1 ꠅꠃ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ “ꠢꠥꠘꠅ, ꠀꠝꠤ ꠚꠦꠞꠣꠃꠘꠞ ꠉꠦꠍꠦ ꠔꠥꠝꠣꠞꠦ ꠀꠟ꠆ꠟꠣꠞ ꠟꠣꠈꠣꠘ ꠛꠣꠘꠣꠁꠝꠥ। ꠀꠞ ꠔꠥꠝꠣꠞ ꠜꠣꠁ ꠢꠣꠞꠥꠘꠞꠦ ꠛꠣꠘꠣꠁꠝꠥ ꠔꠥꠝꠣꠞ ꠘꠛꠤ। 2 ꠀꠝꠤ ꠔꠥꠝꠣꠞꠦ ꠎꠦꠟꠣ ꠢꠥꠇꠥꠝ ꠇꠞꠝꠥ, ꠔꠥꠝꠤ ꠅꠃꠟꠣ ꠢꠣꠞꠥꠘꠞꠦ ꠇꠁꠛꠣꠄ, ꠀꠞ ꠢꠣꠞꠥꠘꠦ ꠅꠔꠣ ꠚꠦꠞꠣꠃꠘꠞꠦ ꠇꠁꠛ; ꠎꠣꠔꠦ ꠢꠦ ꠛꠘꠤ ꠁꠍꠞꠣꠁꠟꠞꠦ ꠔꠣꠞ ꠖꠦꠡ ꠕꠣꠇꠤ ꠍꠣꠠꠤ ꠖꠦꠄ। 3 ꠅꠁꠟꠦ ꠀꠝꠤ ꠚꠦꠞꠣꠃꠘꠞ ꠖꠤꠟꠞꠦ ꠙꠣꠡꠣꠘ ꠇꠞꠤꠟꠤꠝꠥ। ꠝꠤꠡꠞ ꠖꠦꠡꠅ ꠀꠝꠤ ꠛꠃꠔ ꠇꠦꠞꠣꠝꠔꠤ ꠀꠞ ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠦꠈꠣꠁꠝꠥ। 4 ꠔꠣꠞ ꠛꠣꠖꠦꠅ ꠚꠦꠞꠣꠃꠘꠦ ꠔꠥꠝꠞꠣꠞ ꠝꠣꠔꠞ ꠖꠣꠝ ꠖꠤꠔ ꠘꠣꠄ। ꠔꠦꠃ ꠀꠝꠤ ꠝꠤꠡꠞꠞ ꠃꠙꠞꠦ ꠀꠝꠣꠞ ꠀꠔ ꠟꠣꠉꠣꠁꠀ, ꠖꠦꠈꠣꠞ ꠝꠔ ꠡꠣꠎꠣ ꠖꠤꠀ ꠝꠤꠡꠞ ꠖꠦꠡ ꠕꠣꠇꠤ ꠀꠝꠣꠞ ꠘꠤꠎꠞ ꠛꠘ꠆ꠖꠣ ꠛꠘꠤ ꠁꠍꠞꠣꠁꠟꠞꠦ ꠍꠤꠙꠣꠁꠞ ꠟꠣꠈꠣꠘ ꠖꠟꠦ ꠖꠟꠦ ꠛꠣꠞ ꠇꠞꠝꠥ। 5 ꠝꠤꠡꠞꠞ ꠝꠣꠎꠦ ꠀꠝꠣꠞ ꠘꠤꠎꠞ ꠀꠔ ꠟꠣꠉꠣꠁꠝꠥ, ꠝꠤꠡꠞꠤ ꠅꠇꠟꠞ ꠝꠣꠎ ꠕꠣꠇꠤ ꠛꠘꠤ ꠁꠍꠞꠣꠁꠟꠞꠦ ꠛꠣꠞ ꠇꠞꠤꠀ ꠀꠘꠝꠥ, ꠅꠃꠖꠤꠘ ꠔꠣꠞꠣ ꠛꠥꠎꠛꠣ ꠀꠝꠤꠃ ꠝꠣꠛꠥꠖ।” 6 ꠛꠣꠖꠦ ꠝꠥꠍꠣ ꠀꠞ ꠢꠣꠞꠥꠘꠦ ꠅꠃꠟꠣ ꠇꠞꠟꠣ, ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠇꠣꠝ ꠇꠞꠟꠣ। 7 ꠚꠦꠞꠣꠃꠘꠞ ꠟꠉꠦ ꠝꠣꠔ-ꠇꠕꠣꠞ ꠡꠝꠄ ꠝꠥꠍꠣꠞ ꠛꠄꠅꠡ ꠀꠍꠤꠟ ꠀꠡꠤ, ꠀꠞ ꠢꠣꠞꠥꠘꠞ ꠔꠤꠞꠣꠡꠤ ꠛꠞꠍ।

8 ꠅꠃ ꠡꠝꠄ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ, 9 “ꠚꠦꠞꠣꠃꠘꠦ ꠎꠦꠛꠟꠣ ꠇꠁꠛ, ꠔꠥꠝꠞꠣꠞ ꠘꠤꠎꠞ ꠇꠥꠘꠥ ꠇꠦꠞꠣꠝꠔꠤ ꠇꠣꠝ ꠖꠦꠈꠣꠅ, ꠔꠦꠃ ꠔꠥꠝꠤ ꠢꠣꠞꠥꠘꠞꠦ ꠇꠁꠅ, ꠔꠣꠞ ꠟꠣꠑꠤ ꠘꠤꠀ ꠚꠦꠞꠣꠃꠘꠞ ꠍꠣꠝꠘꠦ ꠚꠣꠟꠣꠁꠔ, ꠚꠣꠟꠣꠘꠤꠞ ꠟꠉꠦ ꠟꠉꠦꠃ ꠁꠐꠣ ꠢꠣꠚ ꠅꠁꠎꠤꠛ।” 10 ꠛꠣꠖꠦ ꠝꠥꠍꠣ ꠀꠞ ꠢꠣꠞꠥꠘ ꠚꠦꠞꠣꠃꠘꠞ ꠉꠦꠍꠦ ꠉꠦꠟꠣ, ꠉꠤꠀ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠇꠣꠝ ꠇꠞꠟꠣ। ꠢꠣꠞꠥꠘꠦ ꠚꠦꠞꠣꠃꠘ ꠀꠞ ꠔꠣꠞ ꠃꠎꠤꠞ-ꠘꠣꠎꠤꠞꠞ ꠍꠣꠝꠘꠦ ꠢꠃ ꠟꠣꠑꠤ ꠚꠣꠟꠣꠘꠤꠞ ꠟꠉꠦ ꠟꠉꠦꠃ ꠁꠐꠣ ꠢꠣꠚ ꠅꠁꠉꠦꠟ। 11 ꠅꠃ ꠚꠦꠞꠣꠃꠘꠦꠅ ꠔꠣꠞ ꠉꠥꠘꠤꠘ ꠀꠞ ꠎꠣꠖꠥꠉꠤꠞ ꠅꠇꠟꠞꠦ ꠀꠘꠣꠁꠟ, ꠔꠣꠞꠣꠅ ꠔꠣꠞꠣꠞ ꠎꠣꠖꠥ-ꠝꠘꠔ꠆ꠞ ꠖꠤꠀ ꠅꠃꠟꠣ ꠖꠦꠈꠣꠁꠟꠣ। 12 ꠔꠣꠞꠣ ꠢꠇꠟꠦꠃ ꠎꠣꠞꠎꠤꠞ ꠟꠣꠑꠤ ꠍꠣꠠꠟ, ꠀꠞ ꠄꠅꠔꠣ ꠢꠣꠚ ꠅꠁꠉꠦꠟ, ꠅꠁꠟꠦ ꠢꠣꠞꠥꠘꠞ ꠟꠣꠑꠤꠄ ꠔꠣꠞꠣꠞ ꠢꠇ꠆ꠇꠟ ꠟꠣꠑꠤꠞꠦ ꠉꠤꠟꠤꠟꠤꠟ। 13 ꠁꠔꠣ ꠖꠦꠈꠤꠀꠅ ꠚꠦꠞꠣꠃꠘꠞ ꠖꠤꠟ ꠙꠣꠡꠣꠘ ꠞꠁꠟ, ꠢꠦ ꠄꠞꠣꠞ ꠝꠣꠔꠦ ꠇꠣꠘ ꠖꠤꠟ ꠘꠣ, ꠎꠦꠟꠣ ꠝꠣꠛꠥꠖꠦ ꠀꠉꠦ ꠇꠁꠍꠟꠣ।

14 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠚꠦꠞꠣꠃꠘꠞ ꠖꠤꠟ ꠔ ꠙꠣꠡꠣꠘ, ꠢꠦ ꠝꠣꠘꠡꠞꠦ ꠍꠣꠠꠔꠦ ꠞꠣꠎꠤ ꠘꠣꠄ। 15 ꠔꠦ ꠔꠥꠝꠤ ꠛꠤꠀꠘꠤ ꠛꠣꠟꠣ ꠚꠦꠞꠣꠃꠘꠞ ꠉꠦꠍꠦ ꠎꠣꠁꠅ, ꠉꠦꠟꠦ ꠖꠦꠈꠛꠣꠄ ꠢꠦ ꠙꠣꠘꠤꠞ ꠉꠦꠍꠦ ꠎꠣꠁꠛ, ꠔꠥꠝꠤ ꠔꠣꠞ ꠟꠉꠦ ꠖꠦꠈꠣ ꠇꠞꠣꠞ ꠟꠣꠉꠤ ꠘꠤꠟ ꠘꠖꠞ ꠙꠣꠞꠅ ꠃꠛꠣꠁꠅ। ꠔꠥꠝꠣꠞ ꠎꠦ ꠟꠣꠑꠤ ꠢꠣꠚ ꠅꠁꠍꠤꠟ, ꠅꠃ ꠟꠣꠑꠤ ꠀꠔꠅ ꠇꠞꠤ ꠘꠤꠅ। 16 ꠘꠤꠀ ꠔꠣꠞꠦ ꠇꠁꠅ, ‘ꠝꠣꠛꠥꠖ, ꠎꠦꠁꠘ ꠁꠛꠞꠣꠘꠤ ꠅꠇꠟꠞ ꠀꠟ꠆ꠟꠣ, ꠔꠣꠁꠘ ꠘꠤꠎꠦ ꠀꠝꠣꠞꠦ ꠙꠣꠑꠣꠁꠍꠂꠘ ꠀꠙꠘꠣꠞꠦ ꠅꠈꠣꠘ ꠇꠁꠔꠣꠝ, ꠔꠥꠝꠤ ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠍꠣꠠꠤ ꠖꠦꠅ, ꠔꠣꠞꠣ ꠀꠝꠣꠞ ꠛꠘ꠆ꠖꠦꠉꠤ ꠇꠞꠣꠞ ꠟꠣꠉꠤ ꠝꠞꠥꠜꠥꠝꠤꠔ ꠢꠤꠎꠞꠔ ꠇꠞꠃꠇ, ꠔꠣ-ꠅ ꠅꠈꠘꠅ ꠔꠥꠝꠤ ꠢꠥꠘꠞꠣꠄ ꠘꠣ। 17 ꠄꠞꠟꠣꠉꠤ ꠅꠈꠘ ꠔꠥꠝꠤ ꠛꠥꠎꠛꠣꠄ, ꠀꠝꠤꠃ ꠝꠣꠛꠥꠖ।’ ꠅꠈꠣꠘ ꠇꠁꠀ ꠢꠣꠞꠤ ꠔꠥꠝꠤ ꠇꠁꠅ, ‘ꠖꠦꠈꠃꠇ꠆ꠇꠣ, ꠀꠝꠤ ꠘꠤꠎꠞ ꠀꠔꠞ ꠟꠣꠑꠤ ꠖꠤꠀ ꠅꠃ ꠘꠤꠟ ꠘꠖꠞ ꠙꠣꠘꠤꠔ ꠛꠣꠠꠤ ꠝꠣꠞꠝꠥ, ꠀꠞ ꠢꠇ꠆ꠇꠟ ꠙꠣꠘꠤ ꠟꠃ ꠅꠁꠎꠤꠛ। 18 ꠢꠇ꠆ꠇꠟ ꠝꠣꠍ ꠝꠞꠤꠎꠤꠛ ꠀꠞ ꠙꠌꠣ ꠉꠘ꠆ꠖ ꠛꠣꠞ ꠅꠁꠛ, ꠔꠦꠃ ꠝꠤꠡꠞꠤ ꠅꠇꠟꠦ ꠅꠃ ꠘꠤꠟ ꠘꠖꠞ ꠙꠣꠘꠤ ꠈꠣꠁꠔꠣ ꠙꠣꠞꠔꠣ ꠘꠣꠄ।’ ”

19 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠢꠣꠞꠥꠘꠞꠦ ꠅꠃ ꠇꠕꠣ ꠇꠅ, ꠔꠥꠝꠤ ꠘꠤꠎꠞ ꠟꠣꠑꠤ ꠟꠁꠀ ꠝꠤꠡꠞꠤ ꠅꠇꠟꠞ ꠢꠇ꠆ꠇꠟ ꠙꠣꠘꠤꠞ ꠃꠙꠞꠦ, ꠖꠦꠡꠞ ꠉꠣꠋ-ꠘꠣꠟꠣ, ꠈꠣꠟ-ꠛꠤꠟ, ꠀꠅꠞ-ꠛꠣꠅꠞ ꠌꠣꠁꠞꠅꠛꠣꠄ ꠔꠥꠝꠣꠞ ꠀꠔ ꠛꠣꠠꠣꠅ, ꠔꠦꠃ ꠁꠔꠣꠞ ꠢꠇ꠆ꠇꠟ ꠙꠣꠘꠤ ꠟꠃ ꠅꠁꠎꠤꠛ। ꠙꠣꠔ꠆ꠔꠞ ꠈꠥꠖꠤꠀ ꠛꠣꠘꠣꠁꠟ ꠛꠣ ꠟꠣꠇꠠꠤꠞ ꠙꠣꠔꠤꠟ-ꠇꠟꠡꠞ ꠝꠣꠎꠦ ꠕꠅꠀ ꠙꠣꠘꠤꠅ ꠟꠃ ꠅꠁꠎꠤꠛ।”

20 ꠅꠃ ꠝꠥꠍꠣ ꠀꠞ ꠢꠣꠞꠥꠘꠦ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠅꠃꠟꠣ ꠇꠞꠟꠣ, ꠔꠣꠁꠘ ꠟꠣꠑꠤ ꠃꠌꠣ ꠇꠞꠤ ꠚꠦꠞꠣꠃꠘ ꠀꠞ ꠔꠣꠞ ꠃꠎꠤꠞ-ꠘꠣꠎꠤꠞꠞ ꠍꠣꠝꠘꠦ ꠘꠤꠟ ꠘꠖꠞ ꠙꠣꠘꠤꠔ ꠛꠣꠠꠤ ꠝꠣꠞꠟꠣ, ꠔꠦꠃ ꠢꠇꠟ ꠙꠣꠘꠤ ꠟꠃ ꠅꠁꠉꠦꠟ। 21 ꠘꠤꠟ ꠘꠖꠞ ꠢꠇꠟ ꠝꠣꠍ ꠝꠞꠤꠉꠦꠟ, ꠢꠇꠟ ꠙꠣꠘꠤꠔ ꠙꠌꠣ ꠉꠘ꠆ꠖ ꠛꠣꠞ ꠅꠁꠟ, ꠝꠤꠡꠞꠤ ꠅꠇꠟꠦ ꠙꠣꠘꠤ ꠀꠞ ꠈꠣꠁꠔꠣ ꠙꠣꠞꠟꠣ ꠘꠣ, ꠝꠤꠡꠞ ꠖꠦꠡꠞ ꠢꠇꠟ ꠙꠣꠘꠤ ꠟꠃ ꠅꠁꠉꠦꠟ। 22 ꠝꠤꠡꠞꠤ ꠎꠣꠖꠥꠉꠤꠞ ꠅꠇꠟꠦꠅ ꠔꠣꠞꠣꠞ ꠎꠣꠖꠥ-ꠝꠘꠔ꠆ꠞ ꠍꠣꠠꠤꠀ ꠅꠃꠟꠣ ꠇꠞꠟ, ꠄꠔꠦ ꠚꠦꠞꠣꠃꠘꠞ ꠖꠤꠟ ꠙꠣꠡꠣꠘ ꠞꠁꠟ। ꠢꠦ ꠄꠞꠣꠞ ꠝꠣꠔꠅ ꠇꠣꠘ ꠖꠤꠟ ꠘꠣ, ꠎꠦꠟꠣ ꠝꠣꠛꠥꠖꠦ ꠀꠉꠦ ꠇꠁꠍꠟꠣ। 23 ꠛꠣꠖꠦ ꠚꠦꠞꠣꠃꠘꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠙꠤꠍ ꠖꠤꠀ ꠔꠣꠞ ꠞꠣꠎꠛꠣꠠꠤꠔ ꠉꠦꠟꠉꠤ, ꠁꠔꠣ ꠇꠥꠘ꠆ꠔꠣꠔꠃ ꠇꠣꠘ ꠖꠤꠟ ꠘꠣ। 24 ꠅꠁꠟꠦ ꠇꠥꠘꠥ ꠝꠤꠡꠞꠤꠄ ꠉꠣꠋꠉꠞ ꠙꠣꠘꠤ ꠈꠣꠁꠔꠦ ꠘꠣ ꠙꠣꠞꠣꠄ, ꠙꠣꠘꠤ ꠈꠣꠅꠀꠞ ꠟꠣꠉꠤ ꠉꠣꠋꠉꠞ ꠙꠣꠞꠞ ꠌꠣꠁꠞꠅꠛꠣꠄ ꠔꠣꠞꠣ ꠉꠣꠔ ꠈꠥꠖꠤꠟꠣ।

25 ꠘꠤꠟ ꠘꠖꠞ ꠙꠣꠘꠤꠔ ꠝꠣꠛꠥꠖꠞ ꠉꠎꠛ ꠘꠣꠎꠤꠟ ꠅꠀꠞ ꠛꠣꠖꠦ ꠡꠣꠔ ꠖꠤꠘ ꠉꠥꠎꠞꠤ ꠉꠦꠟ।