1 ꠝꠥꠍꠣꠄ ꠎꠥꠀꠙ ꠖꠤꠟꠣ, “ꠅ ꠝꠣꠛꠥꠖ, ꠔꠣꠞꠣ ꠎꠥꠖꠤ ꠀꠝꠣꠞꠦ ꠄꠇꠤꠘ ꠘꠣ ꠇꠞꠂꠘ, ꠀꠝꠣꠞ ꠝꠣꠔ ꠘꠣ ꠢꠥꠘꠂꠘ ꠛꠣ ꠔꠣꠞꠣ ꠎꠥꠖꠤ ꠇꠂꠘ, ꠝꠣꠛꠥꠖꠦ ꠔꠥꠝꠣꠞꠦ ꠖꠞꠡꠘ ꠖꠤꠍꠂꠘ ꠘꠣ, ꠔꠦ ꠀꠝꠤ ꠇꠤꠔꠣ ꠇꠞꠔꠣꠝ?” 2 ꠔꠦꠃ ꠀꠟ꠆ꠟꠣꠄ ꠔꠣꠘꠦ ꠎꠤꠇꠣꠁꠟꠣ, “ꠔꠥꠝꠣꠞ ꠀꠔꠅ ꠁꠉꠥ ꠇꠤꠔꠣ?” ꠔꠣꠁꠘ ꠇꠁꠟꠣ, “ꠄꠉꠥ ꠟꠣꠑꠤ।” 3 ꠀꠟ꠆ꠟꠣꠄ ꠇꠁꠟꠣ, “ꠅꠇꠐꠣ ꠝꠣꠐꠤꠔ ꠚꠣꠟꠣꠅ।” ꠝꠥꠍꠣꠄ ꠟꠣꠑꠤꠞꠦ ꠝꠣꠐꠤꠔ ꠚꠣꠟꠣꠁꠔꠦꠃ ꠁꠐꠣ ꠢꠣꠚ ꠅꠁꠉꠦꠟ। ꠢꠣꠚ ꠖꠦꠈꠤꠀꠃ ꠔꠣꠁꠘ ꠚꠣꠟꠖꠤ ꠢꠞꠤ ꠉꠦꠟꠣ। 4 ꠀꠟ꠆ꠟꠣꠄ ꠔꠣꠘꠦ ꠢꠥꠇꠥꠝ ꠇꠞꠟꠣ, “ꠀꠔ ꠛꠣꠠꠣꠁꠀ ꠅꠉꠥꠞ ꠟꠦꠘ꠆ꠎꠅ ꠗꠞꠅ।” ꠀꠞ ꠔꠣꠁꠘ ꠗꠞꠣꠞ ꠟꠉꠦ ꠟꠉꠦ ꠅꠉꠥ ꠢꠤꠞꠛꠣꠞ ꠟꠣꠑꠤ ꠅꠁꠉꠦꠟ। 5 ꠛꠣꠖꠦ ꠀꠟ꠆ꠟꠣꠄ ꠇꠁꠟꠣ, “ꠔꠥꠝꠤꠅ ꠅꠃꠟꠣ ꠇꠞꠤꠅ, ꠔꠦꠃ ꠔꠣꠞꠣ ꠢꠣꠍꠣꠃ ꠄꠇꠤꠘ ꠇꠞꠛꠣ ꠔꠣꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠞ ꠝꠣꠛꠥꠖ, ꠁꠛ꠆ꠞꠣꠢꠤꠝꠞ ꠝꠣꠛꠥꠖ, ꠁꠍꠢꠣꠇꠞ ꠝꠣꠛꠥꠖ ꠀꠞ ꠁꠀꠇꠥꠛꠞ ꠝꠣꠛꠥꠖꠦ ꠔꠥꠝꠣꠞꠦ ꠖꠞꠡꠘ ꠖꠤꠍꠂꠘ।”

6 ꠀꠟ꠆ꠟꠣꠄ ꠀꠞꠅ ꠇꠁꠟꠣ, “ꠔꠥꠝꠣꠞ ꠀꠔ ꠔꠥꠝꠣꠞ ꠌꠣꠖ꠆ꠖꠞꠞ ꠔꠟꠦ ꠢꠣꠞꠣꠅ।” ꠔꠣꠁꠘ ꠀꠔ ꠢꠣꠞꠣꠁꠟꠣ, ꠀꠞ ꠛꠣꠞ ꠇꠞꠣꠞ ꠛꠣꠖꠦꠃ ꠔꠣꠘ ꠀꠔ ꠇꠥꠡ꠆ꠑ-ꠗꠟꠛꠦꠖꠣ ꠛꠦꠝꠣꠞꠦ ꠖꠥꠗꠞ ꠟꠣꠈꠣꠘ ꠗꠟꠣ ꠅꠁꠉꠦꠟ। 7 ꠀꠟ꠆ꠟꠣꠄ ꠇꠁꠟꠣ, “ꠔꠥꠝꠣꠞ ꠀꠔ ꠢꠤꠞꠛꠣꠞ ꠢꠘꠅ ꠢꠣꠞꠣꠅ।” ꠔꠣꠁꠘ ꠢꠣꠞꠣꠁꠟꠣ ꠀꠞ ꠌꠣꠖ꠆ꠖꠞꠞ ꠔꠟ ꠕꠣꠇꠤ ꠛꠣꠞ ꠇꠞꠤꠀ ꠖꠦꠈꠂꠘ, ꠀꠉꠞ ꠟꠣꠈꠣꠘ ꠜꠣꠟꠣ ꠅꠁꠉꠦꠍꠦ।

8 ꠀꠟ꠆ꠟꠣꠄ ꠇꠁꠟꠣ, “ꠔꠣꠞꠣ ꠎꠥꠖꠤ ꠔꠥꠝꠣꠞꠦ ꠄꠇꠤꠘ ꠘꠣ ꠇꠞꠂꠘ, ꠔꠦ ꠔꠥꠝꠣꠞ ꠟꠣꠑꠤꠞꠦ ꠢꠣꠚ ꠅꠀ ꠖꠦꠈꠟꠦ ꠄꠇꠤꠘ ꠇꠞꠛꠣ, ꠀꠞ ꠄꠅꠐꠣꠄ ꠄꠇꠤꠘ ꠘꠣ ꠇꠞꠟꠦ ꠔꠥꠝꠣꠞ ꠀꠔꠞ ꠛꠦꠝꠣꠞꠞ ꠇꠦꠞꠣꠝꠔꠤ ꠖꠦꠈꠟꠦ ꠔꠣꠞꠣ ꠄꠇꠤꠘ ꠇꠞꠛꠣ। 9 ꠀꠞ ꠎꠥꠖꠤ ꠁ ꠖꠥꠁꠅ ꠇꠦꠞꠣꠝꠔꠤꠄꠅ ꠄꠇꠤꠘ ꠘꠣ ꠇꠞꠂꠘ, ꠔꠥꠝꠣꠞ ꠇꠕꠣ ꠘꠣ ꠝꠣꠘꠂꠘ, ꠔꠦ ꠔꠥꠝꠤ ꠘꠤꠟ ꠘꠖ ꠕꠣꠇꠤ ꠕꠥꠠꠣ ꠙꠣꠘꠤ ꠀꠘꠤꠀ ꠢꠥꠇꠘꠣ ꠝꠣꠐꠤꠔ ꠚꠣꠟꠣꠁꠅ, ꠖꠦꠈꠛꠣꠄ ꠝꠣꠐꠤꠔ ꠙꠠꠤꠀꠃ ꠁ ꠙꠣꠘꠤ ꠟꠃ ꠅꠁꠎꠤꠛ।”

10 ꠅꠃ ꠝꠥꠍꠣꠄ ꠝꠣꠛꠥꠖꠞꠦ ꠇꠁꠟꠣ, “ꠅ ꠝꠣꠟꠤꠇ, ꠀꠝꠤ ꠔ ꠜꠣꠟꠣ ꠇꠞꠤ ꠝꠣꠔ-ꠇꠕꠣꠃ ꠝꠣꠔꠔꠣꠝ ꠙꠣꠞꠤ ꠘꠣ, ꠀꠉꠦꠅ ꠙꠣꠞꠔꠣꠝ ꠘꠣ ꠀꠞ ꠀꠙꠘꠦ ꠁ ꠉꠥꠟꠣꠝꠞ ꠟꠉꠦ ꠛꠣꠔꠌꠤꠔ ꠇꠞꠣꠞ ꠛꠣꠖꠦꠅ ꠙꠣꠞꠤ ꠘꠣ, ꠀꠝꠣꠞ ꠔ ꠎꠤꠚꠞꠣ ꠛꠣꠠꠥꠀ।” 11 ꠀꠟ꠆ꠟꠣꠄ ꠇꠁꠟꠣ, “ꠝꠣꠘꠡꠞ ꠝꠥꠈ ꠇꠦ ꠛꠣꠘꠣꠁꠍꠦ, ꠀꠝꠤ ꠘꠣꠄ ꠘꠤ? ꠇꠦ ꠝꠣꠘꠡꠞꠦ ꠛꠥꠛꠣ, ꠈꠣꠟꠥꠀ ꠛꠣ ꠀꠘ꠆ꠖꠣ ꠛꠣꠘꠣꠁꠘ? ꠌꠃꠈꠦ ꠖꠦꠈꠣꠞ ꠟꠣꠉꠤ ꠌꠈꠥꠞ ꠙꠣꠅꠀꠞ ꠇꠦ ꠖꠦꠁꠘ? ꠁꠔꠣ ꠔ ꠀꠝꠤ ꠀꠟ꠆ꠟꠣꠄꠃ ꠖꠦꠁ ꠘꠣ ꠘꠤ? 12 ꠔꠦ ꠔꠥꠝꠤ ꠎꠣꠅ, ꠉꠤꠀ ꠇꠤꠔꠣ ꠝꠣꠔꠤꠔꠣꠄ ꠀꠝꠤ ꠢꠤꠇꠣꠁꠀ ꠖꠤꠝꠥ। ꠔꠥꠝꠣꠞ ꠝꠥꠈꠞ ꠎꠛꠣꠘꠞꠦ ꠀꠝꠤ ꠡꠣꠁꠎ꠆ꠎ ꠇꠞꠝꠥ।”

13 ꠔꠣꠁꠘ ꠇꠁꠟꠣ, “ꠅ ꠝꠣꠟꠤꠇ, ꠀꠝꠤ ꠝꠤꠘꠔ ꠇꠞꠤꠀꠞ, ꠅꠁꠘ꠆ꠘ ꠇꠦꠃꠞꠞꠦ ꠙꠣꠑꠣꠁ ꠖꠦꠃꠇ꠆ꠇꠣ।” 14 ꠅꠃ ꠝꠥꠍꠣꠞ ꠃꠙꠞꠦ ꠝꠣꠛꠥꠖꠞ ꠉꠥꠍꠣ ꠃꠑꠟ। ꠔꠣꠁꠘ ꠇꠁꠟꠣ, “ꠔꠥꠝꠣꠞ ꠜꠣꠁ ꠢꠣꠞꠥꠘ ꠛꠤꠘ ꠟꠦꠛꠤ ꠀꠍꠦ ꠘꠣ ꠘꠤ? ꠀꠝꠤ ꠎꠣꠘꠤ, ꠢꠦ ꠜꠣꠟꠣ ꠛꠇ꠆ꠔꠤꠔꠣ ꠖꠤꠔ ꠙꠣꠞꠦ। ꠢꠦ ꠅꠈꠘ ꠔꠥꠝꠣꠞ ꠟꠉꠦ ꠖꠦꠈꠣ ꠇꠞꠣꠔ ꠀꠞ, ꠔꠥꠝꠣꠞꠦ ꠖꠦꠈꠤꠀ ꠢꠦ ꠈꠥꠛ ꠈꠥꠡꠤ ꠅꠁꠛ। 15 ꠔꠥꠝꠤ ꠢꠤꠇꠣꠁꠀ ꠖꠤꠅ ꠀꠞ ꠇꠁꠅ ꠢꠦ ꠇꠤꠔꠣ ꠝꠣꠔꠤꠔ। ꠀꠝꠤ ꠔꠥꠝꠞꠣ ꠖꠥꠁꠅꠎꠘꠞ ꠝꠥꠈꠞ ꠎꠛꠣꠘꠞꠦ ꠡꠣꠁꠎ꠆ꠎ ꠇꠞꠝꠥ। ꠀꠞ ꠢꠘꠅ ꠉꠤꠀ ꠇꠤꠔꠣ ꠇꠞꠔꠣꠄ ꠀꠝꠤ ꠢꠤꠇꠣꠁꠀ ꠖꠤꠝꠥ। 16 ꠔꠥꠝꠣꠞ ꠜꠣꠁ ꠢꠣꠞꠥꠘꠞ ꠝꠥꠈ ꠅꠁꠛ ꠔꠥꠝꠣꠞ ꠝꠥꠈ, ꠢꠦ ꠔꠥꠝꠣꠞ ꠅꠁꠀ ꠝꠣꠘꠡꠞ ꠟꠉꠦ ꠝꠣꠔꠤꠛ। ꠙꠦꠉꠣꠝ꠆ꠛꠞ ꠅꠇꠟꠦ ꠎꠦꠟꠣ ꠀꠟ꠆ꠟꠣꠞ ꠇꠣꠟꠣꠝ ꠇꠂꠘ, ꠢꠣꠞꠥꠘꠦ ꠅꠃꠟꠣ ꠔꠥꠝꠣꠞ ꠛꠥꠟꠤ ꠇꠁꠛ। 17 ꠅꠃ ꠟꠣꠑꠤ ꠔꠥꠝꠣꠞ ꠀꠔꠅ ꠞꠣꠈꠤꠅ, ꠁꠐꠣ ꠖꠤꠀ ꠢꠃ ꠇꠦꠞꠣꠝꠔꠤ-ꠝꠥꠎꠦꠎꠣ ꠅꠇꠟ ꠎꠣꠁꠞ ꠇꠞꠛꠣꠄ।”

18-19 ꠝꠣꠖꠤꠀꠘ ꠖꠦꠡꠅ ꠕꠣꠇꠔꠦꠃ ꠝꠣꠛꠥꠖꠦ ꠝꠥꠍꠣꠞꠦ ꠢꠥꠇꠥꠝ ꠇꠞꠍꠟꠣ, “ꠔꠥꠝꠤ ꠝꠤꠡꠞꠅ ꠎꠣꠅꠉꠤ, ꠇꠣꠞꠘ ꠝꠤꠡꠞꠞ ꠎꠦꠔꠣ ꠝꠣꠘꠡꠦ ꠔꠥꠝꠣꠞꠦ ꠈꠥꠘ ꠇꠞꠔꠣ ꠌꠣꠁꠍꠟꠣ, ꠁꠔꠣ ꠅꠈꠘ ꠝꠞꠤ ꠉꠦꠍꠂꠘ।” ꠔꠦꠃ ꠝꠥꠍꠣꠄ ꠔꠣꠘ ꠢꠃꠞ ꠡꠥꠀꠁꠛꠞ ꠇꠣꠍꠣꠔ ꠉꠤꠀ ꠇꠁꠟꠣ, “ꠀꠝꠤ ꠀꠝꠣꠞ ꠎꠘꠝ ꠝꠣꠐꠤ ꠝꠤꠡꠞ ꠖꠦꠡꠅ ꠎꠣꠁꠔꠣꠝ ꠌꠣꠁꠞꠣꠝ, ꠀꠝꠣꠞ ꠈꠦꠡ-ꠇꠥꠐꠥꠝ ꠅꠇꠟ ꠎꠤꠔꠣ ꠀꠍꠂꠘ ꠇꠤ ꠘꠣ, ꠔꠣꠞꠣꠞ ꠢꠣꠟ-ꠢꠇꠤꠇꠔ ꠖꠦꠈꠣꠔ ꠎꠣꠁꠔꠣꠝ, ꠔꠦ ꠀꠝꠣꠞꠦ ꠎꠣꠅꠀꠞ ꠅꠘꠥꠝꠔꠤ ꠖꠦꠃꠇ꠆ꠇꠣ।” ꠢꠃꠞꠦ ꠇꠁꠟꠣ, “ꠀꠁꠌ꠆ꠍꠣ, ꠍꠢꠤ-ꠍꠣꠟꠣꠝꠔꠦ ꠎꠣꠅ।” 20 ꠅꠃ ꠝꠥꠍꠣꠄ ꠔꠣꠘ ꠛꠤꠛꠤ ꠀꠞ ꠙꠥꠀꠂꠘ꠆ꠔꠞꠦ ꠉꠣꠗꠣꠞ ꠃꠙꠞꠦ ꠌꠠꠣꠁꠀ ꠝꠤꠡꠞꠞ ꠙꠕꠦ ꠞꠅꠀꠘꠣ ꠅꠁꠟꠣ। ꠔꠣꠘ ꠀꠔꠅ ꠀꠟ꠆ꠟꠣꠁ ꠇꠦꠞꠣꠝꠔꠤꠞ ꠢꠃ ꠟꠣꠑꠤ ꠞꠣꠈꠟꠣ।

21 ꠀꠟ꠆ꠟꠣꠄ ꠝꠥꠍꠣꠞꠦ ꠢꠥꠇꠥꠝ ꠖꠤꠟꠣ, “ꠔꠥꠝꠤ ꠝꠤꠡꠞꠅ ꠉꠤꠀ ꠢꠣꠞꠟꠦ ꠀꠝꠣꠞ ꠖꠦꠅꠀ ꠇꠦꠞꠣꠝꠔꠤ ꠅꠇꠟ ꠚꠦꠞꠣꠃꠘꠞ ꠍꠣꠝꠘꠦ ꠖꠦꠈꠣꠁꠅ, ꠅꠁꠟꠦ ꠀꠝꠤ ꠔꠣꠞ ꠖꠤꠟꠞꠦ ꠙꠣꠡꠣꠘ ꠛꠣꠘꠣꠁꠟꠤꠝꠥ, ꠢꠦ ꠝꠣꠘꠡꠞꠦ ꠍꠣꠠꠔ ꠘꠣꠄ। 22 ꠔꠥꠝꠤ ꠚꠦꠞꠣꠃꠘꠞꠦ ꠇꠁꠅ, ꠝꠣꠛꠥꠖꠦ ꠘꠤꠎꠦ ꠇꠁꠍꠂꠘ, ‘ꠛꠘꠤ ꠁꠍꠞꠣꠁꠟ ꠔ ꠀꠝꠣꠞ ꠙꠄꠟꠣ ꠙꠥꠔꠞ ꠟꠣꠈꠣꠘ*4:22 ꠀꠟ꠆ꠟꠣꠞ ꠙꠄꠟꠣ ꠙꠥꠔ, ꠝꠣꠘꠤ ꠔꠣꠘ ꠈꠣꠍ ꠝꠣꠄꠀꠞ ꠛꠘ꠆ꠖꠣ ꠅꠇꠟ। ꠁꠐꠣ ꠄꠇꠐꠣ ꠞꠥꠙꠇ ꠛꠣꠁꠇ꠆ꠇ। । 23 ꠀꠝꠤ ꠘꠤꠎꠦ ꠔꠥꠝꠣꠞꠦ ꠢꠥꠇꠥꠝ ꠇꠞꠍꠟꠣꠝ, ꠀꠝꠣꠞ ꠄꠛꠣꠖꠔꠅ ꠎꠣꠁꠔꠣ ꠇꠞꠤ ꠔꠥꠝꠤ ꠀꠝꠣꠞ ꠙꠥꠔꠞꠦ ꠍꠣꠠꠤ ꠖꠤꠔꠣꠄ, ꠅꠁꠟꠦ ꠔꠥꠝꠤ ꠝꠣꠘꠍ ꠘꠣ। ꠄꠞꠖꠣꠄ ꠀꠝꠤꠅ ꠔꠥꠝꠣꠞ ꠙꠄꠟꠣ ꠙꠥꠔꠞꠦ ꠝꠣꠞꠤꠟꠤꠝꠥ।’ ”

24 ꠛꠣꠖꠦ ꠝꠤꠡꠞꠅ ꠎꠣꠅꠀꠞ ꠙꠕꠅ ꠞꠣꠁꠔ ꠇꠣꠐꠣꠁꠛꠣꠞ ꠎꠣꠉꠣꠔ ꠀꠁꠟꠦ ꠝꠣꠛꠥꠖꠦ ꠝꠥꠍꠣꠞꠦ ꠝꠣꠞꠤꠟꠤꠔꠣ ꠇꠞꠤ ꠝꠥꠈꠣꠝꠥꠈꠤ ꠅꠁꠟꠣ। 25 ꠅꠁꠟꠦ ꠔꠣꠘ ꠛꠤꠛꠤ ꠍꠚꠥꠞꠣꠄ ꠄꠇꠈꠣꠘ ꠗꠣꠞꠣꠁꠟ ꠙꠣꠔ꠆ꠔꠞ ꠟꠁꠀ ꠔꠣꠘ ꠙꠥꠀꠞ ꠝꠍꠟꠝꠣꠘꠤ ꠇꠞꠣꠁꠟ꠆ꠟꠣ ꠀꠞ ꠅꠇꠐꠣ ꠔꠣꠘ ꠎꠣꠝꠣꠁ ꠝꠥꠍꠣꠞ ꠙꠣꠅꠞ ꠝꠣꠎꠦ ꠍꠥꠀꠁꠀ ꠇꠁꠟꠣ, “ꠟꠃꠞ ꠛꠖꠟꠣ ꠀꠝꠤ ꠔꠥꠝꠣꠞꠦ ꠎꠣꠝꠣꠁ ꠢꠤꠡꠣꠛꠦ ꠙꠣꠁꠍꠤ।” 26 ꠔꠦꠃ ꠝꠥꠍꠣꠞꠦ ꠝꠣꠛꠥꠖꠦ ꠍꠣꠠꠤꠖꠤꠟꠣ। ꠝꠍꠟꠝꠣꠘꠤ ꠇꠣꠝꠞ ꠛꠦꠙꠣꠞꠦ ꠍꠚꠥꠞꠣꠄ ꠔ ꠅꠃ ꠇꠕꠣꠃ ꠇꠁꠍꠟꠣ।

27 ꠄꠞꠝꠣꠎꠦ ꠝꠣꠛꠥꠖꠦ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠤ ꠝꠞꠥꠜꠥꠝꠤꠔ ꠉꠤꠀ ꠝꠥꠍꠣꠞ ꠟꠉꠦ ꠖꠦꠈꠣ ꠇꠞꠅ।” ꠅꠃ ꠔꠣꠁꠘ ꠉꠦꠟꠣ ꠀꠞ ꠀꠟ꠆ꠟꠣꠞ ꠙꠣꠠ ꠔꠥꠞꠞ ꠉꠦꠍꠦ ꠀꠁꠀ ꠝꠥꠍꠣꠞꠦ ꠙꠣꠁꠀ ꠌꠥꠝꠣ ꠖꠤꠟꠣ। 28 ꠀꠞ ꠝꠣꠛꠥꠖꠦ ꠎꠦꠔꠣ ꠎꠦꠔꠣ ꠇꠁꠛꠣꠞ ꠟꠣꠉꠤ ꠝꠥꠍꠣꠞꠦ ꠢꠥꠇꠥꠝ ꠖꠤꠍꠟꠣ, ꠝꠥꠍꠣꠄ ꠁꠔꠣ ꠢꠇ꠆ꠇꠟꠔꠣ ꠢꠣꠞꠥꠘꠞꠦ ꠎꠣꠘꠣꠁꠟꠣ। ꠝꠣꠛꠥꠖꠦ ꠎꠔ ꠟꠣꠈꠣꠘ ꠇꠦꠞꠣꠝꠔꠤ-ꠝꠥꠎꠦꠎꠣ ꠖꠦꠈꠣꠘꠤꠞ ꠢꠥꠇꠥꠝ ꠖꠤꠍꠂꠘ, ꠁꠔꠣ ꠢꠇꠟꠔꠣꠃ ꠔꠣꠁꠘ ꠢꠣꠞꠥꠘꠞꠦ ꠛꠥꠎꠣꠁꠟꠣ।

29 ꠛꠣꠖꠦ ꠝꠥꠍꠣ ꠀꠞ ꠢꠣꠞꠥꠘ ꠝꠤꠡꠞ ꠖꠦꠡꠅ ꠉꠤꠀ ꠛꠘꠤ ꠁꠍꠞꠣꠁꠟꠞ ꠢꠇꠟ ꠝꠥꠞꠛ꠆ꠛꠤꠞꠦ ꠖꠟꠣ ꠇꠞꠟꠣ। 30 ꠝꠣꠛꠥꠖꠦ ꠝꠥꠍꠣꠞꠦ ꠎꠔꠔꠣ ꠇꠁꠍꠟꠣ, ꠢꠣꠞꠥꠘꠦ ꠁꠔꠣ ꠢꠇꠟꠔꠣ ꠔꠣꠞꠣꠞꠦ ꠎꠣꠘꠣꠁꠟꠣ, ꠀꠞ ꠢꠃ ꠇꠦꠞꠣꠝꠔꠤ ꠅꠇꠟꠅ ꠝꠣꠘꠡꠞ ꠍꠣꠝꠘꠦ ꠖꠦꠈꠣꠁꠟꠣ। 31 ꠄꠞꠟꠣꠉꠤ ꠝꠣꠘꠡꠦ ꠁꠔꠣ ꠄꠇꠤꠘ ꠇꠞꠟꠣ। ꠔꠣꠞꠣ ꠎꠦꠛꠟꠣ ꠢꠥꠘꠟꠣ, ꠝꠣꠛꠥꠖꠦ ꠔꠣꠞꠣꠞ ꠛꠣꠄ ꠈꠤꠀꠟ ꠇꠞꠍꠂꠘ, ꠔꠣꠞꠣꠞ ꠃꠙꠞꠞ ꠎꠥꠟꠥꠝ-ꠝꠍꠤꠛꠔ ꠖꠦꠈꠍꠂꠘ, ꠅꠃ ꠔꠣꠞꠣ ꠔꠣꠘꠞꠦ ꠍꠁꠎꠖꠣ ꠇꠞꠟꠣ।