1 ꠅꠃ ꠡꠝꠄ ꠝꠥꠍꠣꠄ ꠔꠣꠘ ꠢꠃꠞ ꠝꠣꠖꠤꠀꠘ ꠎꠣꠔꠤꠞ ꠁꠝꠣꠝ ꠍꠣꠛ ꠢꠎꠞꠔ ꠡꠥꠀꠁꠛꠞ ꠍꠣꠉꠟ-ꠝꠦꠠꠣ ꠞꠣꠈꠔꠣ। ꠄꠇꠖꠤꠘ ꠔꠣꠘ ꠍꠣꠉꠟꠞ ꠙꠣꠟ ꠟꠁꠀ ꠝꠞꠥꠜꠥꠝꠤꠞ ꠢꠦꠡ ꠉꠣꠟꠣꠔ ꠀꠟ꠆ꠟꠣꠞ ꠢꠃ ꠔꠥꠞ ꠙꠣꠠꠞ ꠇꠣꠍꠣꠔ ꠉꠦꠟꠣ। 2 ꠢꠘꠅ ꠄꠇ ꠎꠋꠟꠣꠞ ꠝꠣꠎꠦ ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠀꠉꠥꠘꠤꠞ ꠟꠣꠈꠣꠘ ꠘꠥꠞꠞ ꠝꠣꠎ ꠕꠣꠇꠤ ꠔꠣꠘꠞꠦ ꠖꠦꠈꠣ ꠖꠤꠟꠣ। ꠝꠥꠍꠣꠄ ꠖꠦꠈꠟꠣ, ꠎꠋꠟꠣꠞ ꠝꠣꠎꠦ ꠀꠉꠥꠁꠘ ꠎꠟꠦꠞ ꠅꠁꠟꠦ ꠎꠋꠟꠣ ꠎꠟꠦꠞ ꠘꠣ। 3 ꠅꠃ ꠔꠣꠁꠘ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ, “ꠎꠋꠟꠣ ꠎꠦ ꠎꠟꠦꠞ ꠘꠣ, ꠄꠞ ꠇꠣꠞꠘ ꠇꠤꠔꠣ? ꠔꠦ ꠀꠞꠅ ꠇꠣꠍꠣꠔ ꠉꠤꠀ ꠖꠦꠈꠤ ꠌꠣꠁꠘ।”

4 ꠀꠟ꠆ꠟꠣꠄ ꠎꠦꠛꠟꠣ ꠖꠦꠈꠟꠣ ꠄꠁꠘ ꠖꠦꠈꠣꠞ ꠟꠣꠉꠤ ꠇꠣꠍꠣꠔ ꠎꠣꠁꠞꠣꠉꠤ, ꠅꠃ ꠡꠝꠄ ꠔꠣꠁꠘ ꠎꠋꠟꠣꠞ ꠝꠣꠎ ꠕꠣꠇꠤ ꠒꠣꠇꠤꠀ ꠇꠁꠟꠣ, “ꠝꠥꠍꠣ, ꠅ ꠝꠥꠍꠣ!” ꠝꠥꠍꠣꠄ ꠇꠁꠟꠣ, “ꠅꠃꠘꠥ ꠀꠝꠤ।” 5 ꠀꠟ꠆ꠟꠣꠄ ꠇꠁꠟꠣ, “ꠀꠞ ꠍꠣꠝꠘꠦ ꠀꠉꠥꠀꠁꠅ ꠘꠣ। ꠔꠥꠝꠣꠞ ꠙꠣꠅ ꠕꠣꠇꠤ ꠎꠥꠔꠣ ꠈꠥꠟꠤꠟꠣꠅ। ꠎꠣꠘ ꠘꠤ, ꠔꠥꠝꠤ ꠅꠈꠘ ꠎꠦ ꠎꠣꠉꠣꠔ ꠃꠛꠣꠁꠍ ꠁꠈꠣꠘ ꠙꠣꠇ ꠎꠣꠉꠣ। 6 ꠢꠥꠘꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠣꠞ ꠛꠣꠚꠞ ꠝꠣꠛꠥꠖ, ꠁꠛ꠆ꠞꠣꠢꠤꠝꠞ ꠝꠣꠛꠥꠖ, ꠁꠍꠢꠣꠇꠞ ꠝꠣꠛꠥꠖ ꠀꠞ ꠁꠀꠇꠥꠛꠞ ꠝꠣꠛꠥꠖ।” ꠁꠈꠣꠘ ꠢꠥꠘꠤꠀꠃ ꠝꠥꠍꠣꠄ ꠔꠣꠘ ꠝꠥꠈ ꠟꠥꠇꠣꠁꠟ꠆ꠟꠣ। ꠀꠟ꠆ꠟꠣꠞ ꠛꠣꠄ ꠌꠣꠁꠔꠦ ꠔꠣꠘ ꠖꠤꠟꠅ ꠒꠞ ꠢꠣꠝꠣꠁꠉꠦꠟ।

7 ꠝꠣꠛꠥꠖꠦ ꠇꠁꠟꠣ, “ꠀꠝꠤ ꠝꠤꠡꠞ ꠖꠦꠡꠅ ꠀꠝꠣꠞ ꠛꠘ꠆ꠖꠣ ꠅꠇꠟꠞ ꠖꠥꠈ-ꠝꠍꠤꠛꠔ ꠖꠦꠈꠤꠀꠞ। ꠝꠤꠡꠞꠤ ꠡꠞ꠆ꠖꠣꠞ ꠅꠇꠟꠞ ꠎꠥꠟꠥꠝꠞ ꠟꠣꠉꠤ ꠔꠣꠞꠣꠞ ꠇꠣꠘ꠆ꠖꠘ ꠢꠥꠘꠤꠀꠞ। ꠔꠣꠞꠣꠞ ꠖꠥꠈ-ꠇꠡ꠆ꠐ ꠢꠇꠟꠔꠣ ꠀꠝꠤ ꠖꠦꠈꠍꠤ। 8 ꠖꠦꠈꠤꠀ ꠝꠤꠡꠞꠤ ꠅꠇꠟꠞ ꠀꠔ ꠕꠣꠇꠤ ꠔꠣꠞꠣꠞꠦ ꠛꠣꠌꠣꠁꠔꠣꠝ ꠇꠞꠤ ꠀꠝꠤ ꠘꠤꠎꠦ ꠟꠣꠝꠤꠀ ꠀꠁꠍꠤ। ꠔꠦ ꠀꠝꠤ ꠔꠣꠞꠣꠞꠦ ꠝꠤꠡꠞ ꠕꠣꠇꠤ ꠢꠞꠣꠁꠀ ꠘꠤꠝꠥꠉꠤ। ꠘꠤꠀ ꠞꠡꠣꠁꠟ ꠎꠝꠤꠞ ꠛꠃꠔ ꠛꠠ ꠡꠥꠘ꠆ꠖꠞ ꠄꠇ ꠖꠦꠡ ꠖꠤꠝꠥ। ꠁꠈꠣꠘ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠖꠦꠡ। ꠅꠃ ꠖꠦꠡ ꠅꠁꠟ ꠅꠈꠘꠇꠥꠞ ꠇꠦꠘꠣꠘꠤ, ꠢꠤꠐ꠆ꠐꠤ, ꠀꠝꠥꠞꠤ, ꠚꠣꠞꠤꠎꠤ, ꠢꠤꠛ꠆ꠛꠤ ꠀꠞ ꠎꠤꠛꠥꠎꠤ ꠅꠇꠟꠞ ꠖꠦꠡ। 9 ꠛꠘꠤ ꠁꠍꠞꠣꠁꠟꠞ ꠚꠞꠤꠀꠖ ꠀꠝꠣꠞ ꠖꠞꠛꠣꠞꠅ ꠀꠁꠍꠦ, ꠝꠤꠡꠞꠤ ꠅꠇꠟꠦ ꠔꠣꠞꠣꠞꠦ ꠎꠦꠟꠣ ꠍꠣꠔꠣꠁꠞꠣ, ꠁꠔꠣ ꠀꠝꠤ ꠖꠦꠈꠤꠀꠞ। 10 ꠄꠞꠟꠣꠉꠤ ꠀꠝꠤ ꠔꠥꠝꠣꠞꠦ ꠚꠦꠞꠣꠃꠘꠞ ꠉꠦꠍꠦ ꠙꠣꠑꠣꠁꠀꠞ। ꠔꠥꠝꠤ ꠎꠣꠅ, ꠉꠤꠀ ꠀꠝꠣꠞ ꠛꠘ꠆ꠖꠣ ꠛꠘꠤ ꠁꠍꠞꠣꠁꠟꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤꠀ ꠀꠘꠅ।”

11 ꠝꠥꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤ ꠀꠞꠇ ꠎꠘ ꠇꠦ, ꠎꠦꠁꠘ ꠚꠦꠞꠣꠃꠘꠞ ꠍꠣꠝꠘꠦ ꠉꠤꠀ ꠝꠤꠡꠞ ꠖꠦꠡ ꠕꠣꠇꠤ ꠔꠣꠞꠣꠞꠦ ꠢꠞꠣꠁꠔꠣꠝ ꠙꠣꠞꠝꠥ?”

12 ꠀꠟ꠆ꠟꠣꠄ ꠇꠁꠟꠣ, “ꠀꠝꠤ ꠔ ꠔꠥꠝꠣꠞ ꠟꠉꠦ ꠟꠉꠦ ꠞꠁꠝꠥ। ꠔꠥꠝꠤ ꠝꠤꠡꠞ ꠕꠣꠇꠤ ꠝꠣꠘꠡꠞꠦ ꠢꠞꠣꠁꠀ ꠀꠘꠤꠀ, ꠔꠣꠞꠣꠞꠦ ꠟꠁꠀ ꠅꠃ ꠙꠣꠠꠅ ꠀꠝꠣꠞ ꠄꠛꠣꠖꠔ ꠇꠞꠛꠣꠄ। ꠔꠦꠃ ꠛꠥꠎꠛꠣꠄ ꠀꠝꠤꠃ ꠔꠥꠝꠣꠞꠦ ꠙꠣꠑꠣꠁꠍꠤ।”

13 ꠝꠥꠍꠣꠄ ꠀꠞꠎ ꠇꠞꠟꠣ, “ꠖꠦꠈꠃꠇ꠆ꠇꠣ, ꠀꠝꠤ ꠎꠦꠛꠟꠣ ꠛꠘꠤ ꠁꠍꠞꠣꠁꠟꠞꠦ ꠉꠤꠀ ꠇꠁꠝꠥ, ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠝꠣꠛꠥꠖꠦ ꠀꠝꠣꠞꠦ ꠙꠣꠑꠣꠁꠍꠂꠘ, ꠅꠃ ꠡꠝꠄ ꠔꠣꠞꠣ ꠎꠥꠖꠤ ꠎꠤꠇꠣꠁꠘ ꠔꠣꠘ ꠘꠣꠝ ꠇꠤꠔꠣ, ꠔꠦ ꠔꠣꠞꠣꠞꠦ ꠇꠤꠔꠣ ꠎꠥꠀꠙ ꠖꠤꠔꠣꠝ?”

14 ꠀꠟ꠆ꠟꠣꠄ ꠇꠁꠟꠣ, “ꠀꠝꠤ ꠎꠦꠁꠘ ꠀꠍꠤ, ꠀꠍꠤꠃ। ꠛꠘꠤ ꠁꠍꠞꠣꠁꠟꠞꠦ ꠅꠃꠟꠣ ꠇꠁꠅ, ꠎꠦꠘ ꠘꠣꠝ ‘ꠀꠝꠤ ꠀꠍꠤ’ ꠔꠣꠁꠘ ꠀꠝꠣꠞꠦ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠁꠍꠂꠘ।”

15 ꠔꠣꠁꠘ ꠀꠞꠅ ꠇꠁꠟꠣ, “ꠔꠥꠝꠤ ꠉꠤꠀ ꠔꠣꠞꠣꠞꠦ ꠇꠁꠅ, ‘ꠢꠃ ꠀꠟ꠆ꠟꠣ ꠎꠦꠁꠘ ꠢꠞ-ꠢꠣꠝꠦꠡꠣ ꠀꠍꠂꠘ, ꠄꠁꠘ ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠝꠣꠛꠥꠖ, ꠁꠛ꠆ꠞꠣꠢꠤꠝꠞ ꠝꠣꠛꠥꠖ, ꠁꠍꠢꠣꠇꠞ ꠝꠣꠛꠥꠖ ꠀꠞ ꠁꠀꠇꠥꠛꠞ ꠝꠣꠛꠥꠖ, ꠄꠁꠘꠃ ꠀꠝꠣꠞꠦ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠁꠍꠂꠘ।’

“ꠀꠝꠣꠞ ꠢꠞ-ꠢꠣꠝꠦꠡꠣꠇꠥꠞ ꠘꠣꠝ ‘ꠀꠝꠤ ꠎꠦꠁꠘ ꠀꠍꠤ’। ꠎꠥꠉꠦ ꠎꠥꠉꠦ, ꠙꠥꠞꠥꠡꠦ ꠙꠥꠞꠥꠡꠦ ꠅꠃ ꠘꠣꠝ ꠇꠣꠁꠝ ꠞꠁꠛ। 16 ꠔꠥꠝꠤ ꠎꠣꠅ, ꠉꠤꠀ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠤꠀ ꠇꠅ, ꠢꠃ ꠀꠟ꠆ꠟꠣ, ꠎꠦꠁꠘ ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠝꠣꠛꠥꠖ, ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠝꠣꠛꠥꠖ, ꠔꠣꠁꠘ ꠀꠝꠣꠞꠦ ꠖꠤꠖꠣꠞ ꠖꠤꠀ ꠇꠁꠍꠂꠘ, ꠔꠣꠁꠘ ꠔꠥꠝꠞꠣꠞ ꠛꠣꠄ ꠈꠤꠀꠟ ꠇꠞꠍꠂꠘ, ꠔꠥꠝꠞꠣꠞ ꠃꠙꠞꠞ ꠎꠥꠟꠥꠝ-ꠝꠍꠤꠛꠔ ꠖꠦꠈꠍꠂꠘ, ꠝꠤꠡꠞ ꠖꠦꠡꠅ ꠔꠥꠝꠞꠣꠞ ꠛꠣꠄ ꠎꠦꠔꠣ ꠇꠞꠣ ꠅꠞ ꠄꠅꠔꠣ ꠔꠣꠁꠘ ꠈꠤꠀꠟ ꠇꠞꠍꠂꠘ। 17 ꠅꠈꠘ ꠔꠣꠁꠘ ꠇꠁꠞꠣ, ꠝꠤꠡꠞꠞ ꠉꠥꠟꠣꠝꠤ ꠕꠣꠇꠤ ꠔꠥꠝꠞꠣꠞꠦ ꠛꠣꠌꠣꠁꠀ ꠇꠦꠘꠣꠘꠤ, ꠢꠤꠐ꠆ꠐꠤ, ꠀꠝꠥꠞꠤ, ꠚꠣꠞꠤꠎꠤ, ꠢꠤꠛ꠆ꠛꠤ ꠀꠞ ꠎꠤꠛꠥꠎꠤ ꠅꠇꠟꠞ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠖꠦꠡꠅ ꠔꠣꠁꠘ ꠔꠥꠝꠞꠣꠞꠦ ꠘꠤꠛꠣꠉꠤ।”

18 ꠀꠟ꠆ꠟꠣꠄ ꠀꠞꠅ ꠇꠁꠟꠣ, “ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠦ ꠔꠥꠝꠣꠞ ꠇꠕꠣ ꠢꠥꠘꠛꠣ, ꠔꠥꠝꠤ ꠔꠣꠞꠣꠞꠦ ꠟꠉꠦ ꠟꠁꠀ ꠝꠤꠡꠞꠞ ꠛꠣꠖꠡꠣꠞ ꠉꠦꠍꠦ ꠎꠣꠁꠅ। ꠉꠤꠀ ꠇꠁꠅ, ‘ꠀꠟ꠆ꠟꠣ ꠎꠦꠁꠘ ꠁꠛꠞꠣꠘꠤ ꠅꠇꠟꠞ ꠝꠣꠛꠥꠖ, ꠔꠣꠁꠘ ꠀꠝꠣꠞꠦ ꠖꠞꠡꠘ ꠖꠤꠍꠂꠘ। ꠄꠞꠟꠣꠉꠤ ꠀꠝꠞꠣ ꠔꠣꠘ ꠘꠣꠝꠦ ꠄꠇꠈꠣꠘ ꠇꠥꠞꠛꠣꠘꠤ ꠇꠞꠔꠣꠝ ꠌꠣꠁꠀꠞ, ꠀꠝꠞꠣ ꠝꠞꠥꠜꠥꠝꠤꠞ ꠛꠣꠄ ꠔꠤꠘ ꠖꠤꠘꠞ ꠙꠕ ꠉꠤꠀ ꠇꠥꠞꠛꠣꠘꠤ ꠖꠤꠝꠥ, ꠔꠦ ꠀꠝꠞꠣꠞꠦ ꠎꠣꠅꠀꠞ ꠅꠘꠥꠝꠔꠤ ꠖꠦꠃꠇ꠆ꠇꠣ।’ 19 ꠅꠁꠟꠦ ꠀꠝꠤ ꠎꠣꠘꠤ ꠝꠤꠡꠞꠞ ꠛꠣꠖꠡꠣꠄ ꠔꠥꠝꠞꠣꠞꠦ ꠎꠣꠁꠔꠦ ꠖꠤꠔ ꠘꠣꠄ, ꠎꠥꠞ-ꠎꠛꠞꠖꠡ꠆ꠔꠤ ꠇꠞꠟꠦꠅ ꠖꠤꠔ ꠘꠣꠄ। 20 ꠔꠦꠃ ꠀꠝꠤ ꠀꠝꠣꠞ ꠇꠥꠖꠞꠔꠤ ꠀꠔ ꠟꠣꠉꠣꠁꠝꠥ ꠀꠞ ꠅꠃꠟꠣ ꠀꠌꠣꠘꠇ ꠉꠎꠛ ꠘꠣꠎꠤꠟ ꠇꠞꠝꠥ, ꠎꠣꠔꠦ ꠢꠦ ꠔꠥꠝꠞꠣꠞꠦ ꠎꠣꠁꠔꠦ ꠖꠦꠄ। 21 ꠀꠞ ꠀꠝꠤ ꠝꠤꠡꠞꠤ ꠅꠇꠟꠞ ꠖꠤꠟꠞ ꠝꠣꠎꠦ ꠛꠘꠤ ꠁꠍꠞꠣꠁꠟꠞ ꠛꠣꠄ ꠄꠝꠘ ꠄꠇ ꠖꠄꠀꠞ ꠜꠣꠛ ꠙꠄꠖꠣ ꠇꠞꠣꠁꠝꠥ, ꠄꠞꠣ ꠎꠣꠘꠥ ꠝꠤꠡꠞ ꠕꠣꠇꠤ ꠈꠣꠟꠤ ꠀꠔꠦ ꠘꠣ ꠎꠣꠁꠘ। 22 ꠢꠇꠟ ꠁꠍꠞꠣꠁꠟꠤ ꠛꠦꠐꠤꠘ꠆ꠔꠦ ꠔꠣꠞꠣꠞ ꠀꠞꠤ-ꠚꠞꠤ ꠛꠣ ꠎꠦꠞꠣꠞ ꠛꠣꠠꠤꠔ ꠔꠣꠞꠣ ꠞꠂꠘ, ꠅꠃꠟꠣ ꠝꠤꠡꠞꠤ ꠛꠦꠐꠤꠘ꠆ꠔꠞ ꠉꠦꠍ ꠕꠣꠇꠤ ꠔꠣꠞꠣꠞ ꠡꠥꠘꠣ-ꠞꠥꠙꠣꠞ ꠉꠄꠘꠣ-ꠉꠣꠐꠤ ꠀꠞ ꠜꠣꠟꠣ ꠇꠣꠙꠠ-ꠌꠥꠙꠠ ꠈꠥꠎꠤꠀ ꠘꠤꠅ। ꠅꠔꠣ ꠖꠤꠀ ꠔꠥꠝꠞꠣꠞ ꠙꠥꠀ-ꠙꠥꠠꠤꠘꠞꠦꠅ ꠢꠣꠎꠣꠁꠅ, ꠅꠃ ꠘꠝꠥꠘꠣꠄ ꠔꠥꠝꠞꠣ ꠝꠤꠡꠞꠤꠘ꠆ꠔꠞ ꠗꠘ-ꠍꠣꠝꠣꠘꠣ ꠖꠈꠟ ꠇꠞꠛꠣꠄ।”