ ꠔꠥꠝꠞꠣꠞꠦ ꠅꠟꠣ ꠛꠣꠘꠣꠁꠛꠣ, ꠎꠣꠔꠦ ꠔꠥꠝꠞꠣ ꠢꠇꠟꠞ ꠝꠣꠕꠣꠞ ꠃꠙꠞꠦ ꠞꠅ, ꠇꠦꠃꠞꠞ ꠙꠣꠅꠞ ꠔꠟꠣꠔ ꠘꠣ ꠕꠣꠇꠅ। ꠔꠥꠝꠞꠣ ꠈꠣꠟꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠅꠃ ꠢꠥꠇꠥꠝ-ꠀꠢꠇꠣꠝ ꠅꠇꠟ ꠈꠥꠛ ꠎꠔꠘ ꠇꠞꠤꠀ ꠀꠝꠟ ꠇꠞꠤꠅ, ꠎꠦꠔꠣ ꠀꠁꠎ ꠀꠝꠤ ꠔꠥꠝꠞꠣꠞꠦ ꠇꠁꠀꠞ, ꠔꠦꠃ ꠔꠥꠝꠞꠣ ꠢꠇꠟꠞ ꠃꠙꠞꠦ ꠞꠁꠛꠣꠄ, ꠔꠟꠦ ꠙꠠꠔꠣꠄ ꠘꠣꠄ। 14 ꠀꠞ ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ ꠖꠤꠀꠞ, ꠀꠝꠣꠞ ꠅꠃ ꠔꠣꠟꠤꠝ ꠕꠣꠇꠤ ꠔꠥꠝꠞꠣ ꠒꠣꠁꠘꠦ-ꠛꠣꠃꠄ ꠢꠞꠤꠅ ꠘꠣ। ꠇꠥꠘꠥ ꠖꠦꠛ-ꠖꠦꠛꠤꠞ ꠈꠞꠦꠖꠤ ꠖꠃꠠꠣꠁꠀ ꠁꠔꠣꠞ ꠙꠥꠎꠣ ꠇꠞꠣꠔ ꠟꠣꠉꠤꠅ ꠘꠣ।

15 “ꠅꠁꠟꠦ ꠔꠥꠝꠞꠣ ꠎꠥꠖꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠘꠣ ꠝꠣꠘꠅ, ꠔꠣꠘ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠀꠞ ꠘꠤꠅꠝ-ꠇꠣꠘꠥꠘ ꠀꠁꠎ ꠀꠝꠤ ꠎꠣꠘꠣꠁꠍꠤ, ꠔꠥꠝꠞꠣ ꠈꠥꠛ ꠈꠤꠀꠟꠤ ꠅꠁꠀ ꠁꠔꠣ ꠘꠣ ꠝꠣꠘꠟꠦ, ꠔꠥꠝꠞꠣꠞ ꠃꠙꠞꠦ ꠅꠃ ꠟꠣꠘ꠆ꠘꠔ ꠅꠇꠟ ꠙꠠꠛ, ꠁꠔꠣ ꠢꠣꠝꠦꠡꠣ ꠔꠥꠝꠞꠣꠞ ꠟꠉꠦ ꠟꠉꠦ ꠞꠁꠛ:

16 “ꠔꠥꠝꠞꠣꠞ ꠛꠡꠔ-ꠛꠣꠠꠤ, ꠈꠦꠔ-ꠈꠣꠝꠣꠞ ꠢꠇꠟ ꠎꠣꠉꠣꠔ ꠟꠣꠘ꠆ꠘꠔ ꠙꠠꠛ।

17 “ꠔꠥꠝꠞꠣꠞ ꠃꠉꠣꠞꠅ ꠀꠞ ꠌꠣꠃꠟꠞ ꠝꠐꠇꠤꠔ ꠟꠣꠘ꠆ꠘꠔ ꠙꠠꠛ।

18 “ꠔꠥꠝꠞꠣꠞ ꠢꠥꠞꠥꠔ꠆ꠔꠣ ꠇꠝ ꠎꠘꠝꠤꠛꠣ, ꠎꠝꠤꠘꠅ ꠚꠄ-ꠚꠡꠟ ꠇꠝꠤꠎꠤꠛ, ꠉꠞꠥ-ꠍꠣꠉꠟꠦ ꠛꠣꠁꠌ꠆ꠌꠣ ꠇꠝ ꠖꠤꠛꠣ, ꠅꠃ ꠘꠝꠥꠘꠣꠄ ꠔꠥꠝꠞꠣꠞ ꠃꠙꠞꠦ ꠟꠣꠘ꠆ꠘꠔ ꠙꠠꠛ।

19 “ꠊꠞꠅ ꠛꠣ ꠛꠣꠁꠞꠣ ꠢꠇꠟ ꠈꠣꠘꠅ ꠔꠥꠝꠞꠣ ꠙꠞꠔꠤ ꠖꠤꠘ ꠟꠣꠘ꠆ꠘꠔ ꠙꠣꠁꠛꠣꠄ।

20 “ꠘꠣꠚꠞꠝꠣꠘꠤ ꠇꠣꠝ ꠇꠞꠤꠀ ꠝꠣꠛꠥꠖꠞ ꠉꠦꠍ ꠕꠣꠇꠤ ꠢꠞꠤ ꠎꠣꠅꠀꠄ, ꠔꠥꠝꠞꠣꠞ ꠢꠇꠟ ꠇꠣꠝ-ꠇꠣꠎꠞ ꠝꠣꠎꠦ ꠔꠣꠁꠘ ꠟꠣꠘ꠆ꠘꠔ ꠖꠤꠛꠣ। ꠛꠣꠟꠣ-ꠝꠍꠤꠛꠔꠅ ꠙꠠꠤꠀ, ꠀꠟ꠆ꠟꠣꠁ ꠉꠎꠛꠞ ꠎꠣꠔꠣꠄ, ꠔꠥꠝꠞꠣ ꠄꠇ꠆ꠇꠦꠞꠦ ꠛꠤꠘꠣꠡ ꠅꠀꠞ ꠀꠉ ꠙꠞ꠆ꠎꠘ꠆ꠔ, ꠀꠡ꠆ꠔꠦ ꠀꠡ꠆ꠔꠦ ꠈꠣꠟꠤ ꠇ꠆ꠇꠄ ꠅꠁꠛꠣꠄ। 21 ꠔꠥꠝꠞꠣ ꠎꠦ ꠖꠦꠡꠞ ꠖꠈꠟꠖꠣꠞꠤ ꠙꠣꠁꠞꠣꠄ, ꠝꠣꠛꠥꠖꠦ ꠢꠘꠅ ꠔꠥꠝꠞꠣꠞ ꠃꠙꠞꠦ ꠛꠦꠝꠣꠞ ꠍꠣꠠꠤꠛꠣ, ꠛꠦꠝꠣꠞꠦ ꠔꠥꠝꠞꠣ ꠝꠞꠔꠦ ꠝꠞꠔꠦ ꠢꠃ ꠖꠦꠡꠅ ꠕꠣꠇꠤ ꠛꠤꠘꠣꠡ ꠅꠁꠛꠣꠄ। 22 ꠝꠣꠛꠥꠖꠦ ꠔꠥꠝꠞꠣꠞ ꠡꠞꠤꠟꠅ ꠘꠡ꠆ꠐ ꠅꠀ ꠛꠦꠝꠣꠞ, ꠛꠣꠇ꠆ꠇꠣ ꠔꠣꠙ ꠀꠞ ꠎꠟꠣ-ꠚꠥꠠꠣ, ꠅꠔꠣ ꠛꠦꠝꠣꠞꠖꠤ ꠔꠥꠝꠞꠣꠞ ꠃꠙꠞꠦ ꠉꠎꠛ ꠖꠤꠛꠣ। ꠀꠞ ꠝꠞꠇꠤ, ꠢꠥꠇꠘꠣ ꠉꠞꠝ ꠛꠣꠔꠣꠡ, ꠚꠡꠟꠞ ꠢꠥꠘꠣ-ꠇꠣꠘꠤ ꠢꠥꠇꠣꠁ ꠎꠣꠅꠀꠞ ꠛꠦꠝꠣꠞ ꠀꠞ ꠙꠣꠔꠣ ꠝꠞꠣ, ꠅꠔꠣ ꠉꠎꠛ ꠅꠇꠟ ꠔꠥꠝꠞꠣꠞ ꠎꠝꠤꠘꠅ ꠖꠤꠛꠣ। ꠔꠥꠝꠞꠣ ꠝꠞꠤꠀ ꠚꠥꠠꠣꠘꠤꠞ ꠀꠉ ꠙꠞ꠆ꠎꠘ꠆ꠔ ꠁ ꠉꠎꠛ ꠔꠥꠝꠞꠣꠞ ꠈꠞꠦ ꠈꠞꠦ ꠞꠁꠛ। 23 ꠔꠥꠝꠞꠣꠞ ꠝꠣꠕꠣꠞ ꠃꠙꠞꠞ ꠀꠍꠝꠣꠘ ꠅꠁꠛ ꠙꠤꠔꠟꠞ ꠟꠣꠈꠣꠘ ꠡꠇ꠆ꠔ, ꠀꠞ ꠙꠣꠅꠞ ꠔꠟꠞ ꠎꠝꠤꠘ ꠅꠁꠛ ꠟꠥꠀꠞ ꠟꠣꠈꠣꠘ ꠇꠑꠤꠘ। 24 ꠝꠣꠛꠥꠖꠦ ꠝꠦꠊꠞ ꠛꠖꠟꠣ ꠔꠥꠝꠞꠣꠞ ꠖꠦꠡꠅ ꠀꠍꠝꠣꠘ ꠕꠣꠇꠤ ꠗꠥꠁꠟ ꠍꠣꠠꠤꠛꠣ, ꠔꠥꠝꠞꠣ ꠛꠤꠘꠣꠡ ꠅꠀꠞ ꠀꠉ ꠙꠞ꠆ꠎꠘ꠆ꠔ ꠁꠔꠣ ꠢꠣꠝꠦꠡꠣ ꠙꠠꠣꠔ ꠞꠁꠛ।

25 “ꠝꠣꠛꠥꠖꠦ ꠔꠥꠝꠞꠣꠞ ꠖꠥꠡꠝꠘ ꠅꠇꠟꠞ ꠝꠥꠇꠣꠛꠤꠟꠣꠔ ꠔꠥꠝꠞꠣꠞꠦ ꠀꠞꠣꠁꠛꠣ, ꠄꠞꠣꠞꠦ ꠄꠇ ꠙꠕꠦꠖꠤ ꠝꠣꠞꠣꠔ ꠉꠦꠟꠦ ꠡꠣꠔ ꠙꠕꠦꠖꠤ ꠜꠣꠉꠤꠛꠣꠄ। ꠔꠥꠝꠞꠣꠞ ꠖꠡꠣ ꠖꠦꠈꠤꠀ ꠎꠉꠔꠞ ꠢꠇꠟ ꠎꠣꠔꠤꠄ ꠒꠞꠣꠁꠀ ꠇꠣꠙꠤꠛꠣ। 26 ꠔꠥꠝꠞꠣꠞ ꠟꠣꠡ ꠅꠁꠛ ꠙꠡꠥ-ꠙꠣꠈꠤꠘ꠆ꠔꠞ ꠈꠥꠞꠣꠇ। ꠁꠔꠣꠞꠦ ꠈꠦꠖꠣꠘꠤꠞ ꠟꠣꠉꠤ ꠇꠦꠃ ꠞꠁꠔ ꠘꠣꠄ। 27 ꠝꠣꠛꠥꠖꠦ ꠢꠃ ꠝꠤꠡꠞꠤ ꠅꠇꠟꠞ ꠟꠣꠈꠣꠘ ꠔꠥꠝꠞꠣꠞ ꠉꠔꠞꠅ ꠉꠎꠛꠤ ꠛꠤꠡ-ꠚꠥꠞꠤ, ꠐꠤꠃꠝꠣꠞ, ꠚꠥꠐ-ꠈꠣꠃꠎꠟꠤ ꠛꠦꠝꠣꠞ ꠖꠤꠛꠣ, ꠁꠔꠣ ꠕꠣꠇꠤ ꠇꠦꠃ ꠔꠥꠝꠞꠣꠞꠦ ꠡꠤꠚꠣ ꠇꠞꠣꠞ ꠈꠦꠝꠔꠣ ꠘꠣꠁ। 28 ꠔꠣꠁꠘ ꠔꠥꠝꠞꠣꠞꠦ ꠙꠣꠉꠟ, ꠀꠘ꠆ꠖꠣ ꠀꠞ ꠛꠦꠖꠤꠡꠣ ꠛꠣꠘꠣꠁꠛꠣ। 29 ꠀꠘ꠆ꠖꠣꠄ ꠎꠦꠟꠣ ꠀꠘ꠆ꠖꠣꠞꠤꠞ ꠝꠣꠎꠦ ꠀꠔꠣꠁ ꠀꠔꠣꠁ ꠀꠐꠦ, ꠔꠥꠝꠞꠣ ꠖꠤꠘꠞ ꠛꠣꠟꠣ ꠅꠟꠣ ꠀꠐꠤꠛꠣꠄ, ꠔꠥꠝꠞꠣꠞ ꠇꠥꠘꠥ ꠇꠣꠝꠃ ꠇꠣꠝꠤꠀꠛ ꠅꠁꠔ ꠘꠣꠄ। ꠔꠥꠝꠞꠣꠞ ꠃꠙꠞꠦ ꠢꠣꠝꠦꠡꠣ ꠎꠥꠟꠥꠝ ꠀꠞ ꠟꠥꠐ-ꠔꠞꠣꠎ ꠌꠟꠛ, ꠁꠔꠣ ꠕꠣꠇꠤ ꠛꠣꠌꠣꠘꠤꠞ ꠟꠣꠉꠤ ꠇꠦꠃ ꠀꠁꠔ ꠘꠣꠄ।

30 “ꠡꠣꠖꠤ ꠇꠞꠣꠞ ꠟꠣꠉꠤ ꠎꠦ ꠇꠁꠘꠣꠞ ꠟꠉꠦ ꠔꠥꠝꠣꠞ ꠀꠈꠔ ꠅꠁꠛ, ꠀꠞꠇ ꠛꠦꠐꠣꠄ ꠀꠁꠀ ꠅꠃ ꠇꠁꠘꠣꠞ ꠁꠎ꠆ꠎꠔ ꠟꠥꠐꠤꠛ। ꠔꠥꠝꠤ ꠊꠞ ꠛꠣꠘꠣꠁꠛꠣꠄ, ꠅꠁꠟꠦ ꠊꠞꠅ ꠛꠡꠔ ꠇꠞꠔꠣꠄ ꠙꠣꠞꠔꠣꠄ ꠘꠣꠄ। ꠀꠋꠉꠥꠞꠞ ꠛꠣꠉꠣꠘ ꠇꠞꠤꠀ, ꠚꠟ ꠈꠣꠅꠀ ꠇꠙꠣꠟꠅ ꠎꠥꠐꠔ ꠘꠣꠄ। 31 ꠔꠥꠝꠞꠣꠞ ꠌꠈꠥꠞ ꠍꠣꠝꠘꠦ ꠔꠥꠝꠞꠣꠞ ꠉꠞꠥ ꠎꠛ ꠇꠞꠣ ꠅꠁꠛ, ꠅꠁꠟꠦ ꠄꠇ ꠐꠥꠇꠞꠣ ꠉꠥꠡ꠆ꠔꠅ ꠔꠥꠝꠞꠣꠞ ꠙꠦꠐꠅ ꠎꠣꠁꠔ ꠘꠣꠄ। ꠔꠥꠝꠞꠣꠞ ꠉꠣꠗꠣꠞꠦ ꠔꠥꠝꠞꠣꠞ ꠀꠔ ꠕꠣꠇꠤ ꠇꠣꠠꠤꠀ ꠘꠦꠅꠀ ꠅꠁꠛ, ꠁꠔꠣ ꠀꠞ ꠚꠤꠞꠔ ꠙꠣꠁꠔꠣꠄ ꠘꠣꠄ। ꠔꠥꠝꠞꠣꠞ ꠝꠦꠠꠣ-ꠍꠣꠉꠟ ꠔꠥꠝꠞꠣꠞ ꠖꠥꠡꠝꠘꠞ ꠀꠔꠅ ꠎꠣꠁꠛ, ꠅꠔꠣ ꠛꠤꠙꠖ ꠕꠣꠇꠤ ꠛꠣꠌꠣꠘꠤꠞ ꠟꠣꠉꠤ ꠇꠦꠃ ꠀꠉꠥꠀꠁ ꠀꠁꠔ ꠘꠣꠄ। 32 ꠔꠥꠝꠞꠣꠞ ꠙꠥꠀ-ꠙꠥꠠꠤꠘ ꠖꠥꠍꠞꠣ ꠎꠣꠔꠤꠞ ꠀꠔꠅ ꠀꠐꠇ ꠅꠁꠛꠣ, ꠔꠣꠞꠣꠞ ꠀꠡꠣꠄ ꠛꠣꠞ ꠌꠣꠁꠔꠦ ꠌꠣꠁꠔꠦ ꠔꠥꠝꠞꠣꠞ ꠌꠈꠥꠞ ꠎꠥꠔꠤ ꠘꠡ꠆ꠐ ꠅꠁꠛ, ꠅꠁꠟꠦ ꠇꠥꠘ꠆ꠔꠣ ꠇꠞꠣꠞ ꠡꠥꠎꠥꠉ ꠅꠁꠔ ꠘꠣꠄ। 33 ꠔꠥꠝꠞꠣꠞ ꠅꠌꠤꠘꠣ ꠜꠤꠘ ꠎꠣꠔꠤꠄ ꠔꠥꠝꠞꠣꠞ ꠈꠦꠔꠞ ꠚꠄ-ꠚꠡꠟ, ꠀꠞ ꠔꠥꠝꠞꠣꠞ ꠝꠦꠘꠔꠞ ꠢꠇꠟ ꠝꠎꠥꠞꠤ ꠟꠥꠐꠤꠀ ꠘꠤꠛꠉꠤ, ꠔꠥꠝꠞꠣ ꠢꠣꠞꠣ ꠎꠤꠘ꠆ꠖꠦꠉꠤ ꠈꠣꠟꠤ ꠎꠥꠟꠥꠝ-ꠝꠍꠤꠛꠔ ꠙꠣꠁꠛꠣꠄ ꠀꠞ ꠌꠥꠞꠝꠣꠞ ꠅꠁꠛꠣꠄ। 34 ꠔꠥꠝꠞꠣꠞ ꠌꠃꠈꠦ ꠁ ꠟꠣꠈꠣꠘ ꠀꠞꠅ ꠎꠦꠔꠣ ꠖꠦꠈꠛꠣꠄ, ꠖꠦꠈꠤꠀ ꠝꠣꠕꠣ ꠈꠣꠞꠣꠙ ꠅꠁꠛ। 35 ꠝꠣꠛꠥꠖꠦ ꠔꠥꠝꠞꠣꠞ ꠃꠞꠣꠔꠅ ꠀꠞ ꠀꠐꠥꠔ ꠡꠥꠞꠥ ꠇꠞꠤꠀ, ꠙꠣꠅꠞ ꠔꠟꠣ ꠕꠣꠇꠤ ꠝꠣꠕꠣꠞ ꠔꠣꠟꠥ ꠙꠞ꠆ꠎꠘ꠆ꠔ ꠀꠡ꠆ꠔꠣ ꠉꠔꠞꠅ ꠛꠤꠡ-ꠚꠥꠞꠤ ꠖꠤꠛꠣ, ꠁꠔꠣꠞ ꠇꠥꠘꠥ ꠡꠤꠚꠣ ꠘꠣꠁ।

36 “ꠔꠥꠝꠞꠣꠞ ꠃꠙꠞꠦ ꠛꠣꠖꠡꠣꠁ ꠇꠞꠣꠞ ꠟꠣꠉꠤ ꠔꠥꠝꠞꠣ ꠎꠣꠞꠦ ꠉꠖꠤꠔ ꠛꠅꠀꠁꠛꠣꠄ, ꠝꠣꠛꠥꠖꠦ ꠢꠃ ꠛꠣꠖꠡꠣ ꠀꠞ ꠔꠥꠝꠞꠣꠞꠦ ꠛꠘ꠆ꠖꠤ ꠇꠞꠣꠁꠀ ꠅꠝꠘ ꠄꠇ ꠎꠣꠔꠤꠞ ꠀꠔꠅ ꠚꠣꠟꠣꠁꠛꠣ, ꠎꠦꠔꠣꠞ ꠘꠣꠝꠃ ꠔꠥꠝꠞꠣ ꠢꠥꠘꠍ ꠘꠣ, ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠄꠅ ꠢꠥꠘꠍꠂꠘ ꠘꠣ। ꠢꠘꠅ ꠉꠤꠀ ꠔꠥꠝꠞꠣ ꠙꠣꠔ꠆ꠔꠞ ꠀꠞ ꠟꠣꠇꠠꠤꠖꠤ ꠛꠣꠘꠣꠁꠟ ꠝꠥꠞ꠆ꠔꠤꠞ ꠙꠥꠎꠣ ꠇꠞꠛꠣꠄ। 37 ꠝꠣꠛꠥꠖꠦ ꠔꠥꠝꠞꠣꠞꠦ ꠎꠦꠔꠣ ꠎꠣꠔꠤꠞ ꠝꠣꠎꠦ ꠈꠦꠖꠣꠁ ꠖꠤꠛꠣ, ꠢꠔꠣꠄ ꠔꠥꠝꠞꠣꠞꠦ ꠖꠦꠈꠤꠀ ꠌꠝꠇꠤꠎꠤꠛ, ꠔꠥꠝꠞꠣꠞ ꠖꠡꠣ ꠌꠤꠠ ꠀꠞ ꠑꠣꠐ꠆ꠐꠣ-ꠝꠡꠇꠞꠣꠞ ꠛꠤꠡꠄ ꠅꠁꠛ।

38 “ꠔꠥꠝꠞꠣ ꠈꠦꠔ ꠇꠞꠛꠣꠄ ꠛꠃꠔ, ꠅꠁꠟꠦ ꠚꠡꠟ ꠙꠣꠁꠛꠣꠄ ꠕꠥꠠꠣ, ꠇꠣꠞꠘ ꠙꠋꠉꠙꠣꠟꠦ ꠈꠣꠁꠟꠤꠛꠣ। 39 ꠔꠥꠝꠞꠣ ꠀꠋꠉꠥꠞꠞ ꠛꠣꠉꠣꠘ ꠇꠞꠤꠀ ꠎꠣꠄ-ꠎꠔꠘ ꠇꠞꠛꠣꠄ, ꠅꠁꠟꠦ ꠇꠤꠠꠣ ꠀꠞ ꠙꠥꠇꠦ ꠛꠣꠉꠣꠘ ꠈꠣꠁꠟꠤꠛ, ꠄꠞꠟꠣꠉꠤ ꠔꠥꠝꠞꠣ ꠀꠋꠉꠥꠞꠅ ꠙꠣꠁꠔꠣꠄ ꠘꠣꠄ, ꠄꠞ ꠡꠞꠛꠔꠅ ꠈꠣꠁꠔꠣꠄ ꠙꠣꠞꠔꠣꠄ ꠘꠣꠄ। 40 ꠔꠥꠝꠞꠣꠞ ꠢꠣꠞꠣ ꠖꠦꠡ ꠎꠄꠔꠥꠘ ꠉꠣꠍꠦ ꠜꠞꠣ ꠞꠁꠟꠦꠅ, ꠎꠄꠔꠥꠘ ꠚꠟ ꠏꠞꠤꠀ ꠙꠠꠤꠎꠤꠛ, ꠄꠞꠟꠣꠉꠤ ꠔꠥꠝꠞꠣꠞ ꠡꠞꠤꠟꠅ ꠔꠦꠟ ꠝꠣꠈꠣ ꠅꠁꠔ ꠘꠣꠄ। 41 ꠔꠥꠝꠞꠣꠞ ꠎꠔ ꠀꠅꠟꠣꠖ ꠅꠁꠛꠣ, ꠁꠔꠣ ꠔꠥꠝꠞꠣꠞ ꠉꠦꠍꠦ ꠞꠁꠔꠣ ꠘꠣꠄ, ꠁꠔꠣꠞꠦ ꠛꠘ꠆ꠖꠤ ꠇꠞꠤ ꠘꠦꠅꠀ ꠅꠁꠛ। 42 ꠉꠎꠛꠤ ꠝꠃꠀ-ꠙꠥꠇꠞ ꠙꠣꠟ ꠀꠁꠀ ꠔꠥꠝꠞꠣꠞ ꠉꠣꠍ-ꠉꠣꠍꠣꠟꠤ ꠀꠞ ꠚꠡꠟ ꠈꠣꠁꠟꠤꠛꠣ।

43 “ꠔꠥꠝꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠜꠤꠘ ꠎꠣꠔꠤꠞ ꠝꠣꠘꠥꠡ ꠅꠇꠟ ꠀꠡ꠆ꠔꠦ ꠀꠡ꠆ꠔꠦ ꠃꠙꠞꠦꠖꠤ ꠃꠑꠛꠣ, ꠀꠞ ꠔꠥꠝꠞꠣ ꠔꠟꠦꠖꠤ ꠟꠣꠝꠛꠣꠄ। 44 ꠔꠣꠞꠣ ꠔꠥꠝꠞꠣꠞꠦ ꠐꠦꠇꠣ-ꠙꠄꠡꠣ ꠀꠅꠟꠣꠔ ꠖꠤꠛꠣ, ꠔꠥꠝꠞꠣ ꠔꠣꠞꠣꠞꠦ ꠀꠅꠟꠣꠔ ꠖꠤꠛꠣꠞ ꠡꠣꠁꠖ꠆ꠖ ꠅꠁꠔ ꠘꠣꠄ। ꠔꠣꠞꠣ ꠞꠁꠛꠣ ꠔꠥꠝꠞꠣꠞ ꠝꠣꠕꠣꠞ ꠃꠙꠞꠦ, ꠔꠥꠝꠞꠣ ꠞꠁꠛꠣꠄ ꠔꠣꠞꠣꠞ ꠙꠣꠅꠞ ꠔꠟꠣꠔ।

45 “ꠅꠃ ꠔꠣꠝꠣꠝ ꠟꠣꠘ꠆ꠘꠔ ꠔꠥꠝꠞꠣꠞ ꠃꠙꠞꠦ ꠙꠠꠛ। ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠈꠥꠡꠤ ꠝꠣꠚꠤꠇ ꠘꠣ ꠌꠟꠣꠄ, ꠔꠣꠘ ꠢꠥꠇꠥꠝ-ꠀꠢꠇꠣꠝ ꠀꠞ ꠘꠤꠅꠝ-ꠇꠣꠘꠥꠘ ꠘꠣ ꠝꠣꠘꠣꠄ ꠅꠃ ꠟꠣꠘ꠆ꠘꠔ ꠅꠇꠟ ꠔꠥꠝꠞꠣꠞ ꠟꠉꠦ ꠟꠣꠉꠣꠁꠟ ꠞꠁꠛ। ꠁꠔꠣꠄ ꠔꠥꠝꠞꠣꠞꠦ ꠎꠣꠔꠤꠀ ꠗꠞꠤꠀ ꠛꠤꠘꠣꠡ ꠇꠞꠤꠟꠣꠁꠛ। 46 ꠅꠃ ꠟꠣꠘ꠆ꠘꠔ ꠅꠇꠟ ꠔꠥꠝꠞꠣ ꠀꠞ ꠔꠥꠝꠞꠣꠞ ꠀꠅꠟꠣꠖꠞ ꠃꠙꠞꠦ, ꠎꠥꠉ ꠎꠥꠉ ꠗꠞꠤ ꠇꠥꠖꠞꠔꠤ ꠢꠥꠡꠤꠀꠞꠤ ꠢꠤꠡꠣꠛꠦ ꠞꠁꠛ। 47 ꠔꠥꠝꠞꠣ ꠘꠤꠎꠞ ꠡꠥꠖꠤꠘꠞ ꠇꠣꠟꠅ ꠝꠘꠞ ꠈꠥꠡꠤꠄ ꠀꠡꠤꠇ ꠛꠘꠤꠀ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠉꠥꠟꠣꠝꠤ ꠇꠞꠍ ꠘꠣ, 48 ꠄꠞꠟꠣꠉꠤ ꠝꠣꠛꠥꠖꠦ ꠔꠥꠝꠞꠣꠞ ꠈꠞꠦꠖꠤ ꠖꠥꠡꠝꠘ ꠟꠣꠉꠣꠁꠛꠣ, ꠔꠥꠝꠞꠣ ꠙꠦꠐꠞ ꠜꠥꠇꠦ, ꠙꠣꠘꠤꠞ ꠙꠤꠀꠍꠦ, ꠅꠜꠣꠛ-ꠅꠘꠐꠘꠦ ꠢꠇꠤꠞ ꠛꠘꠤꠀ ꠔꠣꠞꠣꠞ ꠉꠥꠟꠣꠝꠤ ꠇꠞꠛꠣꠄ। ꠝꠣꠛꠥꠖꠦ ꠔꠥꠝꠞꠣꠞ ꠇꠣꠘ꠆ꠖꠅ ꠟꠥꠀꠞ ꠎꠥꠀꠟ ꠚꠤꠘ꠆ꠖꠣꠁꠛꠣ, ꠅꠃ ꠎꠥꠀꠟꠤꠞ ꠔꠟꠦ ꠔꠥꠝꠞꠣꠞ ꠛꠤꠘꠣꠡ ꠅꠁꠛ।

49 “ꠝꠣꠛꠥꠖꠦ ꠛꠃꠔ ꠖꠥꠞꠁ ꠕꠣꠇꠤ, ꠎꠉꠔꠞ ꠢꠦꠡ ꠡꠤꠝꠣꠘꠣ ꠕꠣꠇꠤ, ꠅꠟꠣ ꠄꠇ ꠎꠣꠔꠤꠞꠦ ꠌꠤꠟꠞ ꠘꠝꠥꠘꠣꠄ ꠃꠠꠣꠁꠀ ꠀꠘꠛꠣ, ꠎꠦꠔꠣꠞ ꠝꠥꠈꠞ ꠛꠥꠟꠤ ꠔꠥꠝꠞꠣ ꠛꠥꠎꠔꠣꠄ ꠘꠣꠄ। 50 ꠁꠔꠣꠞ ꠉꠑꠘ ꠅꠁꠛ ꠛꠖꠍꠥꠞꠔ, ꠁꠔꠣꠄ ꠇꠥꠘꠥ ꠛꠥꠠꠣ-ꠛꠥꠠꠤꠞꠦ ꠁꠎ꠆ꠎꠔ ꠖꠤꠔꠣ ꠘꠣꠄ, ꠀꠞ ꠢꠥꠞꠥꠔ꠆ꠔꠣꠞꠦꠅ ꠝꠣꠄꠀ ꠇꠞꠔꠣ ꠘꠣꠄ। 51 ꠔꠣꠞꠣ ꠔꠥꠝꠞꠣꠞ ꠙꠡꠥꠞ ꠛꠣꠁꠌ꠆ꠌꠣ ꠀꠞ ꠈꠦꠔꠞ ꠚꠡꠟ ꠈꠣꠁꠟꠤꠛꠣ, ꠢꠦꠡ-ꠝꠦꠡ ꠔꠥꠝꠞꠣ ꠛꠤꠘꠣꠡ ꠅꠁꠛꠣꠄ। ꠔꠣꠞꠣ ꠇꠥꠘꠥꠎꠣꠔ ꠚꠡꠟ, ꠘꠄꠀ ꠇꠥꠘꠥ ꠀꠋꠉꠥꠞꠞ ꠡꠞꠛꠔ, ꠔꠦꠟ, ꠉꠞꠥ-ꠍꠣꠉꠟꠞ ꠛꠣꠁꠌ꠆ꠌꠣ, ꠇꠥꠘ꠆ꠔꠣꠃ ꠔꠥꠝꠞꠣꠞ ꠟꠣꠉꠤ ꠕꠁꠔꠣ ꠘꠣꠄ, ꠢꠦꠡ-ꠝꠦꠡ ꠔꠥꠝꠞꠣ ꠛꠤꠘꠣꠡ ꠅꠁꠎꠤꠛꠣꠄ। 52 ꠔꠣꠞꠣ ꠔꠥꠝꠞꠣꠞ ꠐꠣꠃꠘ ꠅꠇꠟ ꠛꠦꠞꠤꠀ ꠞꠣꠈꠛꠣ, ꠀꠞ ꠔꠥꠝꠞꠣ ꠎꠦꠔꠣꠞ ꠃꠙꠞꠦ ꠜꠞꠡꠣ ꠇꠞꠞꠣꠄ, ꠔꠥꠝꠞꠣꠞ ꠢꠃ ꠃꠌꠣ ꠃꠌꠣ ꠝꠎꠛꠥꠔ ꠛꠣꠃꠘ꠆ꠒꠞꠤꠞ ꠅꠀꠟ ꠅꠇꠟ ꠢꠦꠡ-ꠝꠦꠡ ꠜꠣꠋꠉꠤꠀ ꠙꠠꠤꠎꠤꠛ। ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠞꠣ, ꠢꠃ ꠖꠦꠡꠞ ꠢꠇ꠆ꠇꠟ ꠉꠣꠃ ꠀꠞ ꠐꠣꠃꠘ ꠔꠣꠞꠣ ꠛꠦꠞꠤꠟꠤꠛꠣ।

53 “ꠀꠞ ꠖꠥꠡꠝꠘꠦ ꠛꠦꠞꠤꠀ ꠞꠣꠈꠣꠞ ꠇꠣꠟꠅ ꠔꠥꠝꠞꠣ ꠅꠔ ꠛꠠ ꠝꠍꠤꠛꠔꠅ ꠙꠠꠛꠣꠄ, ꠄꠞꠟꠣꠉꠤ ꠔꠥꠝꠞꠣꠞ ꠘꠤꠎꠞ ꠙꠥꠀ-ꠙꠥꠠꠤꠞꠦ ꠈꠣꠁꠟꠤꠛꠣꠄ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠖꠦꠅꠀ ꠀꠅꠟꠣꠖꠞ ꠉꠥꠡ꠆ꠔ ꠘꠤꠎꠦ ꠈꠣꠁꠛꠣꠄ। 54 ꠢꠃ ꠡꠝꠄ ꠔꠥꠝꠞꠣꠞ ꠝꠣꠎꠦ ꠎꠦꠞꠣ ꠜꠣꠟꠣ ꠝꠣꠘꠥꠡ, ꠎꠦꠞꠣ ꠡꠥꠈꠦ ꠀꠞ ꠀꠞꠣꠝ-ꠀꠄꠄꠡꠦ ꠀꠍꠦ, ꠔꠣꠞꠣꠞ ꠝꠘ-ꠝꠤꠎꠣꠎꠅ ꠅꠟꠣꠈꠣꠘ ꠅꠁꠎꠤꠛ, ꠔꠣꠞꠣ ꠀꠙꠘ ꠜꠣꠁꠞꠦ, ꠘꠤꠎꠞ ꠛꠃꠞꠦ ꠀꠞ ꠛꠣꠇꠤ ꠙꠥꠀ-ꠙꠥꠠꠤꠞꠦ ꠇꠥꠘꠥ ꠖꠄꠀ-ꠝꠣꠄꠀ ꠇꠞꠔ ꠘꠣꠄ। 55 ꠢꠦ ꠔꠣꠞ ꠎꠦ ꠀꠅꠟꠣꠖꠞ ꠉꠥꠡ꠆ꠔ ꠈꠣꠁꠛ, ꠁꠔꠣꠞ ꠄꠇꠈꠣꠘ ꠐꠥꠇꠞꠣꠅ ꠔꠣꠞꠣꠞꠦ ꠖꠤꠔ ꠘꠣꠄ। ꠇꠣꠞꠘ ꠖꠥꠡꠝꠘꠦ ꠎꠦꠛꠟꠣ ꠔꠥꠝꠞꠣꠞ ꠐꠣꠃꠘ ꠅꠇꠟ ꠛꠦꠞꠤꠀ ꠞꠣꠈꠛꠣ, ꠅꠃ ꠡꠝꠄ ꠔꠥꠝꠞꠣꠞ ꠙꠦꠐꠞ ꠜꠥꠇ ꠝꠤꠐꠣꠘꠤꠞ ꠟꠣꠉꠤ ꠘꠤꠎꠞ ꠢꠥꠞꠥꠔ꠆ꠔꠣꠞ ꠉꠥꠡ꠆ꠔ ꠍꠣꠠꠣ ꠀꠞ ꠇꠥꠘꠥꠔꠣꠅ ꠝꠤꠟꠔ ꠘꠣꠄ। 56 ꠔꠥꠝꠞꠣꠞ ꠝꠣꠎꠞ ꠈꠥꠛ ꠘꠞꠝ ꠖꠤꠟꠞ ꠎꠦ ꠛꠦꠐꠤ ꠝꠣꠘꠥꠡ ꠀꠍꠦ, ꠎꠦ ꠛꠦꠐꠤꠄ ꠡꠥꠇꠤꠟꠣ ꠎꠤꠘ꠆ꠖꠦꠉꠤꠞ ꠖꠣꠄ ꠇꠥꠘꠥꠖꠤꠘ ꠝꠣꠐꠤꠔ ꠙꠣꠅ ꠚꠣꠟꠣꠁꠍꠦ ꠘꠣ, ꠢꠃ ꠛꠦꠐꠤꠄꠅ ꠔꠣꠁꠞ ꠎꠣꠘꠞ ꠐꠥꠇꠞꠣ ꠎꠣꠝꠣꠁ ꠛꠣ ꠀꠅꠟꠣꠖꠞ ꠛꠣꠄ ꠇꠥꠘꠥ ꠖꠄꠀ-ꠝꠣꠄꠀ ꠇꠞꠔ ꠘꠣꠄ। 57 ꠖꠥꠡꠝꠘꠦ ꠔꠥꠝꠞꠣꠞꠦ ꠛꠦꠞꠤꠀ ꠞꠣꠈꠣꠄ ꠙꠦꠐꠞ ꠜꠥꠇꠞ ꠎꠣꠟꠣꠄ ꠀꠅꠟꠣꠖꠞ ꠎꠘꠝ ꠖꠦꠅꠀꠞ ꠟꠉꠦ ꠟꠉꠦ, ꠅꠃ ꠝꠣʼꠄ ꠘꠤꠎꠞ ꠀꠅꠟꠣꠖꠞ ꠉꠥꠡ꠆ꠔ, ꠀꠞ ꠙꠦꠐꠅ ꠕꠣꠇꠤ ꠛꠣꠞꠅꠁꠟ ꠙꠥꠀꠔꠤ-ꠚꠥꠟ ꠙꠞ꠆ꠎꠘ꠆ꠔ ꠘꠤꠎꠦ ꠘꠤꠎꠦ ꠟꠥꠇꠣꠁꠀ ꠈꠣꠁꠟꠤꠛ।

58 “ꠅꠃ ꠇꠤꠔꠣꠛꠞ ꠝꠣꠎꠦ ꠡꠞꠤꠅꠔꠞ ꠎꠔ ꠢꠥꠇꠥꠝ-ꠀꠢꠇꠣꠝ ꠟꠦꠈꠣ ꠀꠍꠦ, ꠁꠔꠣ ꠎꠥꠖꠤ ꠔꠥꠝꠞꠣ ꠈꠥꠛ ꠈꠤꠀꠟ ꠇꠞꠤꠀ ꠀꠝꠟ ꠘꠣ ꠇꠞꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠝꠢꠤꠝꠣ ꠀꠞ ꠒꠞ-ꠈꠚ ꠀꠟꠣ ꠘꠣꠝꠞ ꠁꠎ꠆ꠎꠔ ꠘꠣ ꠇꠞꠅ, 59 ꠔꠦ ꠝꠣꠛꠥꠖꠦ ꠔꠥꠝꠞꠣ ꠀꠞ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠞꠦ ꠛꠦꠎꠥꠁꠔꠣ ꠛꠦꠝꠣꠞ ꠖꠤꠛꠣ, ꠅꠃ ꠛꠦꠝꠣꠞꠦ ꠔꠥꠝꠞꠣ ꠟꠣꠝ꠆ꠛꠣ ꠡꠝꠄ ꠜꠥꠉꠣꠘ꠆ꠔꠤ ꠇꠞꠛꠣꠄ। 60 ꠝꠤꠡꠞꠅ ꠕꠣꠇꠔꠦ ꠛꠦꠎꠥꠁꠔꠣ ꠎꠔ ꠛꠦꠝꠣꠞ-ꠀꠎꠣꠞ ꠖꠦꠈꠤꠀ ꠔꠥꠝꠞꠣ ꠇꠣꠙꠤꠔꠣꠄ, ꠢꠃ ꠛꠦꠝꠣꠞ-ꠀꠎꠣꠞ ꠅꠈꠘ ꠔꠥꠝꠞꠣꠞ ꠃꠙꠞꠦ ꠖꠤꠛꠣ, ꠁꠔꠣꠄ ꠔꠥꠝꠞꠣꠞ ꠙꠤꠍ ꠍꠣꠠꠔ ꠘꠣꠄ। 61 ꠀꠞ ꠅꠃ ꠔꠃꠞꠣꠔ ꠇꠤꠔꠣꠛꠅ ꠎꠦꠔꠣ ꠛꠦꠝꠣꠞꠞ ꠘꠣꠝ ꠟꠦꠈꠣ ꠘꠣꠁ, ꠅꠟꠣ ꠇꠑꠤꠘ ꠉꠎꠛꠤ ꠀꠞꠅ ꠛꠃꠔ ꠛꠦꠝꠣꠞ-ꠀꠎꠣꠞ ꠝꠣꠛꠥꠖꠦ ꠔꠥꠝꠞꠣꠞ ꠃꠙꠞꠦ ꠍꠣꠠꠤꠛꠣ, ꠔꠥꠝꠞꠣ ꠛꠤꠘꠣꠡ ꠅꠀꠞ ꠀꠉ ꠙꠞ꠆ꠎꠘ꠆ꠔ ꠁꠔꠣ ꠌꠣꠟꠥ ꠞꠁꠛ। 62 ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠘꠣ ꠝꠣꠘꠣꠄ, ꠔꠥꠝꠞꠣꠞ ꠝꠣꠘꠡꠞ ꠙꠞꠤꠝꠣꠘ ꠅꠈꠘ ꠀꠍꠝꠣꠘꠞ ꠔꠦꠞꠣꠞ ꠟꠣꠈꠣꠘ ꠛꠃꠔ ꠛꠦꠡꠤ ꠅꠁꠟꠦꠅ, ꠁꠔꠣ ꠝꠞꠤꠀ ꠈꠥꠛ ꠕꠥꠠꠣ ꠛꠣꠌꠤꠀ ꠞꠁꠛꠣ। 63 ꠝꠣꠛꠥꠖꠦ ꠈꠥꠡꠤ ꠅꠁꠀ ꠔꠥꠝꠞꠣꠞꠦ ꠎꠦꠟꠣ ꠀꠄ-ꠃꠘ꠆ꠘꠔꠤ ꠖꠤꠀ ꠛꠣꠠꠣꠁꠍꠟꠣ, ꠔꠥꠝꠞꠣꠞ ꠝꠣꠘꠡꠞ ꠙꠞꠤꠝꠣꠘ ꠛꠠ ꠇꠞꠍꠟꠣ, ꠢꠃ ꠟꠣꠈꠣꠘ ꠈꠥꠡꠤ ꠇꠞꠤꠀ ꠅꠈꠘ ꠢꠤꠞꠛꠣꠞ ꠔꠥꠝꠞꠣꠞꠦ ꠛꠤꠘꠣꠡ ꠇꠞꠤꠀ ꠘꠤꠙꠣꠔ ꠇꠞꠛꠣ। ꠔꠥꠝꠞꠣ ꠅꠈꠘ ꠎꠦ ꠖꠦꠡꠞ ꠖꠈꠟꠖꠣꠞꠤ ꠙꠣꠁꠞꠣꠄ, ꠢꠃ ꠖꠦꠡ ꠕꠣꠇꠤ ꠔꠥꠝꠞꠣꠞꠦ ꠇꠣꠠꠤꠀ ꠘꠦꠅꠀ ꠅꠁꠛ।

64 “ꠛꠣꠖꠦ ꠎꠉꠔꠞ ꠄꠇ ꠇꠤꠘꠣꠞꠣ ꠕꠣꠇꠤ ꠀꠞꠇ ꠇꠤꠘꠣꠞꠣ ꠙꠞ꠆ꠎꠘ꠆ꠔ, ꠢꠇꠟ ꠎꠣꠔꠤꠞ ꠝꠣꠎꠦ ꠔꠥꠝꠞꠣꠞꠦ ꠍꠤꠔ꠆ꠞꠣꠁ ꠖꠤꠛꠣ। ꠢꠘꠅ ꠞꠁꠀ ꠔꠥꠝꠞꠣ ꠀꠞ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠅꠌꠤꠘꠣ ꠖꠦꠛ-ꠖꠦꠛꠤꠞ ꠡꠦꠛꠣ ꠇꠞꠛꠣꠄ, ꠟꠣꠇꠠꠤ ꠀꠞ ꠙꠣꠔ꠆ꠔꠞꠞ ꠝꠥꠞ꠆ꠔꠤꠞꠦ ꠙꠥꠎꠣ ꠖꠤꠛꠣꠄ। 65 ꠢꠃ ꠎꠣꠔꠤ ꠅꠇꠟꠞ ꠟꠉꠦ ꠞꠁꠀ ꠔꠥꠝꠞꠣꠞ ꠡꠣꠘ꠆ꠔꠤ ꠝꠤꠟꠔ ꠘꠣꠄ, ꠔꠥꠝꠞꠣꠞ ꠀꠞꠣꠝꠞ ꠟꠣꠉꠤ ꠇꠥꠘꠥ ꠎꠣꠉꠣ ꠞꠁꠔ ꠘꠣꠄ। ꠢꠘꠅ ꠝꠣꠛꠥꠖꠦ ꠔꠥꠝꠞꠣꠞ ꠝꠘꠞ ꠝꠣꠎꠦ ꠢꠣꠄ-ꠢꠥꠔꠣꠡ ꠛꠣꠠꠣꠁꠛꠣ, ꠔꠥꠝꠞꠣꠞ ꠌꠈꠥꠞ ꠢꠇꠟ ꠀꠡꠣ-ꠜꠞꠡꠣ, ꠀꠞ ꠖꠤꠟꠞ ꠡꠈꠞꠦ ꠔꠣꠁꠘ ꠘꠤꠞꠣꠡ, ꠘꠤꠡ꠆ꠔꠦꠎ ꠇꠞꠛꠣ। 66 ꠇꠤꠔꠣ ꠊꠐꠤꠛ ꠛꠣ ꠘꠣ ꠊꠐꠤꠛ ꠅꠔꠣ ꠌꠤꠘ꠆ꠔꠣꠄ ꠔꠥꠝꠞꠣꠞ ꠖꠤꠘ ꠉꠥꠎꠞꠤꠛ, ꠖꠤꠘ-ꠞꠣꠁꠔ ꠢꠣꠝꠦꠡꠣ ꠈꠣꠟꠤ ꠎꠣꠘꠞ ꠒꠞ-ꠜꠄꠄ ꠅꠡꠣꠘ꠆ꠔꠤꠔ ꠞꠁꠛꠣꠄ, ꠛꠣꠌꠤꠀ ꠞꠅꠀꠞ ꠇꠥꠘꠥ ꠘꠤꠌ꠆ꠌꠄꠅꠔꠣ ꠙꠣꠁꠔꠣꠄ ꠘꠣꠄ। 67 ꠔꠥꠝꠞꠣ ꠝꠘꠞ ꠒꠞꠦ, ꠎꠣꠘꠞ ꠝꠣꠁꠞꠦ, ꠌꠃꠈꠦ ꠇꠥꠘꠥ ꠇꠥꠟ-ꠇꠤꠘꠣꠞ ꠘꠣ ꠖꠦꠈꠤꠀ ꠈꠣꠟꠤ ꠢꠣꠄ ꠢꠣꠄ ꠇꠞꠛꠣꠄ। ꠛꠤꠀꠘ ꠅꠁꠟꠦ ꠇꠁꠛꠣꠄ ꠎꠟꠖꠤ ꠞꠣꠁꠔ ꠅꠃꠇ, ꠀꠞ ꠞꠣꠁꠔ ꠅꠁꠟꠦ ꠇꠁꠛꠣꠄ ꠎꠟꠖꠤ ꠖꠤꠘ ꠅꠃꠇ। 68 ꠢꠃ ꠎꠦ ꠝꠤꠡꠞ ꠖꠦꠡꠞ ꠛꠦꠙꠣꠞꠦ ꠀꠝꠤ ꠇꠁꠍꠟꠣꠝ, ꠔꠥꠝꠞꠣ ꠢꠤꠘꠅ ꠀꠞ ꠎꠣꠅꠀ ꠅꠁꠔ ꠘꠣꠄ। ꠅꠁꠟꠦ ꠢꠃ ꠉꠎꠛꠞ ꠡꠝꠄ ꠝꠣꠛꠥꠖꠦ ꠔꠥꠝꠞꠣꠞꠦ ꠎꠣꠎꠅ ꠇꠞꠤ ꠢꠤꠞꠛꠣꠞ ꠝꠤꠡꠞ ꠖꠦꠡꠅ ꠘꠦꠅꠀꠁꠛꠣ, ꠘꠤꠀ ꠢꠣꠞꠟꠦ ꠔꠥꠝꠞꠣ ꠉꠥꠟꠣꠝꠤ ꠇꠞꠣꠞ ꠟꠣꠉꠤ ꠢꠘꠅ ꠛꠤꠇꠤ ꠈꠣꠁꠔꠣꠄ ꠌꠣꠁꠛꠣꠄ, ꠅꠁꠟꠦ ꠇꠦꠃ ꠔꠥꠝꠞꠣꠞꠦ ꠇꠤꠘꠔ ꠘꠣꠄ।”