1 ꠅꠃ ꠡꠣꠔ ꠖꠤꠘ ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠚꠦꠞꠣꠃꠘꠞ ꠉꠦꠍꠦ ꠎꠣꠅ, ꠉꠤꠀ ꠔꠣꠞꠦ ꠇꠅ, ꠝꠣꠛꠥꠖꠦ ꠘꠤꠎꠦ ꠇꠁꠞꠣ, ꠀꠝꠣꠞ ꠈꠦꠎꠝꠔ ꠇꠞꠣꠞ ꠟꠣꠉꠤ ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠍꠣꠠꠤ ꠖꠦꠅ। 2 ꠔꠣꠞꠣꠞꠦ ꠘꠣ ꠍꠣꠠꠤꠀ ꠇꠥꠘꠥ ꠛꠣꠗꠣ ꠖꠤꠟꠦ, ꠀꠝꠤ ꠛꠦꠋ ꠖꠤꠀ ꠔꠥꠝꠣꠞ ꠀꠡ꠆ꠔꠣ ꠖꠦꠡꠅ ꠉꠎꠛ ꠓꠣꠟꠝꠥ। 3 ꠀꠡ꠆ꠔꠣ ꠘꠤꠟ ꠘꠖ ꠛꠦꠋꠉꠦ ꠜꠞꠤꠎꠤꠛꠣ, ꠀꠞ ꠁꠔꠣ ꠀꠁꠀ ꠔꠥꠝꠣꠞ ꠞꠣꠎꠛꠣꠠꠤꠔ, ꠢꠥꠔꠤꠛꠣꠞ ꠊꠞꠅ, ꠔꠥꠝꠣꠞ ꠛꠤꠍꠘꠣꠔ ꠃꠑꠤꠛꠣ। ꠀꠞ ꠔꠥꠝꠣꠞ ꠃꠎꠤꠞ-ꠘꠣꠎꠤꠞꠞ ꠊꠞꠅ, ꠔꠥꠝꠣꠞ ꠙ꠆ꠞꠎꠣ ꠅꠇꠟꠞ ꠊꠞꠅ, ꠔꠥꠝꠣꠞ ꠃꠘ꠆ꠖꠣꠟ ꠀꠞ ꠙꠤꠑꠣ ꠛꠣꠘꠣꠁꠛꠣꠞ ꠉꠣꠝꠟꠣꠔꠅ ꠀꠁꠀ ꠢꠣꠝꠣꠁꠛꠣ। 4 ꠔꠥꠝꠣꠞ, ꠀꠞ ꠔꠥꠝꠣꠞ ꠃꠎꠤꠞ-ꠘꠣꠎꠤꠞꠞ, ꠀꠞ ꠙ꠆ꠞꠎꠣ ꠅꠇꠟꠞ ꠉꠔꠞꠅ ꠛꠦꠋ ꠃꠑꠤꠛꠣ।”

5 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠢꠣꠞꠥꠘꠞꠦ ꠇꠅ, ꠔꠥꠝꠤ ꠘꠤꠟ ꠘꠖ ꠀꠞ ꠈꠣꠟ-ꠛꠤꠟꠞ ꠃꠙꠞꠦ ꠢꠃ ꠟꠣꠑꠤ ꠀꠟꠣ ꠀꠔ ꠛꠣꠠꠣꠁꠀ ꠀꠡ꠆ꠔꠣ ꠝꠤꠡꠞꠅ ꠛꠦꠋ ꠀꠘꠣꠅ।” 6 ꠅꠃ ꠢꠣꠞꠥꠘꠦ ꠝꠤꠡꠞꠞ ꠢꠇꠟ ꠙꠣꠘꠤꠞ ꠃꠙꠞꠦ ꠔꠣꠘ ꠀꠔ ꠛꠣꠠꠣꠁꠟꠣ, ꠔꠦꠃ ꠛꠦꠋꠉꠣꠁꠘ꠆ꠔꠦ ꠀꠁꠀ ꠝꠤꠡꠞ ꠖꠦꠡ ꠜꠞꠤꠀ ꠎꠣꠝ ꠅꠁꠉꠦꠟꠣ, ꠇꠥꠘꠥ ꠎꠣꠉꠣ ꠈꠣꠟꠤ ꠞꠁꠟ ꠘꠣ। 7 ꠅꠁꠟꠦ ꠎꠣꠖꠥꠉꠤꠞ ꠅꠇꠟꠦꠅ ꠔꠣꠞꠣꠞ ꠎꠣꠖꠥ-ꠝꠘꠔ꠆ꠞ ꠖꠤꠀ ꠝꠤꠡꠞꠅ ꠅꠃꠟꠣ ꠛꠦꠋ ꠀꠘꠟ।

8 ꠛꠣꠖꠦ ꠚꠦꠞꠣꠃꠘꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠀꠘꠣꠁꠀ ꠇꠁꠟꠣ, “ꠝꠣꠛꠥꠖꠞ ꠉꠦꠍꠦ ꠀꠞꠎ ꠇꠞꠅ, ꠔꠣꠁꠘ ꠀꠝꠣꠞ ꠉꠦꠍ ꠕꠣꠇꠤ ꠀꠞ ꠀꠝꠣꠞ ꠙ꠆ꠞꠎꠣ ꠅꠇꠟꠞ ꠉꠦꠍ ꠕꠣꠇꠤ ꠁ ꠛꠦꠋ ꠅꠇꠟ ꠢꠞꠣꠁꠀ ꠘꠦꠃꠇ꠆ꠇꠣ, ꠔꠣꠁꠟꠦ ꠀꠝꠤ ꠝꠣꠘꠡꠞꠦ ꠍꠣꠠꠤ ꠖꠤꠝꠥ, ꠎꠣꠔꠦ ꠔꠣꠞꠣ ꠉꠤꠀ ꠝꠣꠛꠥꠖꠞ ꠘꠣꠝꠦ ꠇꠥꠞꠛꠣꠘꠤ ꠇꠞꠔ ꠙꠣꠞꠦ।” 9 ꠅꠃꠉꠤ ꠝꠥꠍꠣꠄ ꠚꠦꠞꠣꠃꠘꠞꠦ ꠇꠁꠟꠣ, “ꠀꠙꠘꠦ ꠀꠝꠣꠞꠦ ꠑꠤꠇ ꠇꠞꠤ ꠇꠃꠇ꠆ꠇꠣ, ꠀꠝꠤ ꠇꠥꠘ ꠡꠝꠄꠇꠥꠞ ꠟꠣꠉꠤ ꠝꠤꠘꠔꠤ ꠇꠞꠔꠣꠝ, ꠇꠥꠘ ꠡꠝꠄ ꠀꠙꠘꠣꠞ ꠊꠞ, ꠀꠙꠘꠣꠞ ꠃꠎꠤꠞ-ꠘꠣꠎꠤꠞ ꠀꠞ ꠙ꠆ꠞꠎꠣ ꠅꠇꠟꠞ ꠊꠞ ꠕꠣꠇꠤ ꠛꠦꠋ ꠅꠇꠟ ꠢꠞꠤꠀ ꠎꠣꠁꠔꠣꠉꠤ, ꠉꠤꠀ ꠈꠣꠟꠤ ꠉꠣꠋꠉꠅ ꠞꠁꠔꠣ?”

10 ꠔꠣꠁꠘ ꠇꠁꠟꠣ “ꠇꠣꠁꠟꠇꠥꠞ ꠟꠣꠉꠤ।” ꠅꠃ ꠝꠥꠍꠣꠄ ꠇꠁꠟꠣ, “ꠀꠙꠘꠣꠞ ꠎꠛꠣꠘ ꠝꠔꠃ ꠅꠃꠇ, ꠎꠣꠔꠦ ꠀꠙꠘꠦ ꠛꠥꠎꠔꠣ ꠙꠣꠞꠂꠘ, ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠝꠣꠘꠤ ꠀꠞ ꠇꠦꠃ ꠘꠣꠁ। 11 ꠛꠦꠋꠉꠣꠁꠘ꠆ꠔꠦ ꠀꠙꠘꠣꠞ ꠉꠦꠍ ꠕꠣꠇꠤ, ꠀꠙꠘꠣꠞ ꠊꠞ-ꠛꠣꠠꠤ ꠕꠣꠇꠤ, ꠀꠙꠘꠣꠞ ꠃꠎꠤꠞ-ꠘꠣꠎꠤꠞ ꠀꠞ ꠙ꠆ꠞꠎꠣ ꠅꠇꠟꠞ ꠊꠞ ꠕꠣꠇꠤ ꠢꠞꠤꠀ ꠉꠤꠀ ꠈꠣꠟꠤ ꠘꠤꠟ ꠘꠖꠅ ꠞꠁꠛꠣ।”

12 ꠝꠥꠍꠣ ꠀꠞ ꠢꠣꠞꠥꠘ ꠚꠦꠞꠣꠃꠘꠞ ꠉꠦꠍ ꠕꠣꠇꠤ ꠛꠣꠞꠦ ꠉꠦꠟꠣ, ꠉꠤꠀ ꠝꠥꠍꠣꠄ ꠝꠣꠛꠥꠖꠞ ꠉꠦꠍꠦ ꠚꠞꠤꠀꠖ ꠇꠞꠟꠣ, ꠚꠦꠞꠣꠃꠘꠞ ꠃꠙꠞ ꠕꠣꠇꠤ ꠛꠦꠋꠉꠞ ꠉꠎꠛ ꠢꠞꠣꠘꠤꠞ ꠟꠣꠉꠤ। 13 ꠝꠣꠛꠥꠖꠦ ꠝꠥꠍꠣꠞ ꠀꠞꠎꠤ ꠇꠛꠥꠟ ꠇꠞꠣꠄ, ꠔꠣꠞꠣꠞ ꠛꠣꠠꠤ-ꠊꠞ, ꠃꠑꠣꠘ ꠀꠞ ꠛꠘ꠆ꠖꠞ ꠢꠇꠟ ꠛꠦꠋ ꠝꠞꠤꠉꠦꠟ। 14 ꠀꠞ ꠝꠣꠘꠡꠦ ꠁꠔꠣꠞꠦ ꠎꠣꠉꠣꠄ ꠎꠣꠉꠣꠄ ꠖꠟꠣ ꠇꠞꠟꠦ, ꠙꠌꠤꠀ ꠖꠦꠡꠅ ꠉꠘ꠆ꠖ ꠛꠣꠞ ꠅꠁꠟ। 15 ꠅꠁꠟꠦ ꠚꠦꠞꠣꠃꠘꠦ ꠎꠦꠛꠟꠣ ꠖꠦꠈꠟ, ꠉꠎꠛ ꠔ ꠢꠞꠤꠉꠦꠍꠦ, ꠅꠃ ꠢꠦ ꠔꠣꠞ ꠖꠤꠟ ꠙꠣꠡꠣꠘ ꠇꠞꠤꠟ꠆ꠟ। ꠄꠞꠣꠞ ꠝꠣꠔꠅ ꠀꠞ ꠇꠣꠘ ꠖꠤꠟ ꠘꠣ, ꠎꠦꠟꠣ ꠝꠣꠛꠥꠖꠦ ꠀꠉꠦ ꠇꠁꠍꠟꠣ।

16 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠢꠣꠞꠥꠘꠞꠦ ꠇꠅ, ꠔꠥꠝꠤ ꠔꠥꠝꠣꠞ ꠟꠣꠑꠤ ꠛꠣꠠꠣꠁꠀ ꠝꠣꠐꠤꠞ ꠗꠥꠟꠤꠔ ꠛꠣꠠꠤ ꠝꠣꠞꠅ, ꠔꠦꠃ ꠁ ꠗꠥꠁꠟ ꠝꠡꠣ ꠅꠁꠀ ꠀꠡ꠆ꠔꠣ ꠝꠤꠡꠞ ꠖꠦꠡ ꠜꠞꠤꠎꠤꠛ।”

17 ꠔꠣꠞꠣ ꠅꠃꠟꠣ ꠇꠞꠟꠣ, ꠢꠣꠞꠥꠘꠦ ꠔꠣꠘ ꠟꠣꠑꠤ ꠀꠟꠣ ꠀꠔ ꠛꠣꠠꠣꠁꠀ ꠝꠣꠐꠤꠞ ꠗꠥꠟꠤꠔ ꠛꠣꠠꠤ ꠝꠣꠞꠟꠣ, ꠔꠦꠃ ꠝꠣꠐꠤꠞ ꠢꠇ꠆ꠇꠟ ꠗꠥꠁꠟ ꠝꠡꠣ ꠅꠁꠉꠦꠟ। ꠅꠃ ꠝꠡꠣꠄ ꠝꠣꠘꠥꠡ, ꠎꠣꠘꠥꠀꠞ ꠀꠞ ꠝꠤꠡꠞꠞ ꠢꠇ꠆ꠇꠟꠛꠣꠄ ꠜꠞꠤꠉꠦꠟ। 18 ꠀꠞ ꠎꠣꠖꠥꠉꠤꠞ ꠅꠇꠟꠦꠅ ꠔꠣꠞꠣꠞ ꠎꠣꠖꠥ-ꠝꠘꠔ꠆ꠞ ꠖꠤꠀ ꠅꠃꠟꠣ ꠝꠡꠣ ꠛꠣꠘꠣꠁꠔ ꠌꠣꠁꠟ, ꠅꠁꠟꠦ ꠙꠣꠞꠟ ꠘꠣ। ꠝꠣꠘꠥꠡ ꠀꠞ ꠎꠣꠘꠥꠀꠞꠞ ꠝꠣꠎꠦ ꠝꠡꠣ ꠞꠁꠟ। 19 ꠔꠦꠃ ꠎꠣꠖꠥꠉꠤꠞ ꠅꠇꠟꠦ ꠚꠦꠞꠣꠃꠘꠞꠦ ꠇꠁꠟꠣ, “ꠁꠔꠣ ꠔ ꠀꠟ꠆ꠟꠣꠞ ꠇꠥꠖꠞꠔ।” ꠔꠣ-ꠅ ꠚꠦꠞꠣꠃꠘꠞ ꠖꠤꠟ ꠙꠣꠡꠣꠘ ꠞꠁꠟ, ꠢꠦ ꠄꠞꠣꠞ ꠝꠣꠔꠦ ꠇꠣꠘ ꠖꠤꠟ ꠘꠣ, ꠎꠦꠟꠣ ꠝꠣꠛꠥꠖꠦ ꠀꠉꠦ ꠇꠁꠍꠟꠣ।

20 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠚꠎꠞꠦ ꠃꠑꠤꠀ ꠚꠦꠞꠣꠃꠘꠞ ꠉꠦꠍꠦ ꠀꠎꠤꠞ ꠅꠅ, ꠉꠦꠟꠦ ꠖꠦꠈꠛꠣꠄ ꠢꠦ ꠙꠣꠘꠤꠞ ꠉꠦꠍꠦ ꠀꠁꠛ। ꠔꠥꠝꠤ ꠔꠣꠞꠦ ꠅꠃꠟꠣ ꠇꠁꠅ, ꠝꠣꠛꠥꠖꠦ ꠘꠤꠎꠦ ꠇꠁꠞꠣ, ꠀꠝꠣꠞ ꠈꠦꠎꠝꠔ ꠇꠞꠣꠞ ꠟꠣꠉꠤ ꠔꠥꠝꠤ ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠍꠣꠠꠤ ꠖꠦꠅ। 21 ꠎꠥꠖꠤ ꠘꠣ ꠍꠣꠠꠅ ꠔꠣꠁꠟꠦ ꠀꠝꠤ ꠔꠥꠝꠣꠞ, ꠔꠥꠝꠣꠞ ꠃꠎꠤꠞ-ꠘꠣꠎꠤꠞ, ꠔꠥꠝꠣꠞ ꠙ꠆ꠞꠎꠣ ꠅꠇꠟꠞ ꠃꠙꠞꠦ, ꠀꠞ ꠔꠥꠝꠣꠞ ꠊꠞꠣꠁꠘ꠆ꠔꠞ ꠝꠣꠎꠦ ꠇꠣꠝꠠꠣꠅꠞꠣ ꠒꠣꠡ-ꠝꠣꠍꠤꠞ ꠙꠣꠟ ꠙꠣꠑꠣꠁꠝꠥ, ꠁꠔꠣ ꠙꠣꠟꠦ ꠙꠣꠟꠦ ꠀꠁꠀ ꠝꠤꠡꠞꠤ ꠅꠇꠟꠞ ꠊꠞꠅ ꠀꠞ ꠔꠣꠞꠣꠞ ꠛꠡꠔ-ꠜꠤꠐꠣ ꠡꠢ ꠢꠇꠟ ꠎꠣꠉꠣꠔ ꠎꠣꠝ ꠅꠁꠎꠤꠛꠣ। 22 ꠅꠁꠟꠦ ꠀꠝꠤ ꠀꠝꠣꠞ ꠛꠘ꠆ꠖꠣ ꠅꠇꠟꠞ ꠛꠡꠔ ꠈꠣꠘꠣ ꠉꠥꠡꠘ ꠄꠟꠣꠇꠣꠞꠦ ꠁꠔꠣ ꠕꠣꠇꠤ ꠛꠣꠌꠣꠁꠝꠥ, ꠁꠘꠅ ꠒꠣꠡ-ꠝꠣꠍꠤꠞ ꠙꠣꠟ ꠀꠁꠔꠣ ꠘꠣꠄ। ꠔꠦꠃ ꠔꠥꠝꠤ ꠛꠥꠎꠔꠣꠄ ꠙꠣꠞꠛꠣꠄ, ꠀꠝꠤ ꠀꠟ꠆ꠟꠣ ꠁ ꠖꠦꠡꠅ ꠀꠍꠤ। 23 ꠀꠝꠤ ꠔ ꠀꠝꠣꠞ ꠛꠘ꠆ꠖꠣ ꠀꠞ ꠔꠥꠝꠣꠞ ꠙ꠆ꠞꠎꠣꠞ ꠝꠣꠎꠦ ꠔꠚꠣꠔ-ꠙꠣꠞ꠆ꠕꠇ꠆ꠇ ꠇꠞꠝꠥ, ꠇꠣꠁꠟ ꠁ ꠘꠝꠥꠘꠣ ꠖꠦꠈꠛꠣꠄ।” 24 ꠀꠞ ꠝꠣꠛꠥꠖꠦ ꠅꠃꠟꠣ ꠇꠞꠟꠣ, ꠚꠦꠞꠣꠃꠘ ꠀꠞ ꠔꠣꠞ ꠃꠎꠤꠞ-ꠘꠣꠎꠤꠞꠞ ꠊꠞꠅ ꠇꠣꠝꠠꠣꠅꠞꠣ ꠒꠣꠡ-ꠝꠣꠍꠤꠞ ꠙꠣꠟ ꠀꠁꠟ, ꠀꠡ꠆ꠔꠣ ꠝꠤꠡꠞ ꠖꠦꠡꠞ ꠢꠇ꠆ꠇꠟꠛꠣꠄ ꠒꠣꠡ-ꠝꠣꠍꠤꠞ ꠟꠣꠉꠤ ꠡꠞ꠆ꠛꠘꠣꠡ ꠅꠁꠉꠦꠟ।

25 ꠔꠦꠃ ꠚꠦꠞꠣꠃꠘꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠒꠣꠇꠣꠁꠀ ꠇꠁꠟꠣ, “ꠔꠥꠝꠞꠣ ꠎꠣꠅ, ꠖꠦꠡꠞ ꠜꠤꠔꠞꠦ ꠔꠥꠝꠞꠣꠞ ꠀꠟ꠆ꠟꠣꠞ ꠘꠣꠝꠦ ꠇꠥꠞꠛꠣꠘꠤ ꠇꠞꠅꠉꠤ।” 26 ꠝꠥꠍꠣꠄ ꠇꠁꠟꠣ, “ꠁꠟꠣ ꠇꠞꠣ ꠑꠤꠇ ꠘꠣꠄ, ꠇꠣꠞꠘ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠝꠤꠡꠞꠤ ꠅꠇꠟꠞ ꠊꠤꠘ꠆ꠘꠣ ꠇꠞꠣ ꠇꠥꠞꠛꠣꠘꠤ ꠇꠞꠔꠦ ꠅꠁꠛ। ꠀꠞ ꠖꠦꠈꠃꠇ꠆ꠇꠣ, ꠝꠤꠡꠞꠤ ꠅꠇꠟꠞ ꠍꠣꠝꠘꠦ ꠔꠣꠞꠣꠞ ꠊꠤꠘ꠆ꠘꠣ ꠇꠞꠣ ꠇꠥꠞꠛꠣꠘꠤ ꠇꠞꠟꠦ ꠔꠣꠞꠣ ꠔ ꠀꠝꠞꠣꠞꠦ ꠙꠣꠔ꠆ꠔꠞꠖꠤ ꠁꠐꠣꠁꠀ ꠝꠣꠞꠤꠟꠤꠛꠣ। 27 ꠔꠦ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦꠟꠣ ꠢꠥꠇꠥꠝ ꠇꠞꠛꠣ, ꠀꠝꠞꠣ ꠝꠞꠥꠜꠥꠝꠤꠞ ꠛꠣꠄ ꠔꠤꠘ ꠖꠤꠘꠞ ꠙꠕ ꠢꠞꠤꠀ ꠉꠤꠀ, ꠔꠣꠘ ꠘꠣꠝꠦ ꠅꠃꠟꠣ ꠇꠥꠞꠛꠣꠘꠤ ꠇꠞꠝꠥ।”

28 ꠚꠦꠞꠣꠃꠘꠦ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠍꠣꠠꠤ ꠖꠤꠀꠞ, ꠔꠥꠝꠞꠣ ꠝꠞꠥꠜꠥꠝꠤꠔ ꠉꠤꠀ ꠔꠥꠝꠞꠣꠞ ꠀꠟ꠆ꠟꠣꠞ ꠇꠥꠞꠛꠣꠘꠤ ꠇꠞꠅ। ꠅꠁꠟꠦ ꠛꠦꠡꠤ ꠖꠥꠞꠁ ꠎꠣꠁꠅ ꠘꠣ, ꠔꠥꠝꠞꠣ ꠀꠝꠣꠞ ꠟꠣꠉꠤꠅ ꠝꠤꠘꠔ ꠇꠞꠤꠅ।” 29 ꠅꠃ ꠝꠥꠍꠣꠄ ꠇꠁꠟꠣ, “ꠖꠦꠈꠃꠇ꠆ꠇꠣ, ꠀꠝꠤ ꠀꠙꠘꠣꠞ ꠉꠦꠍ ꠕꠣꠇꠤ ꠢꠞꠤꠀ ꠉꠤꠀ ꠝꠣꠛꠥꠖꠞ ꠉꠦꠍꠦ ꠝꠤꠘꠔꠤ ꠇꠞꠝꠥ, ꠔꠦꠃ ꠇꠣꠁꠟ ꠀꠙꠘꠣꠞ ꠉꠦꠍ ꠕꠣꠇꠤ, ꠀꠙꠘꠣꠞ ꠃꠎꠤꠞ-ꠘꠣꠎꠤꠞ ꠀꠞ ꠀꠙꠘꠣꠞ ꠙ꠆ꠞꠎꠣ ꠅꠇꠟꠞ ꠉꠦꠍ ꠕꠣꠇꠤ ꠒꠣꠡ-ꠝꠣꠍꠤꠞ ꠙꠣꠟ ꠢꠞꠤꠎꠤꠛꠣ। ꠅꠁꠟꠦ ꠝꠣꠘꠡꠦ ꠝꠣꠛꠥꠖꠞ ꠇꠥꠞꠛꠣꠘꠤ ꠇꠞꠣꠔ ꠎꠣꠁꠔꠦ ꠀꠙꠘꠦ ꠀꠞ ꠇꠥꠘꠥ ꠜꠣꠅꠔꠣꠛꠣꠎꠤ ꠇꠞꠂꠘ ꠘꠣ ꠎꠣꠘꠥ।”

30 ꠛꠣꠖꠦ ꠝꠥꠍꠣꠄ ꠚꠦꠞꠣꠃꠘꠞ ꠉꠦꠍ ꠕꠣꠇꠤ ꠉꠤꠀ ꠝꠣꠛꠥꠖꠞ ꠉꠦꠍꠦ ꠝꠤꠘꠔꠤ ꠇꠞꠟꠣ। 31 ꠀꠞ ꠝꠣꠛꠥꠖꠦ ꠝꠥꠍꠣꠞ ꠀꠞꠎꠤ ꠝꠣꠚꠤꠇ ꠇꠣꠝ ꠇꠞꠟꠣ। ꠚꠦꠞꠣꠃꠘ, ꠔꠣꠞ ꠃꠎꠤꠞ-ꠘꠣꠎꠤꠞ ꠀꠞ ꠔꠣꠞ ꠙ꠆ꠞꠎꠣ ꠅꠇꠟꠞ ꠉꠦꠍ ꠕꠣꠇꠤ ꠢꠇ꠆ꠇꠟ ꠒꠣꠡ-ꠝꠣꠍꠤ ꠢꠞꠤꠉꠦꠟꠣ, ꠄꠉꠥꠅ ꠞꠁꠟ ꠘꠣ। 32 ꠅꠁꠟꠦ ꠢꠤꠞꠛꠣꠞ ꠚꠦꠞꠣꠃꠘꠦ ꠔꠣꠞ ꠖꠤꠟ ꠙꠣꠡꠣꠘ ꠇꠞꠤꠟ꠆ꠟ, ꠝꠣꠘꠡꠞꠦ ꠍꠣꠠꠟ ꠘꠣ।