1 ꠝꠥꠍꠣ ꠀꠞ ꠢꠣꠞꠥꠘꠦ ꠉꠤꠀ ꠚꠦꠞꠣꠃꠘꠞꠦ ꠇꠁꠟꠣ, “ꠝꠣꠛꠥꠖ, ꠎꠦꠁꠘ ꠛꠘꠤ ꠁꠍꠞꠣꠁꠟꠞ ꠀꠟ꠆ꠟꠣ, ꠔꠣꠁꠘ ꠘꠤꠎꠦ ꠇꠁꠍꠂꠘ, ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠔꠥꠝꠤ ꠍꠣꠠꠤ ꠖꠦꠅ, ꠀꠝꠣꠞ ꠘꠣꠝꠦ ꠢꠎ ꠇꠞꠣꠞ ꠟꠣꠉꠤ, ꠔꠣꠞꠣ ꠝꠞꠥꠜꠥꠝꠤꠔ ꠢꠤꠎꠞꠔ ꠇꠞꠔꠦ ꠅꠁꠛ, ꠔꠥꠝꠤ ꠔꠣꠞꠣꠞꠦ ꠍꠣꠠꠅ।” 2 ꠚꠦꠞꠣꠃꠘꠦ ꠎꠥꠀꠙ ꠖꠤꠟ, “ꠁ ꠝꠣꠛꠥꠖ ꠀꠞꠇ ꠎꠘ ꠇꠦ, ꠎꠦꠘ ꠢꠥꠇꠥꠝ ꠝꠣꠘꠤꠀ ꠀꠝꠤ ꠛꠘꠤ ꠁꠍꠞꠣꠁꠟꠞꠦ ꠍꠣꠠꠤ ꠖꠤꠔꠣꠝ? ꠁꠟꠣ ꠇꠥꠘꠥ ꠝꠣꠛꠥꠖꠞꠦ ꠀꠝꠤ ꠌꠤꠘꠤ ꠘꠣ, ꠀꠞ ꠛꠘꠤ ꠁꠍꠞꠣꠁꠟꠞꠦꠅ ꠀꠝꠤ ꠍꠣꠠꠔꠣꠝ ꠘꠣꠄ।” 3 ꠔꠣꠞꠣ ꠇꠁꠟꠣ, “ꠁꠛꠞꠣꠘꠤ ꠅꠇꠟꠞ ꠀꠟ꠆ꠟꠣꠄ ꠀꠝꠞꠣꠞꠦ ꠖꠞꠡꠘ ꠖꠤꠍꠂꠘ। ꠄꠞꠟꠣꠉꠤ ꠀꠝꠞꠣ ꠝꠤꠘꠔ ꠇꠞꠤꠀꠞ ꠀꠝꠞꠣꠞꠦ ꠝꠞꠥꠜꠥꠝꠤꠞ ꠛꠣꠄ ꠔꠤꠘ ꠖꠤꠘꠞ ꠙꠕ ꠉꠤꠀ, ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠇꠥꠞꠛꠣꠘꠤ ꠇꠞꠔꠦ ꠖꠦꠃꠇ꠆ꠇꠣ, ꠀꠞꠘꠣꠄ ꠔꠣꠁꠘ ꠀꠝꠞꠣꠞꠦ ꠉꠎꠛꠤ ꠛꠦꠝꠣꠞ ꠖꠤꠀ ꠛꠣ ꠎꠥꠖ꠆ꠖꠞ ꠝꠣꠎꠦ ꠚꠣꠟꠣꠁꠀ ꠝꠣꠞꠤꠟꠣꠁꠛꠣ।” 4 ꠝꠤꠡꠞꠞ ꠛꠣꠖꠡꠣꠄ ꠎꠥꠀꠙ ꠖꠤꠟꠣ, “ꠅ ꠝꠥꠍꠣ ꠀꠞ ꠢꠣꠞꠥꠘ, ꠔꠥꠝꠞꠣ ꠝꠣꠘꠡꠞꠦ ꠇꠦꠘꠦ ꠇꠣꠝꠅ ꠕꠣꠇꠤ ꠚꠤꠞꠣꠁꠞꠣꠄ? ꠎꠣꠅ, ꠔꠥꠝꠞꠣꠅ ꠉꠤꠀ ꠇꠣꠝꠅ ꠟꠣꠉꠅ। 5 ꠖꠦꠈꠞꠣꠄ ꠘꠤ, ꠖꠦꠡꠅ ꠔꠥꠝꠞꠣꠞ ꠝꠣꠘꠥꠡ ꠛꠃꠔ ꠛꠣꠠꠤꠉꠦꠍꠂꠘ, ꠀꠞ ꠔꠥꠝꠞꠣꠞ ꠟꠣꠁ ꠙꠣꠁꠀ ꠁꠔꠣꠄ ꠇꠥꠘꠥ ꠇꠣꠝ ꠇꠞꠞꠣ ꠘꠣ।”

6 ꠅꠃ ꠚꠦꠞꠣꠃꠘꠦ ꠢꠃ ꠖꠤꠘꠃ ꠝꠤꠡꠞꠤ ꠎꠣꠟꠤꠝ ꠡꠞ꠆ꠖꠣꠞ ꠀꠞ ꠁꠛꠞꠣꠘꠤ ꠍꠥꠛꠦꠖꠣꠞ ꠅꠇꠟꠞꠦ ꠢꠥꠇꠥꠝ ꠇꠞꠟꠣ, 7 “ꠁꠐ ꠛꠣꠘꠣꠁꠛꠣꠞ ꠟꠣꠉꠤ ꠔꠥꠝꠞꠣ ꠝꠣꠘꠡꠞꠦ ꠀꠉꠞ ꠟꠣꠈꠣꠘ ꠈꠦꠞ-ꠘꠦꠞꠣ ꠀꠘꠤꠀ ꠖꠤꠅ ꠘꠣ, ꠔꠣꠞꠣ ꠉꠤꠀ ꠁꠔꠣ ꠎꠥꠉꠣꠠ ꠇꠞꠃꠇ। 8 ꠅꠁꠟꠦ ꠀꠉꠦ ꠔꠣꠞꠣ ꠎꠔꠈꠣꠘ ꠁꠐ ꠛꠣꠘꠣꠁꠔ ꠅꠈꠘꠅ ꠅꠔꠈꠣꠘ ꠛꠣꠘꠣꠁꠔꠦ ꠅꠁꠛ, ꠄꠇꠈꠣꠘꠅ ꠇꠝ ꠅꠁꠔ ꠘꠣꠄ। ꠁꠔꠣ ꠀꠟꠡꠤꠀ ꠅꠁꠉꠦꠍꠂꠘ ꠇꠞꠤ, ꠅꠘꠅ ꠀꠁꠀ ꠔꠣꠞꠣꠞ ꠀꠟ꠆ꠟꠣꠞ ꠘꠣꠝꠞ ꠇꠥꠞꠛꠣꠘꠤ ꠇꠞꠔꠣ ꠇꠁꠀ ꠌꠤꠟ꠆ꠟꠣꠁꠞꠣ। 9 ꠔꠥꠝꠞꠣ ꠔꠣꠞꠣꠞꠦ ꠀꠞꠅ ꠇꠡ꠆ꠐꠞ ꠇꠣꠝꠅ ꠟꠣꠉꠣꠅ, ꠔꠦꠃ ꠁꠔꠣꠄ ꠇꠥꠘꠥ ꠟꠣꠈꠣꠘ ꠛꠣꠎꠦ ꠝꠣꠔ ꠘꠣ ꠢꠥꠘꠤꠀ ꠇꠣꠝꠞ ꠝꠣꠎꠦ ꠝꠘ ꠖꠤꠛꠣ।”

10 ꠅꠃ ꠢꠤ ꠡꠞ꠆ꠖꠣꠞ ꠀꠞ ꠍꠥꠛꠦꠖꠣꠞ ꠅꠇꠟ ꠛꠣꠞ ꠅꠁ ꠉꠤꠀ ꠝꠣꠘꠡꠞꠦ ꠇꠁꠟꠣ, “ꠚꠦꠞꠣꠃꠘꠦ ꠇꠁꠍꠂꠘ, ꠅꠈꠘ ꠕꠣꠇꠤ ꠔꠣꠁꠘ ꠀꠞ ꠁꠐ ꠛꠣꠘꠣꠘꠤꠞ ꠈꠦꠞ ꠎꠥꠉꠣꠁ ꠖꠤꠔꠣ ꠘꠣꠄ। 11 ꠔꠥꠝꠞꠣ ꠎꠦꠘ ꠕꠣꠇꠤ ꠙꠣꠞ ꠈꠦꠞ-ꠘꠦꠞꠣ ꠎꠥꠉꠣꠁꠅ, ꠅꠁꠟꠦ ꠔꠥꠝꠞꠣꠞ ꠇꠣꠝ ꠇꠥꠘ꠆ꠔꠣꠃ ꠇꠝꠣꠁꠟ ꠅꠁꠔ ꠘꠣꠄ।” 12 ꠅꠃ ꠝꠣꠘꠡꠦ ꠈꠦꠞ-ꠘꠦꠞꠣ ꠔꠥꠇꠣꠁꠛꠣꠞ ꠟꠣꠉꠤ ꠢꠣꠞꠣ ꠝꠤꠡꠞ ꠖꠦꠡꠅ ꠍꠤꠔ꠆ꠞꠤ ꠉꠦꠟꠣ। 13 ꠀꠞ ꠡꠞ꠆ꠖꠣꠞ ꠅꠇꠟꠦ ꠛꠣꠞꠦ ꠛꠣꠞꠦ ꠔꠣꠉꠖꠣ ꠖꠤꠀ ꠇꠁꠟ, “ꠀꠉꠦ ꠈꠦꠞ ꠎꠥꠉꠣꠁꠀ ꠖꠦꠅꠀꠞ ꠛꠣꠟꠣ ꠔꠥꠝꠞꠣ ꠙꠞꠔꠦꠇ ꠖꠤꠘ ꠎꠔꠈꠣꠘ ꠁꠐ ꠛꠣꠘꠣꠁꠔꠣꠄ, ꠅꠈꠘꠅ ꠅꠔꠈꠣꠘ ꠛꠣꠘꠣꠅ।” 14 ꠚꠦꠞꠣꠃꠘꠞ ꠎꠣꠟꠤꠝ ꠡꠞ꠆ꠖꠣꠞ ꠅꠇꠟꠦ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠎꠦ ꠍꠥꠛꠦꠖꠣꠞ ꠟꠣꠉꠣꠁꠍꠤꠟ, ꠢꠃ ꠡꠞ꠆ꠖꠣꠞ ꠅꠇꠟ ꠀꠁꠀ ꠍꠥꠛꠦꠖꠣꠞ ꠅꠇꠟꠞꠦ ꠝꠣꠁꠞ-ꠗꠁꠞ ꠇꠞꠤꠀ ꠎꠤꠇꠣꠁꠟ, “ꠔꠥꠝꠞꠣ ꠀꠉꠦ ꠎꠔꠈꠣꠘ ꠁꠐ ꠖꠤꠔꠣꠄ, ꠅꠈꠘ ꠅꠔꠈꠣꠘ ꠖꠦꠅ ꠘꠣ ꠇꠦꠘꠦ?”

15 ꠅꠃ ꠛꠘꠤ ꠁꠍꠞꠣꠁꠟꠞ ꠍꠥꠛꠦꠖꠣꠞ ꠅꠇꠟꠦ ꠀꠁꠀ ꠚꠦꠞꠣꠃꠘꠞ ꠉꠦꠍꠦ ꠘꠣꠟꠤꠡ ꠖꠤꠟꠣ, “ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠞ ꠟꠉꠦ ꠁꠟꠣ ꠛꠦꠛꠢꠣꠞ ꠇꠦꠘꠦ ꠇꠞꠞꠣ? 16 ꠡꠞ꠆ꠖꠣꠞ ꠅꠇꠟꠦ ꠀꠝꠞꠣꠞꠦ ꠈꠦꠞ-ꠘꠦꠞꠣ ꠎꠥꠉꠣꠁ ꠖꠦꠁꠘ ꠘꠣ, ꠔꠣ-ꠅ ꠁꠐ ꠛꠣꠘꠣꠁꠛꠣꠞ ꠢꠥꠇꠥꠝ ꠖꠦꠁꠘ ꠀꠞ ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠞꠦ ꠝꠣꠁꠞ-ꠗꠁꠞ ꠇꠞꠂꠘ, ꠅꠁꠟꠦ ꠖꠥꠡ ꠔ ꠀꠙꠘꠣꠞ ꠘꠤꠎꠞ ꠡꠞ꠆ꠖꠣꠞꠞ।” 17 ꠚꠦꠞꠣꠃꠘꠦ ꠎꠥꠀꠙ ꠖꠤꠟ, “ꠔꠥꠝꠞꠣ ꠀꠟꠡꠤꠀ, ꠇꠥꠠꠤꠀ, ꠄꠞꠟꠣꠉꠤ ꠇꠁꠞꠣꠄ ꠝꠣꠛꠥꠖꠞ ꠘꠣꠝꠦ ꠇꠥꠞꠛꠣꠘꠤ ꠇꠞꠣꠔ ꠎꠣꠁꠔꠣꠝ। 18 ꠎꠣꠅ, ꠇꠣꠝ ꠇꠞꠅ ꠉꠤꠀ। ꠔꠥꠝꠞꠣꠞꠦ ꠈꠦꠞ ꠖꠦꠅꠀ ꠎꠣꠁꠔ ꠘꠣꠄ, ꠔꠣ-ꠅ ꠙꠞꠔꠦꠇ ꠖꠤꠘ ꠎꠔꠈꠣꠘ ꠁꠐ ꠛꠣꠘꠣꠁꠛꠣꠞ ꠇꠕꠣ ꠀꠍꠤꠟ, ꠅꠔꠈꠣꠘꠃ ꠛꠣꠘꠣꠁꠔꠦ ꠅꠁꠛ।”

19 ꠅꠃ ꠛꠘꠤ ꠁꠍꠞꠣꠁꠟꠞ ꠍꠥꠛꠦꠖꠣꠞ ꠅꠇꠟꠦ ꠛꠥꠎꠟꠣ, ꠔꠣꠞꠣ ꠛꠤꠙꠖꠞ ꠝꠣꠎꠦ ꠙꠠꠍꠂꠘ, ꠇꠣꠞꠘ ꠔꠣꠞꠣꠞꠦ ꠢꠥꠇꠥꠝ ꠇꠞꠣ ꠅꠁꠍꠦ, ꠀꠉꠦ ꠎꠔꠈꠣꠘ ꠁꠐ ꠛꠣꠘꠣꠘꠤ ꠟꠣꠉꠔ, ꠅꠈꠘꠅ ꠅꠔꠈꠣꠘ ꠁꠐ ꠛꠣꠘꠣꠁꠔꠦ ꠅꠁꠛ, ꠇꠝ ꠅꠁꠔ ꠘꠣꠄ। 20 ꠔꠣꠞꠣ ꠚꠦꠞꠣꠃꠘꠞ ꠉꠦꠍ ꠕꠣꠇꠤ ꠎꠣꠅꠀꠞ ꠙꠕꠅ ꠝꠥꠍꠣ ꠀꠞ ꠢꠣꠞꠥꠘꠞ ꠟꠉꠦ ꠖꠦꠈꠣ ꠅꠁꠟ, ꠄꠞꠣ ꠃꠛꠣꠁꠀ ꠛꠣꠞ ꠌꠣꠅꠀꠔ ꠀꠍꠟꠣ। 21 ꠍꠥꠛꠦꠖꠣꠞ ꠅꠇꠟꠦ ꠇꠁꠟꠣ, “ꠝꠣꠛꠥꠖꠦ ꠀꠙꠘꠣꠞꠣꠞ ꠙꠣꠅꠘꠣ ꠡꠣꠎꠣ ꠖꠤꠛꠣ, ꠀꠙꠘꠣꠞꠣ ꠚꠦꠞꠣꠃꠘ ꠀꠞ ꠔꠣꠞ ꠃꠎꠤꠞ-ꠘꠣꠎꠤꠞꠞ ꠉꠦꠍꠦ ꠀꠝꠞꠣꠞꠦ ꠙꠌꠣ-ꠉꠣꠘ꠆ꠖꠣ ꠛꠣꠘꠣꠁꠀ, ꠀꠝꠞꠣꠞꠦ ꠈꠥꠘ ꠇꠞꠣꠞ ꠟꠣꠉꠤ ꠔꠟꠥꠀꠞ ꠘꠤꠀ ꠔꠣꠞꠣꠞ ꠀꠔꠅ ꠖꠤꠍꠂꠘ।”

22 ꠅꠃ ꠝꠥꠍꠣꠄ ꠢꠤꠞꠛꠣꠞ ꠉꠤꠀ ꠝꠣꠛꠥꠖꠞ ꠉꠦꠍꠦ ꠚꠞꠤꠀꠖ ꠇꠞꠟꠣ, “ꠅ ꠖꠤꠘ ꠖꠥꠘꠤꠀꠞ ꠝꠣꠟꠤꠇ, ꠔꠥꠝꠤ ꠇꠦꠘꠦ ꠔꠥꠝꠣꠞ ꠛꠘ꠆ꠖꠣꠞꠦ ꠝꠍꠤꠛꠔꠅ ꠚꠣꠟꠣꠁꠟꠣꠄ? ꠀꠞ ꠀꠝꠣꠞꠦ ꠇꠤꠔꠣꠟ꠆ꠟꠣꠉꠤ ꠙꠣꠑꠣꠁꠟꠣꠄ? 23 ꠚꠦꠞꠣꠃꠘꠞ ꠉꠦꠍꠦ ꠔꠥꠝꠣꠞ ꠇꠕꠣ ꠢꠥꠘꠣꠘꠤꠞ ꠛꠣꠖ ꠕꠣꠇꠤꠃ ꠔꠥꠝꠣꠞ ꠛꠘ꠆ꠖꠣ ꠅꠇꠟꠞ ꠃꠙꠞꠦ ꠎꠥꠟꠥꠝ ꠔ ꠀꠞꠅ ꠛꠣꠠꠤꠍꠦ। ꠅꠁꠟꠦ ꠔꠥꠝꠤ ꠔ ꠇꠥꠘ꠆ꠔꠣꠃ ꠇꠞꠟꠣꠄ ꠘꠣ।”