6
1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠚꠦꠞꠣꠃꠘꠞ ꠇꠤꠔꠣ ꠖꠡꠣ ꠅꠄ ꠔꠥꠝꠤ ꠖꠦꠈꠤꠅ, ꠀꠝꠣꠞ ꠀꠔꠞ ꠎꠥꠞ ꠖꠦꠈꠟꠦꠃ ꠢꠦ ꠝꠣꠘꠡꠞꠦ ꠍꠣꠠꠤ ꠖꠤꠛ। ꠎꠥꠞꠀꠟꠣ ꠀꠔꠞ ꠇꠥꠖꠞꠔ ꠖꠦꠈꠟꠦꠃ ꠢꠦ ꠔꠣꠞ ꠖꠦꠡ ꠕꠣꠇꠤ ꠄꠞꠣꠞꠦ ꠈꠦꠖꠣꠁ ꠖꠤꠛ।”
ꠛꠘꠤ ꠁꠍꠞꠣꠁꠟꠞ ꠟꠉꠞ ꠅꠀꠖꠣ ꠀꠟ꠆ꠟꠣꠞ ꠁꠀꠖ ꠀꠍꠦ
2 ꠀꠟ꠆ꠟꠣꠄ ꠝꠥꠍꠣꠞ ꠟꠉꠦ ꠛꠣꠔꠌꠤꠔ ꠇꠞꠤ ꠇꠁꠟꠣ, “ꠀꠝꠣꠞ ꠘꠣꠝꠃ ‘ꠀꠟ꠆ꠟꠣ ꠎꠦꠁꠘ ꠀꠍꠂꠘ’। 3 ꠀꠝꠤ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠉꠦꠍꠦ ꠡꠞ꠆ꠛ-ꠡꠇ꠆ꠔꠤꠝꠣꠘ ꠀꠟ꠆ꠟꠣ ꠘꠣꠝꠦ ꠖꠤꠖꠣꠞ ꠖꠤꠔꠣꠝ, ‘ꠀꠟ꠆ꠟꠣ ꠎꠦꠁꠘ ꠀꠍꠂꠘ’ ꠘꠣꠝꠦ ꠔꠣꠞꠣꠞꠦ ꠖꠤꠖꠣꠞ ꠖꠤꠔꠣꠝ ꠘꠣ। 4 ꠀꠝꠤ ꠔꠣꠞꠣꠞ ꠟꠉꠦ ꠅꠃ ꠅꠀꠖꠣ ꠇꠞꠍꠟꠣꠝ, ꠀꠝꠤ ꠔꠥꠝꠞꠣꠞꠦ ꠇꠦꠘꠣꠘ ꠖꠦꠡ ꠖꠤꠝꠥ, ꠎꠦ ꠖꠦꠡꠅ ꠔꠥꠝꠞꠣ ꠝꠥꠍꠣꠚꠤꠞ ꠅꠁꠀ ꠞꠅ, ꠅꠃ ꠖꠦꠡꠃ ꠀꠝꠤ ꠔꠥꠝꠞꠣꠞꠦ ꠖꠤꠝꠥ। 5 ꠈꠣꠍ ꠇꠞꠤ ꠝꠤꠡꠞꠤ ꠅꠇꠟꠦ ꠛꠘꠤ ꠁꠍꠞꠣꠁꠟꠞꠦ ꠉꠥꠟꠣꠝꠤ ꠇꠞꠣꠘꠤꠞ ꠟꠣꠉꠤ ꠄꠞꠣꠞ ꠇꠣꠘ꠆ꠖꠘ ꠢꠥꠘꠤꠀ, ꠀꠝꠣꠞ ꠢꠃ ꠅꠀꠖꠣ ꠅꠈꠘ ꠁꠀꠖ ꠇꠞꠟꠣꠝ। 6 ꠄꠞꠟꠣꠉꠤ ꠔꠥꠝꠤ ꠉꠤꠀ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠝꠣꠛꠥꠖꠦ ꠇꠁꠍꠂꠘ, ꠀꠝꠤ ꠝꠣꠛꠥꠖ, ꠀꠝꠤ ꠔꠥꠝꠞꠣꠞꠦ ꠝꠤꠡꠞꠤ ꠅꠇꠟꠞ ꠔꠟ ꠕꠣꠇꠤ ꠛꠣꠞ ꠇꠞꠤꠀ ꠀꠘꠝꠥ, ꠔꠣꠞꠣꠞ ꠉꠥꠟꠣꠝꠤ ꠕꠣꠇꠤ ꠀꠎꠣꠖ ꠇꠞꠝꠥ। ꠔꠣꠞꠣꠞꠦ ꠖꠦꠈꠣꠞ ꠝꠔ ꠡꠣꠎꠣ ꠖꠤꠀ, ꠀꠝꠣꠞ ꠇꠥꠖꠞꠔꠤ ꠀꠔꠖꠤ ꠔꠥꠝꠞꠣꠞꠦ ꠈꠣꠟꠣꠍ ꠇꠞꠝꠥ। 7 ꠢꠦꠡꠦ ꠔꠥꠝꠞꠣꠞꠦ ꠀꠝꠣꠞ ꠘꠤꠎꠞ ꠛꠘ꠆ꠖꠣ ꠛꠣꠘꠣꠁꠝꠥ, ꠀꠝꠤ ꠘꠤꠎꠦ ꠔꠥꠝꠞꠣꠞ ꠀꠟ꠆ꠟꠣ ꠅꠁꠝꠥ। ꠔꠦꠃ ꠔꠥꠝꠞꠣ ꠛꠥꠎꠛꠣꠄ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ, ꠀꠞ ꠝꠤꠡꠞꠤ ꠅꠇꠟꠞ ꠜꠣꠞꠞ ꠔꠟ ꠕꠣꠇꠤ ꠀꠝꠤꠃ ꠔꠥꠝꠞꠣꠞꠦ ꠛꠣꠌꠣꠁꠍꠤ। 8 ꠀꠝꠤ ꠁꠛ꠆ꠞꠣꠢꠤꠝ, ꠁꠍꠢꠣꠇ, ꠁꠀꠇꠥꠛꠞ ꠟꠉꠦ ꠎꠦ ꠖꠦꠡꠞ ꠇꠕꠣ ꠅꠀꠖꠣ ꠇꠞꠍꠤ, ꠢꠃ ꠖꠦꠡꠅ ꠔꠥꠝꠞꠣꠞꠦ ꠟꠁꠀ ꠎꠣꠁꠝꠥ, ꠔꠥꠝꠞꠣ ꠢꠃ ꠖꠦꠡꠞ ꠝꠣꠟꠤꠇ ꠅꠁꠛꠣꠄ। ꠀꠝꠤꠃ ꠝꠣꠛꠥꠖ।”
9 ꠝꠥꠍꠣꠄ ꠉꠤꠀ ꠁꠔꠣ ꠢꠇꠟꠔꠣ ꠔꠣꠞꠣꠞꠦ ꠎꠣꠘꠣꠁꠟꠣ, ꠅꠁꠟꠦ ꠢꠤ ꠛꠦꠕꠣꠄꠀ ꠎꠥꠟꠥꠝ-ꠔꠇꠟꠤꠚ ꠀꠞ ꠉꠥꠟꠣꠝꠤ ꠇꠞꠔꠦ ꠇꠞꠔꠦ ꠝꠘ-ꠝꠞꠣ ꠅꠁꠎꠣꠅꠀꠄ, ꠔꠣꠞꠣ ꠀꠞ ꠝꠥꠍꠣꠞ ꠝꠣꠔꠦ ꠇꠣꠘ ꠖꠤꠟꠣ ꠘꠣ।
10 ꠅꠃ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 11 “ꠔꠥꠝꠤ ꠉꠤꠀ ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘꠞꠦ ꠇꠅ, ꠢꠦ ꠎꠣꠘꠥ ꠔꠣꠞ ꠖꠦꠡ ꠕꠣꠇꠤ ꠄꠞꠣꠞꠦ ꠎꠣꠁꠔꠦ ꠖꠦꠄ।” 12 ꠝꠥꠍꠣꠄ ꠎꠥꠀꠙ ꠖꠤꠟꠣ, “ꠛꠘꠤ ꠁꠍꠞꠣꠁꠟꠦꠃ ꠎꠦꠛꠟꠣ ꠀꠝꠣꠞ ꠝꠣꠔ ꠢꠥꠘꠦꠞ ꠘꠣ, ꠔꠦ ꠚꠦꠞꠣꠃꠘꠦ ꠇꠤꠟꠣ ꠢꠥꠘꠛ? ꠀꠞ ꠀꠝꠣꠞ ꠔ ꠝꠣꠔꠔꠦ ꠝꠥꠈꠅ ꠟꠣꠉꠤꠎꠣꠄ।” 13 ꠔꠦꠃ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠞꠣ ꠛꠘꠤ ꠁꠍꠞꠣꠁꠟ ꠀꠞ ꠝꠤꠡꠞꠞ ꠞꠣꠎꠣ ꠚꠦꠞꠣꠃꠘꠞꠦ ꠇꠅ, ꠝꠣꠛꠥꠖꠦ ꠀꠝꠞꠣꠞꠦ ꠢꠥꠇꠥꠝ ꠖꠤꠍꠂꠘ, ꠛꠘꠤ ꠁꠍꠞꠣꠁꠟꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤ ꠘꠦꠅꠀꠞ ꠟꠣꠉꠤ।”
ꠢꠎꠞꠔ ꠝꠥꠍꠣ ꠀꠞ ꠢꠣꠞꠥꠘ (ꠀ꠩) ꠅꠞ ꠛꠣꠚ-ꠖꠣꠖꠣꠁꠘ꠆ꠔꠞ ꠙꠞꠤꠌꠄ
14 ꠛꠘꠤ ꠁꠍꠞꠣꠁꠟ ꠎꠣꠔꠤꠞ ꠝꠥꠟ ꠝꠥꠞꠛ꠆ꠛꠤ ꠅꠁꠟꠣ ꠢꠎꠞꠔ ꠁꠀꠇꠥꠛ, ꠀꠟ꠆ꠟꠣꠄ ꠅꠃ ꠁꠀꠇꠥꠛꠞ ꠘꠄꠀ ꠘꠣꠝ ꠖꠤꠍꠟꠣ ꠁꠍꠞꠣꠁꠟ। ꠔꠣꠘ ꠙꠥꠀꠂꠘ ꠅꠁꠟꠣ ꠞꠥꠛꠦꠘ, ꠡꠤꠝꠤꠅꠘ, ꠟꠦꠛꠤ ꠡꠢ ꠝꠥꠐ ꠛꠣꠞꠅꠎꠘ। ꠝꠥꠍꠣ ꠀꠞ ꠢꠣꠞꠥꠘ ꠅꠁꠟꠣ ꠅꠃ ꠢꠎꠞꠔ ꠟꠦꠛꠤꠞ ꠛꠋꠡꠗꠞ।
ꠁꠍꠞꠣꠁꠟꠞ ꠛꠠ ꠙꠥꠀ ꠞꠥꠛꠦꠘꠞ ꠙꠥꠀꠂꠘ ꠅꠁꠟꠣ ꠢꠘꠥꠇ, ꠚꠣꠟꠥ, ꠢꠣꠍꠤꠞ ꠀꠞ ꠇꠞ꠆ꠝꠤ, ꠄꠞꠣ ꠔ ꠞꠥꠛꠦꠘ ꠈꠣꠘ꠆ꠖꠣꠘꠞ ꠘꠣꠘꠣꠘ ꠉꠥꠡ꠆ꠐꠤꠞ ꠝꠥꠟ ꠝꠥꠞꠛ꠆ꠛꠤ।
15 ꠡꠤꠝꠤꠅꠘꠞ ꠙꠥꠀꠂꠘ ꠅꠁꠟꠣ ꠎꠤꠝꠥꠄꠟ, ꠎꠣꠝꠤꠘ, ꠅꠢꠖ, ꠎꠣꠈꠤꠘ, ꠡꠥꠢꠞ ꠀꠞ ꠔꠣꠞ ꠇꠦꠘꠣꠘꠤ ꠛꠃꠞ ꠔꠞꠚꠣ ꠙꠥꠀ ꠡꠃꠟ, ꠄꠞꠣ ꠡꠤꠝꠤꠅꠘ ꠈꠣꠘ꠆ꠖꠣꠘꠞ ꠘꠣꠘꠣꠘ ꠉꠥꠡ꠆ꠐꠤꠞ ꠝꠥꠟ ꠝꠥꠞꠛ꠆ꠛꠤ।
16 ꠈꠣꠘ꠆ꠖꠣꠘ ꠔꠣꠟꠤꠇꠣ ꠢꠤꠡꠣꠛꠦ ꠢꠎꠞꠔ ꠟꠦꠛꠤꠞ ꠙꠥꠀꠂꠘ ꠅꠁꠟꠣ ꠎꠣꠞꠍꠥꠘ, ꠇꠣꠢꠣꠔ ꠀꠞ ꠝꠣꠞꠣꠞꠤ। ꠟꠦꠛꠤ ꠄꠇ-ꠡ ꠡꠣꠠꠔꠤꠡ ꠛꠞꠍ ꠛꠣꠌꠤꠍꠟꠣ।
17 ꠎꠣꠞꠎꠤꠞ ꠉꠥꠡ꠆ꠐꠤꠞ ꠙꠞꠗꠣꠘ ꠢꠤꠡꠣꠛꠦ ꠎꠣꠞꠍꠥꠘꠞ ꠙꠥꠀꠂꠘ ꠅꠁꠟꠣ ꠟꠤꠛꠘꠤ ꠀꠞ ꠡꠤꠝꠦꠁ।
18 ꠇꠣꠢꠣꠔꠞ ꠙꠥꠀꠂꠘ ꠅꠁꠟꠣ ꠁꠝꠞꠣꠘ, ꠁꠎꠢꠣꠞ, ꠢꠦꠛꠞꠘ ꠀꠞ ꠃꠎ꠆ꠎꠟ। ꠇꠣꠢꠣꠔ ꠄꠇ-ꠡ ꠔꠦꠔ꠆ꠞꠤꠡ ꠛꠞꠍ ꠛꠣꠌꠤꠍꠟꠣ।
19 ꠝꠣꠞꠣꠞꠤꠞ ꠙꠥꠀꠂꠘ ꠅꠁꠟꠣ, ꠝꠢꠟꠤ ꠀꠞ ꠝꠥꠡꠤ।
ꠄꠞꠣꠃ ꠅꠁꠟꠣ ꠟꠦꠛꠤ ꠈꠣꠘ꠆ꠖꠣꠘꠞ ꠘꠣꠘꠣꠘ ꠉꠥꠡ꠆ꠐꠤꠞ ꠝꠥꠟ ꠝꠥꠞꠛ꠆ꠛꠤ।
20 ꠁꠝꠞꠣꠘꠞ ꠙꠥꠀꠂꠘ ꠅꠁꠟꠣ ꠝꠥꠍꠣ ꠀꠞ ꠢꠣꠞꠥꠘ। ꠁꠝꠞꠣꠘꠦ ꠔꠣꠘ ꠚꠥꠚꠥ ꠁꠃꠈꠣꠛꠦꠎꠞꠦ ꠛꠤꠀ ꠇꠞꠍꠟꠣ, ꠔꠣꠘ ꠙꠦꠐꠅ ꠄꠞꠣꠞ ꠎꠘꠝ ꠅꠁꠍꠤꠟ। ꠁꠝꠞꠣꠘ ꠄꠇ-ꠡ ꠡꠣꠠꠔꠤꠡ ꠛꠞꠍ ꠛꠣꠌꠤꠍꠟꠣ।
21 ꠁꠎꠢꠣꠞꠞ ꠙꠥꠀꠂꠘ ꠅꠁꠟꠣ ꠇꠥꠞꠣꠢ, ꠘꠦꠚꠉ, ꠎꠤꠈꠞꠤ।
22 ꠃꠎ꠆ꠎꠟꠞ ꠙꠥꠀꠂꠘ ꠝꠤꠡꠣꠄꠄꠟ, ꠄꠟꠎꠣꠚꠘ ꠀꠞ ꠎꠤꠔꠞꠤ।
23 ꠀꠞ ꠢꠣꠞꠥꠘꠦ ꠀꠝꠤꠘꠣꠖꠣꠛꠞ ꠙꠥꠠꠤ ꠘꠣꠢꠤꠡꠞ ꠛꠁꠘ ꠁꠟꠤꠡꠦꠛꠣꠞꠦ ꠛꠤꠀ ꠇꠞꠣꠄ, ꠔꠣꠘ ꠢꠥꠞꠥꠔ꠆ꠔꠣ ꠅꠁꠟꠣ ꠘꠣꠖꠣꠛ, ꠀꠛꠤꠢꠥ, ꠀꠟꠤ-ꠀꠎꠞ ꠀꠞ ꠁꠍꠣꠝꠣꠞ।
24 ꠇꠥꠞꠣꠢꠞ ꠙꠥꠀꠂꠘ ꠅꠁꠟꠣ ꠅꠡꠤꠞ, ꠁꠟꠇꠣꠘꠣ, ꠅꠛꠤꠀꠡꠚ। ꠄꠞꠣ ꠇꠥꠞꠣꠢꠤ ꠅꠇꠟꠞ ꠘꠣꠘꠣꠘ ꠉꠥꠡ꠆ꠐꠤꠞ ꠝꠥꠟ ꠝꠥꠞꠛ꠆ꠛꠤ।
25 ꠀꠟꠤ-ꠀꠎꠞꠞ ꠙꠥꠀ ꠅꠁꠟꠣ ꠙꠤꠘꠢꠡ। ꠢꠣꠞꠥꠘꠞ ꠙꠥꠀ ꠀꠟꠤ-ꠀꠎꠞꠦ ꠙꠥꠐꠤꠄꠟꠞ ꠙꠥꠠꠤꠞꠦ ꠛꠤꠀ ꠇꠞꠣꠄ ꠔꠣꠁꠞ ꠙꠦꠐꠅ ꠙꠤꠘꠢꠡꠞ ꠎꠘꠝ ꠅꠁꠍꠤꠟ।
ꠄꠞꠣ ꠅꠁꠟꠣ ꠟꠦꠛꠤ ꠈꠣꠘ꠆ꠖꠣꠘꠞ ꠘꠣꠘꠣꠘ ꠉꠥꠡ꠆ꠐꠤꠞ ꠝꠥꠟ ꠝꠥꠞꠛ꠆ꠛꠤ।
26 ꠅꠃ ꠢꠣꠞꠥꠘ ꠀꠞ ꠝꠥꠍꠣꠞꠦ ꠝꠣꠛꠥꠖꠦ ꠢꠥꠇꠥꠝ ꠇꠞꠍꠟꠣ, ꠔꠥꠝꠞꠣ ꠛꠘꠤ ꠁꠍꠞꠣꠁꠟꠞꠦ ꠍꠤꠙꠣꠁ ꠖꠟꠞ ꠟꠣꠈꠣꠘ ꠢꠣꠎꠤꠀ ꠝꠤꠡꠞ ꠕꠣꠇꠤ ꠛꠣꠞ ꠇꠞꠅ। 27 ꠝꠥꠍꠣ ꠀꠞ ꠢꠣꠞꠥꠘꠦꠃ ꠛꠘꠤ ꠁꠍꠞꠣꠁꠟꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤ ꠀꠘꠣꠞ ꠇꠕꠣ ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘꠞ ꠟꠉꠦ ꠝꠣꠔꠤꠍꠟꠣ।
ꠝꠣꠛꠥꠖꠦ ꠢꠎꠞꠔ ꠝꠥꠍꠣ ꠀꠞ ꠢꠣꠞꠥꠘ (ꠀ꠩) ꠞꠦ ꠢꠥꠇꠥꠝ ꠖꠤꠟꠣ
28 ꠝꠣꠛꠥꠖꠦ ꠝꠥꠍꠣꠞ ꠟꠉꠦ ꠎꠦꠖꠤꠘ ꠝꠤꠡꠞ ꠖꠦꠡꠅ ꠛꠣꠔꠌꠤꠔ ꠇꠞꠟꠣ, 29 ꠢꠃ ꠖꠤꠘ ꠔꠣꠁꠘ ꠇꠁꠟꠣ, “ꠀꠝꠤ ꠝꠣꠛꠥꠖ। ꠔꠦ ꠔꠥꠝꠣꠞꠦ ꠅꠈꠘ ꠎꠦꠔꠣ ꠎꠦꠔꠣ ꠇꠁꠝꠥ, ꠁꠔꠣ ꠢꠇꠟꠔꠣ ꠔꠥꠝꠤ ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘꠞꠦ ꠇꠁꠅ।” 30 ꠝꠥꠍꠣꠄ ꠝꠣꠛꠥꠖꠞ ꠖꠞꠛꠣꠞꠅ ꠀꠞꠎ ꠇꠞꠟꠣ, “ꠖꠦꠈꠃꠇ꠆ꠇꠣ, ꠀꠝꠣꠞ ꠔ ꠝꠣꠔꠔꠦ ꠝꠥꠈꠅ ꠟꠣꠉꠤꠎꠣꠄ, ꠚꠦꠞꠣꠃꠘꠦ ꠇꠥꠘꠥ ꠀꠝꠣꠞ ꠝꠣꠔ ꠢꠥꠘꠛ ꠘꠤ?”